Hana Ọ Lẹ kẹ Ọmọzae

Ọzae Izrẹl jọ nọ a re se Ẹlkena o wo eyae ivẹ. Odẹ ọjọ Hana, odẹ ọnọ o kiọkọ Pẹnina, rekọ Hana ọzae na ọ mai you. Pẹnina ọ jẹ hai se Hana ẹkoko ẹsikpobi fikinọ Hana o yẹ ọmọ ọvuọvo ho, rekọ Pẹnina o yẹ emọ buobu. Kukpe kukpe, Ẹlkena ọ jẹ hai wha uviuwou riẹ kpobọ uwou-udhu egagọ nọ o jọ obọ Shailo. Oke jọ nọ a kpobọ Shailo, Ẹlkena o te muẹrohọ nọ eva e be were Hana nọ o you gaga na vievie he. Ọ tẹ ta kẹe nọ: ‘Ivie whọ gbẹ viẹ hẹ Hana. Mẹ rrọ kugbe owhẹ, yọ me you owhẹ.’

Nọ omoke jọ o vrẹ no, Hana ọvo o te kpobọ uwou-udhu nyae lẹ. Ọ tẹ be viẹ jẹ be yare Jihova nọ o fiobọhọ kẹe. Ọ tẹ ya eyaa kẹ Jihova nọ: ‘Jihova, whọ tẹ kẹ omẹ ọmọzae, mẹ te rehọ iẹe kẹ owhẹ re ọ gọ owhẹ evaọ edẹ uzuazọ riẹ kpobi.’

Ilai Ozerẹ Okpehru na ọ tẹ ruẹ Hana nọ ọ be ta eme họ eva yọ ọ be viẹ, o te roro nọ Hana ọ da idi bẹ no. Hana ọ tẹ ta kẹe nọ: ‘Mẹ da idi hi olori mẹ. Me wo ẹbẹbẹ ologbo jọ nọ mẹ be ta kẹ Jihova.’ Nọ Ilai ọ riẹ nọ ọ ta thọ no, ọ tẹ ta kẹ Hana nọ: ‘Ajọ Jihova ọ kẹ owhẹ oware nọ whọ be yare iẹe na.’ Eva e tẹ were Hana, ọ tẹ nyavrẹ. Taure ukpe ọvo u te ti re, Hana o te dihọ, o te yẹ ọmọzae, o te se odẹ riẹ Samuẹle. Dai roro kpahe epanọ eva e were Hana te!

Eyaa nọ Hana ọ ya kẹ Jihova e thọrọ e riẹ ẹro ho. Nọ ọ nwani bru Samuẹle evie no, ọ tẹ rehọ iẹe kpobọ uwou-udhu na. Hana ọ tẹ ta kẹ Ilai nọ: ‘Ọmọzae nọ mẹ jẹ yare Jihova nọ ọ kẹ omẹ na ọna. Mẹ be rehọ e riẹ kẹ Jihova re ọ gọe evaọ edẹ uzuazọ riẹ kpobi.’ Ẹlkena avọ Hana a jẹ hai weze bru Samuẹle kukpe kukpe evaọ obọ uwou-udhu na, yọ a jẹ hai ko ewu ọkpokpọ sei. Jihova ọ wariẹ ghale Hana, o te yẹ emezae esa efa gbe emetẹ ivẹ.