Ẹnjẹle Oweze Bru Meri

AYE owoma ọnana họ Meri. Ọmọtẹ Izrẹl ọ rọ, ọnọ ọ be ria evaọ ẹwho Nazarẹt. Ọghẹnẹ ọ riẹ nọ ọ rọ ohwo nọ owoma gaga oye jabọ nọ o je vi Gabriẹl ẹnjẹle riẹ nyae ta ẹme kẹe. Whọ riẹ oware nọ Gabriẹl ọ nyaze te ta kẹ Meri? J’oma ruẹ.

‘Do, whẹ ọnọ a ghale ruaro,’ ere Gabriẹl ọ ta kẹe. ‘Jihova ọ rọ kugbe owhẹ.’ Meri ọ re ruẹ ohwo ọnana ẹdẹvo ho. Ọ tẹ rova gaga, keme na ọ riẹ otọ ẹme nọ ọ ta ha. Rekọ nọ atẹme na Gabriẹl o te furie ozọ riẹ no.

‘Ozọ umu owhẹ hẹ, Meri,’ ere ọ tae. ‘Eva ra e be were Jihova gaga. Oye jabọ nọ o bi ti ro ru oware ugbunu kẹ owhẹ. Obọna who re ti yẹ ọmọ. Who re ti se odẹ riẹ Jesu.’

Gabriẹl o te mu otọ riẹ họ e ru vẹ: ‘Ọmọ nana ọ rẹ te jọ ruaro a re ti sei Ọmọ Ọghẹnẹ nọ Ọmai Kpehru na. Jihova ọ te rehiẹe mu ovie, epanọ Devidi ọ jọ. Rekọ Jesu ọ rẹ te jọ ovie e bẹdẹ bẹdẹ, yọ uvie riẹ u re ti re he!’

‘Ẹvẹ onana kpobi o rẹ te jọ?’ Meri ọ tẹ nọ. ‘Mẹ re rọo ho. Mẹ re ria kugbe ọzae he, kọ ẹvẹ mẹ rẹ sai ro wo ọmọ?’

Gabriẹl o te yo nọ, ‘Ogaga Ọghẹnẹ u re ti bru owhẹ tha. Fikiere a re ti se ọmọ na Ọmọ Ọghẹnẹ.’ Kọ ẹsiẹe ọ ta kẹ Meri: ‘Kareghẹhọ Ẹlizabẹt omoni ra. Ahwo a ta nọ ọkpako vrẹ emọ iyẹ no. Rekọ obọ na o re ti yẹ ọmọ. Fikiere riẹ nọ, oware ovuovo o riẹ hẹ onọ Ọghẹnẹ ọ rẹ sai ru hu.’

Meri ọ tẹ nwane ta nọ: ‘Mẹ ọrigbo ọmọtẹ Jihova! Epanọ whọ ta na ajọ ovia kẹ omẹ ere.’ Kẹsena ẹnjẹle na ọ tẹ nya wa.

Meri ọ tẹ tehe vrẹ kpobọ Ẹlizabẹt. Okenọ Ẹlizabẹt o yo urru Meri, ọmọ nọ ọ rọ Ẹlizabẹt eva o te duola fiki oghọghọ. Ẹzi Ọghẹnẹ ọ tẹ vọ Ẹlizabẹt oma, ọ tẹ ta kẹ Meri nọ: ‘A ghale owhẹ oghẹrẹ sa evaọ udevie eyae na.’ Meri o te lele Ẹlizabẹt ria wọhọ ole evẹre esa, kẹsena o te te zihe kpo ẹwho Nazarẹt.

Meri ọ be te rọo ọzae nọ a re se Josẹf. Rekọ oke nọ Josẹf ọ riẹ no nọ Meri o bi ti yẹ ọmọ, o gbe roro nọ ọ rẹ te rehiẹe he. Kọ ẹsiẹe ẹnjẹle Ọghẹnẹ ọ ta kẹe nọ: ‘Ozọ umu owhẹ hẹ re whọ rehọ Meri re ọ jọ aye ra. Keme na Ọghẹnẹ họ ọnọ ọ rehọ ọmọ na kẹe.’ Fikiere Meri avọ Josẹf a tẹ rọo, a tẹ dobọji re ayẹ Jesu no tao.