Okọto Okpehru Obọ Connecticut O Broziẹ Ẹkẹ-Uvẹ kẹ Ọnọ Ọ be Mọ

Evaọ April 16, 1996, Okọto Ukpehru ọ Connecticut, U.S.A., o te broziẹ ẹkẹ-uvẹ kẹ Isẹri Jihova nọ a rẹ rọ se azẹ osefihọ oma. Oziẹobro ọnana o te nwene ẹdhọ nọ a kaki gu no vẹre.

Evaọ August 1994, Nelly Vega, omọvo Isẹri Jihova jọ, o te je hwẹ azẹ gaga nọ o yẹ ọmọ ọsosuọ riẹ no. Omodawọ nọ a ru kpobi re a whaha azẹ na u w’iruo ho. Nọ ẹyao Aye Vega ọ be ga viere na, ahwo ẹsipito na a tẹ gwọlọ nọ okọto na o kẹ ai udu nọ a re ro se azẹ fihọ iẹe oma. Aye Vega ọ whobọ họ ekade obusino nọ u dhesẹ nọ a re se azẹ fihọ iẹe oma ha evaọ etoke nọ ọ te jọ eva ẹsipito na, avọ obusino ẹsipito na otẹrọnọ oware jọ o via kẹe fiki ẹjiroro riẹ. Ghele na, ahwo ẹsipito na a te sikẹ nọ a tẹ gba azẹ hiẹe oma u ti fiobọhọ kẹ ọmọfofa na ọnọ ọ gwọlọ oni riẹ, wọhọ epanọ ahwo ẹsipito na a roro na. Okọto ẹdhoguo na ọ tẹ jẹ ta nọ, u te no azẹ nọ o bi hwẹ noi oma no, Aye Vega yọ uvovo aye, nọ o wo omakpokpọ. Fikiere, makọ oghẹrẹ nọ ọzae Aye Vega gbe elọya riẹ a si ikẹ te kẹhẹ, okọto na o tẹ ta nọ a se azẹ fihiẹe oma.

U kri hi, a te tu ẹdhọ na ziọ Okọto Okpehru ọ Connecticut. Evaọ obei, okọto na o tẹ ta nọ uruemu ẹsipito na o raha ẹkẹ-udu Aye Vega. Oziẹ na o ta nọ: “Unuẹdhọ nọ a gu kẹ okọto na a gu rai evaọ udevie aso, avọ ugidi nọ o kuvẹ re ahwo na kpobi a tẹ ẹkẹ unu rai hi.”

Oziẹ nana nọ a jọ Okọto Okpehru ọ Connecticut bru na u wuzou gaga kẹ amọfa u te no Isẹri Jihova no. “U wuzou kẹ ahwo nọ e be mọ nọ e rọwo kugbe ẹjiroro edọkita rai hi,” ere Donald T. Ridley, elọya Aye Vega, ọ ta. “Oziẹ nana o te whaha ẹsipito nọ a gbẹ gba ẹjiroro rai họ ẹgwọlọ enọ e be mọ họ, makọ erọ egagọ hayo erọ obọ rai.”