Gidiọn O Fi Ahwo Midian Kparobọ

Nọ oke o be nyaharo na, ahwo Izrẹl a tẹ nyasiọ Jihova ba jẹ wariẹ mu eghẹnẹ erue họ ẹgọ. Ikpe ihrẹ soso ahwo Midian a tho erao ahwo Izrẹl jẹ raha ekakọ rai. Ahwo Izrẹl a te je dhere ighogho itho gbe igbehru fiki ahwo Midian na. A tẹ viẹ se Jihova nọ o siwi ai. Fikiere Jihova o te vi ukọ-odhiwu riẹ bru ọzae jọ nọ a re se Gidiọn. Ukọ-odhiwu na ọ ta kẹ Gidiọn nọ: ‘Jihova ọ salọ owhẹ no re whọ jọ ọgbaẹmo ologbo.’ Gidiọn ọ tẹ nọ ukọ-odhiwu na nọ: ‘Ẹvẹ mẹ sai ro siwi ahwo Izrẹl? Mẹ yọ ohwo ọvo ho.’

Gidiọn ọ ginẹ gwọlọ riẹ sọ Jihova ọ salọ e riẹ. Fikiere o te fi uvovo họ otọ, ọ tẹ ta kẹ Jihova nọ: ‘Evaọ ohiohiẹ odẹ, otẹrọnọ igrigri i ru uvovo na vo rekiyọ otọ na o rrọ yaya, mẹ te riẹ nọ whọ ginẹ gwọlọ rehọ omẹ siwi ahwo Izrẹl.’ Nọ oke o ke, ame ọ tẹ vọ uvovo na rekiyọ otọ na o rrọ yaya! Gidiọn ọ tẹ wariẹ ta kẹ Jihova nọ jọ uvovo na o jọ yaya evaọ ohiohiẹ odẹ rekọ otọ na o jọ vuavo. Nọ o ginẹ via ere, u te mu Gidiọn ẹro nọ Jihova ọ ginẹ salọ iẹe. Gidiọn o te koko egbaẹmo riẹ họ re a nyae họre ahwo Midian.

Jihova ọ tẹ ta kẹ Gidiọn nọ: ‘Me ti ru ahwo Izrẹl fi kparobọ. Rekọ fikinọ egbaẹmo nọ e rrọ kugbe owhẹ e rrọ buobu, wha sai roro nọ ẹgba obọrai wha ro fi kparobọ. Fikiere ta kẹ ohwo kpobi nọ ozọ u bi mu nọ o zihe kpo.’ Egbaẹmo nọ i bu te idu udhegbivẹ (22,000) soso a te zihe kpo, u te kiọkọ idu ikpe (10,000). Jihova ọ tẹ wariẹ ta kẹ Gidiọn nọ: ‘Egbaẹmo na i gbe bu gahrọ. Rehọ ai kpohọ oria ame na, re whọ ta kẹ ai nọ a da ame na. Enọ e be da ame yọ a muẹrohotọ sọ ewegrẹ e be nyatha, ae ọvo a re lele owhẹ kpohọ ẹmo na.’ Ezae egba esa (300) ọvo họ enọ i muẹrohotọ nọ a jẹ da ame na. Jihova ọ tẹ ta kẹ Gidiọn nọ umutho ezae nana i ti fi egbaẹmo ahwo Midian nọ i bu te idu udhozeza gbe ikpegbisoi (135,000) soso kparobọ.

Evaọ aso yena, Jihova ọ tẹ ta kẹ Gidiọn nọ: ‘Oke nọ wha rẹ rọ nyae họre ahwo Midian u te no!’ Gidiọn ọ tẹ kẹ egbaẹmo riẹ enware gbe ithẹ-ame ilogbo ifofe nọ ikpẹ e rrọ eva . Ọ tẹ ta kẹ ae nọ: ‘Wha rri omẹ, re wha ru epanọ me ru.’ Gidiọn o te kporo onware riẹ, ọ tẹ rọ othẹ riẹ fi otọ, ọ tẹ kpare ukpẹ riẹ kpehru, o je bo nọ: ‘Ọgbọdọ Jihova avọ ọrọ Gidiọn!’ Ezae egba esa (300) na a te ru epọvo na re. Ozọ u te mu ahwo Midian gaga, a tẹ jẹ dhẹ vaha vaha. Nọ a be dhẹ na, a te mu ohwohwo họ ekpe. Whaọ Jihova ọ wariẹ fiobọhọ kẹ ahwo Izrẹl fi ewegrẹ rai kparobọ no.