Ẹlizabẹt O Yẹ Ọmọ

O vrẹ ikpe egba ene (400) soso no anwẹnọ a rọ wariẹ bọ igbẹhẹ Jerusalẹm na. Ozerẹ jọ nọ a re se Zẹkaraya avọ aye riẹ Ẹlizabẹt, a jẹ rria kẹle Jerusalẹm. U kri no nọ a rọ rọo rekọ a re sai yẹ ọmọ họ. Whaọ evaọ ẹdẹ jọ, epanọ Zẹkaraya ọ be rọ mahe insẹnse evaọ etẹmpol na, ukọ-odhiwu jọ nọ a re se Gebriẹl ọ tẹ romavia kẹe. Ozọ u te mu Zẹkaraya gaga, rekọ Gebriẹl ọ tẹ ta kẹe nọ: ‘Jọ ozọ u mu owhẹ hẹ. Mẹ wha emamọ usi no obọ Jihova se owhẹ. Ẹlizabẹt aye ra o ti yẹ ọmọzae, yọ who re se odẹ riẹ Jọn. Jihova ọ salọ Jọn no rọkẹ obọdẹ iruo jọ.’ Zẹkaraya ọ tẹ nọ Gebriẹl nọ: ‘Kọ ẹvẹ mẹ sae rọ rọwo ẹme ra na? Mẹ avọ aye mẹ ma kpako vi ọmọ oyẹ no.’ Gebriẹl ọ tẹ ta kẹe nọ: ‘Ọghẹnẹ o vi omẹ ze te vuẹ owhẹ usi nana. Rekọ fikinọ whọ rọwo ẹme mẹ hẹ na, who ti dienu bẹsenọ a re yẹ ọmọ na no.’

Zẹkaraya ọ tẹ rria obọ etẹmpol kri vi epanọ ọ rẹ rria kri te vẹre. Nọ o ti no evaọ etẹmpol na ze, ahwo nọ a jẹ hẹrẹ iẹe evaọ obọ otafe, a tẹ gwọlọ riẹ oware nọ o soriẹ ze nọ o ro kri tere. Rekọ Zẹkaraya ọ gbẹ be sae ta ẹme he, enu riẹ o di no. Obọ ọ jẹ rọ ta ẹme kẹ ahwo. Ahwo na a tẹ te riẹ nọ Ọghẹnẹ ọ vuẹ Zẹkaraya uwou jọ.

Nọ oke jọ o vrẹ no, Ẹlizabẹt o te dihọ, o te yẹ ọmọzae nwane wọhọ epanọ ukọ-odhiwu na ọ ta. Egbẹnyusu gbe imoni riẹ a tẹ nyaze te ruẹ ọmọ na. Eva e were rai gaga kẹ Ẹlizabẹt. Ẹlizabẹt ọ tẹ ta nọ: ‘Jọn họ odẹ nọ a re sei.’ Egbẹnyusu riẹ gbe imoni riẹ a tẹ ta nọ: ‘A mu Jọn kẹ ohwo ọvo evaọ uviuwou ra ha. Rehọ odẹ ọsẹ riẹ Zẹkaraya ro sei.’ Rekọ Zẹkaraya o te kere eme nana fihọ obe kẹ ai inọ: ‘Jọn họ odẹ riẹ.’ Ẹsiẹvo na, Zẹkaraya o te mu ẹme họ ẹta! Usi ọmọ na u te do ruọ Judia soso. Akpọ o te gbe ahwo unu. A tẹ jẹ ta nọ: ‘Oghẹrẹ ohwo vẹ ọmọ nana ọ be te jọ?’

Ẹzi Ọghẹnẹ ọ tẹ ruọ Zẹkaraya oma. Ọ tẹ ruẹaro nọ: ‘Ujiro u te Jihova. Ọ ya eyaa kẹ Abraham nọ o ti vi osiwi ze, Mesaya na, ọnọ o ti siwi omai. Jọn ọ te jọ ọruẹaro. Yọ ọye ọ te ruẹrẹ edhere na họ kẹ Mesaya na.’

Omamọ oware jọ o via kẹ Meri nọ ọ rrọ omoni Ẹlizabẹt. Ma te ta kpahe onana evaọ uzoẹme nọ ọ rrọ aro na.