Uzou Avọ 104

A Yo Urru Ọghẹnẹ Orọ avọ Esa

NỌ Ọ jọ etẹmpol na, Jesu ọ jẹ ruawa kpahe uwhu nọ ọ te rẹriẹ ovao ku kẹle na. Awaọruọ riẹ kpobi họ epanọ uwhu riẹ u ti kpomahọ odẹ Ọsẹ riẹ, fikiere ọ tẹ lẹ nọ: “Ọsẹ kẹ odẹ ra oro.”

Urru ulogbo jọ u te no idhiwu ze, whowho nọ: “Mẹ kẹ riẹ oro uno, mẹ jẹ te wariẹ kẹ e oro.”

U te gbe ogbotu nọ a dikihẹ na unu. Ejọ a te muhọ ẹta nọ: “Ukọ-odhiwu jọ [ọ] ta ẹme kẹ e.” Efa a tẹ ta inọ egbrara e va. Rekọ, uzẹme riẹ họ Jihova Ọghẹnẹ ọ t’ẹme na! Rekọ onana họ orọ ọsosuọ nọ a yo urru Ọghẹnẹ kpahe Jesu hu.

Eva ame-ọhọ Jesu, ikpe esa gbe ubro nọ i kpemu, Jọn Ọhọahwo-Ame na o yo nọ Ọghẹnẹ ọ ta kpahe Jesu nọ: “Ọnana họ Ọmọ oyoyou mẹ, ọnọ ọ were omẹ hrọ.” Kẹsena, nọ Ọnyavrẹ nọ u kpemu na o vrẹ no, okenọ Jesu ọ rẹriẹ evaọ iraro rai, Jemis, Jọn, gbe Pita a te yo Ọghẹnẹ nọ o whowho nọ: “[Ọnana] họ Ọmọ oyoyou mẹ, ọnọ ọ were omẹ hrọ; wha yo ẹme riẹ.” Yọ obọnana, orọ avọ esa, evaọ Nisan 10, edẹ ene taure Jesu o te ti whu, ahwo a tẹ wariẹ yo urru Ọghẹnẹ. Rekọ oke nana Jihova ọ t’ẹme re ogbotu ahwo a yo!

Jesu ọ ta nọ: “Uru nana o ze fiki mẹ hẹ, rekọ fiki rai.” O kẹ imuẹro inọ ghinọ Jesu họ Ọmọ Ọghẹnẹ, Mesaya nọ a yeyaa riẹ na. Jesu ọ tẹ gbẹ ta haro nọ: “Whaọ okenọ a re ro bruoziẹ akpọ na u te no; enẹna a ti le [osu] akpọ na no.” Uzuazọ ẹrọwọ nọ Jesu o yere o kẹ imuẹro nnọ u fo re Setan Ẹdhọ na, osu akpọ na, a “le” i no, re a kpei.

Be riobọ kpohọ iyẹrẹ uwhu riẹ nọ o be tha, Jesu ọ tẹ ta nọ: “Rekọ mẹ, a tẹ kpare omẹ no otọ kpehru, me re ti si ahwo akpọ na rehọ.” Orọnikọ uwhu riẹ u dhesẹ nọ a fi rie kparobọ no ho, keme fiki riẹ o ti ro si amọfa kugbe oma re a reawere uzuazọ ebẹdẹ bẹdẹ.

Rekọ ogbotu na a tẹ vro nọ: “Whaọ ma jọ eva uzi yo nọ, Kristi ọ rẹ jọ bẹdẹ; kẹvẹ whọ jẹ be ta nọ, a [rẹ] te kpare Ọmọ ohwo? Kọ o no họ Ọmọ ohwo yena?”

Makọ imuẹro na kpobi, kugbe urru Ọghẹnẹ nọ a yo, ibuobu a rọwo ho inọ Jesu họ uvi Ọmọ ohwo, Mesaya nọ a yeyaa riẹ na. Ghele na, wọhọ epanọ o ru emerae ezeza nọ i kpo evaọ Ehaa Uwou-Udhu na, Jesu ọ tẹ wariẹ ta kpahe omobọ riẹ wọhọ “elo na” ọ tẹ tudu họ enọ e be gaviezọ kẹe awọ nọ: “Nọ owha wo elo na, wha rọwo elo na, re wha te jọ emọ elo.” Nọ ọ ta eware enana no, Jesu ọ tẹ nya i dhere, ẹsejọhọ fikinọ uzuazọ riẹ o rọ awa.

Ẹrọwọ nọ ahwo Ju a bi fihọ Jesu hu na o rọ orugba eme ọ Aizaya kpahe ‘ibiaro ahwo na nọ i tu no gbe idu rai nọ e ga no re a seba ekurẹriẹ re a siwi ai.’ Aizaya ọ jọ eruẹaruẹ ruẹ okọto odhiwu Jihova, nọ u kugbe Jesu evaọ oruaro odhiwu riẹ kugbe Jihova. Ghele na, ahwo Ju, evaọ orugba oware nọ Aizaya o kere, a keke aro fihọ se imuẹro na nnọ Ọnana họ Osiwi nọ a yeyaa riẹ na.

Evaọ abọdekọ riẹ, ibuobu isu na (ẹsejọhọ ahwo okọto okpehru ahwo Ju na, Sanhẹdrin na) a ghine fi ẹrọwọ họ Jesu. Nikodimọs gbe Josẹf ohwo Arimatia yọ imava isu enana. Rekọ isu na a ti dhesẹ ẹrọwọ rai via tao ho, fiki ozodhẹ nnọ a ti si ai no ọkwa rai evaọ uwou-egagọ na. Eware nọ i vru mi ahwo itieye na i bu yọ!

Jesu o te muẹrohọ nọ: “Ọ nọ ọ rọwo mẹ, orọnọ mẹ ọ rọwo ho, rekọ ọnọ o vi omẹ. Ọ nọ ọ ruẹ omẹ, orọnọ mẹ ọ rẹ ruẹ hẹ, rekọ yọ ọ ruẹ ọ nọ o vi omẹ. . . . Ohwo nọ o yo eme mẹ, o gbe koko ai hi, me re bruoziẹ riẹ hẹ; keme mẹ ze ti bruoziẹ akpọ na ha, rekọ mẹ ze ti siwi akpọ na. . . . Ẹme nọ mẹ ta na, ọye o re ti bruoziẹ riẹ ẹdẹ urere.”

Uyoyou Jihova kẹ akpọ na o wọ riẹ re o vi Jesu ze re ahwo nọ a fi ẹrọwọ họ iẹe a ruẹse zọ. Sọ ahwo a rẹ te zọ o roma hwa sọ a yoẹme kẹ eware nọ Ọghẹnẹ ọ vuẹ Jesu nọ ọ ta. Ẹdhoguo na o te jọ “ẹdẹ urere” na, evaọ etoke Esuo Odu Ikpe Kristi.

Jesu o te ku eme riẹ họ ta nọ: “Keme mẹ ta orobọ mẹ hẹ; rekọ Ọsẹ nọ o vi omẹ, ọye ọ kẹ omẹ [ujaje] onọ mẹ rẹ ta gbe eme oware nọ mẹ rẹ ta. Mẹ riẹ nọ [ujaje] riẹ họ uzuazọ ebẹdẹ bẹdẹ: fikiere eme nọ mẹ ta, mẹ ta e wọhọ epanọ Ọsẹ na o vi omẹ.” Jọn 12:28-50; 19:38, 39; Matiu 3:17; 17:5; Aizaya 6:1, 8-10.

▪ Isiasa vẹ a yo urru Ọghẹnẹ no kpahe Jesu?

▪ Ẹvẹ Aizaya ọruẹaro na ọ ruẹ oruaro Jesu?

▪ Amono họ isu nọ i fi ẹrọwọ họ Jesu, rekọ eme jabọ a gbe bi ro whowho iei via ha?

▪ Eme họ “ẹdẹ urere” na, kọ eme a ti ro gu ahwo ẹdhọ?