JOSHUA

1 Nọ Mosis odibo Jihova o whu no, Jihova ọ tẹ ta kẹ Joshua*+ ọmọzae Nọn, ọgbodibo+ Mosis nọ: 2 “Mosis odibo mẹ o whu no.+ Enẹna ruẹrẹ oma kpahe re whọ fa ethẹ Jọdan na vrẹ, whẹ avọ ahwo nana kpobi, re wha ruọ ẹkwotọ nọ mẹ be te kẹ ae na, ahwo Izrẹl na.+ 3 Mẹ te rehọ oria kpobi nọ wha fi owọ rai họ kẹ owhai, nwane wọhọ epanọ mẹ ya eyaa kẹ Mosis.+ 4 Ẹkwotọ rai ọ te kẹre no obọ udhude na rite Lebanọn je rite ethẹ ologbo na, koyehọ Yufretis—ẹkwotọ ahwo Hit na kpobi+—je rite obọ Abade Ologbo* na nọ o rrọ ofẹ ukiediwo-ọre.+ 5 Ohwo ọvo ọ te sai fi owhẹ kparobọ họ evaọ edẹ uzuazọ ra kpobi.+ Nwane wọhọ epanọ mẹ jọ kugbe Mosis na, ere mẹ te jọ kugbe owhẹ re.+ Mẹ te nyasiọ owhẹ ba hayo gbabọkẹ owhẹ hẹ.+ 6 Wo udu je kru oma ga,+ keme whẹ họ ọnọ o ti su ahwo nana nyae reuku ẹkwotọ nọ me duwu iyei kẹ esẹ-esẹ rai nọ mẹ te rọ kẹ ae na.+

7 “Thakpi wo udu je kru oma ga ziezi, jẹ romatotọ koko oware kpobi nọ o rrọ Uzi nọ Mosis odibo mẹ o jie kẹ owhẹ na. Who reghe noi kpohọ obọze hayo ẹkpẹlobọ họ,+ re whọ ruẹsi ru eware avọ areghẹ evaọ oria kpobi nọ whọ nya.+ 8 Obe Uzi nana u re no unu ra ha,+ yọ o gbahọ nọ whọ rẹ rọ unu kpotọ sei* te aso te uvo, re whọ sae romatotọ koko eware kpobi nọ a kere fihọ iẹe;+ ẹsiẹe eware e te riẹ nya kẹ owhẹ, who ve ti je ru eware avọ areghẹ.+ 9 Kọ mẹ gbẹ re ta kẹ owhẹ? Wo udu je kru oma ga. Jọ ozọ u mu owhẹ hẹ hayo who guegue he, keme Jihova Ọghẹnẹ ra ọ rrọ kugbe owhẹ evaọ oria kpobi nọ whọ be nya.”+

10 Kẹsena Joshua ọ tẹ ta kẹ enọ i wuzou ahwo na nọ: 11 “Wha nyaruọ evuẹ na re wha ta ẹme nana kẹ ahwo na, ‘Wha ruẹrẹ emu kpahe, keme edẹ esa e tẹ vrẹ no wha te fa Jọdan na vrẹ nyae rehọ ẹkwotọ nọ Jihova Ọghẹnẹ rai ọ be kẹ owhai re wha wo na.’”+

12 Joshua ọ tẹ ta kẹ ahwo orua Rubẹn, ahwo orua Gad gbe abọvo orua Manasẹ nọ: 13 “Wha kareghẹhọ ẹme nọ Mosis odibo Jihova ọ ta kẹ owhai, inọ:+ ‘Jihova Ọghẹnẹ rai ọ be kẹ owhai omofọwẹ,* ọ tẹ jẹ kẹ owhai ẹkwotọ nana no. 14 Eyae rai, emọ rai, gbe erao rai e rẹ jọ ẹkwotọ nọ Mosis ọ kẹ owhai evaọ abọ obonẹ* Jọdan na,+ rekọ whai egbaẹmo egaga na kpobi+ wha re dhe uhie ẹmo họ fa vrẹ karo kẹ inievo rai.+ O gba owhai họ nọ wha re fiobọhọ kẹ ae 15 bẹsenọ Jihova ọ rẹ kẹ inievo rai omofọwẹ* no, nwane wọhọ epanọ ọ kẹ owhai no na, gbe bẹsenọ a rẹ rehọ ẹkwotọ nọ Jihova Ọghẹnẹ rai ọ be te kẹ ae na no. Kẹsena wha ve zihe ziọ ẹkwotọ nọ a kẹ owhai nọ wha rria na, wha vẹ rehọ iẹe, ẹkwotọ nọ Mosis odibo Jihova ọ kẹ owhai evaọ ofẹ ovatha-ọre Jọdan na.’”+

16 A tẹ kẹ Joshua uyo nọ: “Ma ti ru oware kpobi nọ whọ ta kẹ omai, yọ ma te nya kpohọ oria kpobi nọ who vi omai nya.+ 17 Nwane wọhọ epanọ ma gaviezọ kẹ oware kpobi nọ Mosis ọ ta na, ere ma te gaviezọ kẹ owhẹ re. Jọ Jihova Ọghẹnẹ ra ọ thakpe jọ kugbe owhẹ nwane wọhọ epanọ ọ jọ kugbe Mosis na.+ 18 Ohwo kpobi nọ ọ be wọso ẹme ra je bi veghe uzou kẹ ujaje kpobi nọ who jie kẹe a re kpei no.+ Thakpi wo udu je kru oma ga.”+

2 Kẹsena Joshua ọmọzae Nọn ọ tẹ lẹlẹ vi ezae ivẹ no Shitim+ vrẹ wọhọ ekiotọ. Ọ ta kẹ ae nọ: “Wha nya re wha kiẹ ẹkwotọ na riwi, maero kọ Jẹriko.” Fikiere a tẹ nyavrẹ, a te te uwou ogberẹ jọ nọ a re se Rehab,+ a tẹ jọ etẹe. 2 Ahwo a tẹ vuẹ ovie Jẹriko nọ: “Rri! Ezae Izrẹl jọ e ruọ ẹwho na owọwọ nana re a kiẹ ẹkwotọ na riwi.” 3 Fikiere ovie Jẹriko o te vi uwou se Rehab nọ: “Rehọ ezae nọ e nyaze nọ e rrọ uwou ra na lahwe, keme a nyaze te kiẹ ẹkwotọ na soso riwi.”

4 Rekọ aye na o si ezae ivẹ na no. Ọ tẹ ta nọ: “Uzẹme, ezae na e nyabru omẹ ze rekọ mẹ riẹ obonọ a no ze he. 5 Yọ okenọ a je ru re a kare ẹthẹ okpẹwho na nọ oke u siarohọ no ezae na e rọ nyavrẹ. Mẹ riẹ obonọ ezae na i kpohọ họ, rekọ wha te le ai obọnana, wha ti le ai mu.” 6 (Rekọ oke yena yọ ọ rehọ ezae na kpobọ ehru uwou na no je si ai no họ otọ ẹbe eflase* nọ a kokohọ ehru uwou na.) 7 Fikiere ezae na i te le ai vrẹ rri ofẹ ethẹ Jọdan na nọ o rrọ kpakpafua.+ A tẹ kare ẹthẹ okpẹwho na nọ ezae nọ i bi le ae na e ruọ otafe no.

8 Taure ezae na i te ti kiẹzẹ re a wezẹ, Rehab ọ tẹ nyabru ae evaọ obọ ehru uwou na. 9 Ọ tẹ ta kẹ ezae na nọ: “Mẹ riẹ nọ Jihova ọ te kẹ owhai ẹkwotọ na,+ yọ ozọ rai u bi mu omai.+ Udu u no ahwo kpobi nọ a be rria ẹkwotọ na awọ no fiki rai,+ 10 keme ma yo epanọ Jihova o ro ru ame Abade Ọwawae na kpọ yamu evaọ aro rai okenọ wha no Ijipti,+ gbe oware nọ wha ru Saehọn+ gbe Ọg,+ ivie ivẹ ahwo Amọ nọ wha raha muotọ evaọ abọdekọ* Jọdan. 11 Nọ ma yo kpahe iẹe, udu u no omai awọ,* udu o gbẹ rrọ ohwo ọvo awọ họ* fiki rai, keme Jihova Ọghẹnẹ rai yọ Ọghẹnẹ evaọ obọ idhiwu na gbe evaọ otọakpọ na.+ 12 Whaọ enẹna, ivie, wha rehọ odẹ Jihova duwu iyei kẹ omẹ inọ, fikinọ me dhesẹ uyoyou nọ o rẹ hiẹ hẹ kẹ owhai na, wha ti dhesẹ uyoyou nọ o rẹ hiẹ hẹ kẹ ahwo uwou ọsẹ mẹ re; yọ wha rẹ kẹ omẹ oka jọ hrọ nọ u re ro mu omẹ ẹro.* 13 Wha re siwi uzuazọ ọsẹ gbe oni mẹ hrọ, te inievo-emezae gbe inievo-emetẹ mẹ, gbe ahwo rai kpobi, wha re siwi omai* no uwhu hrọ.”+

14 Ezae na e tẹ ta kẹe nọ: “Mai ma re whu viukpọ owhai!* Wha gbẹ ta oware nọ ma nyaze ti ru na via ha, ma ti dhesẹ uyoyou nọ o rẹ hiẹ hẹ kẹ owhẹ je ru ẹme nọ ma ta kẹ owhẹ na gba okenọ Jihova ọ te kẹ omai ẹkwotọ na.” 15 Kẹsena ọ tẹ jọ unwido rehọ ufi si ai kpotọ, keme uwou riẹ o jọ abọjọ ugbẹhẹ okpẹwho na. Ẹme na họ, ehru ugbẹhẹ na ọ jẹ rria.+ 16 Kẹsena ọ tẹ ta kẹ ae nọ: “Wha kpobọ ubrotọ igbehru na re wha dhere obei edẹ esa, re enọ i bi le owhai na a gbẹ ruẹ owhai hi. Nọ enọ i bi le owhai na i te zihe ze no, wha sai kpo obonọ wha no ze.”

17 Ezae na e tẹ ta kẹe nọ: “Oware nọ o te gba omai họ ru epanọ whọ lẹliẹ omai duwu iyei na họ,+ 18 otẹrọnọ evaọ okenọ ma te ruọ ẹkwotọ na, who thuru ufi olulu ọwawae nana fihọ unwido nọ who ro si omai kpotọ na. Who re koko ọsẹ ra, oni ra, inievo ra, gbe ahwo uwou ọsẹ ra kpobi fihọ uwou na kugbe owhẹ.+ 19 Otẹrọnọ ohwo jọ o no uwou ra na ruọ otafe, azẹ riẹ ọ te jọ uzou obọriẹ, ma te reabe he. Rekọ otẹrọnọ obọ u te* ohwo jọ nọ ọ rrọ uwou na kugbe owhẹ, azẹ riẹ ọ te jọ uzou mai. 20 Rekọ otẹrọnọ whọ vuẹ ahwo oware nọ ma nyaze ti ru na,+ o gbẹ te gba omai họ nọ ma re ru epanọ whọ lẹliẹ omai duwu iyei na ha.” 21 Ọ tẹ ta nọ: “Jọ o jọ epanọ wha ta na.”

Nọ ọ ta ere no, ọ tẹ kẹ ae uvẹ nyavrẹ. Kẹsena, o te thuru ufi ọwawae na fihọ unwido na. 22 A tẹ nyavrẹ kpobọ ubrotọ igbehru na, a tẹ jọ obei edẹ esa bẹsenọ enọ i je le ai na a ro zihe. Enọ i je le ai na a jọ edhere kpobi gwọlọ ae rekọ a duku ai hi. 23 Ezae ivẹ na i te nwrotọ no obọ ubrotọ igbehru na ze, a tẹ fa ethẹ na vrẹ, a tẹ nyabru Joshua ọmọzae Nọn. A te gbiku eware kpobi nọ e via kẹ ae rọ kẹe. 24 Kẹsena a tẹ ta kẹ Joshua nọ: “Jihova ọ rehọ ẹkwotọ na soso họ omai obọ no.+ Uzẹme riẹ họ, udu u no ahwo kpobi nọ a be rria ẹkwotọ na awọ no fiki mai.”+

3 Kẹsena Joshua ọ tẹ kpama evaọ irioke frifri, tei te ahwo Izrẹl* kpobi a te no Shitim,+ a tẹ ziọ obọ ethẹ Jọdan. A jọ etẹe asohẹrioke taure a tẹ te fa ethẹ na ruọ abọdekọ.

2 Nọ edẹ esa e vrẹ no, enọ i wuzou ahwo na+ a tẹ nya evuẹ na soso duwu, 3 a tẹ ta kẹ ahwo na nọ: “Nọ wha tẹ nwane ruẹ etehe ọvọ Jihova Ọghẹnẹ rai nọ izerẹ nọ e rrọ ahwo Livae na a wọ,+ wha rẹ wọ no oria rai, wha ve lele iei. 4 Rekọ wha re thabọ noi te ikiubiti idu ivẹ (2,000);* wha rẹ kẹle iẹe vrẹ ere he, re wha sae riẹ edhere nọ wha rẹ nya, keme wha re nya edhere nana ẹdẹvo ho.”

5 Joshua ọ tẹ ta kẹ ahwo na nọ: “Wha ru omarai fo,+ keme Jihova ọ te jọ udevie rai ru eware igbunu odẹnotha.”+

6 Kẹsena Joshua ọ tẹ ta kẹ izerẹ na nọ: “Wha wọ etehe+ ọvọ na re wha nyaruọ aro ahwo na.” Fikiere a tẹ wọ etehe ọvọ na, a tẹ nya kpobọ aro ahwo na.

7 Kẹsena Jihova ọ tẹ ta kẹ Joshua nọ: “Nẹnẹ na me ti mu owhẹ họ ẹkpare kpehru evaọ ibiaro ahwo Izrẹl kpobi,+ re a riẹ nọ mẹ te jọ kugbe owhẹ+ nwane wọhọ epanọ mẹ jọ kugbe Mosis na.+ 8 Enẹ whọ rẹ ta kẹ izerẹ nọ e wọ etehe ọvọ na: ‘Nọ wha tẹ nyate akotọ ame ethẹ Jọdan na, wha ve dikihẹ oria ovo evaọ Jọdan na.’”+

9 Joshua ọ tẹ ta kẹ ahwo Izrẹl na nọ: “Wha nyaze re wha gaviezọ kẹ eme nọ Jihova Ọghẹnẹ rai ọ ta.” 10 Joshua ọ tẹ ta nọ: “Ẹkwoma onana wha te rọ riẹ nọ Ọghẹnẹ nọ ọ rrọ uzuazọ ọ rrọ udevie rai,+ yọ o ti le ahwo Kenan, ahwo Hit, ahwo Hiv, ahwo Pẹriz, ahwo Gẹgash, ahwo Amọ gbe ahwo Jebus no kẹ owhai, oware ovo o te whaha iẹe he.+ 11 Rri! Etehe ọvọ Olori otọakpọ na soso ọ karo kẹ owhai bi kpobọ Jọdan na. 12 Fikiere enẹna, wha jọ erua Izrẹl na salọ ezae ikpegbivẹ, omọvo evaọ orua kpobi.+ 13 Nọ evawọ izerẹ nọ e wọ etehe ọvọ Jihova nọ ọ rrọ Olori otọakpọ na soso na e tẹ nwani te* ame Jọdan na, ame Jọdan nọ o bi su no obọ ehri ethẹ na ze na o ti serihọ, o ve ti dikihẹ oria ovo wọhọ ugbẹhẹ.”+

14 Fikiere, nọ ahwo na a wọ no iwou-udhu rai ze no, taure a tẹ te nwane fa ethẹ Jọdan na ruọ abọdekọ, izerẹ nọ e wọ etehe+ ọvọ na e tẹ nya kpobọ aro ahwo na. 15 Nọ izerẹ nọ e wọ etehe ọvọ na e nwani te ethẹ Jọdan na je dhe awọ rai họ ame evaọ akotọ ethẹ na (whaọ ame ethẹ Jọdan ọ rẹ vọ ziọ obọ okpa+ evaọ oke ivuẹvu na soso), 16 ame nọ o bi su no obọ ehri ethẹ na ze na o te mudhe. O te dikihẹ gegerege wọhọ ugbẹhẹ evaọ ugbo obọ Adamu, okpẹwho nọ o kẹle Zeratan, ame nọ o je su kpobọ Abade Araba* na, koyehọ Abade Uwhei na* ọ tẹ kpọ no. Nọ ame na ọ daji no, ahwo na a tẹ fa vrẹ kpohọ abọdekọ ethẹ na rẹriẹ ovao ku Jẹriko. 17 Nọ izerẹ nọ e wọ etehe ọvọ Jihova na a gbe dikihẹ otọ oyaya+ evaọ udevie Jọdan na, ahwo Izrẹl na kpobi a tẹ rọ otọ oyaya fa vrẹ+ bẹsenọ orẹwho na soso o rọ fa Jọdan na vrẹ no.

4 Nọ orẹwho na soso o nwane fa Jọdan na vrẹ no, Jihova ọ tẹ ta kẹ Joshua nọ: 2 “Jọ udevie ahwo na rehọ ezae ikpegbivẹ, ọzae ọvo evaọ orua kpobi,+ 3 re whọ ta kẹ ae nọ: ‘Wha wọ itho ikpegbivẹ no udevie ethẹ Jọdan na ze, evaọ oria nọ izerẹ na i dikihẹ na,+ re wha wọ ae lele oma, wha ve fi ae họ oria nọ wha te jọ aso nana.’”+

4 Joshua o te se ezae ikpegbivẹ nọ o ro mu evaọ udevie ahwo Izrẹl na, ọzae ọvo evaọ orua kpobi, 5 Joshua ọ tẹ ta kẹ ae nọ: “Wha nyaruọ aro etehe ọvọ Jihova Ọghẹnẹ rai na evaọ udevie ethẹ Jọdan na, re whai omomọvo ọ wọ utho fihọ ẹkoko riẹ, wọhọ epaọ unu erua Izrẹl, 6 re o jọ oware oka evaọ udevie rai. Nọ emọ* rai e tẹ nọ owhai ẹdẹfa nọ, ‘Fikieme itho nana e rọ rrọ etenẹ?’+ 7 wha rẹ ta kẹ ae nọ: ‘Fikinọ ame ethẹ Jọdan ọ daji jẹ hẹriẹ evaọ aro etehe+ ọvọ Jihova. Nọ a wọ etehe ọvọ na fa ethẹ Jọdan na vrẹ no, ame ethẹ na ọ tẹ daji. Itho nana e te jọ oware ekareghẹhọ kẹ ahwo Izrẹl ribri.’”+

8 Fikiere ahwo Izrẹl na a te ru epanọ Joshua ọ ta kẹ ae na dẹẹ. A jọ udevie ethẹ Jọdan na wọ itho ikpegbivẹ nwane wọhọ epanọ Jihova ọ ta kẹ Joshua, re e jọ ẹrẹrẹe kugbe unu erua ahwo Izrẹl. A wọ rai kpohọ oria nọ a te jọ evaọ aso yena, a te fi ai họ etẹe.

9 Joshua ọ tẹ jẹ ruẹrẹ itho ikpegbivẹ họ udevie ethẹ Jọdan na, evaọ oria nọ awọ izerẹ nọ e wọ etehe ọvọ na e jọ,+ yọ itho na e gbẹ rrọ etẹe rite inẹnẹ.

10 Izerẹ nọ e wọ etehe ọvọ na i dikihẹ udevie ethẹ Jọdan na bẹsenọ a ro ru oware kpobi nọ Jihova ọ ta kẹ Joshua nọ ọ vuẹ ahwo na no, a te je ru lele oware kpobi nọ Mosis ọ ta kẹ Joshua. Evaọ oke nana kpobi yọ ahwo na a bi siawọ fa ruọ abọdekọ. 11 Nọ ahwo na kpobi a nwane fa vrẹ re no, izerẹ nọ e wọ etehe ọvọ Jihova na e tẹ fa vrẹ re evaọ iraro ahwo na.+ 12 Ahwo orua Rubẹn, orua Gad, gbe abọvo orua Manasẹ a dhe uhie ẹmo họ+ fa vrẹ evaọ aro ahwo Izrẹl nọ a kiọkọ nwane wọhọ epanọ Mosis ọ ta kẹ ae.+ 13 Enwenọ egbaẹmo idu udhuvẹ (40,000) nọ e ruẹrẹ oma kpahe kẹ ẹmo e fa ethẹ na vrẹ ruọ udhude opraprara Jẹriko evaọ aro Jihova.

14 Evaọ ẹdẹ yena, Jihova ọ kpare Joshua kpehru evaọ aro ahwo Izrẹl kpobi,+ yọ a jẹ kẹe adhẹẹ* gaga evaọ edẹ uzuazọ riẹ kpobi, nwane wọhọ epanọ a jẹ kẹ Mosis adhẹẹ gaga na.+

15 Kẹsena Jihova ọ tẹ ta kẹ Joshua nọ: 16 “Ta kẹ izerẹ nọ e wọ etehe+ Isẹri na nọ a no ethẹ Jọdan na ziọ obọ okpa.” 17 Fikiere Joshua ọ tẹ ta kẹ izerẹ na nọ: “Wha no Jọdan na ziọ obọ okpa.” 18 Nọ izerẹ nọ e wọ etehe+ ọvọ Jihova na a no udevie ethẹ Jọdan ze jẹ nwane rọ evawọ rai te okpa, ame ethẹ Jọdan na ọ tẹ wariẹ muhọ esu, ọ tẹ vọ ziọ obọ okpa+ wọhọ epanọ ọ jọ vẹre.

19 Ahwo na a no Jọdan na ze evaọ ẹdẹ avọ ikpe ọrọ amara ọsosuọ, a tẹ fa evuẹ họ Gilgal+ nọ o rrọ uwhru ovatha-ọre Jẹriko.

20 Joshua ọ tẹ ruẹrẹ itho ikpegbivẹ nọ a wọ no ethẹ Jọdan ze na họ ehru ohwohwo evaọ Gilgal.+ 21 Kẹsena ọ tẹ ta kẹ ahwo Izrẹl nọ: “Nọ emọ rai e tẹ nọ esẹ rai ẹdẹfa nọ, ‘Eme itho nana i dikihẹ kẹ?’+ 22 wha rẹ ta kẹ emọ rai hrọ inọ: ‘Ahwo Izrẹl a fa ethẹ Jọdan vrẹ evaọ otọ oyaya+ 23 okenọ Jihova Ọghẹnẹ rai o ru ame ethẹ Jọdan kpọ yamu evaọ aro rai bẹsenọ a rọ fae vrẹ, nwane wọhọ epanọ Jihova Ọghẹnẹ rai o ru Abade Ọwawae na kpọ yamu kẹ omai bẹsenọ ma rọ fae vrẹ.+ 24 O ru onana re ahwo kpobi nọ a rrọ otọakpọ na a riẹ epanọ obọ Jihova u wo ogaga te,+ re wha jẹ ruẹse dhozọ Jihova Ọghẹnẹ rai ẹsikpobi.’”

5 Nọ ivie ahwo Amọ kpobi+ nọ e jọ ofẹ ukiediwo-ọre* Jọdan gbe ivie ahwo Kenan kpobi+ nọ ewho rai e kẹle abade na a nwani yo nọ Jihova o ru ame Ethẹ Jọdan kpọ yamu evaọ aro ahwo Izrẹl bẹsenọ a rọ fa ruọ abọdekọ riẹ, udu u te no ai awọ,*+ a gbe wo udu vievie he* fiki ahwo Izrẹl.+

2 Evaọ oke yena, Jihova ọ tẹ ta kẹ Joshua nọ: “Ru emegha itho re whọ wariẹ yawo+ ezae Izrẹl, orọ avọ isiava.” 3 Fikiere Joshua o te ru emegha itho, ọ tẹ yawo ezae Izrẹl evaọ Gibiat-haralọt.*+ 4 Oware nọ o lẹliẹ Joshua yawo ae ona: Ezae kpobi nọ i no Ijipti ze, koyehọ ezae kpobi nọ e rẹ sai kpohọ ẹmo,* a whu no evaọ etoke onya rai evaọ udhude na nọ a no Ijipti no.+ 5 A yawo ezae kpobi nọ i no Ijipti ze evaọ oke jọ nọ o vrẹ, rekọ ezae kpobi nọ a yẹ evaọ etoke onya rai evaọ udhude na a yawo rai hi. 6 Ahwo Izrẹl a jọ udhude na nya ikpe udhuvẹ+ bẹsenọ orẹwho na soso u ro whu muotọ, koyehọ, ezae nọ e rẹ sai kpohọ ẹmo nọ i no Ijipti ze nọ i yoẹme kẹ urru Jihova ha.+ Jihova o te duwu iyei nọ ọ te kẹ ae uvẹ ruẹ ẹkwotọ+ nọ Jihova o duwu iyei kẹ esẹ-esẹ rai nọ ọ te kẹ omai na ha,+ ẹkwotọ nọ ame-ivie gbe ọnyọ i bi jo su.+ 7 Fikiere ọ tẹ rehọ emezae rai nwene ai.+ Ahwo nana họ enọ Joshua ọ yawo; ọ yawo rai keme a yawo rai evaọ etoke onya rai na ha.

8 Nọ a yawo orẹwho na soso no, a tẹ daji oria rai evaọ evuẹ na bẹsenọ oyawo na u ro kpo.

9 Kẹsena Jihova ọ tẹ ta kẹ Joshua nọ: “Me ghelie ekela Ijipti no owhai oma no nẹnẹ na.” Fikiere a bi se oria yena Gilgal*+ rite ẹdẹ inẹnẹ na.

10 Ahwo Izrẹl a tẹ gbẹ jọ Gilgal, a tẹ jọ udhude opraprara Jẹriko ru ehaa Ọnyavrẹ na evaọ ẹdẹ avọ ikpegbene amara na,+ evaọ owọwọ. 11 A te mu eware nọ i no ẹkwotọ na ze họ ẹre evaọ okiokiọ riẹ nọ a ru ehaa Ọnyavrẹ na no. A re ebrẹdi nọ ọ kare ẹvi+ gbe eka nọ a sasa* evaọ ẹdẹ ọvo nana. 12 Emana e tẹ seba ekie ze evaọ ẹdẹ nọ o lele i rie nọ a re eware jọ nọ i no ẹkwotọ na ze no; emana e gbẹ jariẹ kẹ ahwo Izrẹl he,+ rekọ a te mu eware nọ i no ẹkwotọ Kenan ze họ ẹre evaọ ukpe yena.+

13 Ẹdẹ jọ nọ Joshua ọ jọ oria jọ kẹle Jẹriko, ọ tẹ kpare ovao, ọ tẹ ruẹ ọzae jọ+ nọ o dikihẹ aro riẹ avọ ọgbọdọ nọ o kru họ obọ.+ Joshua ọ tẹ nyabru ei, ọ tẹ nọe nọ: “Kọ abọ mai whọ rrọ manikọ abọ ewegrẹ mai?” 14 Ọzae na o te yo kẹe nọ: “Ijo, rekọ mẹ nyaze wọhọ osu* ogbaẹmo Jihova.”+ Fikiere Joshua o te kigwẹ vovao tuotọ je kiẹzẹ vovao tuotọ, ọ tẹ ta kẹe nọ: “Eme olori mẹ o wo nọ ọ gwọlọ ta kẹ odibo riẹ?” 15 Osu ogbaẹmo Jihova na ọ tẹ kpahe kẹ Joshua nọ: “Ba eviẹ ra no awọ ra, keme oria nọ who dikihẹ na yọ oria ọrẹri.” Joshua ọ tẹ nwani ru ere.+

6 Whaọ ahwo Jẹriko a wuhu inuethẹ okpẹwho na di kpoi fiki ahwo Izrẹl; ohwo ọvo o je noi hayo ruọ ẹe eva ha.+

2 Kẹsena Jihova ọ tẹ ta kẹ Joshua nọ: “Rri, mẹ rehọ Jẹriko avọ ovie riẹ gbe egbaẹmo egaga riẹ họ obọ ra no.+ 3 Whai egbaẹmo na kpobi wha rẹ nya okpẹwho na wariẹ họ, wha rẹ nyae wariẹ họ ẹsiẹvo. Ere wha re ru evaọ edẹ ezeza. 4 Jọ izerẹ ihrẹ e tọlọ izei egbo ihrẹ re a jọ aro etehe ọvọ na. Rekọ evaọ ẹdẹ avọ ihrẹ wha vẹ nya okpẹwho na wariẹ họ isiahrẹ, izerẹ na i ve fu izei* na.+ 5 Nọ a te fu izei* egbo na, koyehọ, nọ wha tẹ nwani yo edo izei na nọ a fu,* egbaẹmo na kpobi a ve bo gaga wọhọ ẹsenọ a rrọ ẹmo. Igbẹhẹ okpẹwho na i ve ti kie fihọ otọ,+ egbaẹmo na e vẹ nya ovavo ruọ okpẹwho na.”

6 Fikiere Joshua ọmọzae Nọn o te se izerẹ na kokohọ, ọ tẹ ta kẹ ae nọ: “Wha wọ etehe ọvọ na, izerẹ ihrẹ e vẹ tọlọ izei egbo ihrẹ, a vẹ jọ aro etehe ọvọ Jihova.”+ 7 Kẹsena ọ tẹ ta kẹ ahwo na nọ: “Wha wọ re wha nya okpẹwho na wariẹ họ, yọ egbaẹmo na+ e rẹ kobaro kẹ etehe ọvọ Jihova.” 8 Nwane wọhọ epanọ Joshua ọ ta kẹ ahwo na, izerẹ ihrẹ nọ i kru izei egbo ihrẹ evaọ aro Jihova na e tẹ nya kpobọ aro, a te fu izei* na, yọ etehe ọvọ Jihova o bi lele ai. 9 Egbaẹmo nọ e wha ekwakwa ẹmo na e tẹ nya kpobọ aro izerẹ nọ i je fu izei* na, yọ egbaẹmo nọ e rrọ obemu i bi lele etehe ọvọ na nọ a bi fu izei* na ababọ eriosehọ na.

10 Evaọ oke yena, yọ Joshua o jie uzi kẹ ahwo na no inọ: “Wha bo ho, yọ wha ru re a yo edo uvou rai hi. Ẹme ọvuọvo o re no unu rai ze he bọo ẹdẹ nọ mẹ te ta kẹ owhai nọ, ‘Wha bo!’ Wha ve te bo.” 11 O te ru nọ a rọ rehọ etehe ọvọ Jihova nya okpẹwho na wariẹ họ, a nya riẹ wariẹ họ ẹsiẹvo, a te zihe kpohọ evuẹ na, a tẹ jọ etẹe asohẹrioke.

12 Okiokiọ riẹ, Joshua ọ tẹ kpama evaọ irioke, izerẹ na e tẹ wọ etehe+ ọvọ Jihova, 13 izerẹ ihrẹ nọ i kru izei egbo ihrẹ e tẹ rrọ obaro etehe ọvọ Jihova, yọ a bi fu izei* na ababọ eriosehọ. Egbaẹmo nọ e wha ekwakwa ẹmo na e jọ obaro rai, yọ egbaẹmo nọ e rrọ obemu i bi lele etehe ọvọ Jihova nọ izerẹ na i bi fu izei* na ababọ eriosehọ na. 14 A tẹ nya okpẹwho na wariẹ họ evaọ ẹdẹ avọ ivẹ na ẹsiẹvo, kẹsena a te zihe kpohọ evuẹ na. Ere a ru edẹ ezeza.+

15 Evaọ ẹdẹ avọ ihrẹ ahwo na a tẹ riọ kpama, nọ oke o nwane ke no, a tẹ rọ oghẹrẹ ovona nya okpẹwho na wariẹ họ isiahrẹ. Ẹdẹ yena ọvo a nya okpẹwho na wariẹ họ isiahrẹ.+ 16 Evaọ orọ avọ isiahrẹ na, izerẹ na i te fu izei* na, Joshua ọ tẹ ta kẹ ahwo na nọ: “Wha bo,+ keme Jihova ọ kẹ owhai okpẹwho na no! 17 Wha rẹ raha okpẹwho na gbe oware kpobi nọ o rrọ eva riẹ muotọ;+ o rrọ rọkẹ Jihova. Rehab+ ogberẹ na ọvo wha rẹ seba uzuazọ, tei te ahwo kpobi nọ a rrọ kugbei evaọ uwou na, keme o si ekiotọ nọ ma vi nya na no.+ 18 Rekọ wha kẹnoma kẹ oware nọ a ta nọ a rẹ raha muotọ,+ re oware nọ a ta nọ a rẹ raha muotọ u gbe si owhai urru re wha rehọ iẹe he,+ re wha siọ okpẹtu* ba ẹwha ziọ evuẹ Izrẹl je ru ei fihọ oware nọ a rẹ raha no.+ 19 Rekọ isiliva avọ igoru gbe eware nọ a rehọ ekọpa gbe ayọno ru na kpobi yọ eware nọ e rrọ ọrẹri kẹ Jihova.+ Wha re fi ae họ oria ekwakwa-aghae uwou Jihova.”+

20 Kẹsena ahwo na a te bo okenọ a fu izei* na.+ Nọ ahwo na a nwani yo edo izei* na nọ a fu, je bo gaga wọhọ ahwo nọ a rrọ ẹmo, igbẹhẹ okpẹwho na e tẹ fia fihọ otọ.+ Kẹsena a tẹ nya ovavo ruọ okpẹwho na, a tẹ raha iẹe no. 21 A rehọ ọgbọdọ kpe oware kpobi nọ o rrọ okpẹwho na muotọ, te ọzae te aye, te ọmaha te ọkpako, te iruẹ, igodẹ, gbe eketekete.+

22 Joshua ọ tẹ ta kẹ ezae ivẹ nọ a vi nyae kiẹ ẹkwotọ na riwi na nọ: “Wha nya kpobọ uwou ogberẹ na re wha rehọ aye na avọ ahwo riẹ kpobi lahwe, nwane wọhọ epanọ wha duwu iyei kẹe.”+ 23 Emoha nọ e nyae kiẹ otọ na riwi na e tẹ ruọ eva uwou riẹ, a tẹ rehọ Rehab avọ ọsẹ riẹ, oni riẹ, inievo riẹ, gbe ahwo riẹ kpobi lahwe; ahwo uviuwou riẹ kpobi a rehọ lahwe,+ a tẹ rehọ ae omakọkọ ziọ oria jọ evaọ otafe evuẹ Izrẹl.

24 Kẹsena a tẹ rọ erae mahe okpẹwho na gbe oware kpobi nọ o riẹe eva. Rekọ a tẹ rehọ isiliva avọ igoru gbe ekwakwa nọ a rehọ ekọpa gbe ayọno ru ziọ oria ekwakwa-aghae uwou Jihova.+ 25 Rehab ogberẹ na avọ ahwo uwou ọsẹ riẹ gbe ahwo kpobi nọ a rrọ ahwo Rehab ọvo Joshua ọ seba uzuazọ;+ yọ ọ be rria kugbe ahwo Izrẹl rite ẹdẹ inẹnẹ na,+ keme o si ekiotọ nọ Joshua o vi nyae kiẹ otọ Jẹriko riwi na no.+

26 Evaọ oke yena Joshua o te duwu iyei nana:* “Uye u no obọ Jihova ze te ọzae kpobi nọ ọ gwọlọ wariẹ bọ okpẹwho Jẹriko nana. Ọmọ ọsosuọ riẹ o re whu nọ ọ te wọ otọhotọ riẹ họ, ubreyẹ riẹ o re whu nọ ọ te whẹ ethẹ riẹ họ.”+

27 Jihova ọ jọ kugbe Joshua,+ yọ odẹ riẹ u do ruọ otọakpọ na soso.+

7 Rekọ ahwo Izrẹl a yoẹme kẹ Ọghẹnẹ hẹ evaọ eware nọ ọ ta nọ a rẹ raha kufiẹ na, keme Ekan+ ọmọzae Kamae, ọmọzae Zabdae, ọmọzae Zira nọ ọ rrọ ohwo orua Juda, ọ tọlọ eware jọ nọ a ta nọ a rẹ raha kufiẹ.+ Fikiere Jihova o te mu ofu gaga kẹ emọ Izrẹl.+

2 Kẹsena Joshua o te vi ahwo no Jẹriko kpohọ Ai,+ ẹwho nọ ọ kẹle Bẹt-evẹn evaọ ofẹ ovatha-ọre Bẹtẹl,+ ọ ta kẹ ae nọ: “Wha nyae kiẹ otọ na riwi.” Ezae na e tẹ nyae kiẹ Ai riwi. 3 Nọ a zihe bru Joshua ze a tẹ vuẹe nọ: “U du gwọlọ nọ egbaẹmo na kpobi e rẹ nya ha. Egbaẹmo idu ivẹ (2,000) hayo idu esa (3,000) ọvo e rẹ sai fi Ai kparobọ. Who du vi ezae na kpobi kpohọ ẹmo na re oma o rrọ ae he, keme ahwo nọ a be rria ẹwho na a tulo ho.”

4 Fikiere egbaẹmo nọ i bu te oware wọhọ idu esa (3,000) i te kpohọ ẹmo na, rekọ nọ ahwo Ai a wọ ze, ahwo Izrẹl a tẹ dhẹ.+ 5 Ahwo Ai a kpe ezae ọgbagbezeza Izrẹl, a le rai no otafe unuẹthẹ okpẹwho na rite ugbo obọ Shebarim,* yọ a je kpe ai fihọ otọ evaọ ukuwhrẹrẹ na. Fikiere udu nọ o jọ ahwo na awọ* o tẹ ghra no je su vrẹ wọhọ ame.

6 Joshua ọ tẹ bẹre iwu riẹ je kigwẹ vovao tuotọ evaọ aro etehe ọvọ Jihova rite owọwọ, tei te ekpako Izrẹl, yọ a be whẹ ovu fihọ uzou rai. 7 Joshua ọ tẹ ta nọ: “O Jihova Olori nọ Ọ Mai Kpehru na, fikieme whọ jẹ rehọ ahwo nana no ugbo obọ abọdekọ Jọdan ze re whọ rehọ omai kẹ ahwo Amọ inọ a kpe no? Dodokọ ma daji abọ obei* Jọdan! 8 Ivie, O Jihova, kọ eme mẹ rẹ ta enẹna nọ orọnọ ahwo Izrẹl a dhẹ fiki ewegrẹ rai na?* 9 Nọ ahwo Kenan gbe ahwo kpobi nọ a be rria ẹkwotọ na a te yoi, a ve ti ko omai họ je voro odẹ mai no otọakpọ na no. Kọ eme who ti ru kpahe odẹ ulogbo ra evaọ oke yena?”+

10 Jihova o te yo kẹ Joshua nọ: “Kpama! Fikieme who ro kie vovao tuotọ? 11 Izrẹl ọ raha uzi no. A raha uzi ọvọ mẹ+ nọ me jie kẹ ae nọ a koko. A tọlọ eware jọ nọ a rẹ raha kufiẹ,+ a tho+ rai jẹ lẹlẹ fi ae họ udevie eware rai.+ 12 Fikiere, ahwo Izrẹl a te sai dikihẹ họre ewegrẹ rai hi. A ti kuomarẹriẹ a ve ti muhọ ẹdhẹ fiki ewegrẹ rai keme a zihe ruọ oware nọ a rẹ raha kufiẹ no. Mẹ gbẹ te jọ kugbe owhai hi, ajokpanọ wha rẹ raha oware nọ a rẹ raha kufiẹ na no udevie rai no.+ 13 Kpama re who ru ahwo na fo!+ Ta kẹ ae nọ, ‘Wha ru omarai fo rọ ruẹrẹ oma kpahe kẹ odẹnotha, keme enẹ Jihova Ọghẹnẹ Izrẹl ọ ta: “Oware nọ a ta nọ a raha kufiẹ o rrọ udevie rai, O Izrẹl. Wha te sai dikihẹ họre ewegrẹ rai hi bẹsenọ wha re si oware nọ a rẹ raha kufiẹ na no udevie rai. 14 Whai kpobi wha rẹ nyaze evaọ ohiohiẹ, no orua te orua, orua nọ Jihova ọ te salọ+ o vẹ nya lahwe, no unuwou te unuwou, unuwou nọ Jihova ọ te salọ o vẹ nya lahwe, no ekru te ekru, ekru nọ Jihova ọ te salọ o vẹ nya lahwe, no ọzae te ọzae. 15 Yọ a te rọ erae mahe ohwo kpobi nọ a jọ obọ riẹ ruẹ oware nọ a rẹ raha kufiẹ na,+ tei te eware nọ o wo kpobi, keme ọ raha ọvọ+ Jihova no, gbe fikinọ o ru oware omovuọ evaọ Izrẹl.”’”

16 Joshua ọ tẹ kpama evaọ irioke okiokiọ riẹ, o te ru ahwo Izrẹl kpobi nya lahwe no orua te orua, a tẹ salọ orua Juda. 17 Ọ tẹ ta nọ inuwou nọ e rrọ orua Juda e nya lahwe, a tẹ salọ unuwou Zira,+ kẹsena ọ tẹ ta nọ ahwo unuwou Zira a nya lahwe, no ọzae te ọzae, a tẹ salọ Zabdae. 18 Ukuhọ riẹ ọ tẹ ta nọ ekru Zabdae ọ nya lahwe, no ọzae te ọzae, a tẹ salọ Ekan ọmọzae Kamae, ọmọzae Zabdae, ọmọzae Zira nọ ọ rrọ ohwo orua Juda.+ 19 Joshua ọ tẹ ta kẹ Ekan nọ: “Ọmọzae mẹ, ivie, kẹ Jihova Ọghẹnẹ Izrẹl orro re whọ feva kẹe. Ivie, ta oware nọ who ru kẹ omẹ. Whọ ko ẹe dhere omẹ hẹ.”

20 Ekan ọ tẹ ta kẹ Joshua nọ: “Uzẹme riẹ họ, mẹ họ ọnọ ọ raha uzi Jihova Ọghẹnẹ Izrẹl, yọ oware nọ me ru ona. 21 Nọ mẹ jọ udevie egbo-ẹmo na ruẹ ewu owowoma Shaena+ jọ gbe isiliva nọ e gbẹdẹ te shẹkẹl* egba ivẹ (200) gbe ukulu igoru nọ o gbẹdẹ te shẹkẹl udhuvẹ-gbikpe, i te si omẹ urru, mẹ tẹ tọlọ ae. Me si rai no họ otọ evaọ uwou-udhu mẹ, avọ igho na nọ e rrọ otọ riẹ.”

22 Joshua ọ tẹ nwani vi enyukọ, a tẹ dhẹ kpobọ uwou-udhu na, a tẹ ruẹ ewu na nọ o si no họ uwou-udhu riẹ avọ igho na nọ e rrọ otọ riẹ. 23 A tẹ tọlọ eware na no uwou-udhu na ze, a tẹ rehọ ae bru Joshua gbe ahwo Izrẹl kpobi ze, a te fi ai họ otọ evaọ aro Jihova. 24 Joshua avọ ahwo Izrẹl kpobi nọ a rrọ kugbei a tẹ rehọ Ekan+ ọmọzae Zira, te isiliva na, ewu owowoma na, gbe ukulu igoru na,+ kugbe emezae riẹ, emetẹ riẹ, eruẹ riẹ, eketekete riẹ, uthuru erao riẹ, uwou-udhu riẹ, gbe eware kpobi nọ o wo ziọ Ukiekpotọ* Ekọ.+ 25 Joshua ọ tẹ ta nọ: “Fikieme who ro si okpẹtu* se omai?+ Jihova o ti si okpẹtu se owhẹ nẹnẹ na.” Ahwo Izrẹl kpobi a tẹ rọ itho fi ei,+ kẹsena a tẹ rehọ erae mahe ae.+ Enẹ a rọ rehọ itho fi aikpobi kpe. 26 A tẹ kwa itho ruru iei, yọ itho na e gbẹ rrọ etẹe rite ẹdẹ inẹnẹ na. Ofu Jihova o te hrẹ kpotọ.+ Oyejabọ nọ odẹ etẹe na o rọ rrọ Ukiekpotọ Ekọ* rite ẹdẹ inẹnẹ na.

8 Jihova ọ tẹ ta kẹ Joshua nọ: “Jọ ozọ u mu owhẹ hẹ, who guegue gbe he.+ Rehọ egbaẹmo na kpobi lele oma re wha nyae họre Ai. Rri, mẹ rehọ ovie Ai, ahwo riẹ, okpẹwho riẹ, gbe ẹkwotọ riẹ họ obọ ra no.+ 2 Ru Ai avọ ovie riẹ nwane wọhọ epanọ who ru Jẹriko avọ ovie riẹ na,+ rekọ wha rẹ sae kwa eware rai jẹ rehọ erao rai kẹ omarai. Jọ ahwo jọ a dhere obemu okpẹwho na.”

3 Fikiere Joshua avọ egbaẹmo na a tẹ wọ ẹmo kpohọ Ai. Joshua ọ salọ egbaẹmo egaga idu ọgba (30,000), o te vi ae vrẹ evaọ aso. 4 O te jie uzi nana kẹ ae: “Rri, wha re dhere obemu okpẹwho na. Wha re thabọ no okpẹwho na gaga ha, yọ whai kpobi wha rẹ ruẹrẹ oma kpahe. 5 Mẹ avọ ahwo kpobi nọ a rrọ kugbe omẹ ma te nya kẹle okpẹwho na, nọ a tẹ wọ bru omai ze wọhọ epaọ ọsosuọ,+ ma te dhẹ kẹ ae. 6 Nọ a te bi le omai, ma ti ru ae dhẹ no okpẹwho na, keme a te ta nọ, ‘A be dhẹ wọhọ epanọ a dhẹ oke ẹdẹ.’+ Ma vẹ te dhẹ siọ ae ba. 7 Kẹsena wha vẹ kparoma no oria nọ wha dhere na ze re wha vẹruọ okpẹwho na; Jihova Ọghẹnẹ rai ọ te rehọ iẹe kẹ owhai. 8 Wha tẹ nwane rehọ okpẹwho na no, wha ve tu erae họ iẹe.+ Wha re ru epanọ Jihova ọ ta. Rri, mẹ vuẹ owhai oware nọ wha re ru no.”

9 Joshua o te vi ae vrẹ, a tẹ wọ onya kpohọ oria nọ a ti dhere na; a te dhere oria jọ evaọ udevie Bẹtẹl avọ Ai, evaọ ofẹ ukiediwo-ọre Ai, Joshua ọ tẹ jọ kugbe ahwo na aso yena.

10 Nọ Joshua ọ kpama evaọ irioke frifri je koko egbaẹmo na họ no, tei te ekpako Izrẹl a te su ai kpohọ Ai. 11 Egbaẹmo nọ e jọ kugbei kpobi+ e tẹ nya kpobọ aro okpẹwho na. A tẹ fa evuẹ họ ofẹ ẹkpẹlobọ ovatha-ọre Ai, yọ ukiekpotọ o rrọ udevie rai avọ Ai. 12 Evaọ oke nana yọ ọ salọ ezae nọ i bu te oware wọhọ idu isoi (5,000) no jẹ vuẹ ae nọ a dhere oria jọ+ nọ o rrọ udevie Bẹtẹl+ avọ Ai, evaọ ofẹ ukiediwo-ọre okpẹwho na. 13 Egbaẹmo nọ e mai bu na e tẹ fa evuẹ fihọ ofẹ ẹkpẹlobọ ovatha-ọre okpẹwho na,+ egbaẹmo nọ i dhere na e tẹ jọ ofẹ ukiediwo-ọre okpẹwho na,+ Joshua ọ tẹ nya kpohọ udevie ukiekpotọ* na evaọ aso yena.

14 Nọ ovie Ai ọ nwane ruẹ onana, tei te ezae okpẹwho na a tẹ nwane wọ lahwe evaọ irioke frifri re a lele Izrẹl fi ẹmo evaọ oria jọ nọ o rẹriẹ ovao ku ukiekpotọ udhude na. Rekọ ọ riẹ hẹ inọ egbaẹmo jọ i dhere obemu okpẹwho na be hẹrẹ iẹe. 15 Nọ ahwo Ai a wọ bru ai ze, Joshua avọ ahwo Izrẹl kpobi a tẹ rọ edhere nọ ọ rrọ ofẹ udhude na muhọ ẹdhẹ.+ 16 Kẹsena a te se ahwo okpẹwho na kpobi re a le ai; nọ a bi le Joshua na, yọ a be rọ ere bẹbẹ ai no okpẹwho na. 17 Uvumọ ọzae o kiọkọ Ai avọ Bẹtẹl he nọ o le ahwo Izrẹl vrẹ hẹ. A dhẹ no okpẹwho na avọ epanọ ethẹ riẹ i ro kpefihọ gbaladha, a te le ahwo Izrẹl vrẹ.

18 Jihova ọ tẹ ta kẹ Joshua nọ: “Rriẹ ozuẹ nọ ọ rrọ owhẹ obọ na rri Ai,+ keme mẹ te rehọ iẹe họ obọ ra.”+ Fikiere Joshua ọ tẹ rriẹ ozuẹ nọ ọ jọ obọ riẹ rri okpẹwho na. 19 Nọ ọ nwane rriẹ obọ riẹ, egbaẹmo nọ i dhere na e tẹ kpama ovovẹrẹ no oria nọ a rrọ, a tẹ dhẹ ruọ okpẹwho na, a tẹ rehọ iẹe. A tẹ nwani tu erae họ okpẹwho na.+

20 Nọ ezae Ai a kuomarẹriẹ, a tẹ ruẹ iwiri nọ i bi kuye kpehru evaọ okpẹwho na, a gbe wo ẹgba nọ a rẹ rọ dhẹ rri ofẹ ovo ho. Kẹsena ahwo nọ a jẹ dhẹ rri ofẹ udhude vẹre na a te kuomarẹriẹ rri ahwo nọ a je le ai na. 21 Nọ Joshua avọ ahwo Izrẹl kpobi a ruẹ nọ egbaẹmo nọ i dhere na e rehọ okpẹwho na no jẹ ruẹ iwiri nọ i bi kuye kpehru evaọ okpẹwho na, a te kuomarẹriẹ, a te mu ahwo Ai họ ẹhọre. 22 Egbaẹmo Izrẹl nọ i kiọkọ na i te no okpẹwho na bru ai ze, a te ko ahwo Ai họ udevie, ahwo Izrẹl jọ a rrọ abọ obonẹ, yọ efa e rrọ abọdekọ. A te kpe ai bẹsenọ aikpobi a ro whu muotọ, ọvuọvo ọ zọ hayo dhẹ vabọ họ.+ 23 Rekọ a kpe ovie Ai hi,+ a mu rie, a tẹ rehọ iẹe se Joshua.

24 Nọ ahwo Izrẹl a kpe ahwo Ai kpobi nọ a jọ ẹwọ na no, koyehọ evaọ udhude nọ a jẹ jọ le ai na, nọ a rọ ọgbọdọ kpe aikpobi muotọ no, ahwo Izrẹl kpobi a te zihe kpohọ Ai, a tẹ rọ ọgbọdọ kpe ohwo kpobi nọ o kiọkọ iẹe. 25 Ahwo kpobi nọ a kpe evaọ ẹdẹ yena, te ezae te eyae, a bu te idu ikpegbivẹ (12,000), koyehọ ahwo nọ a jọ Ai kpobi. 26 Joshua o si obọ nọ ọ rọ rriẹ ozuẹ rri Ai na rehọ họ+ bẹsenọ o ro kpe ahwo nọ a be rria Ai kpobi muotọ no.+ 27 Rekọ ahwo Izrẹl a rehọ erao na, a tẹ jẹ kwa eware okpẹwho na rehọ kẹ omarai wọhọ epanọ Jihova ọ ta kẹ Joshua.+

28 Kẹsena Joshua o te tu erae họ Ai, ọ tẹ raha iẹe muotọ riẹriẹriẹ,+ yọ ere o rrọ rite ẹdẹ inẹnẹ na. 29 Nọ o kpe ovie Ai no, o te thuru iei fihọ ure bi veghe rite owọwọ, nọ ọre o je ru re o kiediwi, Joshua ọ tẹ ta nọ a wọ ori riẹ no ure na.+ Kẹsena a te gbolo iei fihọ aro unuẹthẹ okpẹwho na, a tẹ kwa itho buobu fihọ ehru riẹ, yọ e gbẹ rrọ etẹe rite ẹdẹ inẹnẹ.

30 Oke yena Joshua ọ rọ bọ agbada-idhe fihọ ehru Ugbehru Ibal+ kẹ Jihova Ọghẹnẹ Izrẹl, 31 nwane wọhọ epanọ Mosis odibo Jihova o jie uzi kẹ ahwo Izrẹl gbe epanọ a kere fihọ obe Uzi+ Mosis inọ: “O rẹ jọ agbada-idhe nọ a rọ itho esoso bọ nọ a ri dhe okwakwa ayọno te he.”+ A tẹ jọ ehru riẹ dhe idhe emahọ gbe idhe ọriẹyeri kẹ Jihova.+

32 Ọ tẹ jọ etẹe nọ itho na e jọ na wariẹ kere Uzi+ nọ Mosis ọ jọ iraro ahwo Izrẹl kere no vẹre na.+ 33 Ahwo Izrẹl kpobi, ekpako rai, iletu rai, gbe ibruoziẹ rai a dikihẹ tabọ tabọ etehe ọvọ na evaọ aro izerẹ nọ e rrọ ahwo Livae na nọ e wọ etehe ọvọ Jihova na. Ahwo erẹwho efa gbe emotọ Izrẹl a jọ etẹe.+ Abọvo ahwo na a dikihẹ aro Ugbehru Gẹrizim, enọ i kiọkọ i te dikihẹ aro Ugbehru Ibal+ (nwane wọhọ epanọ Mosis odibo Jihova ọ ta no vẹre),+ re ahwo Izrẹl a sai wo oghale. 34 Nọ onana o vrẹ no, o te se eme kpobi nọ e rrọ Uzi na do via,+ eghale+ gbe iye+ nọ a fodẹ evaọ eva riẹ, o se oware kpobi nọ a kere fihọ obe Uzi na. 35 Joshua o se oware kpobi nọ Mosis o jie uzi riẹ do via evaọ aro ukoko ahwo Izrẹl soso,+ te eyae, te emọ, gbe ahwo erẹwho efa+ nọ a jẹ rria* kugbe ae.+

9 Nọ ivie kpobi nọ e jọ ofẹ ukiediwo-ọre Jọdan na+ a yo oware nọ o via, ivie nọ e rrọ ubrotọ igbehru na, enọ e rrọ Shefila* na, enọ e rrọ akotọ Abade Ologbo* na soso,+ gbe enọ e rrọ aro Lebanọn, koyehọ ivie ahwo Hit, ahwo Amọ, ahwo Kenan, ahwo Pẹriz, ahwo Hiv, gbe ahwo Jebus,+ 2 a te kuomagbe re a họre Joshua avọ Izrẹl.+

3 Ahwo nọ a be rria Gibiọn+ a yo oware nọ Joshua o ru Jẹriko+ gbe Ai re.+ 4 Fikiere a te ru oware areghẹ jọ. A fi emu họ ekpa nọ e who no, a tẹ wọ ae họ ehru eketekete rai, avọ eviẹ-udi nọ e who jẹ bẹre no nọ a ko; 5 a te je ku eviẹ nọ e who no nọ a ko họ awọ rai je ku iwu nọ e who no họ oma. Ebrẹdi nọ e ya fia no je bi whowho ọvo a tọlọ fihọ ẹkpa. 6 A tẹ nyabru Joshua evaọ evuẹ nọ ọ rrọ Gilgal,+ a tẹ ta kẹe avọ ezae Izrẹl nọ: “Ẹkwotọ ugbothabọ ma no ze. Wha re ọvọ kugbe omai.” 7 Rekọ ezae Izrẹl e tẹ ta kẹ ahwo Hiv na nọ:+ “Ẹsejọhọ wha be rria kẹle omai. Fikieme ma rẹ rọ re ọvọ kugbe owhai?”+ 8 A te yo kẹ Joshua nọ: “Mai yọ idibo* ra.”

Kẹsena Joshua ọ tẹ ta kẹ ae nọ: “Whai yọ amono? Kọ bovẹ wha no ze?” 9 A tẹ ta kẹe nọ: “Ẹkwotọ jọ nọ o thabọ gaga mai idibo ra ma no ze+ fiki adhẹẹ nọ ma wo kẹ odẹ Jihova Ọghẹnẹ ra, keme ma yo kpahe oruaro riẹ gbe eware kpobi nọ o ru evaọ Ijipti+ 10 gbe eware kpobi nọ o ru ivie ivẹ ahwo Amọ nọ e jọ abọdekọ* Jọdan, Saehọn ovie+ Hẹshbọn gbe Ọg+ ovie Beshan nọ ọ jọ Ashtarọt. 11 Fikiere ekpako mai gbe ahwo kpobi nọ a be rria ẹkwotọ mai a tẹ ta kẹ omai nọ, ‘Wha rehọ emu nọ wha rẹ wha lele oma kpohọ erẹ na re wha nyabru ae. Wha ta kẹ ae nọ: “Ma te jọ idibo rai;+ ivie, wha re ọvọ kugbe omai.”’+ 12 Ebrẹdi nana nọ ma wha lele oma na e gbẹ jẹ rrorro evaọ ẹdẹ nọ ma rọ wọ no iwou mai ruọ edhere re ma nyabru owhai ze. Whaọ enẹna wha be ruẹ nọ e ya fia no je bi whowho.+ 13 Yọ eviẹ-udi nana e gbẹ jọ ekpokpọ okenọ ma ku udi họ eva rai, rekọ enẹna e sa bẹre no.+ Yọ iwu gbe eviẹ mai e who no fiki ugbothabọ nọ ma no ze na.”

14 Ezae Izrẹl i te mi ai emu rai jọ,* rekọ a du nọ mi Jihova ha.+ 15 Joshua o te ru udhedhẹ kugbe ai+ jẹ re ọvọ kugbe ai inọ a ti kpe ai hi, yọ ere ọvona isu ahwo Izrẹl a duwu iyei kẹ ai re.+

16 Nọ a re ọvọ kugbe ae no, edẹ esa e jẹ ruemu no, a te yo nọ ahwo na a be rria kẹle ae. 17 Ahwo Izrẹl a tẹ wọ, a tẹ nyate ikpewho rai evaọ ẹdẹ avọ esa; ikpewho rai họ Gibiọn,+ Kẹfaera, Biẹrọt, gbe Kiriat-jierim.+ 18 Rekọ ahwo Izrẹl a họre rai hi, keme isu ogbotu na e rehọ odẹ Jihova Ọghẹnẹ Izrẹl duwu iyei kẹ ai no.+ Fikiere ogbotu ahwo na kpobi a te muhọ ẹgo kpahe isu na. 19 Fiki onana, isu na kpobi e tẹ ta kẹ ogbotu na soso nọ: “Nọ orọnọ ma rehọ odẹ Jihova Ọghẹnẹ Izrẹl duwu iyei kẹ ae no na, ma sai gbe dhobọte ai hi. 20 Oware nọ ma ti ru ona: Ma te se ae ba uzuazọ, re Ọghẹnẹ o gbe mu ofu kẹ omai hi fiki iyei nọ ma duwu kẹ ae na.”+ 21 Isu na e tẹ jẹ ta nọ: “Ma du kpe ai hi, rekọ jọ a jọ enọ i re hwe ire je vo ame kẹ ogbotu na soso.” Enẹ isu ahwo na a ya eyaa kẹ ae.

22 Joshua o te se ai, ọ tẹ ta kẹ ae nọ: “Fikieme wha rọ viẹ omai họ nọ, ‘Ẹkwotọ jọ nọ o thabọ gaga no owhai ma no ze,’ kpakiyọ uzedhe udevie mai wha be rria?+ 23 No umuo enẹna vrẹ, whai yọ ahwo nọ a bọwo ehao no,+ erigbo ọvo wha te jọ nọ e te hai hwe ire je vo ame fihọ uwou Ọghẹnẹ mẹ.” 24 A te yo kẹ Joshua nọ: “Fikinọ a vuẹ idibo ra vevẹ nọ Jihova Ọghẹnẹ ra o jie uzi kẹ Mosis odibo riẹ inọ ọ kẹ owhai ẹkwotọ nana kpobi je kpe ahwo kpobi nọ a be rriae no kẹ owhai.+ Fikiere ozọ u te je mu omai inọ wha ti kpe omai* no,+ oyejabọ nọ ma ro ru oware nana.+ 25 Obọnana ma rrọ owhai obọ. Wha ru omai oware kpobi nọ wha roro nọ u woma je kiehọ evaọ aro rai.” 26 Yọ ere o ru rai; ọ thọ rai no obọ ahwo Izrẹl, a gbe kpe ai hi. 27 Rekọ evaọ ẹdẹ yena, Joshua o te fi ae họ ahwo nọ a re hwe ire je vo ame kẹ ogbotu na+ gbe agbada-idhe Jihova evaọ oria nọ Ọ salọ,+ yọ iruo yena a gbe bi ru rite ẹdẹ inẹnẹ na.+

10 Nọ Adonae-zidẹk ovie Jerusalẹm o yo nọ Joshua o fi Ai kparobọ jẹ raha iẹe muotọ no, je ru Ai avọ ovie riẹ+ nwane wọhọ epanọ o ru Jẹriko avọ ovie riẹ,+ gbe epanọ ahwo Gibiọn a ro ru udhedhẹ kugbe Izrẹl+ a tẹ gbẹ be rria udevie rai, 2 ozọ u te mu ei gaga,+ keme Gibiọn ọ jọ okpẹwho ologbo, wọhọ ikpewho nọ i wo ovie. O rro vi Ai,+ yọ ezae kpobi nọ e riẹe eva egbaẹmo. 3 Fikiere Adonae-zidẹk ovie Jerusalẹm o te vi uwou nana se Hoham ovie Hebrọn,+ Paeram ovie Jamut, Jefaya ovie Lekish, gbe Diba ovie Ẹglọn, inọ:+ 4 “Wha nyaze ti fiobọhọ kẹ omẹ re ma họre ahwo Gibiọn, keme a ru udhedhẹ kugbe Joshua avọ ahwo Izrẹl no.”+ 5 Ivie isoi ahwo Amọ na,+ koyehọ ovie Jerusalẹm, ovie Hebrọn, ovie Jamut, ovie Lekish, gbe ovie Ẹglọn a te kokohọ avọ egbaẹmo rai, a tẹ nyae fa evuẹ kẹle Gibiọn, re a lele iei fi ẹmo.

6 Kẹsena ahwo Gibiọn a te vi uwou se Joshua evaọ oria nọ a fa evuẹ fihọ evaọ Gilgal, inọ:+ “Who gbabọkẹ* erigbo ra ha.+ Nyaze ovovẹrẹ re who siwi omai je fiobọhọ kẹ omai! Ivie ahwo Amọ kpobi nọ e rrọ ubrotọ igbehru na a kokohọ no re a họre omai.” 7 Fikiere Joshua ọ tẹ wọ no Gilgal vrẹ avọ egbaẹmo na kpobi gbe egbaẹmo egaga na.+

8 Kẹsena Jihova ọ tẹ ta kẹ Joshua nọ: “Jọ ozọ rai u mu owhẹ hẹ,+ keme mẹ rehọ e rai kẹ owhẹ no.+ Ọvuọvo rai ọ te sai dikihẹ họre owhẹ hẹ.”+ 9 Joshua ọ tẹ vẹruọ ae idudhe nọ ọ nya aso na soso no obọ Gilgal ze no. 10 Jihova ọ tẹ whẹ ozighi họ udevie rai evaọ aro ahwo Izrẹl,+ a te kpe ibuobu rai evaọ Gibiọn, a te je le ae evaọ edhere-ukpehru Bẹt-horọn, a te kpe ai kuku otọ rite ugbo obọ Azika gbe Makkida. 11 Epanọ a jẹ rọ dhẹ fiki ahwo Izrẹl na, nọ a jọ ukuwhrẹrẹ Bẹt-horọn, Jihova o te ru oso-itho ilogbo rrọ no obọ ehru ze ku ai rite ugbo obọ Azika, a te whu. Enọ oso-itho na o kpe i bu vi enọ ahwo Izrẹl a rehọ ọgbọdọ kpe.

12 Evaọ oke yena, evaọ ẹdẹ nọ Jihova ọ rọ raha ahwo Amọ muotọ evaọ aro ahwo Izrẹl na, Joshua ọ rọ ta kẹ Jihova evaọ iraro ahwo Izrẹl nọ:

13 Ọre na o te dikihẹ oria ovo, yọ ọvẹre na o no oria ovo gbe he bẹsenọ orẹwho na u ro fi ewegrẹ riẹ kparobọ no. Kọ a gbe kere iei fihọ obe Jesha?+ Ọre na o dikihẹ oria ovo evaọ udevie ehru na, yọ ọ kaki kiediwi evaọ okpẹdoke soso ho. 14 A re ruẹ ẹdẹ nọ ọ wọhọ ẹdẹ yena vievie he, evaọ okenọ u kpemu hayo nọ u lele i rie, nọ Jihova ọ rọ gaviezọ kẹ urru ohwo-akpọ,+ keme Jihova ọ jẹ họre kẹ ahwo Izrẹl.+

15 Kẹsena Joshua avọ ahwo Izrẹl kpobi a te zihe kpobọ evuẹ na evaọ Gilgal.+

16 Evaọ oke yena yọ ivie isoi na e dhẹ nyai dhere eghogho-utho nọ ọ rrọ Makkida.+ 17 Kẹsena a tẹ vuẹ Joshua nọ: “A ruẹ ivie isoi na nọ i dhere eghogho-utho nọ ọ rrọ Makkida.”+ 18 Joshua ọ tẹ ta nọ: “Wha ghelie itho ilogbo ruru unu eghogho-utho na, re wha fi ezae jọ họ nọ i re rou rie.* 19 Rekọ whai nọ i kiọkọ na wha dikihẹ hẹ. Wha le ewegrẹ rai re wha kpe ai no obemu vrẹ.+ Wha kẹ ae uvẹ ruọ ikpewho rai hi, keme Jihova Ọghẹnẹ rai ọ rehọ e rai họ obọ rai no.”

20 Nọ Joshua avọ ahwo Izrẹl a kpe ahwo na buobu gaga no, te epanọ a ro voro ai muotọ ajokpaọ umutho ahwo jọ nọ a dhẹ vabọ ruọ ikpewho nọ a di ogba wariẹ họ na,* 21 ahwo na kpobi a te zihe omakọkọ bru Joshua evaọ evuẹ nọ ọ rrọ Makkida. Ohwo ọvo ọ dawo e riẹ ta ẹme* wọso ahwo Izrẹl he. 22 Kẹsena Joshua ọ tẹ ta nọ: “Wha rovie unu eghogho-utho na re wha rehọ ivie isoi na se omẹ.” 23 A tẹ rehọ ivie isoi na no eghogho-utho na ze sei: ovie Jerusalẹm, ovie Hebrọn, ovie Jamut, ovie Lekish, gbe ovie Ẹglọn.+ 24 Nọ a rehọ ivie nana bru Joshua ze, o te se ezae Izrẹl kpobi kokohọ, ọ tẹ ta kẹ enọ i wuzou egbaẹmo nọ i lele i rie kpohọ ẹmo na nọ: “Wha nya lahwe. Wha fi awọ rai họ emu uriohọ ivie nana.” A tẹ nya lahwe a te fi awọ rai họ emu uriohọ rai.+ 25 Joshua ọ tẹ ta kẹ ae nọ: “Jọ ozọ u mu owhai hi, wha guegue gbe he.+ Wha wo udu je kru oma ga, keme enẹ Jihova o ti ru ewegrẹ rai kpobi nọ wha ti lele fi ẹmo.”+

26 Kẹsena Joshua ọ tẹ rehọ ọgbọdọ duwu ivie isoi na kpe, ọ tẹ kare ai fihọ ehru ire isoi, a tẹ jọ ehru ire na rite owọwọ. 27 Nọ ọre o kiediwi no, Joshua ọ tẹ ta nọ a wọ ai no ire na fihọ otọ+ re a gbolo ai fihọ eghogho-utho nọ a dhere vẹre na. Kẹsena a tẹ wọ itho ilogbo ro di unu eghogho-utho na, yọ e gbẹ rrọ etẹe rite ẹdẹ inẹnẹ na.

28 Joshua o fi Makkida kparobọ+ evaọ ẹdẹ yena, ọ tẹ rehọ ọgbọdọ kpe ahwo nọ a riẹe eva. O kpe ovie riẹ gbe ohwo* kpobi nọ ọ riẹe eva, ọ siọ ohwo ọvo ba uzuazọ họ.+ Nwane epanọ o ru ovie Jẹriko, ere o ru ovie Makkida re.+

29 Kẹsena Joshua avọ ahwo Izrẹl kpobi a te no Makkida kpohọ Libna, a tẹ họre Libna.+ 30 Jihova ọ tẹ jẹ rehọ Libna avọ ovie riẹ+ họ obọ ahwo Izrẹl, a tẹ rehọ ọgbọdọ raha iẹe je kpe ohwo* kpobi nọ ọ riẹe eva, a siọ ohwo ọvo ba uzuazọ họ. Nwane epanọ a ru ovie Jẹriko, ere a ru ovie Libna re.+

31 Nọ u no oyena no, Joshua avọ ahwo Izrẹl kpobi a te no Libna kpobọ Lekish,+ a tẹ fa evuẹ fihọ etẹe, a tẹ họre okpẹwho yena. 32 Jihova ọ tẹ rehọ Lekish họ obọ ahwo Izrẹl, a te fi okpẹwho na kparobọ evaọ ẹdẹ avọ ivẹ. A tẹ rehọ ọgbọdọ kpe ohwo* kpobi nọ ọ riẹe eva,+ nwane wọhọ epanọ a ru Libna.

33 Kẹsena Horam ovie Gizẹ+ ọ tẹ nyai fiobọhọ kẹ Lekish, rekọ Joshua o te kpei avọ ahwo riẹ bẹsenọ ohwo ọvo o ro kiọkọ họ.

34 Kẹsena Joshua avọ ahwo Izrẹl kpobi a te no Lekish kpobọ Ẹglọn,+ a tẹ fa evuẹ fihọ etẹe, a tẹ họre okpẹwho yena. 35 A rehọ okpẹwho na evaọ ẹdẹ yena, a tẹ rehọ ọgbọdọ kpe ahwo nọ a be rriae eva. A kpe ohwo* kpobi nọ ọ riẹe eva evaọ ẹdẹ yena, nwane wọhọ epanọ a ru Lekish.+

36 Kẹsena Joshua avọ ahwo Izrẹl kpobi a te no Ẹglọn kpobọ Hebrọn,+ a tẹ họre okpẹwho yena. 37 A rehọ e riẹ, a tẹ rehọ ọgbọdọ kpe ahwo kpobi nọ a be rriae eva, ovie riẹ, gbe ohwo* kpobi nọ ọ be rria ewho esese riẹ, a siọ ohwo ọvo ba uzuazọ họ. Ọ raha e riẹ gbe ohwo kpobi nọ ọ riẹe eva nwane wọhọ epanọ o ru Ẹglọn.

38 Ukuhọ riẹ, Joshua avọ ahwo Izrẹl kpobi a tẹ rọ ovao rri Diba,+ a tẹ họre okpẹwho yena. 39 Ọ tẹ rehọ okpẹwho na avọ ewho esese riẹ, je mu ovie riẹ, a tẹ rehọ ọgbọdọ kpe ai, a kpe ohwo* kpobi nọ ọ riẹe eva,+ a siọ ohwo ọvo ba uzuazọ họ.+ Nwane epanọ o ru Hebrọn gbe Libna avọ ovie riẹ na, ere o ru Diba avọ ovie riẹ re.

40 Joshua o fi ẹkwotọ kpobi nọ o rrọ ubrotọ igbehru na kparobọ, Negẹb* na, Shefila* na,+ gbe eria nọ i kuwhrẹrẹ na, gbe ivie rai kpobi, ọ siọ ọvuọvo rai ba uzuazọ họ; ọ raha oware kpobi nọ o be wẹ muotọ,+ nwane wọhọ epanọ Jihova Ọghẹnẹ Izrẹl o jie uzi na.+ 41 Joshua o fi rai kparobọ no obọ Kedẹsh-bania+ rite obọ Gaza,+ jegbe ẹkwotọ Goshẹn soso+ rite obọ Gibiọn.+ 42 Evaọ etoke ọvona Joshua o ro fi ivie nana kpobi kparobọ jẹ rehọ ẹkwotọ rai, keme Jihova Ọghẹnẹ Izrẹl ọ jẹ họre kẹ ahwo Izrẹl.+ 43 Kẹsena Joshua avọ ahwo Izrẹl kpobi a te zihe kpohọ evuẹ nọ a fa fihọ Gilgal.+

11 Nọ Jabin ovie Hezọ ọ nwani yo kpahe iẹe, o te vi uwou se Jobab ovie Medọn,+ o te je vi uwou se ovie Shimrọn, gbe ovie Akshaf,+ 2 te ivie nọ e jọ ubrotọ igbehru evaọ ofẹ ẹkpẹlobọ ovatha-ọre, enọ e jọ obọ ekwotọ epraprara* na evaọ ofẹ obọze ovatha-ọre Kinẹrẹt, enọ e jọ obọ Shefila* na gbe ukuwhrẹrẹ Dọr+ evaọ ofẹ ukiediwo-ọre, 3 ahwo Kenan+ nọ a jọ ofẹ ovatha-ọre gbe ukiediwo-ọre, ahwo Amọ,+ ahwo Hit, ahwo Pẹriz, ahwo Jebus nọ a jọ ubrotọ igbehru na, gbe ahwo Hiv+ nọ a jọ obotọ Ugbehru Hẹmọn+ evaọ ẹkwotọ Mizpa. 4 A tẹ wọ ze avọ egbaẹmo rai kpobi, ogbotu ahwo nọ a rrọ buobu wọhọ uwẹkpẹ nọ o rrọ akotọ abade, avọ enyenya gbe ekẹkẹ ẹmo buobu gbidi gbidi. 5 Ivie nana kpobi a rọwo nọ a re kuomagbe, a tẹ wọ ze jẹ fa evuẹ kugbe kẹle akotọ eyeri-ame Mẹrọm re a lele Izrẹl fi ẹmo.

6 Jihova ọ tẹ ta kẹ Joshua nọ: “Jọ ozọ u mu owhẹ fiki rai hi,+ keme evaọ oke utionana odẹnotha, mẹ te rehọ aikpobi họ obọ ahwo Izrẹl re a kpe ai no. Who re wiri awọ enyenya rai hrọ,+ yọ whọ rẹ rehọ erae mahe ekẹkẹ rai hrọ.” 7 Joshua avọ egbaẹmo na kpobi a tẹ vẹruọ ae idudhe evaọ akotọ eyeri-ame Mẹrọm. 8 Jihova ọ rehọ e rai họ obọ Izrẹl,+ a te fi ai kparobọ je le ai te ugbo obọ Saedọn Ologbo na+ gbe Misrifọt-meyẹm,+ je rite Ukiekpotọ Mizpẹ nọ o rrọ ofẹ ovatha-ọre, a te je kpe ai bẹsenọ a ro kpe aikpobi muotọ.+ 9 Joshua o te ru ai nwane wọhọ epanọ Jihova ọ ta kẹe nọ o ru na; o wiri awọ enyenya rai, ọ tẹ jẹ rehọ erae mahe ekẹkẹ rai.+

10 U no ere no, Joshua o te zihe kpohọ Hezọ je fi ei kparobọ, ọ tẹ rehọ ọgbọdọ kpe ovie riẹ,+ keme Hezọ ọ jọ ẹkwotọ nọ o wuzou ekwotọ-ivie nana kpobi vẹre. 11 A rọ ọgbọdọ kpe ohwo* kpobi nọ ọ riẹe eva, a kpe rai kpobi muotọ.+ A siọ oware ovuovo nọ o be wẹ ba ha.+ Kẹsena ọ tẹ rọ erae mahe Hezọ. 12 Joshua o fi ikpewho kpobi nọ ivie nana i je su na kparobọ jẹ rọ ọgbọdọ kpe ivie rai kpobi.+ Ọ raha e rai muotọ+ nwane wọhọ epanọ Mosis odibo Jihova o jie uzi. 13 Rekọ ahwo Izrẹl a mahe okpẹwho ọvuọvo ho evaọ usu ikpewho nọ e jọ ehru ikpehru na, ajokpaọ Hezọ; ọye ọvo Joshua ọ mahe. 14 Ahwo Izrẹl a kwa eware ikpewho nana jẹ rehọ erao rai kpobi kẹ omarai.+ Rekọ a rehọ ọgbọdọ kpe ohwo kpobi bẹsenọ a ro kpe ai muotọ.+ A kuvẹ re ohwo ọvo nọ ọ be wẹ o kiọkọ họ.+ 15 Nwane epanọ Jihova ọ ta kẹ Mosis odibo riẹ, ere Mosis ọ ta kẹ Joshua,+ yọ ere Joshua o ru. O ru oware kpobi nọ Jihova ọ ta kẹ Mosis.+

16 Joshua o fi ẹkwotọ nana soso kparobọ, koyehọ ubrotọ igbehru na, Negẹb* na soso,+ ẹkwotọ Goshẹn soso, Shefila* na,+ Araba* na,+ gbe ubrotọ igbehru Izrẹl avọ Shefila riẹ,* 17 no Ugbehru Helak, onọ u kpobọ Siya, rite ugbo obọ Bale-gad+ nọ o rrọ Ukiekpotọ Lebanọn evaọ obotọ Ugbehru Hẹmọn,+ o fi ivie rai kpobi kparobọ je kpe ai no. 18 Joshua o lele ivie nana kpobi fi ẹmo evaọ omoke jọ. 19 Okpẹwho ọvuọvo o ru udhedhẹ kugbe ahwo Izrẹl he, ajokpaọ ahwo Hiv nọ a jẹ rria Gibiọn ọvo.+ Ẹmo a ro fi enọ i kiọkọ kpobi kparobọ.+ 20 Jihova họ ọnọ ọ kẹ rai uvẹ re a ru udu rai gaga+ nọ a je ro lele Izrẹl fi ẹmo, re ọ ruẹse raha ae muotọ ababọ ohrọ-oriọ.+ O gwọlọ nọ a rẹ raha ai no riẹriẹriẹ, nwane wọhọ epanọ Jihova o jie uzi kẹ Mosis.+

21 Evaọ oke yena, Joshua o voro ahwo Anak kpobi+ no ubrotọ igbehru na, no Hebrọn, Diba, Enab, gbe ubrotọ igbehru Juda kpobi avọ ubrotọ igbehru Izrẹl kpobi. Joshua ọ raha e rai avọ ikpewho rai muotọ.+ 22 Uvumọ ohwo Anak o kiọkọ ẹkwotọ ahwo Izrẹl he; obọ Gaza,+ Gat,+ gbe Ashdọd+ ọvo a kiọkọ.+ 23 Ere Joshua ọ rọ rehọ ẹkwotọ na soso, nwane wọhọ epanọ Jihova ọ ya eyaa kẹ Mosis,+ ọ tẹ rehọ iẹe kẹ ahwo Izrẹl re o jọ ukuoriọ rai, a tẹ ghale iẹe kẹ omarai lele ẹkẹ nọ o te orua kpobi.+ Ẹmo-ofio o te serihọ evaọ ẹkwotọ na.+

12 Whaọ enana họ ivie nọ i je su ẹkwotọ nọ ahwo Izrẹl a fi kparobọ, enọ a rehọ ẹkwotọ rai evaọ ofẹ ovatha-ọre Jọdan, no Ukiekpotọ Anọn*+ rite obọ Ugbehru Hẹmọn+ gbe ẹkwotọ Araba* na soso evaọ ofẹ ovatha-ọre:+ 2 Saehọn ovie+ ahwo Amọ, ọnọ ọ jẹ rria Hẹshbọn, nọ o je su no obọ Aroa ze,+ onọ o jọ akotọ Ukiekpotọ Anọn,*+ je no udevie ukiekpotọ na ze, gbe abọvo Giliad rite ugbo obọ Ukiekpotọ* Jabọk, nọ o jọ uwhru ahwo Ammọn. 3 Ọ tẹ jẹ jọ osu Araba* na rite ugbo obọ Abade Kinẹrẹt*+ nọ o rrọ ofẹ ovatha-ọre je rite ugbo obọ Abade Araba* na, obọ Abade Uwhei na* rite ofẹ ovatha-ọre nọ ẹkwotọ Bẹt-jẹshimọt ọ rrọ, je rite ofẹ obọze ovatha-ọre evaọ otọ ukuwhrẹrẹ Pisga.+

4 A tẹ jẹ rehọ ẹkwotọ Ọg ovie+ Beshan, ọnọ ọ jọ usu ahwo urere Rẹfeyẹm,+ nọ ọ jẹ rria Ashtarọt gbe Ẹdrae 5 yọ o je su evaọ Ugbehru Hẹmọn, evaọ Saleka gbe evaọ Beshan soso+ rite ugbo obọ uwhru ahwo Gẹshọ gbe ahwo Meakat,+ gbe abọvo Giliad rite obọ ẹkwotọ Saehọn ovie Hẹshbọn.+

6 Mosis odibo Jihova avọ ahwo Izrẹl a fi rai kparobọ,+ kẹsena Mosis odibo Jihova ọ tẹ rehọ ẹkwotọ rai kẹ ahwo orua Rubẹn, ahwo orua Gad, gbe abọvo orua Manasẹ re o jọ ukuoriọ rai.+

7 Enana họ ivie nọ i je su ekwotọ nọ Joshua avọ ahwo Izrẹl a fi kparobọ evaọ ofẹ ukiediwo-ọre Jọdan, no obọ Bale-gad+ nọ o rrọ Ukiekpotọ Lebanọn+ rite ugbo obọ Ugbehru Helak,+ onọ u kpobọ Siya,+ kẹsena Joshua ọ tẹ rehọ ẹkwotọ na kẹ erua Izrẹl re o jọ ukuoriọ rai lele ẹkẹ nọ o te rai,+ 8 evaọ obọ ubrotọ igbehru na, obọ Shefila* na, obọ Araba* na, evaọ eria nọ i kuwhrẹrẹ na, te obọ udhude na gbe obọ Negẹb* na,+ koyehọ ẹkwotọ ahwo Hit, ahwo Amọ,+ ahwo Kenan, ahwo Pẹriz, ahwo Hiv, gbe ahwo Jebus:+

13 Whaọ Joshua ọ who jẹ kpako gaga no.+ Fikiere Jihova ọ tẹ ta kẹe nọ: “Whọ who jẹ kpako gaga no; rekọ abọ nọ wha re te rehọ họ* evaọ ẹkwotọ na ọ gbẹ rrọ ruaro. 2 Abọ nọ o kiọkọ evaọ ẹkwotọ na họ:+ ibrotọ ahwo Filistia kpobi gbe erọ ahwo Gẹshọ kpobi+ 3 (no ogha Ethẹ Naele* nọ o rrọ ofẹ ovatha-ọre* Ijipti rite uwhru Ekrọn nọ o rrọ ofẹ ẹkpẹlobọ ovatha-ọre, onọ a je se ẹkwotọ ahwo Kenan vẹre)+ je kugbe ẹkwotọ isu isoi ahwo Filistia,+ koyehọ ahwo Gaza, ahwo Ashdọd,+ ahwo Ashkelọn,+ ahwo Gat,+ ahwo Ekrọn;+ gbe ẹkwotọ ahwo Avim+ 4 nọ o rrọ ofẹ obọze ovatha-ọre; ẹkwotọ ahwo Kenan soso; Meara nọ o rrọ ẹkwotọ ahwo Saedọn,+ rite ugbo obọ Efẹk, nọ o rrọ obọ uwhru ahwo Amọ; 5 ẹkwotọ ahwo Gibal+ gbe ẹkwotọ Lebanọn soso nọ o rrọ ofẹ ovatha-ọre, no Bale-gad nọ o rrọ obotọ Ugbehru Hẹmọn rite Libo-hemat;*+ 6 ahwo kpobi nọ a be rria ubrotọ igbehru na no Lebanọn+ rite Misrifọt-meyẹm;+ gbe ahwo Saedọn kpobi.+ Me ti le ai no* kẹ ahwo Izrẹl.+ Thakpe ghale ẹkwotọ na kẹ ahwo Izrẹl re o jọ ukuoriọ rai nwane wọhọ epanọ mẹ ta kẹ owhẹ.+ 7 Whọ rẹ ghale ẹkwotọ nana kẹ erua izii na gbe abọvo orua Manasẹ re o jọ ukuoriọ rai.”+

8 Abọvo orua na nọ o kiọkọ, orua Rubẹn gbe orua Gad a tẹ rehọ ukuoriọ rai nọ Mosis ọ kẹ rai evaọ ofẹ ovatha-ọre Jọdan na, nwane wọhọ epanọ Mosis odibo Jihova ọ ghale riẹ kẹ ae:+ 9 no obọ Aroa ze,+ onọ o rrọ akotọ Ukiekpotọ Anọn,*+ gbe okpẹwho nọ o rrọ udevie ukiekpotọ na, jegbe ẹkwotọ ukpehru opraprara Mẹdeba na soso rite ugbo obọ Daebọn; 10 gbe ikpewho kpobi nọ e jọ otọ esuo Saehọn ovie ahwo Amọ, ọnọ o je su evaọ Hẹshbọn, rite obọ uwhru ahwo Ammọn;+ 11 je kugbe Giliad avọ ẹkwotọ ahwo Gẹshọ gbe ahwo Meakat+ avọ Ugbehru Hẹmọn soso, gbe Beshan soso+ rite ugbo obọ Saleka;+ 12 eria kpobi nọ e jọ ubrotọ esuo Ọg evaọ Beshan, ọnọ o je su evaọ Ashtarọt gbe Ẹdrae. (Ọ jọ usu ahwo urere Rẹfeyẹm.)+ Mosis o fi rai kparobọ, o te le ai no ẹkwotọ na.*+ 13 Rekọ ahwo Izrẹl a le+ ahwo Gẹshọ avọ ahwo Meakat no* ẹkwotọ na ha, ahwo Gẹshọ avọ Meakat a be rria udevie ahwo Izrẹl rite ẹdẹ inẹnẹ na.

14 Orua Livae ọvo ọ kẹ ukuoriọ họ.+ Eware nọ a bi ro dhe idhe emahọ kẹ Jihova Ọghẹnẹ Izrẹl họ ukuoriọ rai+ nwane wọhọ epanọ ọ ya eyaa kẹ ae.+

15 Kẹsena Mosis ọ tẹ kẹ inuwou kpobi nọ e rrọ orua Rubẹn ukuoriọ rai, 16 yọ ẹkwotọ rai o no obọ Aroa ze, onọ o rrọ akotọ Ukiekpotọ Anọn,* gbe okpẹwho nọ o rrọ udevie ukiekpotọ na, jegbe ẹkwotọ ukpehru opraprara Mẹdeba soso; 17 Hẹshbọn avọ ewho riẹ kpobi+ nọ e rrọ ẹkwotọ ukpehru opraprara na, Daebọn, Bemọt-bale, Bẹt-bale-miọn,+ 18 Jehaz,+ Kẹdemọt,+ Mẹfayat,+ 19 Kiriateyẹm, Sibma,+ gbe Zirẹt-sheha nọ o rrọ ehru ugbehru nọ o kẹle ukiekpotọ* na, 20 Bẹt-piọ, ikuwhrẹrẹ Pisga,+ Bẹt-jẹshimọt,+ 21 ikpewho ẹkwotọ ukpehru opraprara na kpobi, gbe eria kpobi nọ e jọ ubrotọ esuo Saehọn ovie ahwo Amọ, ọnọ o je su evaọ Hẹshbọn.+ Mosis o fi rie kparobọ+ gbe isu ahwo Midian nọ a re se Ivae, Rikẹm, Zọr, Họr, gbe Riba,+ isu* nọ e jọ otọ Saehọn nọ e jẹ rria ẹkwotọ na. 22 Belam+ ọmọzae Biọ, ọgbẹva na+ yọ ohwo jọ nọ ahwo Izrẹl a rọ ọgbọdọ kpe kugbe ahwo nọ a kiọkọ nọ a kpe. 23 Ethẹ Jọdan na ọ jọ uwhru orua Rubẹn; yọ ẹkwotọ nana avọ ikpewho na gbe iwhre rai e jọ ukuoriọ inuwou orua Rubẹn kpobi.

24 U te no ere no, Mosis ọ kẹ orua Gad ukuoriọ riẹ, inuwou kpobi nọ e rrọ orua Gad ọ kẹ, 25 yọ ẹkwotọ rai u kugbe Jeza+ gbe ikpewho Giliad kpobi jegbe abọvo ẹkwotọ ahwo Ammọn+ rite ugbo obọ Aroa, nọ o rẹriẹ ovao ku Raba;+ 26 je no obọ Hẹshbọn+ rite obọ Remat-mizpẹ gbe Bẹtọnim, je no obọ Mehaneyẹm+ rite uwhru Diba; 27 jegbe evaọ ukiekpotọ* na, Bẹt-heram, Bẹt-nimra,+ Sọkọt,+ gbe Zefọn, eria efa nọ e jọ ubrotọ esuo Saehọn ovie Hẹshbọn,+ yọ Ethẹ Jọdan o jọ uwhru riẹ, onọ u no obọ oka Abade Kinẹrẹt* ze+ evaọ ofẹ ovatha-ọre Jọdan na. 28 Ẹkwotọ nana avọ ikpewho na gbe iwhre rai e jọ ukuoriọ inuwou orua Gad kpobi.

29 U te no ere no, Mosis ọ kẹ abọvo orua Manasẹ ẹkẹ ukuoriọ riẹ, inuwou kpobi nọ e rrọ abọvo orua Manasẹ na ọ kẹ.+ 30 Ẹkwotọ rai o no obọ Mehaneyẹm ze,+ yọ o kẹre ruọ Beshan soso, oria kpobi nọ Ọg ovie Beshan o je su, gbe iwhre iwou-udhu kpobi nọ e rrọ Jeya+ evaọ Beshan, ewho udhosa. 31 A ghale abọvo Giliad, Ashtarọt gbe Ẹdrae,+ ikpewho nọ e jọ ubrotọ esuo Ọg evaọ Beshan kẹ emezae Meka,+ ọmọzae Manasẹ, koyehọ iviuwou kpobi nọ e rrọ abọvo unuwou Meka.

32 Enana họ ukuoriọ nọ Mosis ọ kẹ rai evaọ udhude opraprara Moab nọ o kẹre ruọ abọdekọ Jọdan, evaọ ofẹ ovatha-ọre Jẹriko.+

33 Rekọ Mosis ọ kẹ orua Livae ukuoriọ họ.+ Jihova Ọghẹnẹ Izrẹl họ ukuoriọ rai, nwane wọhọ epanọ ọ ya eyaa kẹ ae.+

14 Whaọ onana họ ukuoriọ ahwo Izrẹl evaọ ẹkwotọ Kenan, onọ Ẹlieza ozerẹ na avọ Joshua ọmọzae Nọn gbe isu inuwou nọ e rrọ erua Izrẹl a ghale kẹ ae re a rọ reuku.+ 2 Ẹta a ma rọ ghale ukuoriọ na kẹ ae,+ nwane wọhọ epanọ Jihova ọ rehọ Mosis jie uzi inọ a ru kẹ erua izii gbe ubro orua na.+ 3 Mosis ọ rehọ ukuoriọ erua ivẹ gbe ubro edekọ kẹ ai no vẹre evaọ abọdekọ* Jọdan,+ rekọ ọ kẹ ahwo Livae na ukuoriọ evaọ udevie rai hi.+ 4 A rehọ uyẹ Josẹf wọhọ erua ivẹ,+ Manasẹ avọ Ifremu;+ yọ a jọ ẹkwotọ na ghale otọ te ahwo Livae he, ajokpaọ ikpewho+ nọ a rẹ rria gbe eria nọ erao rai e rẹ jọ re ẹbe, nọ a rẹ sai je fi ekwakwa rai họ.+ 5 Ere ahwo Izrẹl a rọ ghale ẹkwotọ na nwane wọhọ epanọ Jihova o jie uzi kẹ Mosis.

6 Kẹsena ezae orua Juda a tẹ nyabru Joshua ze evaọ Gilgal,+ Kelẹb+ ọmọzae Jefunẹ nọ ọ rrọ ohwo Kẹniz ọ tẹ ta kẹe nọ: “Whọ riẹ oware nọ Jihova ọ ta+ kẹ Mosis ohwo Ọghẹnẹ uzẹme na+ kpahe omẹ avọ owhẹ evaọ Kedẹsh-bania.+ 7 Ikpe udhuvẹ mẹ jọ okenọ Mosis odibo Jihova o vi omẹ no Kedẹsh-bania nyae kiẹ ẹkwotọ na riwi,+ yọ nọ me zihe ze mẹ niyẹrẹ uzẹme.*+ 8 Dede nọ inievo mẹ nọ ma gbẹ nya a ru udu no ahwo na awọ,* mẹ rọ udu mẹ kpobi* nya lele Jihova Ọghẹnẹ mẹ.+ 9 Mosis o duwu iyei evaọ ẹdẹ yena inọ: ‘Whẹ avọ emọ ra wha te rehọ ẹkwotọ nọ owọ ra u thihi na reuku ribri, keme whọ rọ udu ra kpobi nya lele Jihova Ọghẹnẹ mẹ.’+ 10 Whaọ nwane wọhọ epanọ Jihova ọ ya eyaa na,+ ọ sẹro uzuazọ mẹ+ evaọ ikpe udhuvẹ-gbisoi nọ e vrẹ na, nọ Jihova ọ rọ ya eyaa nana kẹ Mosis evaọ okenọ ahwo Izrẹl a jẹ nya evaọ udhude na;+ mẹ gbẹ riẹ rite inẹnẹ, yọ mẹ kpako te ikpe udhone-gbisoi no. 11 Mẹ gbẹ rrọ gaga nẹnẹ na wọhọ epanọ mẹ jọ evaọ ẹdẹ nọ Mosis o ro vi omẹ nya na. Me gbe wo ẹgba nọ me re ro fi ẹmo je ru eware efa wọhọ epanọ o jọ oke yena. 12 Fikiere, kẹ omẹ ubrotọ igbehru nana nọ Jihova ọ ya eyaa riẹ kẹ omẹ evaọ ẹdẹ yena. Dede nọ who yo ẹdẹ yena inọ ahwo Anak+ a rrọ etẹe avọ ikpewho ilogbo nọ a di ogba wariẹ họ,*+ ababọ avro* Jihova ọ te jọ kugbe omẹ,+ yọ me ti le ai no,* nwane wọhọ epanọ Jihova ọ ya eyaa na.”+

13 Fikiere, Joshua ọ tẹ lẹ ẹro kẹ Kelẹb ọmọzae Jefunẹ, ọ tẹ rehọ ẹkwotọ Hebrọn na kẹe re o jọ ukuoriọ riẹ.+ 14 Oyejabọ nọ Hebrọn ọ rọ rrọ ẹkwotọ ukuoriọ Kelẹb ọmọzae Jefunẹ ohwo Kẹniz na rite ẹdẹ inẹnẹ na, fikinọ ọ rọ udu riẹ kpobi nya lele Jihova Ọghẹnẹ Izrẹl.+ 15 Kiriat-aba họ odẹ Hebrọn vẹre+ (Aba ọ jọ ohwo ologbo evaọ udevie ahwo Anak). Ẹmo-ofio o te serihọ evaọ ẹkwotọ na.+

15 Ẹkwotọ nọ a ghale*+ kẹ inuwou orua Juda u no uwhru Edọm vrẹ,+ koyehọ udhude Zin rite obọ Negẹb* na evaọ obọ oka riẹ nọ o rrọ obọze ovatha-ọre. 2 Uwhru ofẹ obọze ovatha-ọre rai u no obọ oka Abade Uwhei* na ze,+ koyehọ uto nọ u rri ofẹ obọze ovatha-ọre. 3 Yọ o nya rri ofẹ obọze ovatha-ọre rite edhere-ukpehru Akrabim,+ nya kpobọ Zin, je no obọze ovatha-ọre kpohọ Kedẹsh-bania,+ jẹ nyavrẹ kpobọ Hẹzrọn rite obọ Adda, jẹ nya ghelie họ rri obọ Kaka. 4 O tẹ nyavrẹ kpobọ Azmọn+ rite obọ Uto* Ijipti,+ uwhru na u te kuhọ evaọ obọ Abade na.* Onana o jọ uwhru ofẹ obọze ovatha-ọre ẹkwotọ rai.

5 No Abade Uwhei* na rite obọ oka Jọdan o jọ uwhru ofẹ ovatha-ọre, yọ uwhru nọ o jọ ubienẹ obọ ẹkpẹlobọ ovatha-ọre u muhọ evaọ unueri abade na, evaọ obọ oka Jọdan.+ 6 Uwhru na o nyavrẹ kpohọ Bẹt-họgla,+ jẹ nyaruọ abọdekọ evaọ ẹkpẹlobọ ovatha-ọre Bẹt-araba,+ o tẹ nyavrẹ kpobọ utho Bohan+ ọmọzae Rubẹn. 7 Uwhru na o nyavrẹ kpohọ Diba evaọ Ukiekpotọ* Ekọ,+ o tẹ gẹle rri ofẹ ẹkpẹlobọ ovatha-ọre kpohọ Gilgal,+ nọ o rrọ aro edhere-ukpehru Adọmim nọ o rrọ obọze ovatha-ọre uto na, o tẹ nyavrẹ kpobọ ame Ẹn-shimẹsh,+ u te kuhọ evaọ Ẹn-rogẹl.+ 8 Uwhru na o tẹ nya kpobọ Ukiekpotọ Ọmọzae Hinọm+ vrẹ kpohọ ukuwhrẹrẹ Jebus+ evaọ obọze ovatha-ọre, koyehọ Jerusalẹm,+ o tẹ gbẹ nyavrẹ kpobọ ehru ugbehru nọ o rẹriẹ ovao ku Ukiekpotọ Hinọm evaọ ofẹ ukiediwo-ọre, onọ o rrọ obọ oka Ukiekpotọ* Rẹfeyẹm evaọ ofẹ ẹkpẹlobọ ovatha-ọre. 9 A ka oka họ uwhru na no obọ ehru ugbehru na ze rite obọ eyeri ame Nẹftoa,+ jẹ nyavrẹ te obọ ikpewho nọ e rrọ Ugbehru Ifrọn; a ka oka họ uwhru na rite obọ Beala, koyehọ, Kiriat-jierim.+ 10 Uwhru na o nya ghelie họ no Beala ze evaọ ofẹ ukiediwo-ọre rite Ugbehru Siya, o tẹ nyavrẹ ruọ ukuwhrẹrẹ nọ o rrọ Ugbehru Jerim evaọ ofẹ ẹkpẹlobọ ovatha-ọre, koyehọ Kẹsalọn, o tẹ jẹ nya rri obotọ kpohọ Bẹt-shimẹsh+ jẹ nyaruọ Timnah.+ 11 Uwhru na u te obọ ukuwhrẹrẹ Ekrọn+ evaọ ofẹ ẹkpẹlobọ ovatha-ọre, yọ a ka oka họ iẹe rite Shikẹrọn, o tẹ nyavrẹ ruọ Ugbehru Beala je te obọ Jabniẹl, u te kuhọ evaọ obọ abade na.

12 Abade Ologbo* na avọ okpa nọ o jọ akotọ riẹ oye o jọ uwhru ofẹ ukiediwo-ọre na.+ Onana o jọ uwhru otọ nọ a ghale kẹ inuwou kpobi nọ e jọ uyẹ Juda.

13 Ọ kẹ Kelẹb+ ọmọzae Jefunẹ otọ evaọ udevie uyẹ Juda, wọhọ epanọ Jihova ọ ta kẹ Joshua. Ẹkwotọ nọ ọ kẹ riẹ họ Kiriat-aba (Aba họ ọsẹ Anak), koyehọ, Hebrọn.+ 14 Fikiere Kelẹb o te le emezae esa Anak no etẹe no:+ Shishae, Ahaeman, gbe Talmae,*+ ahwo uyẹ Anak. 15 Kẹsena o te no etẹe re ọ nyae họre ahwo nọ a be rria Diba.+ (Odẹ Diba vẹre họ Kiriat-sifa.) 16 Kelẹb ọ tẹ ta nọ: “Ọzae nọ ọ họre Kiriat-sifa je fi ei kparobọ, mẹ te kẹe Aksa ọmọtẹ mẹ re ọ jọ aye riẹ.” 17 Otniẹl+ ọmọzae Kinaz,+ oniọvo Kelẹb, o te fi ẹwho na kparobọ. Fikiere Kelẹb ọ tẹ kẹe Aksa+ ọmọtẹ riẹ re ọ jọ aye riẹ. 18 Nọ Aksa o je lele ọzae riẹ kpo, ọ tẹ jẹ tẹzẹ ọzae riẹ nọ ọ ta kẹ Kelẹb ọsẹ riẹ re ọ kẹ ae otọ jọ. Kẹsena Aksa o te no eketekete riẹ ruọ otọ.* Kelẹb ọ tẹ nọe nọ: “Eme whọ gwọlọ?”+ 19 Ọ tẹ ta nọ: “Ivie, kẹ omẹ okẹ rọ ghale omẹ, keme obọze ovatha-ọre* whọ jọ kẹ omẹ ẹwẹ otọ; rekọ kẹ omẹ Gọlọt-meyẹm* kugbe re.” Fikiere ọ tẹ kẹe Gọlọt Obehru gbe Gọlọt Obotọ.

20 Onana họ ẹkwotọ ukuoriọ nọ a ghale kẹ inuwou orua Juda.

21 Ikpewho nọ e jọ obọ oka ẹkwotọ orua Juda nọ o jọ abọ uwhru Edọm+ evaọ ofẹ obọze ovatha-ọre họ: Kabziẹl, Ida, Jegọ, 22 Kaena, Daemona, Adeda, 23 Kidẹsh, Hezọ, Itnan, 24 Zif, Tilẹm, Bielọt, 25 Hezọ-hadata, gbe Kiriọt-hẹzrọn, koyehọ Hezọ, 26 Emam, Shima, Moleda,+ 27 Heza-gada, Hẹshmọn, Bẹt-pẹlẹt,+ 28 Heza-shual, Biẹ-shiba,+ Biziotaya, 29 Beala, Aiyẹm, Izẹm, 30 Ẹltolad, Kisol, Họma,+ 31 Ziklag,+ Madmana, Sansana, 32 Lebeyọt, Shilhim, Eyin, gbe Rimọn+—ikpewho na kpobi i bu te udhegbizii je kugbe iwhre rai.

33 Ikpewho nọ e jọ obọ Shefila*+ na họ: Ẹshtaọl, Zora,+ Ashna, 34 Zanoa, Ẹn-ganim, Tapua, Inam, 35 Jamut, Adọlam,+ Sokọ, Azika,+ 36 Sheareyẹm,+ Aditeyẹm, gbe Gẹdira avọ Gẹderọteyẹm*—ikpewho ikpegbene avọ iwhre rai.

37 Ikpewho efa họ: Zinan, Hadasha, Migdal-gad, 38 Daelian, Mizpẹ, Jọktiẹl, 39 Lekish,+ Bọzkat, Ẹglọn, 40 Kabọn, Lọmam, Kitlish, 41 Gẹdirọt, Bẹt-degọn, Neama, gbe Makkida+—ikpewho ikpegbezeza avọ iwhre rai.

42 Efa họ: Libna,+ Ita, Ashan,+ 43 Ifta, Ashna, Nizib, 44 Kaela, Akzib, gbe Marishah—ikpewho izii avọ iwhre rai.

45 Ekrọn avọ ewho esese riẹ* gbe iwhre riẹ; 46 no Ekrọn vrẹ kpohọ ofẹ ukiediwo-ọre, koyehọ ewho kpobi nọ e kẹle Ashdọd gbe iwhre rai.

47 Ashdọd+ avọ ewho esese riẹ* gbe iwhre riẹ; Gaza+ avọ ewho esese riẹ gbe iwhre riẹ, rite obọ Uto Ijipti, Abade Ologbo na,* gbe ubrotọ nọ o kẹle abade na.+

48 Ikpewho nọ e jọ ubrotọ igbehru na họ: Shemẹ, Jata,+ Sokọ, 49 Dana, Kiriat-sana, koyehọ Diba, 50 Enab, Ẹshtẹmọ,+ Enim, 51 Goshẹn,+ Holọn, gbe Gaelọ+—ikpewho ikpegbọvo avọ iwhre rai.

52 Ikpewho efa họ: Arab, Duma, Ishan, 53 Jenim, Bẹt-tapua, Afika, 54 Humta, Kiriat-aba, koyehọ Hebrọn,+ gbe Zaeyọ—ikpewho izii gbe iwhre rai.

55 Efa họ: Meọn,+ Kamẹl, Zif,+ Jọta, 56 Jezrẹl, Jọkdiam, Zanoa, 57 Keyẹn, Gibiah, gbe Timnah+—ikpewho ikpe gbe iwhre rai.

58 Efa jọ re họ: Halhọl, Bẹt-zọ, Gidọ, 59 Mearat, Bẹt-enọt, gbe Ẹltekọn—ikpewho ezeza avọ iwhre rai.

60 Kiriat-bale, koyehọ Kiriat-jierim,+ gbe Raba—ikpewho ivẹ avọ iwhre rai.

61 Enọ e jọ udhude na họ: Bẹt-araba,+ Midin, Sekeka, 62 Nibshan, Okpẹwho Uwhei, gbe Ẹn-gẹdi+—ikpewho ezeza avọ iwhre rai.

63 Rọ kpahe ahwo Jebus+ nọ a jẹ rria Jerusalẹm,+ ahwo Juda a sai le ai no ho,+ fikiere ahwo Jebus na a be rria kugbe ahwo Juda evaọ Jerusalẹm rite ẹdẹ inẹnẹ na.

16 Ẹkwotọ nọ a rọ ẹta-ọma ghale+ te uyẹ Josẹf+ u no abọ Ethẹ Jọdan nọ o rrọ Jẹriko kpohọ ame nọ ọ rrọ ofẹ ovatha-ọre Jẹriko, o tẹ nyaruọ udhude nọ u no Jẹriko ze kpohọ ubrotọ igbehru nọ o rrọ Bẹtẹl.+ 2 U no Bẹtẹl nọ o kẹle Lọz ze jẹ nyavrẹ rite obọ uwhru ahwo uyẹ Akae evaọ Atarọt, 3 o tẹ nya rri ofẹ ukiediwo-ọre kpobọ uwhru ahwo Jaflẹt je rite ugbo obọ uwhru Bẹt-horọn Obotọ+ gbe Gizẹ,+ u te kuhọ evaọ obọ abade na.

4 Ahwo uyẹ Josẹf,+ Manasẹ avọ Ifremu, a te mu ẹkwotọ rai họ ẹria.+ 5 Enẹ uwhru ẹkwotọ inuwou uyẹ Ifremu o jọ: Uwhru ẹkwotọ ukuoriọ rai evaọ ofẹ ovatha-ọre o jọ Atarọt-ada+ rite ugbo obọ Bẹt-horọn Obehru,+ 6 yọ uwhru na u te obọ abade na. Mikmitat+ o jọ ofẹ ẹkpẹlobọ ovatha-ọre, yọ uwhru na o nya ghelie họ evaọ ofẹ ovatha-ọre kpohọ Teanat-shailo, o tẹ nyavrẹ no ofẹ ovatha-ọre na kpohọ Janoa. 7 O tẹ nya no Janoa kpobọ Atarọt gbe Neara, je te obọ Jẹriko,+ o tẹ nyavrẹ rite Ethẹ Jọdan. 8 Uwhru na o nyaharo no Tapua+ vrẹ rri ofẹ ukiediwo-ọre kpohọ Uto Kena, u te kuhọ evaọ obọ abade na.+ Onana họ ẹkwotọ ukuoriọ inuwou orua Ifremu; 9 ahwo uyẹ Ifremu a tẹ jẹ jọ udevie ukuoriọ Manasẹ wo ikpewho jọ,+ ikpewho na kpobi avọ iwhre rai.

10 Rekọ a le ahwo Kenan nọ a jẹ rria Gizẹ hẹ,+ ahwo Kenan a gbẹ be rria kugbe ahwo Ifremu rite ẹdẹ inẹnẹ na,+ yọ a be rehọ ai ru iruo ọgbahọ.+

17 Kẹsena ẹta na+ o te kie fihọ kẹ orua Manasẹ,+ keme ọye họ ọmọ ọsosuọ Josẹf.+ Nọ orọnọ Meka,+ ọmọ ọsosuọ Manasẹ gbe ọsẹ Giliad ọ jọ ọgbaẹmo na, a tẹ kẹe ẹkwotọ Giliad avọ Beshan.+ 2 Ẹta na o te kie fihọ kẹ inuwou uyẹ Manasẹ nọ i kiọkọ ọvuọvo, emezae Abi-iza,+ emezae Hilẹk, emezae Azriẹl, emezae Shẹkẹm, emezae Hifa, gbe emezae Shimaida. Ahwo nana họ ezae nọ i wuzou inuwou nọ e rrọ uyẹ Manasẹ, ọmọzae Josẹf.+ 3 Rekọ Zẹlofẹhad+ ọmọzae Hifa, ọmọzae Giliad, ọmọzae Meka, ọmọzae Manasẹ, o yẹ emezae he, emetẹ ọvo o yẹ. Edẹ emetẹ riẹ na họ: Mala, Noa, Họgla, Milka gbe Tẹza. 4 Fikiere a tẹ nyabru Ẹlieza+ ozerẹ na gbe Joshua ọmọzae Nọn gbe enọ i wuzou na, a tẹ ta nọ: “Jihova họ ọnọ ọ ta kẹ Mosis nọ ọ kẹ omai ukuoriọ evaọ udevie imoni mai.”+ Fikiere ọ tẹ kẹ ae ukuoriọ evaọ udevie imoni rai wọhọ epanọ Jihova ọ ta.+

5 Ekẹ otọ ikpe efa e jariẹ nọ a ma kẹ Manasẹ u te no ẹkwotọ Giliad avọ Beshan na no, enọ e jọ abọdekọ* Jọdan,+ 6 keme a kẹ emetẹ orua Manasẹ ẹkwotọ ukuoriọ re wọhọ epanọ a kẹ emezae riẹ, ẹkwotọ Giliad o te zihe ruọ ẹkwotọ ahwo uyẹ Manasẹ nọ i kiọkọ.

7 Uwhru ẹkwotọ Manasẹ u no Asha rite Mikmitat,+ onọ o rẹriẹ ovao ku Shẹkẹm,+ yọ uwhru na o nyaharo rri ofẹ obọze ovatha-ọre* kpohọ ẹkwotọ ahwo nọ a be rria Ẹn-Tapua. 8 Ẹkwotọ Tapua+ u te zihe ruọ orọ Manasẹ, rekọ ahwo uyẹ Ifremu họ enọ i wo okpẹwho Tapua nọ o jọ uwhru Manasẹ. 9 Uwhru na o nyavrẹ kpobọ Uto Kena evaọ ofẹ obọze ovatha-ọre uto na. Ifremu o wo ikpewho jọ re evaọ usu ikpewho Manasẹ,+ yọ uwhru Manasẹ o jọ ofẹ ẹkpẹlobọ ovatha-ọre uto na, u te kuhọ evaọ obọ abade na.+ 10 Ifremu o wo otọ obọze ovatha-ọre na, Manasẹ o te wo otọ ẹkpẹlobọ ovatha-ọre na, abade na ọ jọ uwhru otọ Manasẹ,+ yọ otọ Manasẹ* evaọ ofẹ ẹkpẹlobọ ovatha-ọre o nya duwu orọ Asha, evaọ ofẹ ovatha-ọre o tẹ nya duwu orọ Isaka.

11 A jọ ekwotọ Isaka avọ Asha kẹ Manasẹ okpẹwho Bẹt-shian avọ ewho esese riẹ,* Ibliẹm+ avọ ewho esese riẹ, Dọr avọ ahwo nọ a be rriae+ gbe ewho esese riẹ, Ẹn-dọr+ avọ ahwo nọ a be rriae gbe ewho esese riẹ, Teanak+ avọ ahwo nọ a be rriae gbe ewho esese riẹ, Mẹgido avọ ahwo nọ a be rriae gbe ewho esese riẹ. Ọye o wo ekwotọ ikpehru esa na.

12 Rekọ ahwo uyẹ Manasẹ a sae rehọ ikpewho nana ha; keme ahwo Kenan na a dadamu nọ a re no ẹkwotọ nana ha.+ 13 Nọ ahwo Izrẹl a dowọ muotọ ziezi no, a tẹ jẹ rehọ ahwo Kenan na ru iruo ọgbahọ,+ rekọ a le rai no* ẹkwotọ na riẹriẹriẹ hẹ.+

14 Ahwo uyẹ Josẹf a tẹ ta kẹ Joshua nọ: “Fikieme whọ rọ kẹ omai* ẹkwotọ ọvo jẹ ma ẹkẹ otọ ọvo kẹ omai* re o jọ ukuoriọ mai?+ Ma rrọ buobu, keme Jihova ọ be ghale omai rite inẹnẹ na.”+ 15 Joshua ọ tẹ kpahe kẹ ae nọ: “Otẹrọnọ wha rrọ buobu ere, wha nya kpobọ owhawho na re wha kpe oria jọ kẹ omarai evaọ ẹkwotọ ahwo Pẹriz+ gbe ahwo Rẹfeyẹm na,+ nọ orọnọ ubrotọ igbehru Ifremu+ na ọ keke hrọ kẹ owhai na.” 16 Kẹsena ahwo uyẹ Josẹf na a tẹ ta nọ: “Ubrotọ igbehru na u te kẹ omai hi, yọ ahwo Kenan kpobi nọ a be rria ẹkwotọ ukiekpotọ* na a wo ekẹkẹ ẹmo+ nọ etẹ rai i wo egbọdọ,* te enọ e rrọ Bẹt-shian+ avọ ewho esese riẹ* gbe enọ e rrọ Ukiekpotọ* Jezrẹl.”+ 17 Fikiere Joshua ọ tẹ ta ẹme nana kẹ ahwo uwou Josẹf, koyehọ Ifremu avọ Manasẹ, inọ: “Wha rrọ buobu, wha tẹ jẹ goma gaga. Ẹkwotọ ọvo a rẹ ghale kẹ owhai hi,+ 18 a te kẹ owhai ubrotọ igbehru na kugbe re.+ Dede nọ owhawho o rrọ, wha ti kpei, o vẹ te jọ oka ẹkwotọ rai. Wha ti le ahwo Kenan na no dede nọ a rrọ gaga je wo ekẹkẹ ẹmo nọ etẹ rai i wo egbọdọ.”*+

18 Kẹsena ogbotu ahwo Izrẹl na kpobi a te kokohọ Shailo,+ a tẹ whẹ uwou-udhu omakugbe na họ evaọ etẹe,+ keme evaọ oke yena yọ a fi otọ na kparobọ no.+ 2 Rekọ erua ihrẹ i gbe kiọkọ evaọ Izrẹl nọ a re ghale ẹkwotọ ukuoriọ kẹ hẹ. 3 Fikiere Joshua ọ tẹ ta kẹ ahwo Izrẹl na nọ: “Ẹvẹ wha rẹ hẹrẹ kri te re wha tẹ nyae rehọ ẹkwotọ nọ Jihova Ọghẹnẹ esẹ-esẹ rai ọ kẹ owhai?+ 4 Wha kẹ omẹ ezae esa evaọ orua kpobi nọ me re vi kpohọ ẹkwotọ na; a vẹ nya ẹkwotọ na soso wariẹ jẹ mae oghẹrẹ nọ orua kpobi u ti ro wo ọvuọ ukuoriọ riẹ. Kẹsena a ve zihe bru omẹ ze. 5 A rẹ ghale iẹe kpohọ ekẹ ihrẹ fihọ omoma rai.+ Orua Juda o rẹ gbẹ jọ ẹkwotọ riẹ evaọ ofẹ obọze ovatha-ọre,+ yọ ahwo uwou Josẹf a rẹ gbẹ jọ ẹkwotọ rai evaọ ofẹ ẹkpẹlobọ ovatha-ọre.+ 6 Rọkẹ owhai, wha ma ẹkwotọ na ekẹ ihrẹ, re wha nyaze ti dhesẹ oghẹrẹ nọ wha ma rai kẹ omẹ,+ mẹ vẹ te jọ etenẹ ma ẹta kẹ owhai evaọ aro Jihova Ọghẹnẹ mai. 7 Rekọ a te ghale ẹkwotọ kẹ ahwo Livae evaọ udevie rai hi,+ keme ọkwa-ozerẹ nọ Jihova ọ kẹ rai họ ukuoriọ rai;+ yọ orua Gad, orua Rubẹn gbe abọvo orua Manasẹ+ a jọ ofẹ ovatha-ọre Jọdan wo ukuoriọ rai no, onọ Mosis odibo Jihova ọ kẹ rai.”

8 Ezae na e tẹ wọ re a nya, Joshua ọ tẹ ta kẹ enọ e te ma otọ na nọ: “Wha nya re wha nya ẹkwotọ na soso duwu jẹ mae epanọ a te rọ ghale iẹe, wha ve zihe bru omẹ ze, mẹ vẹ te jọ aro Jihova ma ẹta kẹ owhai evaọ Shailo.”+ 9 Fikiere ezae na e tẹ nyavrẹ, a tẹ nya ẹkwotọ na wariẹ, a tẹ rehọ ikpewho rọ mae fihọ eko ihrẹ, yọ a bi kere ai fihọ obe. Nọ a ru ere no a te zihe bru Joshua ze evaọ evuẹ na evaọ Shailo. 10 Joshua ọ tẹ jọ Shailo ma ẹta kẹ ae evaọ aro Jihova.+ Etẹe Joshua ọ jọ ghale ẹkwotọ na kpohọ ọvuọ ẹkẹ riẹ kẹ ahwo Izrẹl.+

11 Ẹta na o te kie fihọ kẹ inuwou orua Bẹnjamin, yọ ẹkwotọ nọ a ghale kẹ ae o jọ udevie ẹkwotọ ahwo Juda+ avọ ahwo Josẹf.+ 12 Uwhru ẹkwotọ rai evaọ ofẹ ẹkpẹlobọ ovatha-ọre u muhọ evaọ Jọdan, o tẹ nyavrẹ kpohọ ukuwhrẹrẹ Jẹriko+ evaọ ofẹ ẹkpẹlobọ ovatha-ọre, jẹ nyavrẹ kpohọ ugbehru nọ o rrọ ofẹ ukiediwo-ọre rite obọ udhude Bẹt-evẹn.+ 13 Uwhru na o nyaharo kpobọ Lọz, evaọ ukuwhrẹrẹ Lọz nọ o rrọ ofẹ obọze ovatha-ọre, koyehọ Bẹtẹl;+ uwhru na o tẹ gbẹ nyavrẹ kpobọ Atarọt-ada+ evaọ ugbehru nọ o rrọ obọze ovatha-ọre Bẹt-horọn Obotọ.+ 14 A ka oka họ uwhru na evaọ ofẹ ukiediwo-ọre, o tẹ nya ghelie họ rri obọze ovatha-ọre, u te no ugbehru nọ o rẹriẹ ovao ku Bẹt-horọn kpohọ obọze ovatha-ọre; u te kuhọ evaọ Kiriat-bale, koyehọ Kiriat-jierim,+ okpẹwho Juda. Onana họ ofẹ ukiediwo-ọre ẹkwotọ na.

15 Abọ obọze ovatha-ọre uwhru na u no obọ oka Kiriat-jierim vrẹ, yọ o nya rri obọ ukiediwo-ọre; o tẹ nyavrẹ kpobọ eyeri-ame Nẹftoa.+ 16 Uwhru na o nyavrẹ kpobọ oka ugbehru nọ o rẹriẹ ovao ku Ukiekpotọ Ọmọzae Hinọm,+ onọ o rrọ Ukiekpotọ* Rẹfeyẹm+ evaọ ofẹ ẹkpẹlobọ ovatha-ọre, o tẹ jẹ nyavrẹ kpobọ Ukiekpotọ Hinọm, je kpobọ ukuwhrẹrẹ ahwo Jebus+ evaọ obọze ovatha-ọre, o tẹ jẹ nya kpobọ Ẹn-rogẹl.+ 17 A tẹ ka oka họ iẹe evaọ ofẹ ẹkpẹlobọ ovatha-ọre, yọ u te obọ Ẹn-shimẹsh je no etẹe vrẹ kpobọ Gẹlaelọt nọ o rrọ aro edhere-ukpehru Adọmim,+ o tẹ nyavrẹ kpobọ utho+ Bohan+ ọmọzae Rubẹn. 18 O tẹ gbẹ nyaharo kpobọ ukuwhrẹrẹ nọ o rrọ ofẹ ẹkpẹlobọ ovatha-ọre evaọ aro Araba* na, o tẹ nyate Araba* na. 19 Uwhru na o tẹ gbẹ nyaharo kpobọ ofẹ ẹkpẹlobọ ovatha-ọre ọrọ ukuwhrẹrẹ nọ o rrọ Bẹt-họgla,+ u te kuhọ evaọ ofẹ ẹkpẹlobọ ovatha-ọre Abade Uwhei*+ na nọ o rrọ oka ofẹ obọze ovatha-ọre Jọdan. Onana o jọ uwhru otọ na evaọ ofẹ obọze ovatha-ọre. 20 Yọ Ethẹ Jọdan o jọ uwhru riẹ evaọ ofẹ ovatha-ọre. Onana o jọ ukuoriọ inuwou uyẹ Bẹnjamin kpobi, wọhọ epanọ iwhru riẹ i dhesẹ via evaọ ofẹ kpobi.

21 Enana họ ikpewho inuwou orua Bẹnjamin: Jẹriko, Bẹt-họgla, Imẹk-kizẹz, 22 Bẹt-araba,+ Zẹmareyẹm, Bẹtẹl,+ 23 Avim, Pera, Ọfra, 24 Kifa-amonae, Ọfnae, gbe Giba+—ikpewho ikpegbivẹ avọ iwhre rai.

25 Efa họ Gibiọn,+ Rema, Biẹrọt, 26 Mizpẹ, Kẹfaera, Mozah, 27 Rikẹm, Epiẹl, Tarala, 28 Zilah,+ Họ-ilẹf, Jebusi, koyehọ Jerusalẹm,+ Gibiah,+ gbe Kiriat—ikpewho ikpegbene avọ iwhre rai.

Onana o jọ ukuoriọ inuwou Bẹnjamin kpobi.

19 Kẹsena ẹta avọ ivẹ+ o te kie fihọ kẹ Simiọn,+ koyehọ inuwou orua Simiọn kpobi. Yọ ukuoriọ rai o jọ evaọ udevie ukuoriọ Juda.+ 2 Eria ukuoriọ rai họ: Biẹ-shiba+ avọ Shiba, Moleda,+ 3 Heza-shual,+ Belah, Izẹm,+ 4 Ẹltolad,+ Bitọl, Họma, 5 Ziklag,+ Bẹt-makabọt, Heza-susa, 6 Bẹt-lebeyọt,+ gbe Sheruhẹn—ikpewho ikpegbesa avọ iwhre rai. 7 Efa họ: Eyin, Rimọn, Ita, gbe Ashan+—ikpewho ene avọ iwhre rai; 8 jegbe iwhre kpobi nọ e wariẹ ikpewho nana họ rite ugbo obọ Bealat-biẹ, koyehọ Rema nọ o rrọ obọze ovatha-ọre. Eria nana e jọ ukuoriọ inuwou orua Simiọn kpobi. 9 Evaọ ekwotọ nọ a ma kẹ Juda a jọ kẹ uyẹ Simiọn ukuoriọ rai keme ẹkwotọ nọ a kẹ Juda ọ rro ga hrọ kẹ ae. Fikiere uyẹ Simiọn o tẹ jọ evaọ udevie ukuoriọ rai wo ẹkwotọ.+

10 Ẹta avọ esa+ o te kie fihọ kẹ inuwou uyẹ Zẹbulọn kpobi,+ yọ uwhru ukuoriọ rai u theri te ugbo obọ Serid. 11 Uwhru rai o nya rri ofẹ ukiediwo-ọre kpobọ Mariẹl je rite obọ Dabeshẹt, kẹsena o tẹ nya kpobọ ukiekpotọ* nọ o rrọ aro Jọkniam. 12 U te no Serid nya rri ofẹ ovatha-ọre, kpobọ uwhru Kislọt-tebọ je no etẹe nya kpobọ Daberat,+ kẹsena o tẹ nya kpobọ Jefaya. 13 O tẹ nyaharo no etẹe vrẹ rri ofẹ ovatha-ọre kpohọ Gat-hifa,+ te obọ Ẹt-kezin, je no etẹe kpobọ Rimọn, yọ u te obọ Niya. 14 Uwhru na o tẹ nyae wariẹ họ evaọ ẹkpẹlobọ ovatha-ọre kpohọ Hanatọn, u te kuhọ evaọ Ukiekpotọ Ifta-ẹl, 15 gbe Katat, Nahalal, Shimrọn,+ Aidala, gbe Bẹtlẹhẹm+—ikpewho ikpegbivẹ avọ iwhre rai. 16 Onana o jọ ukuoriọ inuwou uyẹ Zẹbulọn kpobi.+ Ae a wo ikpewho nana avọ iwhre rai.

17 Ẹta avọ ene+ o te kie fihọ kẹ Isaka,+ koyehọ inuwou uyẹ Isaka kpobi. 18 Uwhru rai o nya rri obọ Jezrẹl,+ Kẹsulọt, Shunẹm,+ 19 Hafareyẹm, Shayọn, Anaherat, 20 Rabit, Kishiọn, Ibẹz, 21 Rimẹt, Ẹn-ganim,+ Ẹn-hada, gbe Bẹt-pazẹz. 22 Uwhru na u te obọ Tebọ+ gbe Shehazuma gbe Bẹt-shimẹsh, yọ uwhru rai u kuhọ evaọ Jọdan—ikpewho ikpegbezeza avọ iwhre rai. 23 Onana o jọ ukuoriọ inuwou orua Isaka kpobi,+ ikpewho na avọ iwhre rai.

24 Ẹta avọ isoi+ o te kie fihọ kẹ Asha,+ koyehọ inuwou orua Asha kpobi. 25 Uwhru ẹkwotọ rai họ Hẹlkat,+ Helae, Bitan, Akshaf, 26 Alamẹlẹk, Emad, Maeshal. Uwhru na u te obọ ofẹ ukiediwo-ọre Kamẹl,+ u te je te obọ Shaehọ-libnat, 27 o tẹ nya zihe kpohọ ofẹ ovatha-ọre Bẹt-degọn, u te te obọ Zẹbulọn, gbe Ukiekpotọ Ifta-ẹl nọ o rrọ ofẹ ẹkpẹlobọ ovatha-ọre, u te kpobọ Bẹt-imẹk gbe Niayẹl, o tẹ nya kpobọ Kebul nọ o rrọ ẹkpẹlobọ, 28 o tẹ jẹ nya rri obọ Ibrọn, Rihọb, Hamọn, gbe Kena je rite ugbo obọ Saedọn Ologbo.+ 29 Uwhru na u te zihe kpobọ Rema je rite ugbo obọ okpẹwho Taya nọ a di ogba wariẹ họ.*+ Kẹsena uwhru na u te zihe kpobọ Hosa, u te kuhọ evaọ obọ abade nọ ọ rrọ ẹkwotọ Akzib, 30 Ọmah, Efẹk,+ gbe Rihọb+—ikpewho udhegbivẹ avọ iwhre rai. 31 Onana o jọ ukuoriọ inuwou orua Asha,+ ikpewho na avọ iwhre rai.

32 Ẹta avọ ezeza+ o te kie fihọ kẹ uyẹ Naftalae, koyehọ inuwou uyẹ Naftalae kpobi. 33 Uwhru rai u muhọ evaọ Hilẹf gbe oria nọ ure ulogbo o rrọ evaọ Zeananim,+ kpobọ Adami-nikẹb gbe Jabniẹl rite ugbo obọ Lakkọm; u te kuhọ evaọ Ethẹ Jọdan. 34 Uwhru na u te zihe kpohọ ofẹ ukiediwo-ọre kpobọ Aznọt-tebọ, u te je no etẹe kpobọ Hukọk je te obọ Zẹbulọn evaọ ofẹ obọze ovatha-ọre, u te je te obọ Asha evaọ ofẹ ukiediwo-ọre je te obọ otọ Juda nọ o kẹle Ethẹ Jọdan evaọ ofẹ ovatha-ọre. 35 Yọ ikpewho nọ a di ogba wariẹ họ* ena: Zidim, Zẹ, Hamat,+ Rakat, Kinẹrẹt, 36 Adama, Rema, Hezọ,+ 37 Kidẹsh,+ Ẹdrae, Ẹn-hazọ, 38 Yaerọn, Migdal-ẹl, Horẹm, Bẹt-enat, gbe Bẹt-shimẹsh+—ikpewho ikpegbizii avọ iwhre rai. 39 Onana o jọ ukuoriọ inuwou orua Naftalae kpobi,+ ikpewho na avọ iwhre rai.

40 Ẹta avọ ihrẹ+ o te kie fihọ kẹ inuwou orua Dan+ kpobi. 41 Uwhru ẹkwotọ ukuoriọ rai họ Zora,+ Ẹshtaọl, Iyẹr-shimẹsh, 42 Shealabin,+ Aijalọn,+ Itla, 43 Ilọn, Timnah,+ Ekrọn,+ 44 Ẹlteka, Gibẹtọn,+ Bealat, 45 Jihud, Bẹnẹ-birak, Gat-rimọn,+ 46 Me-jakọn, gbe Rakọn, nọ uwhru riẹ u rri Jọpa.+ 47 Rekọ ẹkwotọ Dan ọ keke hrọ kẹ ae.+ Fikiere a tẹ wọ ẹmo kpohọ Lishẹm,+ a tẹ rehọ ọgbọdọ kpe ahwo nọ a rrọ eva riẹ, a te fi ei kparobọ. A tẹ rehọ ẹkwotọ na je mu ei họ ẹria. A te nwene odẹ Lishẹm kpohọ Dan, odẹ ọsẹ-esẹ rai.+ 48 Onana o jọ ukuoriọ inuwou orua Dan kpobi. Ae a wo ikpewho na avọ iwhre rai.

49 Ere a ro ku ẹghale ewho ukuoriọ na họ. Kẹsena ahwo Izrẹl a tẹ kẹ Joshua ọmọzae Nọn ukuoriọ evaọ udevie rai. 50 A ru wọhọ epanọ Jihova ọ ta kẹ ae, a kẹ riẹ okpẹwho nọ ọ yare, okpẹwho Timnat-sira+ evaọ ubrotọ igbehru Ifremu, ọ tẹ bọ okpẹwho na je mu ei họ ẹria.

51 Enana họ ekwotọ ukuoriọ nọ Ẹlieza ozerẹ na, Joshua ọmọzae Nọn, gbe enọ i wuzou inuwou erua Izrẹl a rọ ẹta-ọma ghale+ evaọ Shailo+ evaọ aro Jihova, evaọ obọ unuẹthẹ uwou-udhu omakugbe na.+ Ere a ro ku ẹghale ẹkwotọ na họ.

20 Jihova ọ tẹ ta kẹ Joshua nọ: 2 “Ta kẹ ahwo Izrẹl nọ, ‘Wha salọ ikpewho adhẹzọ kẹ omarai+ wọhọ epanọ mẹ rehọ Mosis ta kẹ owhai, 3 re ohwo nọ o keke aro fihọ kpe ohwo ho* hayo nọ ọ rehọ ethobọ kpe ohwo* ọ vẹ dhẹ kpohọ ae. Ikpewho na e rẹ te jọ oria adhẹzọ kẹ owhai no obọ ọnọ ọ be gwọlọ kioja ohwo nọ a kpe na.+ 4 Ọ rẹ dhẹ kpohọ ọvo jọ evaọ ikpewho nana,+ o ve dikihẹ aro unuẹthẹ okpẹwho na,+ o ve gu ẹkẹunu riẹ kẹ ekpako okpẹwho yena. Kẹsena a vẹ rehọ iẹe fihọ okpẹwho na jẹ kẹe oria nọ ọ rẹ jọ, ọ vẹ rria kugbe ae. 5 Otẹrọnọ ọnọ ọ gwọlọ kioja ohwo nọ a kpe na o le rie ze, a re siobọno ohwo nọ o kpe ohwo na kẹe he, keme ethobọ o ro kpe ọrivẹ riẹ, o mukpahe iẹe vẹre he.+ 6 Okpẹwho yena ọ rẹ rria bẹsenọ a rẹ rehọ iẹe guẹdhọ evaọ aro ogbotu na,+ ọ vẹ jọ okpẹwho na bẹsenọ ohwo nọ ọ rrọ ozerẹ okpehru+ evaọ oke yena o re whu no. Kẹsena ohwo nọ o kpe ohwo na o ve zihe kpohọ okpẹwho nọ ọ dhẹ no ze, ọ vẹ ruọ eva uwou riẹ evaọ okpẹwho na.’”+

7 Fikiere a te ru eria nana fihọ oria ọrẹri* fiki ẹjiroro yena: Kidẹsh+ nọ o rrọ Galili evaọ ubrotọ igbehru Naftalae, Shẹkẹm+ nọ o rrọ ubrotọ igbehru Ifremu, gbe Kiriat-aba,+ koyehọ Hebrọn, nọ o rrọ ubrotọ igbehru Juda. 8 Evaọ ubrotọ Jọdan nọ o rrọ ofẹ ovatha-ọre Jẹriko, a jọ orua Rubẹn salọ Biza+ nọ o rrọ udhude evaọ ẹkwotọ ukpehru opraprara na, a jọ orua Gad salọ Remọt+ nọ o rrọ Giliad, a tẹ jẹ jọ orua Manasẹ+ salọ Golan+ nọ o rrọ Beshan.

9 Enana i te zihe ruọ ikpewho nọ a fihọ rọkẹ ahwo Izrẹl kpobi gbe erara nọ e be rria udevie rai, re ohwo kpobi nọ ọ rehọ ethobọ kpe ohwo* ọ vẹ sae dhẹ kpohọ ọjọ,+ re ohwo nọ ọ gwọlọ kioja ohwo nọ a kpe na o gbe kpei no ho taure a tẹ te rehọ iẹe guẹdhọ evaọ aro ogbotu na.+

21 Enọ i wuzou inuwou abọ ọsẹ evaọ orua Livae a tẹ nyabru Ẹlieza+ ozerẹ na, Joshua ọmọzae Nọn gbe enọ i wuzou inuwou abọ ọsẹ erọ erua Izrẹl, 2 a tẹ jọ Shailo+ evaọ ẹkwotọ Kenan ta kẹ ae nọ: “Jihova ọ rọ ẹkwoma Mosis jie uzi inọ a kẹ omai ikpewho nọ ma rẹ rria, gbe etọ nọ erao mai e rẹ jọ re ẹbe.”+ 3 Fikiere ahwo Izrẹl a tẹ jọ ukuoriọ rai kẹ ahwo orua Livae ikpewho nana+ gbe etọ rai nọ erao e rẹ jọ re ẹbe wọhọ epanọ Jihova ọ ta.+

4 Ẹta ọsosuọ o te kie fihọ kẹ iviuwou nọ e rrọ unuwou Kohat,+ a tẹ jọ orua Juda,+ orua Simiọn,+ gbe orua Bẹnjamin+ ghale* ikpewho ikpegbesa kẹ ahwo orua Livae nọ a rrọ ahwo uyẹ Erọn ozerẹ na.

5 A tẹ jọ inuwou orua Ifremu,+ orua Dan, gbe abọvo orua Manasẹ+ ghale* ikpewho ikpe kẹ ahwo unuwou Kohat nọ a kiọkọ.

6 A jọ inuwou orua Isaka, orua Asha, orua Naftalae, gbe abọvo orua Manasẹ nọ o rrọ ẹkwotọ Beshan+ ghale ikpewho ikpegbesa kẹ unuwou Gẹshọn.+

7 A tẹ jọ orua Rubẹn, orua Gad, gbe orua Zẹbulọn+ kẹ inuwou Mẹrarae+ kpobi ikpewho ikpegbivẹ.

8 Ahwo Izrẹl a tẹ rọ ẹta-ọma ghale ikpewho nana gbe etọ rai nọ erao e rẹ jọ re ẹbe kẹ ahwo orua Livae, nwane wọhọ epanọ Jihova ọ rehọ ẹkwoma Mosis jie uzi.+

9 Fikiere a tẹ jọ orua Juda gbe orua Simiọn kẹ ae ikpewho nana nọ a jọ etenẹ fodẹ odẹ rai na,+ 10 a tẹ rehọ ae kẹ emọ Erọn nọ i no unuwou Kohat evaọ orua Livae ze, keme ae ẹta ọsosuọ na o kie fihọ kẹ. 11 A kẹ rai Kiriat-aba+ (Aba họ ọsẹ Anak), koyehọ Hebrọn,+ evaọ ubrotọ igbehru Juda, gbe etọ riẹ nọ erao e rẹ jọ re ẹbe. 12 Rekọ a tẹ rọ itẹwọ okpẹwho na avọ iwhre riẹ kẹ Kelẹb ọmọzae Jefunẹ re o jọ ukuoriọ riẹ.+

13 A tẹ rehọ okpẹwho adhẹzọ nọ ohwo nọ o kpe ohwo ọ rẹ dhẹ kpohọ,+ koyehọ Hebrọn+ avọ etọ riẹ nọ erao e rẹ jọ re ẹbe kẹ emezae Erọn ozerẹ na, a tẹ jẹ kẹ ae Libna+ avọ etọ riẹ nọ erao e rẹ jọ re ẹbe, 14 Jata+ avọ etọ riẹ nọ erao e rẹ jọ re ẹbe, Ẹshtẹmoa+ avọ etọ riẹ nọ erao e rẹ jọ re ẹbe, 15 Holọn+ avọ etọ riẹ nọ erao e rẹ jọ re ẹbe, Diba+ avọ etọ riẹ nọ erao e rẹ jọ re ẹbe, 16 Eyin+ avọ etọ riẹ nọ erao e rẹ jọ re ẹbe, Jọta+ avọ etọ riẹ nọ erao e rẹ jọ re ẹbe, gbe Bẹt-shimẹsh avọ etọ riẹ nọ erao e rẹ jọ re ẹbe—ikpewho izii a rehọ no erua ivẹ nana ze.

17 Enana a rehọ no orua Bẹnjamin ze: Gibiọn+ avọ etọ riẹ nọ erao e rẹ jọ re ẹbe, Giba avọ etọ riẹ nọ erao e rẹ jọ re ẹbe,+ 18 Anatọt+ avọ etọ riẹ nọ erao e rẹ jọ re ẹbe, Almọn avọ etọ riẹ nọ erao e rẹ jọ re ẹbe—ikpewho ene.

19 Ikpewho ikpegbesa avọ etọ rai nọ erao e rẹ jọ re ẹbe a kẹ ahwo uyẹ Erọn, izerẹ na.+

20 A tẹ jọ orua Ifremu rehọ ẹta-ọma kẹ ahwo inuwou Kohat nọ a kiọkọ evaọ orua Livae ikpewho. 21 A kẹ rai okpẹwho adhẹzọ nọ ohwo nọ o kpe ohwo ọ rẹ dhẹ kpohọ,+ koyehọ Shẹkẹm+ avọ etọ riẹ nọ erao e rẹ jọ re ẹbe evaọ ubrotọ igbehru Ifremu, a tẹ jẹ kẹ ae Gizẹ+ avọ etọ riẹ nọ erao e rẹ jọ re ẹbe, 22 Kibzeyẹm avọ etọ riẹ nọ erao e rẹ jọ re ẹbe, gbe Bẹt-horọn+ avọ etọ riẹ nọ erao e rẹ jọ re ẹbe—ikpewho ene.

23 Enana a rehọ no orua Dan ze: Ẹlteka avọ etọ riẹ nọ erao e rẹ jọ re ẹbe, Gibẹtọn avọ etọ riẹ nọ erao e rẹ jọ re ẹbe, 24 Aijalọn+ avọ etọ riẹ nọ erao e rẹ jọ re ẹbe, Gat-rimọn avọ etọ riẹ nọ erao e rẹ jọ re ẹbe—ikpewho ene.

25 Enana a rehọ no abọvo orua Manasẹ ze: Teanak+ avọ etọ riẹ nọ erao e rẹ jọ re ẹbe, gbe Gat-rimọn avọ etọ riẹ nọ erao e rẹ jọ re ẹbe—ikpewho ivẹ.

26 Ikpewho ikpe avọ etọ rai nọ erao e rẹ jọ re ẹbe a kẹ iviuwou nọ i kiọkọ evaọ unuwou Kohat.

27 A tẹ jọ abọvo orua Manasẹ kẹ iviuwou nọ e rrọ unuwou Gẹshọn+ evaọ orua Livae okpẹwho adhẹzọ nọ ohwo nọ o kpe ohwo ọ rẹ dhẹ kpohọ, koyehọ Golan+ nọ o rrọ Beshan avọ etọ riẹ nọ erao e rẹ jọ re ẹbe, gbe Biẹshtera avọ etọ riẹ nọ erao e rẹ jọ re ẹbe—ikpewho ivẹ.

28 Enana a rehọ no orua Isaka ze:+ Kishiọn avọ etọ riẹ nọ erao e rẹ jọ re ẹbe, Daberat+ avọ etọ riẹ nọ erao e rẹ jọ re ẹbe, 29 Jamut avọ etọ riẹ nọ erao e rẹ jọ re ẹbe, gbe Ẹn-ganim avọ etọ riẹ nọ erao e rẹ jọ re ẹbe—ikpewho ene.

30 Enana a rehọ no orua Asha ze:+ Maeshal avọ etọ riẹ nọ erao e rẹ jọ re ẹbe, Abdọn avọ etọ riẹ nọ erao e rẹ jọ re ẹbe, 31 Hẹlkat+ avọ etọ riẹ nọ erao e rẹ jọ re ẹbe, gbe Rihọb+ avọ etọ riẹ nọ erao e rẹ jọ re ẹbe—ikpewho ene.

32 Enana a rehọ no orua Naftalae ze: okpẹwho adhẹzọ+ nọ ohwo nọ o kpe ohwo ọ rẹ dhẹ kpohọ, koyehọ Kidẹsh+ evaọ Galili avọ etọ riẹ nọ erao e rẹ jọ re ẹbe, Hamọt-dọr avọ etọ riẹ nọ erao e rẹ jọ re ẹbe, gbe Katan avọ etọ riẹ nọ erao e rẹ jọ re ẹbe—ikpewho esa.

33 Ikpewho ikpegbesa avọ etọ rai nọ erao e rẹ jọ re ẹbe a kẹ iviuwou nọ e rrọ unuwou Gẹshọn.

34 A tẹ jọ orua Zẹbulọn+ kẹ iviuwou nọ i kiọkọ evaọ unuwou Mẹrarae+ nọ o rrọ orua Livae ikpewho nana: Jọkniam+ avọ etọ riẹ nọ erao e rẹ jọ re ẹbe, Kata avọ etọ riẹ nọ erao e rẹ jọ re ẹbe, 35 Dimna avọ etọ riẹ nọ erao e rẹ jọ re ẹbe, gbe Nahalal+ avọ etọ riẹ nọ erao e rẹ jọ re ẹbe—ikpewho ene.

36 Enana a rehọ no orua Rubẹn ze: Biza+ avọ etọ riẹ nọ erao e rẹ jọ re ẹbe, Jehaz avọ etọ riẹ nọ erao e rẹ jọ re ẹbe,+ 37 Kẹdemọt avọ etọ riẹ nọ erao e rẹ jọ re ẹbe, gbe Mẹfayat avọ etọ riẹ nọ erao e rẹ jọ re ẹbe—ikpewho ene.

38 Enana a rehọ no orua Gad ze:+ okpẹwho adhẹzọ nọ ohwo nọ o kpe ohwo ọ rẹ dhẹ kpohọ, koyehọ, Remọt evaọ Giliad+ avọ etọ riẹ nọ erao e rẹ jọ re ẹbe, Mehaneyẹm+ avọ etọ riẹ nọ erao e rẹ jọ re ẹbe, 39 Hẹshbọn+ avọ etọ riẹ nọ erao e rẹ jọ re ẹbe, gbe Jeza+ avọ etọ riẹ nọ erao e rẹ jọ re ẹbe—aikpobi ikpewho ene.

40 Ikpewho ikpegbivẹ avọ etọ rai nọ erao e rẹ jọ re ẹbe a kẹ iviuwou nọ e rrọ unuwou Mẹrarae, enọ i kiọkọ evaọ orua Livae.

41 Ikpewho udhuvẹ-gberee avọ etọ rai nọ erao e rẹ jọ re ẹbe a jọ ukuoriọ emọ Izrẹl kẹ orua Livae.+ 42 Ikpewho nana i wo ọvuọ etọ rai nọ erao e rẹ jọ re ẹbe nọ e wariẹ e rai họ—ere ikpewho na kpobi e jọ.

43 Ere Jihova ọ rọ kẹ ahwo Izrẹl ẹkwotọ na kpobi, onọ o duwu iyei nọ ọ te kẹ esẹ-esẹ rai na,+ a tẹ rehọ ẹkwotọ na, a te mu ei họ ẹria.+ 44 U te no ere no, Jihova o ru nọ a ro wo omofọwẹ evaọ kabọ kabọ nwane wọhọ epanọ o duwu iyei kẹ esẹ-esẹ rai,+ yọ uvumọ ọwegrẹ rai ọ sai mugba kẹ ai hi.+ Jihova ọ rehọ ewegrẹ rai kpobi họ obọ rai.+ 45 Eyaa eware iwoma kpobi nọ Jihova ọ ya kẹ uwou Izrẹl i rugba, eyaa* ọvuọvo nọ u rugba ha o rrọ họ; aikpobi i rugba re.+

22 Joshua o te se ahwo orua Rubẹn, orua Gad gbe abọvo orua Manasẹ na kokohọ, 2 ọ tẹ ta kẹ ae nọ: “Wha ru oware kpobi nọ Mosis odibo Jihova o jie uzi riẹ kẹ owhai no,+ wha te je yoẹme kẹ urru mẹ evaọ oware kpobi nọ me jie uzi riẹ kẹ owhai.+ 3 Wha dhẹ siọ inievo rai ba evaọ oke nana kpobi hi, makọ rite ẹdẹ inẹnẹ na;+ yọ wha koko ujaje Jihova Ọghẹnẹ rai.+ 4 Whaọ Jihova Ọghẹnẹ rai ọ kẹ inievo rai omofọwẹ no nwane wọhọ epanọ ọ ya eyaa kẹ ae.+ Fikiere, enẹna wha sai zihe kpohọ iwou-udhu rai evaọ ẹkwotọ nọ Mosis odibo Jihova ọ kẹ owhai inọ wha rria evaọ abọdekọ* Jọdan na.+ 5 Wha thakpe romatotọ koko ujaje gbe Uzi nọ Mosis odibo Jihova ọ kẹ owhai,+ ẹkwoma Jihova Ọghẹnẹ rai nọ wha re you,+ idhere riẹ kpobi nọ wha rẹ jọ nya,+ gbe ijaje riẹ nọ wha re koko.+ Wha rẹ talamu ei+ jẹ rehọ udu rai kpobi+ gbe uzuazọ* rai kpobi gọe.”+

6 Joshua ọ tẹ lẹ ẹro eghale kẹ ae, o te siobọno ae vrẹ, a te kpobọ iwou-udhu rai. 7 Mosis ọ jọ Beshan kẹ abọvo orua Manasẹ ukuoriọ no vẹre,+ Joshua ọ tẹ jọ ofẹ ukiediwo-ọre Jọdan kẹ abọ nọ o kiọkọ ukuoriọ+ evaọ udevie inievo rai. U te no ere no, Joshua ọ lẹ ẹro eghale kẹ ae evaọ okenọ o siobọno ae vrẹ kpohọ iwou-udhu rai, 8 ọ ta kẹ ae nọ: “Wha zihe kpohọ iwou-udhu rai avọ ekwakwa efe buobu, avọ erao buobu gaga, avọ igoru gbe isiliva, ekọpa avọ ayọno, gbe iwu buobu gaga.+ Wha rehọ eware ewegrẹ rai+ nọ wha kwa rehọ na re whai avọ inievo rai wha gbẹ ghale ae.”

9 Kẹsena ahwo orua Rubẹn, orua Gad gbe abọvo orua Manasẹ na a tẹ nyasiọ ahwo Izrẹl nọ a kiọkọ ba, a te no Shailo evaọ ẹkwotọ Kenan zihe kpohọ ẹkwotọ Giliad,+ ẹkwotọ ukuoriọ rai nọ a muhọ ẹria no vẹre wọhọ epanọ Jihova ọ rehọ Mosis ta kẹ ae.+ 10 Nọ ahwo orua Rubẹn, orua Gad, gbe abọvo orua Manasẹ na a nya kẹle Jọdan no evaọ ẹkwotọ Kenan, a tẹ bọ agbada-idhe jọ fihọ etẹe kẹle Ethẹ Jọdan, agbada-idhe na ọ jọ ruaro gaga. 11 Uwhremu na, ahwo Izrẹl nọ a kiọkọ a te yo+ nọ ahwo a be ta nọ: “Rri! Ahwo orua Rubẹn, orua Gad gbe abọvo orua Manasẹ a bọ agbada-idhe jọ fihọ uwhru ẹkwotọ Kenan kẹle Jọdan evaọ ofẹ nọ o rrọ kẹ ahwo Izrẹl.” 12 Nọ ahwo Izrẹl a yo kpahe iẹe, ogbotu ahwo na kpobi a te kokohọ Shailo+ re a nyai lele ai fi ẹmo.

13 Kẹsena ahwo Izrẹl a te vi Finihas+ ọmọzae Ẹlieza ozerẹ na bru ahwo orua Rubẹn, orua Gad, gbe abọvo orua Manasẹ evaọ ẹkwotọ Giliad, 14 ọyomariẹ avọ isu ikpe a gbẹ nya, osu ọvuọvo o dikihẹ kẹ unuwou abọ ọsẹ evaọ erua Izrẹl kpobi. Omomọvo rai yọ ọnọ o wuzou unuwou abọ ọsẹ riẹ evaọ usu idu* ahwo Izrẹl.+ 15 Nọ a nyabru ahwo orua Rubẹn, orua Gad, gbe abọvo orua Manasẹ na ze evaọ ẹkwotọ Giliad, a tẹ ta kẹ ae nọ:

16 “Enẹ ogbotu ahwo Jihova kpobi a ta: ‘Kinọ oware uyoma vẹ wha ru+ wọso Ọghẹnẹ Izrẹl na? Wha kiukeku Jihova Ọghẹnẹ rai no nẹnẹ na fiki agbada-idhe nọ wha bọ kẹ omarai na, wha tẹ jẹ kpareso Jihova.+ 17 Kọ uzi nọ ma raha evaọ Piọ u gbe te kẹ omai? Ma re sai ru omamai fo no uzioraha yena rite inẹnẹ hẹ, dede nọ uye u te ogbotu ahwo Jihova.+ 18 Wha tẹ gwọlọ kiukeku Jihova nẹnẹ re wha se iẹe ba elele! Wha tẹ wọso Jihova nẹnẹ, odẹnotha o ve ti mu ofu ọgaga kẹ ogbotu ahwo Izrẹl soso.+ 19 Whaọ otẹrọnọ wha ru onana fikinọ ẹkwotọ rai nọ wha wo na ọ fo ho, wha nyaziọ obọ ẹkwotọ nọ Jihova o wo,+ oria nọ uwou-udhu Jihova o rrọ,+ re wha rria kugbe omai, rekọ wha wọso Jihova ha, yọ wha du ru omai jọ ahwo ọwọsuọ ẹkwoma agbada-idhe ọfa nọ wha rẹ bọ kẹ omarai kugbe agbada-idhe Jihova Ọghẹnẹ mai hi.+ 20 Nọ Ekan+ ọmọzae Zira ọ ghẹmeeyo evaọ oware nọ a ta nọ a rẹ raha no, kọ ogbẹrọnọ ogbotu ahwo Izrẹl soso Ọghẹnẹ o mu ofu ọgaga kẹ?+ Yọ ọye ọvo o whu fiki oruthọ riẹ hẹ.’”+

21 Kẹsena ahwo orua Rubẹn, orua Gad, gbe abọvo orua Manasẹ na a tẹ za kẹ enọ i wuzou idu* ahwo Izrẹl na nọ:+ 22 “Jihova, Ọghẹnẹ eghẹnẹ na!* Jihova, Ọghẹnẹ eghẹnẹ na!+ Ọ riẹ oware nọ o via, yọ Izrẹl ọ te riẹ re. Otẹrọnọ ma wọso Jihova jẹ ghẹmeeyo kẹe, jọ o siwi omai nẹnẹ na ha. 23 Otẹrọnọ ma bọ agbada-idhe kẹ omamai re ma kiukeku Jihova jẹ jariẹ dhe idhe emahọ, idhe ibi ekakọ, gbe idhe ọriẹyeri, Jihova ọ te kẹ omai uye.+ 24 Rekọ oware ofa o lẹliẹ omai ru onana, keme ma jẹ ta kẹ omamai nọ, ‘Evaọ obaro, emezae rai e te ta kẹ emezae mai nọ: “Eme wha wo kugbe Jihova Ọghẹnẹ Izrẹl? 25 Jihova o ru Jọdan na họ uwhru kẹ omai avọ owhai, whai ahwo orua Rubẹn gbe orua Gad. Wha wo ẹkẹ ọvo evaọ Jihova ha.” Emezae rai i ve ti ru nọ emezae mai e gbẹ te gọ* Jihova ha.’

26 “Oyejabọ nọ ma rọ ta nọ, ‘Joma ru oware jọ enẹna, joma bọ agbada-idhe, orọnọ fiki idhe emahọ hayo oghẹrẹ idheidhe efa ha, 27 rekọ re o jọ isẹri kẹ omai avọ owhai+ gbe uyẹ* mai nọ u te no omai no inọ ma te gbẹ rọ idhe emahọ mai, gbe oghẹrẹ idheidhe efa mai, gbe idhe ọriẹyeri mai gọ Jihova,+ re evaọ obaro emezae rai e gbẹ ta kẹ emezae mai hi inọ: “Wha wo ẹkẹ ọvo evaọ Jihova ha.”’ 28 Fikiere ma tẹ ta nọ, ‘Otẹrọnọ a tẹ ta ere kẹ omai avọ uyẹ* mai evaọ obaro, ma vẹ te ta kẹ ae nọ: “Wha rri utiọ agbada-idhe Jihova nọ esẹ-esẹ mai e bọ, orọnọ fiki idhe emahọ hayo oghẹrẹ idheidhe efa ha, rekọ re o jọ isẹri kẹ omai avọ owhai.”’ 29 O rrọ oware nọ ma re roro kpahe vievie he inọ ma rẹ wọso Jihova je kiukeku Jihova nẹnẹ+ ẹkwoma agbada-idhe nọ ma rẹ bọ rọkẹ idhe emahọ, idhe ibi ekakọ gbe oghẹrẹ idheidhe efa, u te no agbada-idhe Jihova Ọghẹnẹ mai nọ o rrọ aro uwou-udhu riẹ no!”+

30 Nọ Finihas ozerẹ na, isu ogbotu ahwo Izrẹl, gbe enọ i wuzou idu* ahwo Izrẹl nọ e jọ kugbei na a yo eme nọ ahwo uyẹ Rubẹn, Gad, gbe Manasẹ a ta, o tẹ vọ ae eva.+ 31 Fikiere Finihas ọmọzae Ẹlieza ozerẹ na ọ tẹ ta kẹ ahwo uyẹ Rubẹn, Gad, gbe Manasẹ na nọ: “Nẹnẹ na, ma riẹ nọ Jihova ọ rrọ kugbe omai, keme wha thọ uzi wọso Jihova ha. Wha siwi ahwo Izrẹl no obọ Jihova no.”

32 Kẹsena Finihas ọmọzae Ẹlieza ozerẹ na avọ isu na a te zihe no obọ ahwo orua Rubẹn gbe ahwo orua Gad nọ a rrọ ẹkwotọ Giliad na ziọ ẹkwotọ Kenan. A tẹ niyẹrẹ epanọ a nyate kẹ ahwo Izrẹl nọ a kiọkọ. 33 Iyẹrẹ na e vọ ahwo Izrẹl na eva. Ahwo Izrẹl na a te jiri Ọghẹnẹ, a gbẹ ta ẹme ọvo kpahe ẹmo nọ a rẹ wọ bru ahwo orua Rubẹn gbe orua Gad na ha re a raha ẹkwotọ nọ a jẹ rria na.

34 Fikiere ahwo orua Rubẹn gbe orua Gad na a te mu odẹ kẹ agbada-idhe na,* keme “agbada-idhe na yọ isẹri kẹ omai avọ owhai inọ Jihova họ Ọghẹnẹ uzẹme na.”

23 Nọ edẹ buobu e vrẹ no nọ Jihova o ru Izrẹl wo omofọwẹ+ evaọ obọ ewegrẹ rai kpobi nọ e wariẹ e rai họ no, yọ Joshua ọ who jẹ kpako gaga no,+ 2 Joshua o te se Izrẹl soso kokohọ,+ te ekpako rai, enọ i wuzou erua rai,+ ibruoziẹ rai, gbe iletu rai, ọ tẹ ta kẹ ae nọ: “Mẹ who no; mẹ kpako gaga no. 3 Yọ wha rọ ibiaro rai ruẹ eware kpobi nọ Jihova Ọghẹnẹ rai o ru erẹwho nana kpobi fiki rai, keme Jihova Ọghẹnẹ rai họ ọnọ ọ jẹ họre kẹ owhai.+ 4 Rri, mẹ rehọ ẹta-ọma ghale+ ẹkwotọ erẹwho nọ i kiọkọ na kẹ owhai re o jọ ukuoriọ erua rai,+ jegbe ẹkwotọ erẹwho kpobi nọ mẹ raha na,+ no obọ Jọdan na rite obọ Abade Ologbo* nọ o rrọ ofẹ ukiediwo-ọre na. 5 Jihova Ọghẹnẹ rai họ ọnọ o je gele ai no aro rai, o te le ai no* kẹ owhai,+ wha tẹ rehọ ẹkwotọ rai, nwane wọhọ epanọ Jihova Ọghẹnẹ rai ọ ya eyaa kẹ owhai.+

6 “Whaọ enẹna, o gba owhai họ nọ wha re wo udu nọ wha re ro koko je ru oware kpobi nọ a kere fihọ obe Uzi+ Mosis na, wha re reghe noi kpohọ obọze hayo ẹkpẹlobọ vievie he,+ 7 wha rẹ nya usu kugbe erẹwho nana+ nọ e gbẹ rrọ kugbe owhai na vievie he. Wha rẹ fodẹ edẹ eghẹnẹ rai hi+ hayo rehọ ae duwu iyei vievie he, yọ wha rẹ gọ ae hayo guzou kpotọ kẹ ai vievie he.+ 8 Rekọ o gba owhai họ nọ wha rẹ talamu Jihova Ọghẹnẹ rai,+ nwane wọhọ epanọ wha bi ru rite ẹdẹ inẹnẹ na. 9 Jihova o ti le erẹwho ilogbo nọ e rrọ gaga no kẹ owhai,+ keme uvumọ ohwo ọ re sai dikihẹ lele owhai họre rite ẹdẹ inẹnẹ na ha.+ 10 Omọvo rai o ti le ahwo nọ a bu te odu (1,000),+ keme Jihova Ọghẹnẹ rai ọ be họre kẹ owhai+ nwane wọhọ epanọ ọ ya eyaa kẹ owhai.+ 11 Fikiere wha yọroma kẹse kẹse*+ ẹkwoma Jihova Ọghẹnẹ rai nọ wha re you.+

12 “Rekọ otẹrọnọ wha dawo e riẹ kuomarẹriẹ, wha jẹ talamu ahwo nọ a kiọkọ evaọ erẹwho nana+ nọ e gbẹ rrọ kugbe owhai na, wha jẹ ruọ orọo kugbe ai,*+ je bi lele ai nya usu, yọ ae omarai a bi kuomagbe owhai re, 13 jọ wha riẹ vevẹ nọ Jihova Ọghẹnẹ rai o ti gbe le erẹwho nana no kẹ owhai hi.+ A ti zihe ruọ ẹta avọ agbefẹ kẹ owhai, gbe eviaviẹ nọ e te fa owhai abefẹ,+ gbe idhigbo evaọ ibiaro rai bẹsenọ wha ti whu muotọ evaọ otọ uwoma nana nọ Jihova Ọghẹnẹ rai ọ kẹ owhai na.

14 “Whaọ enẹna, me te uwhu no,* yọ wha jọ udu rai kpobi gbe uzuazọ* rai kpobi riẹ nọ ẹme ọvo nọ o rugba ha ọ rrọ họ evaọ eyaa eware iwoma kpobi nọ Jihova Ọghẹnẹ rai ọ ya kẹ owhai na. Aikpobi i rugba kẹ owhai no. Ẹme ọvo nọ o rugba ha ọ rrọ họ.+ 15 Rekọ nwane wọhọ epanọ eyaa eware iwoma kpobi nọ Jihova Ọghẹnẹ rai ọ ya kẹ owhai i rugba kẹ owhai na,+ ere ọvona Jihova ọ te kẹ owhai uye kpobi nọ ọ ta nọ u ti te owhai, o ve ti kpe owhai muotọ evaọ otọ uwoma nana nọ Jihova Ọghẹnẹ rai ọ kẹ owhai na.+ 16 Wha tẹ raha ọvọ Jihova Ọghẹnẹ rai nọ o jie uzi riẹ kẹ owhai nọ wha koko na, wha jẹ nyae gọ eghẹnẹ efa je guzou kpotọ kẹ ae, Jihova o ti mu ofu ọgaga kẹ owhai,+ wha ve ti whu no otọ uwoma nọ ọ kẹ owhai na no ababọ oke oraha.”+

24 Kẹsena Joshua o te koko erua Izrẹl kpobi họ evaọ Shẹkẹm, o te se ekpako ahwo Izrẹl, enọ i wuzou erua na, ibruoziẹ rai, gbe iletu rai kokohọ,+ a te dikihẹ aro Ọghẹnẹ uzẹme na. 2 Joshua ọ tẹ ta kẹ ahwo na kpobi nọ: “Enẹ Jihova Ọghẹnẹ Izrẹl ọ ta, ‘Abọdekọ Ethẹ* na esẹ-esẹ rai+ e rria evaọ oke krẹkri nọ u kpemu+—Tera ọsẹ Abraham gbe ọsẹ Nahọ—yọ a jẹ gọ eghẹnẹ efa.+

3 “‘Nọ u te oke jọ mẹ tẹ rehọ Abraham ọsẹ-esẹ rai+ no abọdekọ Ethẹ* na ze, me te ru ei nya ẹkwotọ Kenan na soso duwu je ru emọ* riẹ buobu.+ Mẹ kẹ riẹ Aiziki;+ 4 kẹsena mẹ tẹ kẹ Aiziki Jekọp avọ Esọ.+ Uwhremu na mẹ tẹ rehọ Ugbehru Siya kẹ Esọ re o jọ ukuoriọ riẹ;+ Jekọp avọ emọ riẹ a te kpobọ Ijipti.+ 5 Me te vi Mosis avọ Erọn uwhremu na,+ mẹ tẹ rehọ eware nọ me ru evaọ Ijipti rọ kẹ ahwo Ijipti uye,+ kẹsena mẹ tẹ rehọ owhai no eva riẹ ze. 6 Nọ mẹ jẹ rehọ esẹ rai no Ijipti ze,+ a tẹ nyate abade na, oke yena yọ ahwo Ijipti a be rọ ekẹkẹ ẹmo gbe egbaẹmo nọ e be dhẹ enyenya le esẹ rai, a te le ai rite ugbo obọ Abade Ọwawae na.+ 7 A te mu Jihova họ ebo se,+ o te fi ebi họ udevie rai avọ ahwo Ijipti na, o te ru abade na hwẹ ruru ahwo Ijipti,+ yọ ibiaro rai e ruẹ eware nọ me ru evaọ Ijipti.+ Kẹsena wha tẹ rria udhude na ikpe* buobu.+

8 “‘Mẹ tẹ rehọ owhai ziọ ẹkwotọ ahwo Amọ nọ a jẹ rria abọdekọ* Jọdan na, a tẹ họre owhai.+ Rekọ mẹ rehọ e rai họ obọ rai re wha sae rehọ ẹkwotọ rai, me te kpe ai no kẹ owhai.+ 9 Kẹsena Belak ọmọzae Zipọ, ovie Moab ọ tẹ họre wọso Izrẹl. Fikiere o te se Belam ọmọzae Biọ ze re ọ bọwo owhai ehao.+ 10 Rekọ mẹ gaviezọ kẹ Belam ho.+ Fikiere ọ tẹ lẹ ẹro eghale kẹ owhai unuẹse buobu,+ me te siwi owhai no obọ riẹ.+

11 “‘Kẹsena wha tẹ fa Jọdan vrẹ,+ wha tẹ ziọ Jẹriko.+ Isu* Jẹriko, ahwo Amọ, ahwo Pẹriz, ahwo Kenan, ahwo Hit, ahwo Gẹgash, ahwo Hiv, gbe ahwo Jebus a tẹ họre owhai, rekọ mẹ rehọ e rai họ obọ rai.+ 12 Me vi elọhoma* karo kẹ owhai, u te le ivie ivẹ ahwo Amọ no aro rai.+ Orọnikọ ọgbọdọ rai hayo uze rai wha ro le ai no ho.+ 13 Mẹ tẹ kẹ owhai ẹkwotọ nọ wha ruẹ uye fihọ họ gbe ikpewho nọ wha bọ họ,+ wha te mu ae họ ẹria. Wha be kọrọ ibi evaọ egbọ evaene gbe egbọ olivi nọ wha kọ họ.’+

14 “Fikiere, wha dhozọ Jihova jẹ gọe avọ ẹgbakiete* gbe ọtẹruo,*+ wha ve je si eghẹnẹ esẹ-esẹ rai na no, enọ a jẹ gọ evaọ abọdekọ Ethẹ* na gbe evaọ obọ Ijipti,+ re wha gọ Jihova. 15 Whaọ otẹrọnọ o were owhai nọ wha rẹ gọ Jihova ha, wha salọ kẹ omarai nẹnẹ na ọnọ wha rẹ gọ,+ sọ eghẹnẹ nọ esẹ-esẹ rai a jẹ gọ evaọ abọdekọ Ethẹ* na+ hayo eghẹnẹ ahwo Amọ nọ wha be rria ẹkwotọ rai na.+ Rekọ rọkẹ omẹ avọ ahwo uwou mẹ, Jihova ma rẹ gọ.”

16 Ahwo na a tẹ kẹ uyo nọ: “O rrọ oware nọ ma re roro kpahe vievie he inọ ma rẹ nyasiọ Jihova ba nyae gọ eghẹnẹ efa. 17 Jihova Ọghẹnẹ mai họ ọnọ ọ rehọ omai avọ esẹ mai no ẹkwotọ Ijipti ze,+ no obonọ ma jẹ jọ igbo ze,+ yọ ọye o ru eware eka ilogbo enana evaọ aro mai,+ ọye ọvona ọ jẹ thọ omai evaọ idhere kpobi nọ ma nya gbe evaọ udevie ahwo kpobi nọ ma nyavrẹ.+ 18 Jihova o le ahwo na kpobi no kẹ omai, te ahwo Amọ nọ a kake jọ ẹkwotọ na. Fikiere, ma te gọ Jihova re, keme ọye họ Ọghẹnẹ mai.”

19 Kẹsena Joshua ọ tẹ ta kẹ ahwo na nọ: “Wha te sae gọ Jihova ha, keme Ọghẹnẹ ọrẹri ọ rrọ;+ Ọghẹnẹ nọ ọ gwọlọ omarọkẹ riẹriẹriẹ.+ Ọ te rehọ iruthọ* rai gbe izieraha rai rọvrẹ owhai hi.+ 20 Otẹrọnọ wha tẹ nyasiọ Jihova ba, wha je mu eghẹnẹ erẹwho efa họ ẹgọ, ọ te rọsuọ owhai je kpe owhai muotọ dede nọ o ru ewoma kẹ owhai no.”+

21 Rekọ ahwo na a tẹ ta kẹ Joshua nọ: “Ijo, ma te gọ Jihova!”+ 22 Fikiere Joshua ọ tẹ ta kẹ ahwo na nọ: “Whai ọvo wha se isẹri kpe omarai inọ iroro obọrai wha rọ salọ nọ wha rẹ gọ Jihova na.”+ A tẹ ta nọ: “Mai yọ isẹri.”

23 “Nọ o rrọ ere na, wha si eghẹnẹ erẹwho efa nọ e rrọ udevie rai na no, re wha rọ udu rai kpobi kẹ Jihova Ọghẹnẹ Izrẹl.” 24 Ahwo na a tẹ ta kẹ Joshua nọ: “Ma te gọ Jihova Ọghẹnẹ mai je yoẹme kẹ urru riẹ!”

25 Fikiere Joshua ọ tẹ re ọvọ kugbe ahwo na evaọ ẹdẹ yena, o te je fi uzi avọ ujaje họ kẹ ae evaọ Shẹkẹm. 26 Kẹsena Joshua o te kere eme nana fihọ obe Uzi Ọghẹnẹ,+ ọ tẹ wọ utho ulogbo jọ,+ ọ tẹ wọe fihọ otọ ure ulogbo nọ o rrọ abotọ oria aruẹri Jihova.

27 Kẹsena Joshua ọ tẹ ta kẹ ahwo na kpobi nọ: “Rri! Utho nana u ti se isẹri kpe omai,+ keme u yo oware kpobi nọ Jihova ọ ta kẹ omai, yọ u ti je se isẹri kpe owhai, re wha gbẹ vro Ọghẹnẹ rai hi.” 28 Nọ Joshua ọ ta onana no, o te siobọno ahwo na zihe kpohọ ọvuọ ukuoriọ riẹ.+

29 Nọ eware nana e vrẹ no, Joshua ọmọzae Nọn, odibo Jihova o te whu nọ ọ kpako te ikpe udhusoi-gbikpe (110) no.+ 30 A te ki ei fihọ ẹkwotọ ukuoriọ riẹ evaọ Timnat-sira,+ nọ o rrọ ubrotọ igbehru Ifremu, evaọ ẹkpẹlobọ ovatha-ọre Ugbehru Geash. 31 Ahwo Izrẹl a ruabọhọ jẹ gọ Jihova evaọ oke Joshua kpobi gbe evaọ oke ekpako kpobi nọ e gbẹ jọ uzuazọ okenọ Joshua o whu no, enọ e riẹ kpahe eware kpobi nọ Jihova o ru kẹ ahwo Izrẹl.+

32 A ki igbenwa Josẹf+ nọ a wha lele oma no obọ Ijipti ze fihọ Shẹkẹm evaọ ẹwẹ otọ nọ Jekọp ọ rehọ ewẹ ugho isiliva udhusoi (100)+ dẹ mi emezae Hemọ,+ ọsẹ Shẹkẹm; u te zihe ruọ ukuoriọ emezae Josẹf.+

33 Ẹlieza ọmọzae Erọn o te je whu re.+ A te ki ei fihọ Ukpehru Finihas ọmọzae riẹ,+ onọ a kẹ riẹ evaọ ubrotọ igbehru Ifremu.