Bovẹ Akpọ Na Ọ Be Nya?

Ebẹbẹ ilogbo gbe eware imuozọ nọ e be via i zihe ruọ usi ikẹdẹ kẹdẹ wariẹ akpọ na soso họ no! Eme onana u dhesẹ?

UFUOMA: A be sa ebọmbo evaọ eki. A be jọ isukulu sa iticha gbe emọ-isukulu. A bi mu emefofa rehọ nọ esẹgbini a te ki-uke ku. A be gba eyae gbe ekpọkuezae mi eware evaọ uvo kokoko.

EYERO EGAGỌ: Ichọche e be tha itu sa-sa uke evaọ ẹmo. A ta kpahe abọ nọ isu-ichọche i bi wo evaọ ikpakpe-otu. Izerẹ ichọche a be gba emaha du; ichọche e be ko ai dhere. Unu ahwo nọ i bi kpohọ ichọche u bi kie kpotọ; a be zẹ iwou-ichọche.

OKEGBE NA: A be raha ewhawho no fiki isiuru igho. Iyogbere a bi ko ire ẹwọ kpobi no ro koko erae họ. A be nua ame, o gbe fo kẹ ẹda ha. Ezuzu nọ ekọmpene a bi ku fihọ ame gbe oghẹrẹ idhere ekpokpọ jọ nọ a bi ro kpe iyei i bi kpe iyei nọ e rrọ ame kufiẹ. A raha ofou te epanọ ọ be rọ wha ẹyao se ahwo no.

OKỌ NỌ A RẸ RỌ KO UNU: Evaọ ofẹ jọ Africa, osa amara ahwo jọ u tulo ho. Uvo-uthe enọ i wuzou ekọmpene o be lẹliẹ ekọ raha, o tẹ whae ze nọ idu ahwo buobu a gbe wo iruo ho. Ahwo jọ a ku igho akpọ rai kpobi fiẹ no fiki iwhayo nọ a fi rai.

OHỌO: Wariẹ akpọ na họ ahwo nọ a bu te oware wọhọ 800,000,000 a bi kiẹzẹ eveva.

ẸMO: Ahwo nọ a jọ ikpe-udhusoi avọ 20 na whu fiki ẹmo a bu vrẹ ima 100 no. Ekwakwa-ẹmo ọraha-muotọ nọ ahwo a wo e rẹ sai kpe ahwo-akpọ kpobi isia buobu. Emo omoma e riẹ. Ozighi ọkparesuọ ọ dhẹ akpọ na soso duwu no.

EYAO NỌ I RE VO GBE EYAO EFA: Muhọ evaọ 1918, ẹyao ọtehekọ o kpe ahwo 21,000,000. Obọnana AIDS o zihe ruọ “ẹyao nọ ọ mae raha ọraha no evaọ ikuigbe ohwo-akpọ.” Ẹyao-ọta gbe ẹyao udu e be wha uweri ze evaọ akpọ-soso.

Rri eware nọ e rrọ emu usi nọ a be kẹ. Kọ enana yọ eware nọ e be via evaọ oria jọ ọvo? Manikọ e rrọ eware nọ e dhẹ akpọ soso duwu nọ i wo uvi otofa?

[Ẹkpẹti/Uwoho nọ e rrọ ẹwẹ-obe avọ 5]

Kọ Ọghẹnẹ Ọ Be Ghinẹ Daezọ?

Avọ ọkora fiki eware imuozọ nọ e rrọ akpọ via hayo eware iyoma nọ i bi te ai hayo nọ ohwo o te whu ku ai, u bi gbe ahwo buobu unu oware nọ Ọghẹnẹ ọ gbẹ be rọ dhogbo ze te whaha eware itieye na ha.

Ọghẹnẹ ọ be ghinẹ daezọ. Ọ be kẹ uvi ọkpọvio gbe obufihọ enẹna. (Matiu 11:28-30; 2 Timoti 3:16, 17) Ọ gbẹ edhere no nọ o ti ro si ozighi, ẹyao, gbe uwhu no ribri. Eruẹrẹfihotọ riẹ i dhesẹ nnọ orọnikọ ọ be daezọ ahwo orẹwho jọ ọvo ho rekọ ahwo erẹwho, erua, gbe erọo-unu kpobi.—Iruẹru 10:34, 35.

Ẹvẹ ma be daezọ te? Kọ whọ riẹ ohwo nọ Ọnọma odhiwu gbe otọakpọ na ọ rrọ? Didi odẹ riẹ? Eme họ ẹjiroro riẹ? Ọ kẹ iyo enọ nana evaọ Ebaibol na. Ọ jọ etẹe ta kẹ omai owọ nọ ọ be jẹ re ọ rehọ ozighi te oba je si ẹyao gbe uwhu no. Re ma ruẹsi wo erere, eme o gwọlọ nọ ma re ru? U fo re ma wuhrẹ kpahe iẹe gbe ẹjiroro riẹ. Ẹvẹ ma sai ro rẹro nọ ma re wo erere no eruẹrẹfihotọ riẹ ze ajokpanọ ma fi ẹrọwọ họ ae? (Jọn 3:16; Ahwo Hibru 11:6) O tẹ jẹ r’oja re ma nya lele itee riẹ. (1 Jọn 5:3) Kọ whọ daezọ Ọghẹnẹ te epanọ whọ te rọ gwọlọ ru ere?

Re ma riẹ oware nọ Ọghẹnẹ ọ rọ kuvẹ eyero inẹnẹ na, ẹme-avro ologbo jọ ọ riẹ nọ u fo nnọ ma rẹ riẹ kpahe. Ebaibol na i ru onana vẹ. Evaọ ẹwẹ-obe avọ 15 ọrọ obe nana, a t’ẹme kpahe ẹme-avro ọnana.