Iwhowho Uvie A Be Niyẹrẹ

Ewegrẹ Vẹre A Kuomagbe No be Gọ Jihova

“OKE ọsosuọ nọ mẹ rọ kaki yo kpahe Isẹri Jihova họ okenọ mẹ jọ oroiro evaọ Bosnia,” ere Branko ọ ta.a

Branko o je rro irro evaọ ẹsipito nọ a jẹ sẹro enọ e nwoma. Omọvo edọkita na jọ o je wuhrẹ Ebaibol kugbe Isẹri na, yọ evaọ okenọ o ti nwene ohwo jọ evaọ aso, edọkita na o te gbiku kẹ Branko kpahe eware nọ o wuhrẹ no evaọ Ebaibol na.

Oware nọ Branko o wuhrẹ evaọ aso ọyena u duobọ tei te epanọ o ro fi ugbeke riẹ họ otọ. Ọ tẹ gwọlọ Isẹri na via, re a gbe wuhriẹe eware efa. Uwhremu na, nọ ọ kua kpohọ orẹwho Europe ọfa no, Branko ọ tẹ gwọlọ Ọgua Uvie jọ via, o te mu ewuhrẹ họ ekpohọ kugbe ukoko Yugoslavia ọrọ Isẹri Jihova. Etẹe Branko ọ jẹ nya ku Slobodan.

Slobodan o no obọ Bosnia ze re, yọ o je ruiruo ẹmo-ofio wọhọ epanọ Branko o je ru—rekọ evaọ abọ ọdekọ evuẹ na. Slobodan o je lele ahwo Serb họre ahwo Croat. Evaọ okenọ aimava na a zere oma, yọ Slobodan o zihe ruọ Osẹri Jihova nọ ọ họ-ame no. Ọ tẹ gwọlọ nọ o re wuhrẹ Ebaibol kugbe Branko, ọwegrẹ riẹ vẹre. Nọ ewuhrẹ na ọ be nyaharo na, Branko o te wuhrẹ eware efa kpahe Jihova, uyoyou riẹ kẹ Ọghẹnẹ o tẹ rro. Onana o tẹ wọ Branko nọ ọ rọ rehọ uzuazọ riẹ dhidhe kẹ Ọnọma na. Evaọ October 1993 ọ tẹ rehọ ame-ọhọ dhesẹ oka omarọkẹ riẹ.

Ẹvẹ Slobodan o ro zihe ruọ omọvo Isẹri Jihova? U kri omojọ nọ o no oria ẹmo-ofio na evaọ obọ Bosnia. O se ebe Isẹri na jọ, rekọ isiuru riẹ kẹ Ẹme Ọghẹnẹ e rro ho bẹsenọ Isẹri ivẹ i ro weze kpohọ uwou riẹ eva emuhọ ukpe 1992. Ono o weze bru Slobodan, nọ ọ gwọlọ nọ o re wuhrẹ Ebaibol na kugbei? Ohwo na họ Mujo, ọnọ o no Bosnia ze re, rekọ ọnọ a yọrọ wọhọ Muslim. Nọ uwuhrẹ Ebaibol na o be nyaharo na, Mujo avọ Slobodan, enọ e jọ ewegrẹ vẹre, a tẹ jẹ raha oke kugbe kẹdẹ kẹdẹ re a rọ bọ ẹrọwọ ohwohwo ga.

Ẹmo na evaọ obọ ẹkuotọ Yugoslavia vẹre ọ raha izuazọ ahwo egba idu buobu no. Rekọ Branko, Slobodan, gbe Mujo enẹna a rọ ukoko Isẹri Jihova ọvo na bi ru iruo usiuwoma ota oke kpobi kugbe. A nya siọ ozighi ẹwho gbe uyẹ ba no, yọ enẹna a be gwọlọ udhedhẹ, be romakpotọ kẹ Ọnọma na, Jihova.

Rekọ eme o wha inwene itieye na ze? Uyoyou rai kẹ Jihova, adhẹẹ rai kẹ Ebaibol na, gbe ọwhọ rai re a fi uzẹme Ebaibol na họ iruo evaọ izuazọ rai. Wọhọ epanọ Ikereakere Efuafo na e ta, “ẹme Ọghẹnẹ ọ rẹjọ bẹdẹ, avọ iruo, . . . gbe eva ekiẹ jẹ riẹ ẹjiroro obọ eva.”—Ahwo Hibru 4:12.

[Footnotes]