Ẹzra O Wuhrẹ Ahwo Uzi Ọghẹnẹ

U te ikpe udhosa-gbikpe (70) no anwẹnọ ahwo Izrẹl buobu a ro zihe kpobọ Jerusalẹm, rekọ ejọ e gbẹ be rria ewho sa-sa nọ ahwo Pasia a bi su. Omọvo ahwo otiọye na jọ họ ozerẹ nọ a re se Ẹzra, ọnọ o je wuhrẹ ahwo Uzi Jihova. Nọ Ẹzra o muẹrohọ nọ ahwo nọ a be rria Jerusalẹm a gbe bi koko Uzi Jihova ha, ọ tẹ gwọlọ nọ ọ rẹ nya re o fiobọhọ kẹ ai. Ovie Pasia nọ a re se Atazazis ọ tẹ ta kẹ Ẹzra nọ: ‘Ọghẹnẹ o ru owhẹ wo areghẹ re whọ sai wuhrẹ ahwo Uzi riẹ. Rehọ ahwo nọ a gwọlọ lele owhẹ kpobi re wha gbẹ nya.’ Ẹzra o te koko ahwo nọ a gwọlọ zihe kpobọ Jerusalẹm kpobi họ. Aikpobi a tẹ lẹ se Jihova nọ ọ sẹro rai evaọ edhere, kẹsena a tẹ ruọ edhere.

Nọ a nya emerae ene soso no evaọ edhere, a te te Jerusalẹm. Ikpahwo-esuo nọ e jọ obọ Jerusalẹm a tẹ ta kẹ Ẹzra nọ: ‘Ahwo Izrẹl a gbe bi yoẹme kẹ Jihova ha, a rehọ eyae nọ e be gọ eghẹnẹ erue.’ Kọ eme Ẹzra o ru? Evaọ iraro ahwo na kpobi Ẹzra o te kigwẹ fihọ otọ jẹ lẹ se Jihova nọ: ‘Jihova, who ru eware iwoma buobu kẹ omai no, rekọ ma raha Uzi ra no.’ Ahwo na a gine kurẹriẹ rekọ a gbe je ru eware iyoma ghele. Ẹzra ọ tẹ salọ ekpako gbe iguẹdhọ re a ta ẹme na. Evaọ emerae esa nọ i lele i rie, a te le eyae rai kpobi nọ e be gọ Jihova ha kpo.

Ikpe ikpegbivẹ (12) soso e tẹ vrẹ. A tẹ te wariẹ bọ ugbẹhẹ nọ o wariẹ Jerusalẹm họ. Kẹsena Ẹzra o te koko ahwo na kpobi họ re o se Uzi Ọghẹnẹ kẹ ae. Nọ Ẹzra o rovie obe na, ahwo na kpobi a tẹ kpama dikihẹ. Ẹzra o te jiri Jihova, ahwo na a tẹ kpare abọ rri ehru ro dhesẹ nọ a rọwokugbe Ẹzra. Kẹsena Ẹzra o te se Uzi na, ọ tẹ jẹ f’otọ riẹ, yọ ahwo na kpobi a be romatotọ gaviezọ. A ginẹ rọwo nọ a wariẹ nyasiọ Jihova ba, fikiere a tẹ jẹ viẹ. Okiokiọ riẹ, Ẹzra ọ tẹ wariẹ jọ obe Uzi na se kẹ ae. A te muẹrohọ nọ u fo re a ru Ehaa Iwou-Udhu na. A tẹ nwani mu oma họ ẹruẹrẹ kpahe kẹ ehaa na.

Evaọ edẹ ihrẹ nọ a ro ru ehaa na, ahwo na kpobi a tẹ jẹ ghọghọ je bi jiri Jihova kẹ ehaa na. Anwọ oke Joshua ze, a ri ru ọkpọ Ehaa Iwou-Udhu itiena ha. Nọ a ru ehaa na no, ahwo na a te kokohọ a tẹ lẹ se Jihova nọ: ‘Jihova, whẹ họ ọnọ o siwi omai no igbo, ọnọ ọ jẹ kẹ omai emu gbe ame evaọ igbrẹwọ na, jẹ kẹ omai otọ uwoma nana. Rekọ ẹsibuobu ma yoẹme kẹ owhẹ hẹ. Who vi eruẹaro ze te vẹvẹ omai unu rekọ ma yo ho. Ghele na, who wo odiri kẹ omai. Who koko eyaa nọ whọ ya kẹ Abraham. Whaọ obọnana ma be ya eyaa nọ whẹ ọvo ma ti yoẹme kẹ.’ A te kere eyaa nọ a ya na fihọ otọ, kẹsena ikpahwo-esuo na, ahwo Livae, gbe izerẹ na a tẹ whobọhọ eyaa na.