Uvie nọ O Hẹriẹ Kpohọ Abava

Okenọ Solomọn ọ jẹ gọ Jihova, udhedhẹ o jọ Izrẹl soso. Rekọ Solomọn ọ tẹ rehọ eyae erẹwho efa buobu nọ e jẹ gọ emedhọ. Ẹmẹrera na, Solomọn o te nwene je mu emedhọ họ ẹgọ re. Onana o lẹliẹ eva dha Jihova gaga. Jihova ọ ta kẹ Solomọn nọ: ‘Mẹ te bere uvie Izrẹl no uviuwou ra no, mẹ vẹ te hẹriẹe kpohọ abava. Mẹ te rehọ abọ ologbo riẹ kẹ odibo ra, uviuwou ra u ve ti su abọ ọkakao na ọvo.’

Jihova ọ wariẹ rọ edhere ọfa dhesẹ oware nọ ọ gwọlọ ru na. Ẹdẹ jọ nọ odibo Solomọn nọ a re se Jeroboam ọ jọ edhere, ọ tẹ nyaku ọruẹaro Ọghẹnẹ jọ nọ a re se Ahaejah. Ahaejah ọ tẹ ba ewu riẹ no jẹ bẹre iẹe kpohọ ewẹ ikpegbivẹ (12), kẹsena ọ tẹ ta kẹ Jeroboam nọ: ‘Jihova ọ te rehọ uvie Izrẹl no uviuwou Solomọn no, ọ vẹ ghale iẹe kpohọ abava. Rehọ ewẹ ikpe keme erua ikpe who ti su.’ Nọ Solomọn o yo kpahe onana, ọ tẹ gwọlọ nọ o re kpe Jeroboam no! Fikiere Jeroboam ọ tẹ dhẹ kpobọ Ijipti. Nọ Solomọn o whu no, Rehoboam ọmọzae riẹ o te zihe ruọ ovie. Nọ Jeroboam o yo nọ Solomọn o whu no, o te zihe ziọ obọ Izrẹl.

Ekpako Izrẹl a tẹ ta kẹ Rehoboam nọ: ‘Whọ tẹ riẹ ahwo na ru, a ti yoẹme kẹ owhẹ.’ Rekọ egbẹnyusu Rehoboam nọ a gbẹ rrọ ọhwa a tẹ ta kẹe nọ: ‘Ru ahwo na gaga! Rehọ ai ru iruo vi epaọ anwẹdẹ!’ Rehoboam o te ru lele ohrẹ egbẹnyusu riẹ nọ e jọ emoha na. O te gine ru akpọ bẹ ahwo na, u te ru nọ ahwo na a rọ kpareso ẹe. Ahwo na a tẹ rehọ Jeroboam mu ovie erua ikpe, yọ erua ikpe nana a re se uvie Izrẹl. Erua ivẹ nọ i kiọkọ a re se uvie Juda, yọ erua ivẹ nana ọvo Rehoboam o je su. Whaọ obọnana erua ikpegbivẹ (12) Izrẹl e ghale kpohọ abava no.

Jeroboam ọ gwọlọ nọ ahwo na a kpobọ Jerusalẹm nyae gọ Jihova ha, keme o jọ abọjọ uvie Rehoboam. Kọ whọ riẹ oware nọ o soriẹ? Ozọ u je mu Jeroboam inọ ahwo na a te dhẹ se iẹe ba bru Rehoboam. Fikiere ọ tẹ ma emọ-iruẹ igoru ivẹ, ọ tẹ ta kẹ ahwo na nọ: ‘Jerusalẹm o thabọ hrọ. Wha jọ etẹnẹ gọ.’ Ahwo na a te mu emọ-iruẹ ivẹ na họ ẹgọ, Jihova ọ tẹ wariẹ thọrọ ae ẹro no.