Uzou Avọ 1

Evuẹ nọ I No Odhiwu Ze

OMA Ebaibol na kpobi yọ ovuẹ nọ u no odhiwu ze, onọ Ọsẹ obọ odhiwu mai ọ rọ ze rọkẹ uwuhrẹ mai. Ghele na, ẹnjẹle jọ nọ o re “dikihẹ aro Ọghẹnẹ” ọ rehọ evuẹ obọdẹ ivẹ jọ kẹ ole ikpe 2,000 nọ e vrẹ no. Odẹ riẹ họ Gebriẹl. Joma kiẹ obọdẹ iweze ivẹ riẹ enana ziọ otọakpọ na riwi.

Ukpe na họ 3 B.C.E. Ozerẹ Jihova jọ nọ a re se Zakaraya ọ jẹ rria igbehru Judia, nọ u thabọ no Jerusalẹm hu. Ọ kpako no, yọ aye riẹ Ẹlizabẹt ọ kpako no re. Yọ a yẹ emọ họ. Zakaraya o bi ru ẹkẹ abọ riẹ eva iruẹru izerẹ na evaọ etẹmpol Ọghẹnẹ nọ o rọ Jerusalẹm. Idudhe na Gebriẹl ọ tẹ roma via evaọ obọze agbada-idhe isẹnse na.

Ozọ u te mu Zakaraya gaga. Rekọ Gebriẹl o te furie ozọ riẹ, anọ, ‘Zakaraya whọ dhẹ hẹ; keme a yo olẹ ra no. Ẹlizabẹt aye ra o re ti yẹ ọmọzae kẹ owhẹ, who re ti se odẹ riẹ Jọn.’ Gebriẹl ọ tẹ gbẹ ta nnọ Jọn “ọ rẹ te jọ ruaro eva aro Ọnowo na” jegbe nọ ọ rẹ te “ruẹrẹ ahwo na kpahe kẹ Ọnowo na.”

Ghele na, Zakaraya ọ be sae rọwo ẹme na ha. O wọhọ oware nọ o lọhọ họ inọ ọye avọ Ẹlizabẹt a rẹ gbẹ sai yẹ ọmọ evaọ epanọ a kpako te no na. Fikiere Gebriẹl ọ tẹ ta kẹe nnọ: “Who re ti dienu, whọ rẹ sae te ta ẹme he, bẹsenọ eware nana e rẹ te via no, fiki epanọ whọ rọwo eme mẹ hẹ.”

Oke nana kpobi, ahwo nọ a rọ obọ otafe na a be ruawa kpahe oware nọ Zakaraya o je lehie tere evaọ etẹmpol na. Nọ ọ ruọ otafe uwhremu na, ọ gbẹ jẹ sae t’ẹme he rekọ abọ ọvo ọ jẹ rọ t’ẹme, a te vuhumu nọ ọ ruẹ oware urirẹ jọ.

Nọ oke iruẹru etẹmpol Zakaraya u re no, o te zihe kpo. Yọ u kri hi o tẹ ghinẹ via—Ẹlizabẹt o te dihọ! Nọ ọ be hẹrẹ oke eyẹ ọmọ riẹ na, Ẹlizabẹt ọ tẹ kuoma riẹ dhere ahwo emerae isoi.

Uwhremu na Gebriẹl ọ tẹ wariẹ roma via. Kọ ono o lele t’ẹme? Kugbe uvovo aye jọ nọ ọ re rọo ho nọ a re se Meri nọ o no ẹwho Nazarẹt ze. Kọ didi ovuẹ ọ wha ze enẹna? Gaviezọ! Gebriẹl ọ ta kẹ Meri nọ: “Ọghẹnẹ o ri owhẹ aro uno. Ri, who re ti dihọ eva edhede ra, who re ti yẹ ọmọzae, who ve ti se odẹ riẹ Jesu.” Gebriẹl o te fibae nọ: “Ọ rẹ te jọ ruaro, a re ti sei Ọmọ Oride na . . . Ọ rẹ te ria uvie uviuwou Jekọp bẹdẹ bẹdẹ; uvie riẹ u re ti wo urere he.”

O rẹ sai mu omai ẹro nọ Gebriẹl o rri rie wọhọ uvẹ-ọghọ re ọ kẹ evuẹ enana. Yọ nọ ma ti gbe se kpahe Jọn gbe Jesu na, ma te ruẹ vevẹ viere oware nọ o soriẹ nọ evuẹ enana nọ i no odhiwu ze na i ro wuzou tere. 2 Timoti 3:16; Luk 1:5-33.

▪ Didi evuẹ obọdẹ ivẹ a wha no odhiwu ze?

▪ Ono ọ wha evuẹ na ze, kọ ono a rehọ e rai kẹ?

▪ Fikieme o jẹ rọ bẹbẹ re a rọwo evuẹ na?