Ẹme Emuhọ

Obe nana nọ a se Eria Ebaibol nọ I re Fiobọhọ kẹ Omai Gọ Jihova na u ti ru ei lọhọ kẹ owhẹ nọ whọ te rọ ruẹ eria Ebaibol gbe iku ahwo nọ i ti fiobọhọ kẹ owhẹ evaọ ebẹbẹ nọ whọ be rẹriẹ ovao dhe. U ti je fiobọhọ kẹ owhẹ ruẹ eria Ebaibol nọ whọ sae rọ tuduhọ amọfa awọ, a vẹ sae jiroro nọ e rẹ wha orro se Jihova. Who re kpohọ oria nọ uzoẹme nọ whọ gwọlọ ọ rrọ, who ve rri enọ nọ a nọ fihọ iẹe gbe ẹmẹme nọ a kere kpahe ohwo jọ evaọ Ebaibol na. (Rri ẹkpẹti na “Epanọ Whọ Sae rọ Gwọlọ Oware Evaọ Obe Nana.”) Whọ te ruẹ ehrẹ gbe eme omosasọ buobu nọ e rrọ Ẹme Ọghẹnẹ. Whọ te jẹ ruẹ eria Ebaibol nọ whọ sae rọ tuduhọ amọfa nọ i wo ebẹbẹ awọ, gbe ohrẹ nọ whọ sae kẹ ae.

Epanọ Whọ Sae rọ Gwọlọ Oware Evaọ Obe Nana

Re whọ sae ruẹ uzoẹme jọ, kere ẹme nọ whọ be gwọlọ fihọ oria nọ a rẹ rọ gwọlọ na, hayo whọ sae gwọlọ uzoẹme evaọ eria nọ a jọ fodẹ abọ sa-sa nọ e rrọ obe na. A ghale izoẹme obe Eria Ebaibol nọ I re Fiobọhọ kẹ Omai Gọ Jihova na kpohọ abọ ihrẹ, eye họ: Ebẹbẹ, Iruemu Iwoma gbe Iyoma, Oghẹrẹ Ohwo nọ Ma Rrọ, Ukoko, Usu Mai Kugbe Jihova, Uviuwou, gbe Uzuazọ Ikẹdẹ Kẹdẹ. Abọ ọvuọvo o wo izoẹme sa-sa. Fikiere, salọ abọ nọ ọ ta ẹme kpahe oware nọ whọ be gwọlọ, re whọ jariẹ salọ uzoẹme nọ ọ were owhẹ. Rekọ otẹrọnọ whọ riẹ abọ nọ uzoẹme nọ whọ gwọlọ ọ rrọ họ, kpohọ oria Aikpobi re who rri kpotọ evaọ izoẹme na, whọ vẹ jarai salọ ọnọ u kiehọ oware nọ whọ be gwọlọ. Whọ te jọ otọ uzoẹme ọvuọvo ruẹ izoẹme jọ nọ a kere mu gbalọ. Ejọ yọ enọ, efa kọ ẹme gheghe nọ a ta. Nọ who bi se eria Ebaibol nọ a kere mu gbalọ evaọ otọ uzoẹme ọvuọvo na, roro ziezi kpahe epanọ e rọ kuyo onọ na hayo rọwokugbe ẹme nọ a ta na. A ghale izoẹme jọ kpohọ amabọ sa-sa re u fiobọhọ kẹ owhẹ ruẹ oware nọ whọ be gwọlọ vẹrẹ. Whọ rẹ jọ otọ izoẹme jọ ruẹ eria Ebaibol nọ a kere fihọ nọ “Je rri.” Eria Ebaibol nana i wo eme nọ i kiekpahe uzoẹme na. Whọ te jọ eria buobu ruẹ eria nọ a kere fihọ nọ “Iriruo Ebaibol nọ e sai fiobọhọ kẹ owhẹ,” hayo “Oriruo Ebaibol nọ ọ sai fiobọhọ kẹ owhẹ.” Whọ te ruẹ ẹme jọ nọ a kere lele oria ikere na nọ u dhesẹ ugogo oware nọ oria na o ta kpahe hayo oware nọ ma re wuhrẹ noi ze. Nọ who te bi se oria ikere na, hai roro kpahe ẹme nọ a kere kpahe iẹe na.

Orọnikọ eria Ebaibol kpobi nọ e ta ẹme kpahe uzoẹme nọ a fodẹ whọ te ruẹ evaọ obe nana ha. Rekọ u ti fiobọhọ kẹ owhẹ ruẹ eria Ebaibol nọ i wuzou evaọ ẹme na, kẹsena whọ vẹ jọ ebe efa gbẹ kiẹ nọ o tẹ gwọlọ ere. (Itẹ 2:1-6) Re whọ gbẹ kiẹ kpahe eware efa, rri eria ikere nọ e rrọ udevie ewẹ-obe Ebaibol na, gbe eme uwuhrẹ Ebaibol Efafa Akpọ Ọkpokpọ ọrọ Ikereakere Efuafo Na ọrọ Oyibo. Whọ tẹ gwọlọ gbẹ riẹ kpahe oria ikere jọ gbe epanọ whọ sai ro ru oware nọ o ta, rri Obe Ekiakiẹ Rọkẹ Isẹri Jihova na hayo Watch Tower Publications Index. Se oware nọ ukoko na u kere kpahe iẹe kẹle na re whọ ruẹ nọ otoriẹ ọkpokpọ nọ ma wo kpahe oria Ebaibol na who wo.

Jọ obe Eria Ebaibol nọ I re Fiobọhọ kẹ Omai Gọ Jihova na o lẹliẹ owhẹ ruẹ areghẹ gbe eriariẹ nọ e rrọ Ikereakere Efuafo na, je fiobọhọ kẹ owhẹ wo otoriẹ riẹ. Nọ who bi se obe nana, whọ te ginẹ ruẹ vevẹ nọ “ẹme Ọghẹnẹ ọ rrọ uzuazọ, o te je wo ẹgba.”—Hib 4:12.