Daina O Kie Ruọ Uye

WHỌ ruẹ ohwo nọ Daina o bi weze bru na? Ọ be nya e ruẹ emetẹ jọ nọ e be ria otọ Kenan. Kọ eva e te were Jekọp ọsẹ riẹ kpahe onana? Re u fiobọhọ za onọ onana, daoma kareghẹhọ oware nọ Abraham avọ Aiziki a roro kpahe eya Kenan na.

Abraham ọ rọwo nọ Aiziki ọmọzae riẹ ọ rọo ọmọtẹ Kenan jọ? Ijo, ọ rọwo ho. Kọ Aiziki avọ Rebeka a gwọlọ nọ Jekọp ọmọzae rai ọ rehọ ọmọtẹ Kenan jọ? Ijo, a gwọlọ họ. Whọ riẹ oware nọ osoriẹ?

Oware nọ osoriẹ họ ahwo Kenan a jẹ gọ eghẹnẹ erue. A jọ ahwo owoma nọ a rẹ rehọ wọhọ ezae hayo eyae he, yọ a woma te epanọ a rẹ rọ rehae wọhọ egbẹnyusu ekpekpe he. Fikiere o sai mu omae ẹro nọ eva e rẹ were Jekọp ho nọ ọmọtẹ riẹ o bi mu ogbẹnyusu kugbe emetẹ Kenan enana.

Ghinọ ere, Daina o kie ruọ uye. Whọ be ruẹ ọzae Kenan ọyena nọ ọ rọ ifoto na bi riwi Daina na? Odẹ riẹ Shẹkẹm. Ẹdẹ jọ nọ Daina o weze ze, Shẹkẹm o te kru Daina koyehọ ọ gba riẹ họ lele wezẹ. Onana o thọ, keme ezae gbe eyae nọ erọ orọo ọvo u fo nọ a re kiẹzẹ kugbe. Oware uyoma onana nọ Shẹkẹm o ru Daina na u te su kpohọ eyoma ologbo ọfa.

Okenọ inievo emezae Daina a yo kpahe oware nọ o via na, eva e tẹ dhae gaga. Ivẹ rai, Simiọn avọ Livai, eva e dha rai te epanọ a rọ rehọ egbọdọ a tẹ nya ruọ okpẹwho na, ruọ ahwo na ọza. Ae avọ inievo emezae rai a te kpe Shẹkẹm avọ ezae nọ i kiọkọ. Eva e dha Jekọp fiki nọ emezae riẹ i ru owara uyoma onana.

Ẹvẹ uye onana kpobi u ro muhọ? Oware nọ osoriẹ ze họ Daina nọ o mu ogbẹnyusu kugbe ahwo nọ a je koko izi Ọghẹnẹ hẹ. Ma rẹ gwọlọ wo egbẹnyusu itieye he, ma rẹ gwọlọ?