Uzou Avọ 2
A Kẹ Riẹ Orro Taure A te ti Yẹi
NỌ GEBRIẸL ẹnjẹle na ọ ta kẹ Meri uvovo aye na nọ o ti yẹ ọmọzae ọnọ ọ rẹ te jọ ovie ebẹdẹ bẹdẹ no, Meri ọ tẹ nọ nọ: ‘Nọ mẹ riẹ ọzae he na, ẹvẹ onana o te rọ jọ?’
Gebriẹl o te ru ei vevẹ nọ: “Ẹzi Ẹri na o re ti bru owhẹ tha, ogaga Oride na ọ rẹ te rehọ uwoho ruru owhẹ; fiki ere, ọmọ nọ a re ti yẹ na, a re ti sei Ọrẹri, Ọmọ Ọghẹnẹ.”
Re u fiobọhọ kẹ Meri rọwo ovuẹ riẹ, Gebriẹl ọ tẹ gbẹ ta haro nọ: “Ri, Ẹlizabẹt ohwo [uyẹ ra na], o dieva ọmọzae họ no re eva owho riẹ; ọnana họ amara avọ ezeza riẹ, ọnọ a je se ọga vẹre na. Keme oware ovuovo nọ o rẹ bẹ Ọghẹnẹ eruo orọ họ.”
Meri ọ tẹ rọwo ẹme Gebriẹl. Kọ eme họ uyo riẹ? O te bo nnọ: “Rri! Odibo ọmọtẹ Jihova! Jọ o via k’omẹ wọhọ epaọ ẹme ra na.” (NW )
U kri hi nọ Gebriẹl o zihe no, Meri ọ tẹ ruẹrẹ oma họ o te weze bru Ẹlizabẹt, ọnọ ọ be rria kugbe ọzae riẹ, Zakaraya, evaọ orẹwho igbehru ọ Judia. No obọ uwou Meri evaọ Nazarẹt ze, onana yọ erẹ ugbothabọ ọrọ ole edẹ esa hayo ene.
Uwhremu na nọ Meri o te uwou Zakaraya no, ọ tẹ rueva o te yere iei. Ẹzi ọfuafo ọ tẹ vọ Ẹlizabẹt oma, ọ tẹ ta kẹ Meri nọ: “Who wo oghale eva udevie eyae, ubi edhede ra u wo oghale. Bovẹ onana u nọze kẹ omẹ, nọ oni Ọnowo mẹ o je bru omẹ tha? Keme ri, nọ uru uyere ra o ze ezọ mẹ, ọmọ [nọ ọ rọ] eva edhede mẹ [o te duola] fiki oghọghọ.”
Nọ o yo ẹme ọnana, Meri ọ tẹ kpunu avọ uvi evawere: “Ẹzi mẹ o bi jiri [Jihova, NW ], iroro mẹ e [be] ghọghọ fiki Ọghẹnẹ o siwi mẹ. Fiki epanọ o ri oruori ọrigbo ọmọtẹ riẹ. Keme, nọ inẹnẹ vrẹ ige kpobi i re ti se omẹ ọ nọ o wo oghale; keme ọnọ o wo ogaga o ru eware ilogbo kẹ omẹ [no].” Ghele na, makọ aruoriwo nọ a dhesẹ kẹe, Meri o kpeze ọghọ na kpobi se Ọghẹnẹ. Ọ ta nọ: “Ọrẹri họ odẹ riẹ. Enọ edhẹ riẹ, ọ rẹ re ohrọ rai [no] ige te ige.”
Meri o te gbe je jiri Ọghẹnẹ evaọ ile aruọruẹ urirẹ, bi whowho nọ: “Ọ rehọ igbabọ riẹ dhesẹ ogaga [riẹ no]; eva iroro otu uvre ọ rọ vaha e, o si ahwo ologbo no akaba rai, ọ tẹ kpare iruori kpehru. Ọ rehọ emamọ eware vọ eva enọ ohọwo u re kpe, o te vi edafe kpo [eveva]. O fiobọhọ kẹ Izrẹl odibo riẹ, eva ekareghẹhọ ohrọ riẹ; wọhọ epanọ ọ ta kẹ esẹ mai, Abraham avọ emọ riẹ bẹdẹ bẹdẹ.”
Meri ọ tẹ jọ kugbe Ẹlizabẹt ole emerae esa, yọ ababọ avro ọ jọ obufihọ ulogbo evaọ eka urere udihọ Ẹlizabẹt na. U ghine kiehọ nọ eyae ẹrọwọ ivẹ enana, enọ i dihọ avọ obufihọ Ọghẹnẹ na, a sae jọ kugbe evaọ oke oghale onana evaọ izuazọ rai!
Kọ who muẹrohọ adhẹẹ nọ a rọ kẹ Jesu taure a te ti yẹi? Ẹlizabẹt o se rie “Ọnowo mẹ,” yọ ọmọ riẹ nọ o ri yẹ hẹ o te je duola avọ oghọghọ nọ Meri ọ kake roma via. Evaọ abọdekọ riẹ, amọfa uwhremu na a te rri Meri avọ ọmọ riẹ nọ o ri yẹ hẹ vo, wọhọ epanọ ma te ruẹ na. Luk 1:26-56.
▪ Eme Gebriẹl ọ ta ro fiobọhọ kẹ Meri wo otoriẹ oghẹrẹ nọ o ti ro dihọ?
▪ Ẹvẹ a rọ rehọ adhẹẹ kẹ Jesu taure a te ti yẹi?
▪ Eme Meri ọ ta evaọ olẹ aruọruẹ evaọ ujiro kẹ Ọghẹnẹ?
▪ Ẹvẹ Meri ọ rria kugbe Ẹlizabẹt kri te, kọ fikieme u je fo nọ Meri ọ rẹ jọ kugbe Ẹlizabẹt evaọ etoke nana?