Fikieme Ma be Hai ro Kpohọ Ikokohọ?

Fikieme eva e be rọ were ahwo nana kpobi tenẹ? A rrọ okokohọ mai jọ. Wọhọ epaọ idibo Ọghẹnẹ evaọ oke anwae, enọ ọ ta kẹ nọ a hai kokohọ isiasa ẹgbukpe, ma be hae rẹro oke nọ ma re ro kuomagbe evaọ ikokohọ mai. (Iziewariẹ 16:16) Kukpe kukpe, ma wo ikokohọ esa: ikokohọ ikogho ivẹ nọ a rẹ rọ ẹdẹ ọvuọvo ru, gbe okokohọ ubrotọ nọ a re ru edẹ esa. Didi irere i bi te omai evaọ ikokohọ nana?

I bi fiobọhọ kẹ omai bọ okugbe nọ ọ rrọ udevie mai ga. Wọhọ epanọ ahwo Izrẹl a jẹ hae rọ evawere jiri Jihova “evaọ udevie ikokohọ” na, ere ọvona ma be hae rọ evawere kuomagbe jiri Jihova evaọ ikokohọ mai. (Olezi 26:12, ẹme-obotọ; 111:1) Ikokohọ nana i bi ru ei lọhọ kẹ omai re ma kuomagbe Isẹri Jihova efa nọ i no ikoko efa hayo erẹwho efa ze. Evaọ oke uvo, ma rẹ jọ oria okokohọ na re emu kugbe, yọ onana u re fiba evawere nọ o rẹ jọ ikokohọ enana. (Iruẹru Ikọ 2:42) Ma rẹ jọ ikokohọ nana rọ ẹro ruẹ uyoyou nọ u bi ku “inievo na kpobi” nọ e rrọ akpọ na soso kugbe.​—1 Pita 2:17.

I bi fiobọhọ kẹ omai ru usu mai kugbe Ọghẹnẹ ga. Ahwo Izrẹl a wo erere ọfa no ikokohọ rai ze keme i ru nọ a sai ro “wo otoriẹ eme” Ikereakere na nọ a je ru vẹ kẹ ae. (Nehemaya 8:8, 12) Ere ọvona ma bi wo erere no ithubro Ebaibol nọ a be hae kẹ omai evaọ ikokohọ mai ze. Ebaibol na a be hae rehọ uzoẹme okokohọ kpobi no ze. Ẹkwoma evuẹ ewewere, eme-ọzọhọkugbe, gbe idhesẹvia eware nọ e via vrẹ no nọ a be hai ru, ma be hai wuhrẹ epanọ ma re ro ru oreva Ọghẹnẹ evaọ uzuazọ mai. Nọ ma te yo iku ahwo nọ a bi thihakọ ebẹbẹ nọ i bi te ai fikinọ a rrọ Ileleikristi evaọ oke obẹbẹ nana, o be hae bọ omai ga. A rẹ jọ ikokohọ ilogbo mai dhesẹ edrama nọ i re ru ikuigbe Ebaibol vẹ omai ẹro ziezi, yọ u wo eware buobu nọ ma bi wuhrẹ no ai ze. Evaọ okokohọ kpobi, a rẹ họ ahwo nọ a gwọlọ dhesẹ via nọ a roma mudhe kẹ Ọghẹnẹ no ame.

• Fikieme ikokohọ mai e rọ rrọ etoke evawere?

• Irere vẹ e rẹ sai te omai nọ ma te kpohọ okokohọ?