Fikieme Oke Onana U Je Yoma T’enẹ?

NỌ WHỌ tẹ keria re who se obe-usi hayo re who rri TV hayo re whọ gaviezọ kẹ iredio, who re rẹro usi uyoma jọ, manikọ ere he? Ẹsejọhọ u ti gb’owhẹ unu hu re who wuhrẹ nọ emo i gbe bi fi, inọ uruemu ugbarugba e gbẹ rọ odode, hayo inọ ohọwo o gbẹ rọ oma erẹwho nọ i ri rovie aro ho.

Otẹrọnọ whọ be dina rri thabọ no oria nọ eware enana e be jọ via, ẹsejọ iyẹrẹ itieye na i re tu owhẹ oma tere he. Kọ, ono o re tube wo ọdawẹ kẹ ogbotu ahwo yena kpobi nọ uye o be bẹ na? O tẹ make rọ ere, o rẹ jọ bẹbẹ re oma o siọ omai ba etu otẹrọnọ a rehọ oghẹrẹ uye nọ o be bẹ ahwo ghrẹ omai. Ẹme na họ, nọ o rọ oware jọ re a se kpahe ẹmo je roro kpahe unu ahwo nọ i whu na, o rọ oware ofa re a se kpahe Adnan ọboba na, ọmọzae ikpe izii obọ Bosnia nọ a kpe oni riẹ okenọ ebọmbo e raha uwou rai. Nọ umutho emerae jọ e vrẹ no ojihẹ jọ ọ tẹ sa ọsẹ Adnan kpe nọ a jẹ nya evaọ iyẹrẹ kugbe. Eka jọ nọ i lele i rie oniọvo-ọmọtẹ riẹ o te hwẹ azẹ whu evaọ iraro riẹ, nọ a fi ebọmbo fihọ etegu isukulu rai. Edọkita nọ i je siwi Adnan a tẹ ruẹ nọ iroro ọmọ na e rọ kpimẹ, oware ovo o gbẹ be dae he—whọ tẹ maki fiei areghẹ dede. Ozodhẹ gbe eroro-kpemu i te kpomahọ iẹe te epanọ o ro kparo fihọ; idudu e tẹ whaha iẹe owezẹ. Adnan ọ rọ iku gheghe nọ a gbe he. Ọ rọ ọmọ nọ ọ be ruẹ-uye; ohrọ riẹ o rẹ se omai ba ẹre he.

Ere o rọ re kpahe idabolo efa akpọ. A rẹ sai se kpahe ohọwo; rekọ onana u wo ẹhẹriẹ no ẹruẹ uwoho ọmọtẹ ikpe isoi ọnọ o ru eva kpokẹ avọ abọ nọ e rọ rerere, ohwo nọ ohọwo u kpe kẹle uwhu no. A rẹ sai se kpahe ohwo nọ o kie ruọ abọ igbulegbu; rekọ onana u wo ẹhẹriẹ re a yo kpahe aye-uku nọ a kpe yoyoma, nọ a tho eware riẹ, jẹ gbadu. A rẹ sai se kpahe uviuwou nọ u bi dhe eyeyoma; rekọ onana u wo ẹhẹriẹ no ẹriẹ inọ oni ọ rehọ aro koko gbọ ọmọ obọ riẹ emuore jẹ lahiẹe gaga.

O rẹ da ohwo gaga re a se kpahe eware itieye na. Rekọ ẹvẹ o rẹ tubẹ mai yoma te otẹrọnọ ebẹbẹ enana i kpomahọ omai! Nọ uye eyoma u te t’owhẹ oma, iyẹrẹ nọ a rẹ jọ usi akpọ t’ẹme te e rẹ d’oma fia. O rọ oware idudu re a rẹriẹ ova ku uzẹme na nọ uye-oruẹ no ethube, ẹmo, ohọwo, gbe ẹyao i bi vihọ kpata kpata vi anwẹdẹ evaọ ikuigbe ohwo-akpọ. Okpomahọ eyeri kugbe eware nọ e be via evaọ ikpe-udhusoi avọ 20 nana e rọ ruaro—igbunu, ozọ, gbe ọkora e rọ odode.

Ahwo egagọ buobu a be gwọlọ iyo kẹ enọ uduama wọhọ, Fikieme eware i je yoma enẹ? Diẹse ohwo-akpọ ọ rọ ova dhe?

Avọ ọkora, egagọ inẹnẹ e be kẹ iyo nọ e rẹ veva ha. Nọ whọ kake ruẹ onọ na evaọ uke emagazini ọnana, ẹsejọhọ avro ọ ze owhẹ iroro—oware nọ a re rẹro riẹ. Egagọ buobu e be rehọ ọgbahọ rehọ oware nọ o rọ Ebaibol ho n’eva riẹ ze—ẹdẹ gbe auwa nọ uye akpọ na ọ te rọ ze. (Rri Matiu 24:36.) Ahwo nọ i kporo obe onana a kuvẹ re Ebaibol na ọvo o ru eme na vẹ. O rẹ sai gb’owhẹ unu re who wuhrẹ nọ ikuigbe Ebaibol na kpahe edẹ urere na e rọ uzẹme avọ iroro. Yọ Ebaibol na o ru vi ẹfodẹ oware nọ o soriẹ nọ eware i je yoma t’enẹ. O kẹ ẹruore obaro re, onọ o rẹ ghinẹ kẹ omosasọ.