ENUOBRO
א [Alẹf]*
1 Rri epanọ okpẹwho nọ ahwo a vọ vẹre na ọ keria goli!+
Rri epanọ okpẹwho nọ ahwo a jọ buobu vẹre evaọ udevie erẹwho na ọ wọhọ aye-uku no!+
Rri epanọ ọnọ ọ jọ ovie-aye evaọ udevie ibrotọ* na o zihe ruọ ọnọ a bi ro ru iruo ọgbahọ no!+
ב [Bet]
2 Ọ rẹ viẹ whrowhrowhro evaọ aso,+ yọ irui-oviẹ riẹ i bi su fihọ egba riẹ.
Ọvuọvo evaọ usu ese riẹ kpobi ọ rrọ etẹe re ọ sasa iẹe oma ha.+
Egbẹnyusu riẹ kpobi i vivie i rie no;+ a zihe ruọ ewegrẹ riẹ no.
ג [Gimẹl]
3 Juda o kpohọ igbo no,+ ọ be ruẹ uye jẹ be reoja gaga.+
Ọ rẹ rria udevie erẹwho na hrọ;+ ọ be ruẹ oria eriosehọ họ.
Enọ i bi kpokpo iei kpobi a wọ ruru iei no evaọ oke uye riẹ.
ד [Dalẹt]
4 Idhere nọ a re ro kpohọ Zayọn i bi weri, keme ohwo ọvo ọ be nyaze ehaa na ha.+
Inuethẹ riẹ kpobi e raha no;+ izerẹ riẹ e be fiunu.
Emetẹ-kọkọ* riẹ i bi weri, yọ edada egaga e riẹe oma.
ה [He]
5 Ewegrẹ riẹ họ ilori* riẹ enẹna; ewegrẹ riẹ e be ruawa oware ovo ho.+
Keme Jihova ọ wha uweri sei no fiki izieraha ibuobu riẹ.+
Ọwegrẹ na o su emọ riẹ kpohọ igbo no.+
ו [Whọọ]
6 Erru kpobi nọ ọmọtẹ Zayọn o wo ọ nyasiọ iẹe ba no.+
Ikpahwo-esuo riẹ e wọhọ iyo nọ e be ruẹ ẹbe re he,
A be nya yolo yolo evaọ aro ọnọ o bi le ai.
ז [Zayin]
7 Nọ Jerusalẹm ọ be reoja yọ o wo uwou hu na, ọ be kareghẹhọ
Eware eghaghae nọ o wo vẹre evaọ oke krẹkri nọ u kpemu.+
Okenọ ahwo riẹ a kie ruọ obọ ọwegrẹ na yọ o wo ofiobọhọ họ,+
ח [Hẹt]
8 Jerusalẹm ọ raha uzi gaga.+
Oyejabọ nọ o ro zihe ruọ oware nọ u re tuoma no na.
Ahwo kpobi nọ a jẹ kẹe ọghọ vẹre a bi ru ei wọhọ oware nọ u fioka ha, keme a ruẹ ẹba riẹ no.+
Ọyomariẹ o bi dimẹ+ je bi kuomarẹriẹ avọ omovuọ.
ט [Tet]
9 Egbegbe riẹ o wholo ibuluku riẹ.
O roro kpahe obaro akpọ riẹ hẹ.+
Ekie riẹ o gbunu; o wo ohwo ọvo nọ ọ rẹ sasa iẹe oma ha.
O Jihova, rri oja nọ mẹ be re, keme ọwegrẹ na o ru omariẹ ruaro no.+
י [Yod]
10 Ọwegrẹ na o vi abọ họ ekwakwa eghaghae riẹ kpobi wọ vrẹ no.+
Jerusalẹm ọ ruẹ erẹwho nọ e be ruọ eva oria aruẹri riẹ,+
Enọ who jie uzi kpahe nọ a rẹ ruọ eva ukoko ra ha na.
כ [Kaf]
11 Ahwo riẹ kpobi a be fiunu; a be gwọlọ ebrẹdi.+
A rehọ eware eghaghae rai ro momo oware nọ a rẹ re, re a ruẹse jọ uzuazọ.
O Jihova, rri re whọ ruẹ nọ me zihe ruọ aye* nọ o fioka ha no.
ל [Lamẹd]
12 Kọ wha se uye na gbe oware ovo, whai kpobi nọ e be nya edhere na vrẹ?
Wha rri re wha ruẹ!
Kọ edada jọ e riẹ nọ e wọhọ edada nọ ọ wha họ omẹ oma na,
Onọ Jihova o ru omẹ ruẹ uye riẹ evaọ ẹdẹ ofu ọgaga riẹ na?+
מ [Mẹm]
13 O vi erae no obọ ehru ze te mahe igbenwa mẹ kpobi no.+
Ọ rriẹ ẹriri fihọ rọkẹ awọ mẹ; ọ gba omẹ họ kuomarẹriẹ zihe kpemu.
O ru omẹ fihọ aye nọ ọ rrọ ababọ no.
Mẹ be mọ evaọ okpẹdoke na soso.
נ [Nun]
14 A gba izieraha mẹ kugbe wọhọ owhowha, onọ ọ rehọ obọ riẹ gba kugbe.
A jẹ rai họ uriohọ mẹ, yọ ẹgba mẹ o re no.
Jihova ọ rehọ omẹ họ obọ enọ mẹ rẹ sai lele họre he no.+
ס [Samẹk]
15 Jihova o gbolo ezae egaga kpobi nọ e rrọ eva mẹ kufiẹ no.+
O se ogbotu ahwo kokohọ ze te họre omẹ re a kpe izoge emezae mẹ no.+
Jihova ọ jọ ọgọdọ udi-uruo na thihi ọmọtẹ-kọkọ Juda no.+
ע [Ayin]
16 Mẹ be viẹ fiki eware nana;+ irui-oviẹ i bi su no omẹ aro ze.
Keme ohwo kpobi nọ ọ hae sasa omẹ* oma hayo ru eva were omẹ o thabọ no omẹ.
Emezae mẹ i wo ẹruore ọvo ho, keme ọwegrẹ na ọ kparobọ no.
פ [Pe]
17 Zayọn ọ rriẹ abọ riẹ fihọ;+ o wo ohwo ọvo nọ ọ rẹ sasa iẹe oma ha.
Jihova o jie uzi kẹ ewegrẹ Jekọp kpobi nọ e wariẹ e riẹ họ re a họre iẹe.+
Jerusalẹm o zihe ruọ oware nọ u re tuoma rọkẹ ai no.+
צ [Sade]
18 Jihova o kiẹrẹe,+ keme uye nana u te omẹ fikinọ mẹ wọso ijaje* riẹ.+
Wha gaviezọ, whai ahwo kpobi, re wha ruẹ edada mẹ.
Emetẹ-kọkọ* mẹ avọ izoge emezae mẹ i kpohọ igbo no.+
ק [Kof]
19 Me bo se ese mẹ, rekọ a te vivie omẹ.+
Izerẹ mẹ gbe ekpako mẹ i whu no evaọ okpẹwho na,
Evaọ okenọ a jẹ gwọlọ emuore re a ruẹse jọ uzuazọ.+
ר [Resh]
20 O Jihova, rri, keme idhọvẹ egaga e rrọ omẹ oma.
Obeva mẹ o duwuku.*
Udu mẹ o thahe kurẹriẹ no evaọ eva mẹ, keme mẹ wọso owhẹ gaga.+
Ọgbọdọ o bi kpe evaọ otafe;+ obeva uwou o wọhọ uwhu.
ש [Shin]
21 Ahwo a yo imẹ-idio mẹ no; ohwo ọvo ọ riẹ nọ ọ rẹ sasa omẹ oma ha.
Ewegrẹ mẹ kpobi i yo kpahe okpẹtu nọ o te omẹ no.
A be ghọghọ, keme whọ wha riẹ ze.+
Rekọ whọ te rehọ ẹdẹ nọ who whowho na+ ze, okenọ a te rọ jọ wọhọ omẹ.+
ת [Tọọ]
22 Jọ eyoma rai kpobi ọ ziọ aro ra, ajọ whọ rehọ uye ogaga te ai,+
Nwane wọhọ epanọ whọ rehọ uye ogaga te omẹ fiki izieraha mẹ kpobi na.
Keme me bi dimẹ gaga, yọ udu mẹ o be mọ.
א [Alẹf]
2 Rri epanọ Jihova ọ rehọ ẹgho ruru ọmọtẹ Zayọn evaọ okenọ ofu o mu ei!
O gbolo erru Izrẹl no obọ odhiwu ze fihọ otọakpọ no.+
Ọ kareghẹhọ akpala riẹ nọ ọ rẹ rọ awọ kpahe+ he evaọ ẹdẹ ofu riẹ.
ב [Bet]
2 Jihova ọ lọ iwou Jekọp kpobi no ababọ ọdawẹ.
Ọ rehọ ofu ọgaga riẹ kporo eria ọmọtẹ Juda nọ a di ogba wariẹ họ* fihọ otọ no.+
O gele uvie na+ avọ ikpahwo-esuo+ riẹ fihọ otọ je ru oma vuọ ai no.
ג [Gimẹl]
3 Ọ rehọ ofu bru ẹgba* Izrẹl kpobi fihọ otọ no.
O si obọze riẹ rehọ okenọ ọwegrẹ na ọ nyaze,+
Yọ ọ jẹ to evaọ Jekọp wọhọ erae nọ e rẹ mahe oware kpobi nọ o wariẹ e riẹ họ muotọ.+
ד [Dalẹt]
4 Ọ vẹ* uze riẹ no wọhọ ọwegrẹ; ọ ruẹrẹ obọze riẹ kpahe no wọhọ ọwegrẹ;+
Ọ ruabọhọ je kpe ahwo kpobi nọ a rrọ ghaghae evaọ ẹro mai.+
O ku ofu riẹ kuọ uwou-udhu ọmọtẹ Zayọn+ wọhọ erae.+
ה [He]
5 Jihova ọ wọhọ ọwegrẹ kẹ omai no;+
O si Izrẹl lọ no.
O si iwou ikpehru riẹ kpobi lọ no;
Ọ raha eria riẹ kpobi nọ a di ogba wariẹ họ* no.
O ru nọ uweri avọ enuobro e rọ da eva ọmọtẹ Juda fia.
ו [Whọọ]
6 Ọ rehọ ozighi zurie uwou-owhre riẹ fihọ otọ,+ wọhọ uwou-owhre nọ o rrọ evaọ ọgbọ.
O ru nọ ehaa riẹ i ro serihọ* no.+
Jihova o ru nọ ehaa gbe ẹdijala e rọ thọrọ ẹro no evaọ Zayọn,
O rri ovie avọ ozerẹ aro ho nọ eva e jẹ dhae gaga.+
ז [Zayin]
7 Jihova ọ se agbada-idhe riẹ no;
Ọ se aruẹri riẹ no.+
Ọ rehọ igbẹhẹ iwou ikpehru riẹ nọ e rẹ bẹ ẹvẹruọ na họ obọ ọwegrẹ na no.+
A jọ uwou Jihova kpare uvou rai kpehru+ wọhọ epaọ ẹdẹ nọ a bi ru ehaa.
ח [Hẹt]
8 Jihova ọ gba riẹ mu no nọ ọ rẹ raha ugbẹhẹ ọmọtẹ Zayọn no.+
Ọ rriẹ ufi nọ a rẹ rọ ma oware na fihọ no.+
O ri si obọ riẹ kpemu re ọ siọ ọraha ba ẹwha ze he.*
O bi ru ogba avọ ugbẹhẹ weri.
O ru oma lọhọ ae kpobi no.
ט [Tet]
9 Inuethẹ riẹ i zue ruọ* otọakpọ na no.+
Ọ raha je wiri ekpọ riẹ nọ a rẹ rọ kare ẹthẹ na no.
Ovie riẹ avọ ikpahwo-esuo riẹ a rrọ udevie erẹwho na.+
Uzi* o riẹ hẹ; eruẹaruẹ i bi no obọ Jihova ze te eruẹaro riẹ obọ dede he.+
י [Yod]
10 Ekpako ọmọtẹ Zayọn e keria otọ, yọ a fọ kpoko.+
A whẹ ẹkpẹ fihọ uzou rai je ku ehọ-ekpa* họ.+
Emetẹ-kọkọ Jerusalẹm i gbuzou rai hotọ.
כ [Kaf]
11 Ibiaro mẹ i dhe no fiki oviẹ nọ mẹ be viẹ.+
Obeva mẹ o duwuku.*
A ku edhẹ mẹ fihọ otọ no fiki ekie nọ ọmọtẹ* ahwo mẹ o kie,+
Fiki emọ gbe emọboba nọ ibiaro i bi bi kie fihọ otọ evaọ iko-ore ẹwho na.+
ל [Lamẹd]
12 Nọ ibiaro i bi bi ai kie fihọ otọ evaọ iko-ore okpẹwho na wọhọ ohwo nọ a nwoma na,+
Nọ uzuazọ* rai o be rọ ẹmẹrera re no evaọ abọ ini rai na,
A be nọ ini rai nọ, “Kọ ibi ekakọ gbe enwaene e rrọ?”
מ [Mẹm]
13 Eme mẹ te sae rọ kẹ owhẹ imuẹro,
Hayo kọ eme mẹ sai ro dhesẹ owhẹ, O ọmọtẹ Jerusalẹm?
Eme mẹ sae rọ wawo owhẹ, re oma o sasa owhẹ, O ọmọtẹ-kọkọ Zayọn?
Keme omonwa ra o rrọ kẹkẹe wọhọ abade.+ Kọ ono ọ rẹ sai siwi owhẹ?+
נ [Nun]
14 Eruẹaruẹ nọ eruẹaro ra e jẹ ruẹ kẹ owhẹ yọ erọ ọrue, e tẹ jẹ rrọ ifofe,+
A fere oruthọ ra via ha, onọ o hai ru owhẹ siọ igbo ba ẹnya,+
Rekọ a tẹ ruabọhọ jẹ ruẹaro nọ a jẹ jọ ta eme erue nọ i re su ohwo thọ kẹ owhẹ.+
ס [Samẹk]
15 Ahwo kpobi nọ a be nya edhere na vrẹ a be rọ oma ẹkoko tehe abọ ku owhẹ.+
A be fiunu avọ igbunu+ je bi nuhu uzou rai fiki ọmọtẹ Jerusalẹm, be ta nọ:
“Kọ okpẹwho na ọna, ọnọ a jẹ hae ta kpahe nọ, ‘O wo erru kẹhẹ, ọnọ ọ rrọ oghọghọ rọkẹ otọakpọ na soso na’?”+
פ [Pe]
16 Ewegrẹ ra kpobi i rovie enu rai be ta ẹme wọso owhẹ.
A be fiunu jẹ be reakọ, be ta nọ: “Ma si rie lọ no.+
Ẹdẹ nọ ma jẹ hẹrẹ na ọna!+ Ọ ze no, yọ ma ruẹ e riẹ no!”+
ע [Ayin]
17 Jihova o ru oware nọ ọ gwọlọ ru no;+ o ru oware nọ ọ ta no,+
Oware nọ o jie uzi riẹ oke krẹkri nọ u kpemu.+
O kporo owhẹ kuotọ no ababọ ọdawẹ.+
Ọ kẹ ọwegrẹ na uvẹ no re ọ ghọghọ fiki ra; ọ kpare ẹgba* ewegrẹ ra kpehru no.
צ [Sade]
18 Udu rai u bi bo se Jihova, O whẹ ugbẹhẹ ọmọtẹ Zayọn.
Jọ irui-oviẹ i su fihọ otọ wọhọ ẹkẹre te aso te uvo.
Who serihọ họ, whọ kẹ ubiẹro ra uvẹ re u serihọ họ.*
ק [Kof]
19 Kparoma! Bo via evaọ aso, evaọ oke nọ a re ro mu irou họ na.
Ta oware kpobi nọ o rrọ udu ra evaọ aro Jihova wọhọ ame nọ a bi ku fihọ otọ.
Kpare abọ ra kpehru kẹe fiki uzuazọ* emọ ra,
Enọ aro o bi bi kie fihọ otọ evaọ ubienẹ iyẹrẹ kpobi* fiki ohọo nọ u bi mu.+
ר [Resh]
20 Rri, O Jihova, re whọ ruẹ ọnọ whọ kẹ uye ogaga na.
Kọ u fo re eyae e ruabọhọ be re emọ* obọrai, emọ obọrai nọ a yẹ omakọkọ,+
Hayo kọ u fo re a kpe izerẹ gbe eruẹaro evaọ aruẹri Jihova?+
ש [Shin]
21 Ọmọzae avọ ọkpọkuọzae a whu fihọ otọ evaọ iyẹrẹ na.+
Ọgbọdọ o kpe emetẹ-kọkọ* mẹ gbe izoge emezae mẹ no.+
Who kpe rai no evaọ ẹdẹ ofu ra; who kpe rai no ababọ ọdawẹ.+
ת [Tọọ]
22 Who zizie eware idudu no ofẹ kpobi ze, wọhọ ẹsenọ who zizie ai kẹ ehaa.+
א [Alẹf]
3 Mẹ họ ọzae nọ ọ be reoja na fiki ọkpọ ofu ọgaga riẹ.
2 O le omẹ vrẹ no, je bi ru omẹ nya evaọ ebi, orọnikọ evaọ elo ho.+
3 Evaọ uzẹme, o bi dhe omẹ ekpekpe evaọ okpẹdoke na soso.+
ב [Bet]
4 Ọ raha uwo-oma mẹ gbe ohọroma mẹ no;
O wiri igbenwa mẹ no.
5 O ko omẹ họ no; ọ rehọ enua ọyayare+ gbe ọbẹwẹ wariẹ omẹ họ no.
6 Ọ gba omẹ họ keria eria nọ ebi ọ rrọ, wọhọ ahwo nọ a whu kri no.
ג [Gimẹl]
7 Ọ ma ugbẹhẹ wariẹ omẹ họ, re mẹ gbẹ sae vabọ họ;
Ọ rehọ egbregba ekọpa egbẹgbẹdẹ gba omẹ.+
8 Yọ okenọ mẹ tẹ rọ ẹgba mẹ kpobi bo kẹ obufihọ, ọ rẹ se olẹ mẹ.*+
9 Ọ rehọ itho nọ a bru ro di idhere mẹ no;
O ru idhere mẹ gẹgẹle no.+
ד [Dalẹt]
10 O dhere be hẹrẹ omẹ wọhọ adaka, wọhọ okpohrokpo nọ o dhere.+
12 Ọ vẹ* uze riẹ no, o te ru omẹ fihọ oware nọ ọ gwọlọ rọ ose na sa.
ה [He]
13 Ọ rehọ ese* nọ e rrọ owha-ese riẹ sa ibieku mẹ no.
14 Me zihe ruọ ohwo nọ ahwo na kpobi a be rọ ta atahwẹ no, uzoẹme ole nọ a be so evaọ okpẹdoke na soso.
15 Ọ rehọ eware eyayare vọ eva mẹ no, je ru omẹ be da ame ẹbe ọyayare.+
ו [Whọọ]
17 Who ru nọ me gbe wo udhedhẹ hẹ; oware uwoma o thọrọ omẹ ẹro no.
18 Fikiere mẹ tẹ ta nọ: “Erru mẹ ọ hiẹ no, irẹro nọ me wo fihọ Jihova e tẹ jẹ raha no.”
ז [Zayin]
19 Kareghẹhọ oja nọ mẹ be re gbe uwou nọ me wo ho,+ re whọ jẹ kareghẹhọ ẹbe ọyayare gbe enua ọyayare na.+
20 Whọ* te ginẹ kareghẹhọ je ruwẹ bru omẹ ze.+
21 Mẹ kareghẹhọ onana evaọ udu mẹ; oyejabọ nọ mẹ te rọ rehọ odiri hẹrẹ na.+
ח [Hẹt]
23 O rẹ kpokpọ kohiohiẹ kohiohiẹ;+ a re fievahọ owhẹ ẹsikpobi.+
24 Mẹ ta nọ, “Jihova họ ẹkẹ mẹ,+ oyejabọ nọ mẹ te rọ rehọ odiri hẹrẹ iẹe+ na.”
ט [Tet]
25 Jihova o re ru ewoma kẹ ọnọ o fi ẹruore họ iẹe,+ ohwo* nọ ọ ruabọhọ be gwọlọ iẹe.+
26 U woma re ohwo ọ fọ hẹrẹ*+ esiwo Jihova.+
27 U woma re ohwo ọ wọ owhowha na evaọ oke uzoge riẹ.+
י [Yod]
28 Jọ ọ keria goli jẹ fọ tou evaọ okenọ Ọ tẹ wọ owha na fihọ ehru riẹ.+
29 Jọ ọ vẹ enu riẹ tuotọ;+ ẹsejọhọ ẹruore ọ gbẹ riẹ.+
30 Jọ ọ rehọ agba riẹ kẹ ọnọ ọ be tehe iẹe na; jọ a lae eka totọ.
כ [Kaf]
31 Keme Jihova o ti gbolo omai kufiẹ bẹdẹ bẹdẹ hẹ.+
32 Dede nọ ọ wha uweri ze, ọ te re ohrọ fiki uyoyou riẹ nọ o rẹ hiẹ hẹ nọ o dafia na.+
33 Keme o rrọ udu riẹ hẹ re o gboja kẹ hayo wha uweri se emọ ahwo.+
ל [Lamẹd]
34 Re ohwo o thihi ahwo kpobi nọ a rrọ uwou-odi evaọ otọakpọ na nyaotọ,+
35 Re a siọ uvioziẹ ba ebru kẹ ohwo evaọ iraro Ọnọ Ọ Mai Kpehru na,+
36 Re a kienyẹ ohwo evaọ ẹdhọ riẹ
—Jihova ọ rẹ jẹ eware itieye na rehọ họ.
מ [Mẹm]
37 Nọ o rrọ ere na, kọ ono ọ rẹ sae ta ẹme je ru ei re o via ajokpanọ Jihova ọ ta riẹ?
38 Eware iyoma gbe eware iwoma i re no
Unu Ọnọ Ọ Mai Kpehru na ze evaọ oke ovona ha.
39 Fikieme ohwo nọ ọ rrọ uzuazọ o re ro gu unoma kpahe oware nọ u no uzioraha riẹ ze?+
נ [Nun]
40 Joma romatotọ kiẹ idhere mai rri ziezi+ re ma zihe bru Jihova.+
41 Joma kpare udu mai gbe abọ mai kpehru bru Ọghẹnẹ nọ ọ rrọ obọ idhiwu na:+
42 “Ma raha uzi no jẹ wọso no,+ yọ whọ re rọvrẹ hẹ.+
ס [Samẹk]
44 Whọ rehọ ẹgho za omai dhe no re ma siọ owhẹ ba ẹnyabru, re olẹ mai o gbẹ nyae vrẹ hẹ.+
45 Who ru omai fihọ oware nọ a leri gbe ezuzu evaọ udevie ahwo na.”
פ [Pe]
46 Ewegrẹ mai kpobi i rovie enu rai be ta ẹme wọso omai.+
47 Idudu gbe egbefẹ i zihe ruọ ẹkẹ nọ o te omai no,+ ọraha gbe omonwa.+
48 Iyeri-ame irui-oviẹ i bi su no ibiaro mẹ ze fiki omonwa ọmọtẹ ahwo mẹ.+
ע [Ayin]
49 Irui-oviẹ i bi no aro mẹ ze ọvo, ababọ eriosehọ,+
50 Bẹsenọ Jihova o ti rri no obọ odhiwu ze, ọ vẹ ruẹ omai.+
51 Ibiaro mẹ e wha uweri se omẹ no fiki emetẹ kpobi nọ e rrọ okpẹwho mẹ.+
צ [Sade]
52 Ewegrẹ mẹ e gwọlọ omẹ ruẹ no wọhọ ọvra, ababọ oware nọ me ru.
53 A kpe omẹ no evaọ ọgọdọ na; a ruabọhọ jẹ rọ itho fi omẹ.
54 Ame obuobu o le omẹ no, mẹ tẹ ta nọ: “U re kẹ omẹ no!”
ק [Kof]
55 Mẹ jọ obọ edidi ọgọdọ na se odẹ ra, O Jihova.+
56 Yo urru mẹ; whọ tehe ezọ ra di kẹ ubo nọ me bi bo kẹ obufihọ họ, re oma o fọ omẹ.
57 Who si kẹle omẹ evaọ ẹdẹ nọ me ro se owhẹ. Whọ ta nọ: “Jọ ozọ u mu owhẹ hẹ.”
ר [Resh]
58 Whọ thothọ mẹ no,* O Jihova, whọ ta uzuazọ mẹ zihe ze no.+
59 O Jihova, whọ ruẹ eware iyoma nọ a ru omẹ no; ivie bru uvioziẹ kẹ omẹ.+
60 Whọ ruẹ orukele rai kpobi no, omaa kpobi nọ a be ma kpahe omẹ.
ש [Sin] hayo [Shin]
61 O Jihova, who yo ẹkoko nọ a bi se no, omaa kpobi nọ a be ma kpahe omẹ,+
62 Eme enọ e be wọso omẹ gbe eme imimẹ nọ a be ta wọso omẹ evaọ okpẹdoke na soso.
63 Rri rai; te a keria te a dikihẹ, a be rehọ ile rai se omẹ ẹkoko!
ת [Tọọ]
64 O Jihova, whọ te hwosa kẹ ae wọhọ epaọ iruẹru rai.
65 Who ti ru ai wo udu ogaga, re o jọ ehao nọ whọ bọwo rai.
66 Whọ te rehọ ofu ra le ai jẹ raha ai no otọ idhiwu Jihova na.
א [Alẹf]
4 Rri epanọ igoru nọ o je lo na ọ hiẹ no, emamọ igoru na!+
Rri epanọ itho ọrẹri+ na e vaha fihọ otọ evaọ ubienẹ iyẹrẹ kpobi!*+
ב [Bet]
2 Rọ kpahe emezae eghaghae Zayọn, enọ e jọ ghaghae wọhọ igoru nọ a ru fo no,
Rri epanọ a be rehọ ae wọhọ ithẹ nọ a rọ ẹkpẹ ma,
Iruo abọ ọmebẹ!
ג [Gimẹl]
3 Makọ ikozi dede e rẹ kẹ emọ rai evie,
Rekọ ọmọtẹ ahwo mẹ ọ rrọ eva gaga,+ wọhọ ogomugoro nọ ọ rrọ udhude.+
ד [Dalẹt]
4 Ẹrọo ọmọ-unuevie ọ tamu ei unu fiki uruame.
Emọ e be yare ebrẹdi,+ rekọ ohwo ọvo ọ be kẹ ae ebrẹdi ọvuọvo ho.+
ה [He]
5 Enọ e jẹ hae re obọdẹ emu vẹre i kiẹzẹ iko-ore avọ ohọo ogaga nọ u bi kpe ai.*+
Enọ a rọ iwu eghaghae yọrọ no otọ ze,+ a kiẹzẹ ẹre enwo.
ו [Whọọ]
6 Uye* ọmọtẹ ahwo mẹ o rro vi uye nọ a kẹ Sọdọm fiki uzioraha riẹ,+
Ọnọ a raha ababọ oke oraha, nọ ohwo ọvo ọ sai fiobọhọ kẹ hẹ.+
ז [Zayin]
7 Ahwo Nazaraet riẹ+ a fo vi ekpalekpa-ame vẹre, a fo vi ame-ivie.
A ware vi ikoral* vẹre; a jọ wọhọ itho safaya enwranwra.
ח [Hẹt]
8 Oma rai u bi vi ewizi* no;
A bi vuhu ae evaọ iyẹrẹ hẹ.
Ohọroma rai u siku tamu igbenwa rai no;+ o ya fia wọhọ ure uwhuowhu.
ט [Tet]
9 Enọ a rehọ ọgbọdọ kpe i woma vi enọ ohọo nọ u mu u kpe whu,+
Enọ oma o lọhọ fiki emuore nọ o bi no udhu na ze he, wọhọ ẹsenọ a rehọ ọgbọdọ duwu ai lafi.
י [Yod]
10 Eyae nọ e jẹ hai wo ọdawẹ e rehọ abọ rai there emọ obọrai.+
Emọ na i zihe ruọ emu uweri nọ a be re evaọ etoke nọ ọmọtẹ ahwo mẹ ọ rọ nwoma.+
כ [Kaf]
11 Jihova o mu ofu no;
O ku ofu ọgaga riẹ lahwe no.+
O tu erae họ Zayọn no nọ e be mahe etọhotọ riẹ no.+
ל [Lamẹd]
12 Ivie otọakpọ na gbe ahwo kpobi nọ a be rria otọakpọ na a rọwo ho
Inọ ojihẹ na avọ ọwegrẹ na a te nya inuethẹ Jerusalẹm ruọ eva.+
מ [Mẹm]
13 Onana o via fiki izieraha eruẹaro riẹ, iruthọ izerẹ riẹ,+
Enọ i kpe azẹ ahwo okiẹrẹe evaọ eva riẹ.+
נ [Nun]
14 A bi ghoro wọhọ ahwo nọ a tuaro+ evaọ iyẹrẹ.
Azẹ o gbe oma rai ku,+
Onọ u ru nọ ohwo ọvo ọ gbẹ be sae rọ obọ te iwu rai hi.
ס [Samẹk]
15 A bi bo kẹ ae nọ, “Wha no etenẹ no! Enọ e fo ho! Wha no etenẹ no! Wha no etenẹ no! Wha rọ obọ te omai hi!”
Keme a gbe wo uwou hu, yọ a bi ghoro kpenẹ avọ enẹ.
Ahwo a be jọ udevie erẹwho na ta nọ: “A sae rria etenẹ kugbe omai hi.*+
פ [Pe]
16 Ovao Jihova o vaha e rai no;+
O gbe ti rri rai aro vievie he.
Ahwo a ti wo adhẹẹ kẹ izerẹ na ha,+ a ti rri ekpako na aro ho.”+
ע [Ayin]
17 Makọ enẹna, ibiaro mai i dhe no nọ ma bi ro rri gwọlọ obufihọ nọ u bi te omai obọ họ.+
Ma je rri, je rri gwọlọ obufihọ evaọ obọ orẹwho nọ o sai siwi omai hi.+
צ [Sade]
18 A rọ kpahe ithihi mai tuatuatua,+ onọ u ru nọ ma gbẹ be sae nya evaọ iko-ore mai hi.
Urere mai o kẹle no; edẹ mai i re no, keme urere mai u te no.
ק [Kof]
19 Enọ i je le omai i siawọ vi igo nọ e rrọ obọ ehru.+
A je le omai evaọ ehru igbehru na; a je dhere hẹrẹ omai evaọ udhude na.
ר [Resh]
20 Ẹwẹ ighogho-inwe mai, ọnọ Jihova o wholo na,+ a mu rie no evaọ ọgọdọ ologbo rai,+
Ọnọ ma jẹ ta kpahe nọ: “Otọ edhedhẹ riẹ ma te jọ nọ ma te rria udevie erẹwho na.”
ש [Sin]
21 Ghọghọ jẹ wereva, O ọmọtẹ Edọm,+ nọ whọ be rria ẹkwotọ Ọz na.
Rekọ a te wọ egho na kẹ owhẹ re,+ idi i ve ti mu owhẹ, whọ vẹ te bafihọ.+
ת [Tọọ]
22 O ọmọtẹ Zayọn, uye nọ whọ be ruẹ fiki oruthọ ra u te oba no.
Ọ gbẹ te wariẹ mu owhẹ kpohọ igbo ho.+
Rekọ o ti kuomarẹriẹ rri oruthọ ra, O ọmọtẹ Edọm.
Ọ te fere izieraha ra via.+
5 O Jihova, kareghẹhọ oware nọ o via kẹ omai na.
Rri re whọ ruẹ omovuọ nọ o rrọ omai oma.+
2 A rehọ ukuoriọ mai kẹ erara no, a rehọ iwou mai kẹ ahwo erẹwho efa no.+
3 Ma zihe ruọ emọ nọ i wo ọsẹ hẹ no; ini mai e wọhọ eyae-uku.+
4 Ma be hwosa re ma tẹ da ame obọmai,+ yọ ẹdẹ ma be dẹ ire obọmai.
5 Enọ i bi le omai a te omai oma no;
Oma o lọhọ omai no, rekọ a be kẹ omai uvẹ serihọ họ.+
6 Ma rriẹ abọ mai kẹ Ijipti+ gbe Asiria+ re ma wo ebrẹdi nọ i re te omai re.
7 Esẹ-esẹ mai nọ e raha uzi i whu no, rekọ o gba omai họ nọ ma rẹ ruẹ uye iruthọ rai.
8 Idibo i bi su omai enẹna; ohwo ọvo ọ riẹ nọ o re si omai no obọ rai hi.
9 Ma re fi uzuazọ* mai họ ọza re ma te wo ebrẹdi,+ fiki ọgbọdọ nọ ọ rrọ udhude na.
10 Ohọroma mai o be rrorro wọhọ umuwou-erae fiki edada nọ ohọo o be wha ze.+
11 A ru oma vuọ eyae uwou-orọo nọ e rrọ Zayọn no,* emetẹ-kọkọ nọ e rrọ ikpewho Juda.+
12 A thuru ufi fihọ obọ ikpahwo-esuo ro thuru ai veghe,+ yọ a kẹ ekpako adhẹẹ hẹ.+
13 Izoge emezae e wọ utho nọ a re ro wuhu eware, yọ emezae i bi zoruẹ fiki ekru ire nọ a wọ.
14 Ekpako na i no unuẹthẹ okpẹwho na no;+ izoge emezae na i gbe bi kporo ile rai hi.+
15 Oghọghọ u no udu mai no; ile-igbe mai i zihe ruọ uweri no.+
16 Etu-uvie na o kie no uzou mai no. Uye u te omai, keme ma raha uzi no!
17 Fiki onana, udu mai o be mọ,+
Yọ fiki eware enana, ibiaro mai i dhe no,+
18 Fiki Ugbehru Zayọn nọ o rrọ ofofe;+ iruakọ e be jọ eva riẹ nya kpenẹ avọ enẹ enẹna.
19 Rọkẹ owhẹ, O Jihova, whọ keria agbara-uvie bẹdẹ bẹdẹ.
Agbara-uvie ra ọ rrọ no oge ruọ oge.+
20 Fikieme whọ rọ kpairoro vrẹ omai bẹdẹ bẹdẹ, je gbabọkẹ omai kri te enẹ?+
21 Rehọ omai zihe bru omara ze, O Jihova, ma te rọ unevaze zihe bru owhẹ ze.+
Ru edẹ mai kpokpọ wọhọ epanọ e jọ evaọ oke nọ u kpemu.+
22 Rekọ whọ siọ omai no riẹriẹriẹ.
Who gbe bi mu ofu kẹ omai gaga.+
Uzou ọsosuọ rite orọ avọ ene na yọ eme uweri evaọ ibieme Hibru.
Hayo “ibrotọ esuo.”
Hayo “Izoge emetẹ.”
Evaọ Hibru, “enọ i wuzou.”
Hayo “wereva.”
Ẹme nọ a ro dhesẹ Jerusalẹm wọhọ ẹsenọ ọ rrọ ohwo.
Evaọ Hibru, “nifẹsh mẹ.” Rri oria Otofa Eme.
Evaọ Hibru, “unu.”
Hayo “Izoge emetẹ.”
Evaọ Hibru, “Ivu mẹ i duwuku.”
Hayo “e rẹ bẹ ẹvẹruọ.”
Evaọ Hibru, “uzei.”
Evaọ Hibru, “O thihi.”
Hayo “e rẹ bẹ ẹvẹruọ.”
Hayo “Ọ raha ehaa riẹ.”
Evaọ Hibru, “ọ seba esilọ họ.”
Hayo “e mere ruọ.”
Hayo “Uthubro.”
Hayo “ehọ-ẹkporo.”
Evaọ Hibru, “Ivu mẹ i duwuku.”
Nọ odẹme nọ a re ro dhesẹ oware wọhọ ẹsenọ ọ rrọ ohwo, ẹsejọhọ o be ta kpahe ohrọ-oriọ hayo uweri nọ a bi weri kẹ ohwo.
Evaọ Hibru, “nifẹsh.” Rri oria Otofa Eme.
Evaọ Hibru, “uzei.”
Evaọ Hibru, “ọmọtẹ ubiẹro ra uvẹ re o serihọ họ.”
Evaọ Hibru, “nifẹsh.” Rri oria Otofa Eme.
Evaọ Hibru, “evaọ uzou iyẹrẹ kpobi.”
Hayo “ubi.”
Hayo “izoge emetẹ.”
Hayo “yẹ omakọkọ.”
Hayo “o re bru olẹ mẹ dhe; ọ rẹ kare olẹ mẹ dhe.”
Hayo o sae jọ nọ, “o ru omẹ fihọ ọnọ o bi ru oware ovo ho.”
Evaọ Hibru, “O thihi.”
Evaọ Hibru, “emezae.”
Evaọ Hibru, “Nifẹsh ra ọ.” Rri oria Otofa Eme.
Evaọ Hibru, “nifẹsh.” Rri oria Otofa Eme.
Hayo “rọ odiri hẹrẹ.”
Hayo “Who guẹdhọ mẹ no.”
Evaọ Hibru, “evaọ uzou iyẹrẹ kpobi.”
Evaọ Hibru, “ababọ.”
Evaọ Hibru, “Oruthọ.”
Rri oria Otofa Eme.
Evaọ Hibru, “ubiebi.”
Hayo “rria etenẹ wọhọ ahwo erẹwho efa ha.”
Evaọ Hibru, “nifẹsh.” Rri oria Otofa Eme.
Hayo “A gba eyae uwou-orọo nọ e rrọ Zayọn du no.”