ILETA RO SE AHWO FILIPAI

1 Pọl avọ Timoti, erigbo Kristi Jesu, ro se erẹri na kpobi nọ e rrọ usu kugbe Kristi Jesu nọ e rrọ Filipai,+ gbe esẹro avọ idibo iruiruo:+

2 Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.

3 Me re yere Ọghẹnẹ mẹ ẹsikpobi nọ mẹ tẹ kareghẹhọ owhai 4 evaọ olẹ ayare-ọgaga mẹ kpobi nọ mẹ be lẹ fiki rai kpobi. Mẹ be lẹ olẹ ayare-ọgaga kpobi avọ oghọghọ,+ 5 fiki obọ nọ wha bi fihọ* evaọ ẹwhaharo usi uwoma na no ẹdẹ ọsosuọ ze rite enẹna. 6 Keme uzedhe oware nana u mu omẹ ẹro, inọ ọnọ ọ jọ oma rai mu iruo iwoma họ na o ti ru ei te urere+ bọo ẹdẹ Kristi Jesu.+ 7 U kiehọ re me roro enẹ kpahe owhai kpobi, keme me wo owhai họ iroro, whai enọ i bi lele omẹ wo erere no uwowou ulogbo Ọghẹnẹ ze, nọ e be tha omẹ uke evaọ uwou-odi nọ mẹ rrọ+ gbe evaọ ẹthọ usi uwoma na je bi ru ei dikihẹ evaọ abọ egọmeti.*+

8 Keme Ọghẹnẹ họ osẹri mẹ inọ u bi si omẹ urru gaga re mẹ ruẹ owhai kpobi, keme me wo ọkpọ uvi uyoyou Kristi Jesu kẹ owhai. 9 Olẹ nọ mẹ be lẹ ẹsikpobi họ, jọ uyoyou rai u gbe dhe ẹruẹro+ avọ eriariẹ egbagba+ gbe orimuo kpobi;+ 10 re wha ruẹsi vuhu eware nọ e mae roja,+ wha vẹ sae kare afuẹwẹ jẹ siọ amọfa ba ezoruẹ+ ri bọo ẹdẹ Kristi; 11 re ibi ikiẹrẹe e ruẹse vọ owhai oma ẹkwoma Jesu Kristi,+ onọ o rẹ wha oruaro gbe ujiro se Ọghẹnẹ.

12 Whaọ mẹ gwọlọ re wha riẹ, inievo, inọ uyero mẹ u fiobọhọ no evaọ ẹnyaharo usi uwoma na, 13 te epanọ Iroiro Osu Ologbo na kpobi gbe amọfa kpobi a rọ riẹ no+ inọ fiki Kristi mẹ rọ rrọ uwou-odi.+ 14 Whaọ inievo mai buobu evaọ Olori na a wo udu no fiki uwou-odi nọ mẹ rrọ na, yọ a bi dhesẹ aruọwha vi epaọ anwẹdẹ evaọ ẹme Ọghẹnẹ nọ a be ta ababọ ozodhẹ.

15 Uzẹme, ahwo jọ a be rọ ihri-eriọ gbe ẹwhọ whowho ovuẹ kpahe Kristi na, rekọ amọfa a be rọ emamọ eva ru ei. 16 Enọ e be rọ emamọ eva ru ei na a bi whowho ovuẹ kpahe Kristi fiki uyoyou, keme a riẹ nọ a rehọ omẹ mu re mẹ thọ usi uwoma na;+ 17 rekọ otu ọdekọ na a be rọ oma ẹwhọ ro ru ei, orọnikọ avọ emamọ ẹjiroro ho, keme a gwọlọ wha ukpokpoma se omẹ evaọ uwou-odi nọ mẹ rrọ na. 18 Eme u bi no onana ze? Oghẹrẹ kpobi nọ o rrọ kẹhẹ, te a ru rie avọ ẹghẹ hayo evaọ uzẹme, a bi whowho odẹ Kristi, yọ mẹ be ghọghọ fiki onana. Evaọ uzẹme, mẹ te gbẹ ghọghọ 19 keme mẹ riẹ nọ onana o te wha esiwo se omẹ fiki olẹ ayare-ọgaga rai+ gbe uketha ẹzi Jesu Kristi.+ 20 Onana o rọwokugbe irẹro egaga gbe ẹruore nọ me wo inọ oma o te vuọ omẹ vievie he, rekọ fiki ẹme nọ mẹ be ta ududu, Kristi ọ te rọ ẹkwoma oma mẹ wo orro enẹna wọhọ epaọ anwẹdẹ, te mẹ rrọ uzuazọ hayo me whu.+

21 Keme rọkẹ omẹ, mẹ tẹ rrọ uzuazọ, mẹ rrọ uzuazọ kẹ Kristi,+ yọ me te whu me wo erere.+ 22 Whaọ otẹrọnọ mẹ tẹ gbẹ rrọ uzuazọ evaọ uwo, me ti gbe ru iruo buobu; ghele na mẹ be ta onọ mẹ salọ via ha. 23 Mẹ riẹ onọ mẹ rẹ salọ evaọ eware ivẹ nana ha, keme o rrọ isiuru mẹ re a siobọno omẹ re mẹ jọ kugbe Kristi,+ keme oye o mai woma.+ 24 Rekọ, o mae roja re mẹ gbẹ jariẹ evaọ uwo fiki rai. 25 Fikinọ onana u mu omẹ ẹro, mẹ riẹ nọ mẹ te gbẹ jariẹ jẹ jọ kugbe owhai re wha gbe wo ẹnyaharo je wo oghọghọ evaọ ẹrọwọ na, 26 re wha ruẹsi wo evawere gaga evaọ Kristi Jesu fiki mẹ okenọ mẹ te wariẹ jọ kugbe owhai.

27 Thakpinọ wha yeri* evaọ oghẹrẹ nọ u fo usi uwoma kpahe Kristi na,+ re o tẹ make rọnọ mẹ nyaze te ruẹ owhai hayo mẹ nyaze he, me ve yo kpahe owhai jẹ riẹ nọ wha dikihẹ ga evaọ ẹzi ọvo, be rọ okugbe* ọvo+ họre kẹ ẹrọwọ nọ wha wo fiki usi uwoma na, 28 yọ wha be kuvẹ re ewegrẹ rai i ru ozọ mu owhai vievie he. Uzedhe oware nana yọ imuẹro ọraha+ nọ o ti te ai, rekọ esiwo kẹ owhai;+ yọ obọ Ọghẹnẹ onana u no ze. 29 Keme a kẹ owhai uvẹ-ọghọ na fiki Kristi, yọ orọnikọ re wha fi ẹrọwọ họ iẹe ọvo ho, rekọ re wha ruẹ uye fiki riẹ re.+ 30 Keme wha be rẹriẹ ovao dhe oghẹrẹ uye nọ wha ruẹ nọ mẹ rẹriẹ ovao dhe,+ onọ wha bi yo nọ mẹ gbẹ be rẹriẹ ovao dhe na.

2 Otẹrọnọ wha te wo uduotahawọ jọ nọ wha rẹ kẹ evaọ Kristi, otẹrọnọ wha te wo omosasọ jọ nọ wha rẹ kẹ fiki uyoyou, otẹrọnọ wha tẹ be daezọ ohwohwo,* otẹrọnọ wha bi dhesẹ uvi uyoyou gbe ọdawẹ, 2 wha ru re me wo oghọghọ ziezi ẹkwoma eva evo nọ wha re wo, oghẹrẹ uyoyou ọvona nọ wha re wo, okugbe ọvo nọ wha rẹ jọ, je wo iroro evona.+ 3 Wha rehọ ẹwhọ+ hayo omorro+ ru oware ovo ho, rekọ avọ omaurokpotọ* wha rri amọfa inọ a rro vi owhai,+ 4 wha gwọlọ ewoma obọrai ọvo ho,+ rekọ ewoma amọfa re.+

5 Ẹsikpobi jọ wha wo oghẹrẹ iroro nana nọ Kristi Jesu o wo re na,+ 6 ọnọ o du roro epanọ ọ rẹ rọ jọ ẹrẹrẹe kugbe Ọghẹnẹ hẹ+ dede nọ ọ jọ wọhọ Ọghẹnẹ.+ 7 Ijo, rekọ o siobọno eware kpobi, ọ tẹ rehọ oma ọrigbo,+ o te zihe ruọ ohwo-akpọ.*+ 8 Mae tubẹ rro na, okenọ ọ jọ ohwo-akpọ,* ọ romakpotọ je yoẹme te epanọ o ro whu dede,+ ẹhẹ, uwhu evaọ ure-oja.*+ 9 Fiki ugogo ẹjiroro nana, Ọghẹnẹ ọ kpare riẹ fihọ ọkwa nọ o kpehru vi onọ ọ jọ vẹre+ jẹ kẹe odẹ nọ o rro vi odẹ ofa kpobi,+ 10 re ighilawọ kpobi i kigwẹ evaọ odẹ Jesu, ighilawọ enọ e rrọ obọ odhiwu gbe otọakpọ gbe obọ otọ ẹkpẹ na+— 11 re ẹrọo kpobi ọ jẹ ta via nọ Jesu Kristi họ Olori,+ onọ o rẹ wha oruaro se Ọghẹnẹ Ọsẹ na.

12 Fikiere iyoyou mẹ, nwane wọhọ epanọ wha be hai yoẹme ẹsikpobi na, orọnikọ nọ mẹ tẹ rrọ kugbe owhai ọvo ho na rekọ maero okenọ mẹ rrọ kugbe owhai hi na, wha hae daoma rehọ ozodhẹ gbe enuhu thuẹhọ epanọ wha re ro wo esiwo. 13 Keme Ọghẹnẹ họ ọnọ ọ be kẹ owhai ẹgba nọ wha re ro ru eware nọ e rẹ were iẹe, ọ be kẹ owhai isiuru na gbe ogaga nọ wha re ro ru ere. 14 Wha hai ru eware kpobi ababọ eguago+ gbe avro-ọvro,+ 15 re wha ruẹse kare afuẹwẹ jẹ kare abe, jẹ jọ emọ Ọghẹnẹ+ nọ e kare epe evaọ udevie oge omuomu nọ ọ vọ avọ uzioraha,*+ enọ wha be jọ udevie rai lo wọhọ ikpẹ evaọ akpọ na,+ 16 nọ wha bi kru ẹme uzuazọ na gaga ziezi na.+ Mẹ vẹ sae ruẹ oware nọ o rẹ lẹliẹ omẹ ghọghọ evaọ ẹdẹ Kristi nọ mẹ tẹ ruẹ nọ mẹ dhẹ ohrẹ kufiẹ hẹ hayo me ru iruo kufiẹ hẹ. 17 Rekọ, o tẹ make rọnọ a bi ku omẹ wọhọ idhe udi+ fihọ ehru idheidhe+ gbe iruo odibọgba ọrẹri* nọ ẹrọwọ rai ọ be wọ owhai ru, eva e be were omẹ, yọ me bi lele owhai kpobi ghọghọ. 18 Epọvo na re, jọ eva e were owhai, re wha je lele omẹ ghọghọ.

19 Whaọ me bi rẹro nọ me ti vi Timoti+ ze kẹle na, nọ o tẹ ruọ Olori na Jesu, re mẹ ruẹsi wo uduotahawọ nọ me te yo epanọ wha bi ru. 20 Keme me wo omọfa nọ o wo ọkpọ uruemu riẹ hẹ nọ ọ te rọ eva riẹ kpobi rẹrote eware nọ e rrọ ọdawẹ kẹ owhai. 21 Keme ahwo nọ a kiọkọ kpobi a be gwọlọ ewoma obọrai, orọnikọ ọrọ Jesu Kristi hi. 22 Rekọ wha riẹ imuẹro nọ ọ kẹ kpahe omariẹ, inọ wọhọ ọmọ+ nọ ọ rrọ kugbe ọsẹ riẹ, o lele omẹ ruẹ uye re usi uwoma na o nyaharo. 23 Fikiere, ọye họ ohwo nọ me bi rẹro nọ me ti vi ze nọ mẹ tẹ nwane riẹ epanọ eware e te jọ kẹ omẹ no. 24 Evaọ uzẹme, me fievahọ Olori na inọ mẹ omamẹ mẹ te nyabru owhai ze kẹle re.+

25 Rekọ evaọ enẹna me roro nọ u kiehọ re me vi Epafrodaitọs se owhai, oniọvo mẹ gbe ibe oruiruo mẹ, ọnọ ma gbẹ rrọ osoja Kristi, ọ tẹ jẹ rrọ ọnyukọ rai nọ wha vi ze te rẹrote omẹ,+ 26 keme u bi si ei urru re ọ ruẹ owhai kpobi, yọ ọ rrọ ọkora fikinọ wha yo inọ ọ jẹ mọ. 27 Ẹhẹ, ọ ginẹ mọ tubẹ kẹle uwhu dede; rekọ Ọghẹnẹ ọ re ohrọ riẹ, evaọ uzẹme, orọnikọ ohrọ riẹ ọvo ho rekọ ohrọ mẹ re, re me gbe weri vi onọ mẹ rrọ na ha. 28 Fikiere, me bi vi ei se owhai vẹrẹ vẹrẹ, re nọ wha tẹ ruẹ e riẹ, wha vẹ wariẹ wo oghọghọ, awaọruọ mẹ o ve je kpotọ re. 29 Fikiere wha rọ oghọghọ dede iei rehọ wọhọ epanọ wha be hai dede ilele Olori na rehọ na, wha gbẹ hai rri inievo itieye na ghaghae,+ 30 keme o je ti whu no fiki iruo Kristi,* o fi uzuazọ riẹ họ ọza re ọ ruẹsi ru eware nọ wha hai ru rọ gbodibo kẹ omẹ.+

3 Orọ urere, inievo mẹ, wha gbẹ hae ghọghọ evaọ Olori na.+ Uye o rrọ kẹ omẹ hẹ re mẹ wariẹ kere eware evona se owhai, keme o rrọ kẹ omofọwẹ rai.

2 Wha muẹrohotọ fiki erakọ na; wha muẹrohotọ fiki enọ e rẹ wha enwoma ze; wha muẹrohotọ fiki enọ i re si ikẹ nọ u fo re a yawo.*+ 3 Keme mai họ enọ i wo uvi oyawo na,+ mai nọ i bi ru iruo ọrẹri ẹkwoma ẹzi Ọghẹnẹ jẹ be rọ Kristi Jesu seha,+ enọ i bi fievahọ eware uwo ho. 4 Rekọ otẹrọnọ ohwo jọ kpobi o wo eware nọ e rẹ lẹliẹe fievahọ eware uwo, mẹ họ ohwo na.

Otẹrọnọ omọfa jọ kpobi o bi roro nọ o wo eware nọ e rẹ lẹliẹe fievahọ eware uwo, mẹ mai wo: 5 a yawo omẹ ẹdẹ avọ eree,+ mẹ yọ ohwo orẹwho Izrẹl, ohwo orua Bẹnjamin, ohwo Hibru nọ ahwo Hibru a yẹ;+ evaọ ekoko uzi, mẹ yọ ohwo Farisi;+ 6 rọ kpahe ajọwha, me je kpokpo ukoko na;+ rọ kpahe ẹrẹreokie fiki ekoko uzi na, me dhesẹ nọ mẹ kare afuẹwẹ. 7 Ghele na, kpahe eware nọ e jẹ kẹ omẹ erere na, me rri rai wọhọ eware nọ i wo iruo ho* fiki Kristi.+ 8 U te no ere no, me bi rri eware kpobi wọhọ eware nọ i wo iruo ho fiki eriariẹ kpahe Kristi Jesu Olori mẹ nọ e ghare vi eware kpobi. Fiki riẹ, mẹ kpairoro vrẹ eware kpobi, mẹ tẹ rehọ ae wọhọ eware ezuzu, re mẹ ruẹsi wo Kristi, 9 jẹ jọ usu kugbei, orọnikọ fiki ẹrẹreokie obọmẹ nọ u no ekoko Uzi na ze he, rekọ fiki ẹrẹreokie nọ u no ẹrọwọ+ nọ a fihọ Kristi+ ze, ẹrẹreokie nọ u no obọ Ọghẹnẹ ze fiki ẹrọwọ.+ 10 Utee mẹ họ re mẹ riẹe gbe ogaga ẹkparomatha riẹ,+ re me je wobọ evaọ uye-oruẹ riẹ,+ jẹ rọwo nọ me re whu oghẹrẹ uwhu nọ o whu,+ 11 re mẹ ruẹ sọ o sae lọhọ re mẹ jọ usu ẹkparomatha ọsosuọ no uwhu ze+ na.

12 Orọnikọ u te omẹ obọ no ho hayo kọ a ru omẹ gba no ho, rekọ mẹ be daoma kpobi+ sọ oware nọ Kristi Jesu ọ rọ fiki riẹ salọ omẹ* na o sai te omẹ obọ.+ 13 Inievo, me bi rri omamẹ nọ u te omẹ obọ no ho; rekọ oware jọ nọ u muẹro ona: Mẹ be kpairoro vrẹ eware nọ e rrọ obemu+ jẹ be daoma kpobi le eware nọ e rrọ obaro,+ 14 mẹ be daoma kpobi le utee osa+ use obọ odhiwu+ nọ Ọghẹnẹ ọ rọ ẹkwoma Kristi Jesu se na. 15 Fikiere, jọ mai nọ e kpako+ a wo oghẹrẹ iroro nana, yọ otẹrọnọ wha wo oghẹrẹ iroro efa evaọ abọ jọ kpobi, Ọghẹnẹ ọ te fere iroro egbagba na via kẹ owhai. 16 Rekọ, oghẹrẹ kpobi nọ ma wo ẹnyaharo te no kẹhẹ, joma gbẹ hae nyaharo kpatiẹ evaọ edhere ọvona.

17 Inievo, whai kpobi wha rọ aro kele omẹ,+ jẹ tẹrovi enọ e be nya evaọ edhere nọ ọ rọwokugbe oriruo nọ ma fihọ otọ kẹ owhai na. 18 Keme ibuobu e riẹ nọ mẹ jẹ hae fodẹ gaga rekọ mẹ be fodẹ ae enẹna avọ oviẹ, enọ e be nya evaọ oghẹrẹ nọ u ru rai họ ewegrẹ ure-oja* Kristi na. 19 Ọraha ọ te jọ ukuhọ rai, eva rai họ ọghẹnẹ rai, a be rọ eware nọ i fo nọ e rẹ vuọ ae oma rọ yoma, je bi fi iroro rai họ eware otọakpọ na.+ 20 Rekọ ẹwho mai+ ọ rrọ obọ idhiwu na,+ yọ ma be rọ ọwhọ hẹrẹ osiwi nọ o bi no obei ze, Olori na Jesu Kristi,+ 21 ọnọ o ti nwene ugboma ohẹhẹ mai na re o jọ wọhọ* ugboma riẹ nọ u wo oruaro+ na ẹkwoma ogaga ulogbo riẹ nọ ọ be sai ro fi eware kpobi họ otọ omobọ riẹ.+

4 Fikiere, inievo mẹ nọ me you jẹ gwọlọ nọ mẹ rẹ ruẹ, oghọghọ gbe etu-uvie mẹ,+ jọ wha dikihẹ ga+ evaọ Olori na evaọ oghẹrẹ nọ mẹ fodẹ no na, iyoyou mẹ.

2 Mẹ be tuduhọ Yuodia awọ jẹ be tuduhọ Sintiki awọ inọ a wo iroro evo evaọ Olori na.+ 3 Mẹ be lẹ owhẹ re, emamọ ibe oruiruo mẹ, inọ hai fiobọhọ kẹ eyae nana nọ i lele omẹ ruẹ uye no* fiki usi uwoma na, gbe Klẹmẹnt gbe ibe iruiruo mẹ nọ i kiọkọ, enọ edẹ rai e rrọ obe uzuazọ na.+

4 Wha hae ghọghọ ẹsikpobi evaọ Olori na. Mẹ be wariẹ ta nọ, Wha ghọghọ!+ 5 Wha ru re ahwo kpobi a ruẹ nọ wha wo iroro.*+ Olori na o thabọ họ. 6 Wha ruawa kpahe oware ovo ho,+ rekọ evaọ oware kpobi wha rọ olẹ avọ olẹ ayare-ọgaga kugbe uyere-okẹ ta ayare rai via kẹ Ọghẹnẹ;+ 7 udhedhẹ+ Ọghẹnẹ nọ u vi otoriẹ kpobi o vẹ te sẹro udu rai+ gbe ogaga iroro rai* ẹkwoma Kristi Jesu.

8 Orọ urere, inievo, eware kpobi nọ e rrọ uzẹme, eware kpobi nọ e roja gaga, eware kpobi nọ i kiẹrẹe, eware kpobi nọ e fo, eware kpobi nọ e rẹ wha uyoyou họ aro, eware kpobi nọ a be ta emamọ ẹme kpahe, eware kpobi nọ i woma, gbe eware kpobi nọ i fo ejiro, wha hai roro* kpahe eware nana.+ 9 Eware nọ wha wuhrẹ mi omẹ jẹ rọwo na, enọ wha yo jẹ ruẹ evaọ oma mẹ na, wha ru ai,+ Ọghẹnẹ udhedhẹ na ọ vẹ te jọ kugbe owhai.

10 Mẹ be ghọghọ gaga evaọ Olori na inọ enẹna wha wariẹ mu awa mẹ họ ẹruọ no.+ Dede nọ wha jẹ ruawa kpahe omẹ, wha ruẹ uvẹ dhesẹ iẹe via ha. 11 Orọnikọ mẹ be ta onana fikinọ oware jọ o kare omẹ hẹ, keme me wuhrẹ epanọ me re ro wo edẹro no ghelọ uyero kpobi nọ mẹ rrọ kẹhẹ.+ 12 Mẹ riẹ epanọ me re ro yeri nọ me te wo umutho eware+ gbe nọ me te wo buobu. Me wuhrẹ oware nọ umutho ahwo jọ ọvo a riẹ, oye họ, epanọ a re ro wo edẹro evaọ oware kpobi gbe evaọ uyero kpobi, te ohwo ọ re eva vọ hayo ohọo u bi kpei, te o wo buobu hayo o wo ho. 13 Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.+

14 Ghele na, wha riẹ ru nọ wha ro fiobọhọ kẹ omẹ evaọ ukpokpoma mẹ. 15 Evaọ uzẹme, whai inievo Filipai, wha riẹ re inọ, nọ wha kaki yo usi uwoma na no, evaọ okenọ me no Masidonia vrẹ, uvumọ ukoko u kuobọgbe omẹ hẹ evaọ ẹme ẹkẹ gbe emio, u te no owhai no;+ 16 keme okenọ mẹ jọ obọ Tẹsalonika, wha vi eware se omẹ ro fiobọhọ kẹ omẹ orọnikọ ẹsiẹvo ho rekọ isiava soso. 17 Orọnikọ mẹ be gwọlọ nọ wha kẹ omẹ okẹ hẹ, rekọ mẹ gwọlọ nọ wha mọ ubi nọ o rẹ wha erere buobu fihọ ẹkpa-ugho rai. 18 Rekọ, me wo oware kpobi nọ mẹ gwọlọ je tube wo dafia dede. Me wo eware buobu enẹna nọ Epafrodaitọs+ ọ kẹ omẹ eware nọ wha vi se omẹ no na, idheidhe nọ i re gbo ore awere,+ onọ o rẹ were Ọghẹnẹ, nọ ọ rẹ jẹrehọ. 19 Fiki onana, Ọghẹnẹ mẹ nọ o wo efe kpobi na ọ te rehọ ẹkwoma Kristi Jesu kẹ owhai eware kpobi nọ e roja nọ wha re wo.+ 20 Enẹna jọ oruaro na u te Ọghẹnẹ gbe Ọsẹ mai bẹdẹ bẹdẹ. Ami.

21 Wha yere erẹri na kpobi nọ e rrọ usu kugbe Kristi Jesu kẹ omẹ. Inievo nọ e rrọ kugbe omẹ a bi yere owhai. 22 Erẹri na kpobi, maero kọ enọ e rrọ ahwo uwou Siza,+ a bi yere owhai.

23 Jọ Olori na Jesu Kristi o dhesẹ uwowou ulogbo riẹ kẹ owhai nọ wha bi dhesẹ emamọ ẹzi na.