Omosasọ Evaọ Etoke Ikpe Ene Ẹmo
EVAỌ etoke ikpe ene ẹmo evaọ ẹkuotọ Yugoslavia vẹre, ahwo buobu a ruẹ-uye ọbẹwẹ gbe ababọ ẹgwọlọ rai no. Evaọ usu ahwo enana họ Isẹri Jihova ẹko udhusoi buobu, enọ e gbẹ be rehọ ẹrọwọ gọ “Ọghẹnẹ omosasọ kpobi.”—2 Ahwo Kọrint 1:3.
Evaọ Sarajevo, ahwo a ruẹ-uye ọbẹwẹ ọfa ọrọ ẹria okpẹwho ologbo nọ ewegrẹ a wariẹ họ evaọ etoke ẹmo na kpobi. Ikpẹ, ame, ire, gbe emuore e jariẹ hẹ. Ẹvẹ Ukoko Isẹri Jihova ọ Sarajevo na a je ro ruiruo evaọ otọ iyero egaga enana? Ileleikristi ọ ekuotọ ekẹloma a fi izuazọ rai họ awa re a sae rehọ eware nọ a gwọlọ ro se ai. (Rri Uwou-Eroro Na, November 1, 1994 (ọrọ Oyibo), ewẹ-obe 23-27.) Ofariẹ, inievo na evaọ Sarajevo a ghale eware nọ a wo kugbe ohwohwo, yọ a rehọ eware ẹzi kobaro. Evaọ etoke nọ a rọ wariẹ ẹwho na họ, ọsẹro Oleleikristi jọ nọ o no okpẹwho ọyena ze ọ tẹ kẹ iyẹrẹ ọnana:
“Iwuhrẹ mai i wo aghare k’omai gaga. Te omẹ te aye mẹ, kugbe ahwo 30 efa, ma jẹ hae nya ikilomita 15 [emaele 9] re ma te te oria uwuhrẹ na. Ẹsejọ a re whowho nọ a te rehọ ame ze evaọ etoke ọ iwuhrẹ na. Kọ eme inievo na a re ru? Kọ a rẹ jọ uwou hayo kọ a re kpohọ iwuhrẹ na? Inievo mai a jẹ sa nọ a re kpohọ iwuhrẹ. Inievo na a je fiobọhọ kẹ ohwohwo ẹsikpobi; oware nọ a wo kpobi, a jẹ hẹ ghaliẹe kugbe amọfa. Oniọvo-ọmọtẹ jọ evaọ ukoko mai ọ jẹ rria ughe okpẹwho na, kẹle owhawho; fikiere o dina lọhọ omojọ re o wo ire. O je ruiruo evaọ oria nọ a re jo there ebrẹdi re, yọ a jẹ hẹ rehọ eka nọ a wuhu no hwae osa. O tẹ lọhọ, ọ vẹ rehọ eka nọ a wuhu na there ebrẹdi ologbo ọ vẹ whae ziọ ewuhrẹ. Okenọ ewuhrẹ na ọ tẹ fa no, nọ ma tẹ be ruọ otafe, ọ vẹ ghale iẹe kẹ ohwo kpobi.
“U wuzou inọ oniọvo ọvuọvo nọ o roro nọ a gbabọ kẹe ọ jariẹ hẹ. Ohwo ọvo ọ riẹ ohwo nọ u ti t’oma evaọ usu mai okiofa nọ ọ te gwọlọ obufihọ fiki eyero oyoma ha. Evaọ oke uriri nọ oniọvo-ọmọtẹ jọ ọ jẹ mọ, inievo emezae emaha nọ i wo ẹgba, a te je ghelie iei kpohọ iwuhrẹ.
“Mai kpobi a je wo abọ evaọ iruo usiuwoma ota na, yọ Jihova ọ ghale omodawọ mai re. Ọ riẹ oja nọ ma be re evaọ Bosnia, rekọ ọ rehọ ẹvi ghale omai no—ẹvi nọ ma ruẹ hẹ taure ẹmo na o te ti muhọ.”
Epọvo na re, evaọ eria efa ọ Yugoslavia vẹre nọ ẹmo ọ tahaku no, Isẹri Jihova a be reawere ẹvi ghelọ ebẹbẹ ilogbo nọ a be ruẹ uye rai. No ọfisi Isẹri Jihova obọ Croatia ze, ma wo iyẹrẹ ọnana kpahe ẹko Isẹri jọ: “Inievo nọ e be rria Velika Kladuša a be rioja gaga. Ẹsibuobu a wọ ohọre ruọ ẹwho na. Inievo na a vẹ fodẹ edikihẹ seomabaedhehọ rai kẹ ahwo Croatia, Serbia, gbe egbaẹmo Muslim sa-sa. Uzẹme na, a thihakọ eware buobu no—uwou-odi, ukpe, ohọo, ọza uwhu. Ghele, aikpobi a dikihẹ gaga a te je wo ọghọ ologbo ọrọ ẹruẹ oghale Jihova evaọ iruẹru rai.”
Ghelọ ebẹbẹ enana, Isẹri Jihova evaọ Velika Kladuša gbe Bihać nọ o kẹle riẹ a gbẹ be reawere ẹvi nọ a gbẹ be rọ rehọ ajọwha ghale ovuẹ omosasọ Ọghẹnẹ kugbe erivẹ rai na. Aikpobi iwhowho Uvie nọ i bu te 26 evaọ eria ivẹ enana a bi ru iwuhrẹ Ebaibol 39!