“Mai Kpobi Ahwo Uviuwou Ọvo Na”

EVAỌ ikpe oke mai nana omohẹriẹ egagọ gbe uyẹ o vaha ruọ otọakpọ na kpobi no. Ẹwhọ uyẹ o wha ikpakpe ze no, olahiẹ, gbe eware omovuọ efa. Wọhọ epaọ iyẹrẹ jọ nọ Amnesty International ọ kẹ ọ ta, ẹkẹ-uvẹ ohwo nọ a be raha o gba ahwo ima 23 họ evaọ akpọ na soso re a dhẹ no iwou rai evaọ 1994.

Evaọ Rwanda ọvo, ole ahwo 500,000 a kpe yọ bu vi ahwo 2,000,000 efa a dhẹ kpohọ eria adhẹzọ nọ ozighi o du lahwe evaọ udevie ahwo Tutsi gbe ahwo Hutu. “Isẹri Jihova a mae lahiẹ,” ere obe awhusi ọ orẹwho Belgium Le Soir ọ niyẹrẹ, “fikinọ a se nọ a rẹ tọlọ ekwakwa-ẹmo ho.” Isẹri Jihova a re fiẹmo ho. Ghele, a kpe udhusoi buobu rai evaọ ozighi na. Onana o tẹ kareghẹhọ omai eme Jesu kẹ ilele riẹ: “Fiki epanọ wha rọ erọ akpọ na ha, . . . akpọ na oje mukpahe owhai.”—Jọn 15:19.

Uviuwou Osẹri jọ—Eugène Ntabana, avọ aye riẹ, gbe emọ ivẹ rai—a jẹ rria okpẹwho na, Kigali. Nọ o te bi ruọ seomabaedhehọ Oleleikristi riẹ vẹ, Eugène ọ vẹ t’ẹme kpahe ure bougainvillea, ure evaene nọ ọ rẹ jọ bọbọbọ evaọ oke uvewhru.—Matiu 22:21.

Eugène ọ jẹ hae ru ei vevẹ nọ: “Evaọ Kigali obonẹ, ure bougainvillea na ọ rẹ mọ idodo ewawae, iburu, yọ evaọ ẹsejọ efuafo. Ghele, oma ure ovo na i no ze. Epọvo na o rọ kẹ ahwo-akpọ re. Dede nọ ma rọ uyẹ sa-sa, ovioma sa, hayo no oria ọfa ze, uviuwou ovo na ma rọ, uviuwou ohwo-akpọ.”

Je tube yoma dede, makọ epanọ a rọ wolẹ te jẹ rọ abọ ọvo ho na, igbulegbu nọ azẹ o bi siuru a te kpe uviuwou Ntabana. Ghele, a whu avọ ẹrọwọ. O rẹ sai mu omai ẹro inọ Jihova Ọghẹnẹ o re ti ru eyaa riẹ gba kpahe ahwo itieye na, yọ a rẹ te kpare ai ze te reuku akpọ nọ ọ rẹ te kare omohẹriẹ. (Iruẹru 24:15) Okioye, uviuwou Ntabana, kugbe efa, “oma o rẹ te were ae evaọ omofọwẹ.”—Olezi 37:11.