Kọ Whọ Sae Rọwo Ọghẹnẹ nọ Ọ Ghinẹ Rọ Uzuazọ?

“U DU fo nọ whọ rẹ rọwo Ọghẹnẹ re whọ tẹ jọ Oleleikristi hi . . . Obọnana ma rọ abọ enwene-idudhe egagọ, rekọ evaọ ikpe-udhusoi avọ 21 na ichọche na e te jọ ababọ Ọghẹnẹ wọhọ epanọ a riẹ riẹ n’otọ ze,” ere osu egagọ jọ evaọ yunivasiti ọ Britain ọ ta. Ọ jẹ ta unu ọ ẹko ahwo jọ nọ a re se Abade Ẹrọwọ onọ ole izerẹ udhusoi ahwo Britain a rọ eva. “Ileleikristi [enana] nọ e rọwo Ọghẹnẹ hẹ na” a be ta nọ egagọ yọ oware nọ ohwo-akpọ ọ tohọ gheghe gbe nnọ, wọhọ epanọ omọvo rai jọ o fi rie họ, Ọghẹnẹ yọ “ẹme iroro” gheghe. Ọghẹnẹ erumeru o gbẹ rọ iroro rai hi.

“Ọghẹnẹ o whu no” yọ ẹme nọ a je dhe ẹtẹta evaọ etoke ikpe 1960. U dhesẹ eriwo Friedrich Nietzsche, ọgba-eriariẹ ohwo German na ọrọ ikpe-udhusoi avọ 19 na, onọ o kẹ emoha buobu uvẹ re a gwọlọ ru oware nọ u je rai, re a gbe ọfariẹ jẹ lọ imu egaga epanọ u je rai. Kọ ufuoma otiọye na o kẹ emọ idodo na, wọhọ epanọ a je he se ai na, uzuazọ nọ o rẹ veva, ọrọ evawere no?

Evaọ etoke ikpe ikpe ọvo na, ibishọpo Anglican jọ John A. T. Robinson o te kporo obe avro riẹ Honest to God. Ibe isu ichọche riẹ buobu a tẹ whọku ei fikinọ o roro kpahe Ọghẹnẹ wọhọ “abọ odidi ọ iroro ohwo-akpọ gheghe.” Keith Ward, owuhrẹ egagọ, ọ nọ inọ: “Kọ orọwọ fihọ Ọghẹnẹ yọ eriwo anwae jọ gheghe nọ u kie kpo no, onọ iwareghẹ na a gbolo kufiẹ no?” Nọ ọ jẹ kuyo onọ obọ riẹ, ọ tẹ ta nọ: “Oware ovo o jọ egagọ r’oja nẹnẹ hẹ vi eriariẹ eriwo anwae na kpahe Ọghẹnẹ nọ a re vi n’otọ ze.”

Uye-Oruẹ gbe Ọghẹnẹ nọ Ọ Ghinẹ Rọ Uzuazọ

U re gbe ahwo buobu nọ e rọwo Ọghẹnẹ nọ ọ ghinẹ rọ uzuazọ unu nọ a tẹ be ruẹ idabolo gbe uye-oruẹ. Wọhọ oriruo, evaọ March 1996, a rehọ ugbeke sa emọ eboba 16 kugbe iticha rai kpe evaọ Dunblane, Scotland. Aye jọ avọ ọkora ọ tẹ ta nọ: “Whaọ mẹ riẹ oware nọ Ọghẹnẹ o je ru hu.” Ekade jọ avọ idodo nọ a nya seba otafe isukulu emọ na u dhesẹ ọkora okpẹtu na via. Ubiẹme jọ nọ a kere fihiẹe họ, “FIKIEME?” Evaọ uyo ọgbodibo ọ Ichọche Dunblane ọ tẹ ta nọ: “E jae ta ha. Ma rẹ sae k’uyo kpahe oware nọ o wha onana ze he.”

Evaọ ukpe ọvo yena, a tẹ rọ ahae kpe ọmoha osu Ichọche England jọ nọ ọ viodẹ. Obeusi ọ Church Times o tẹ niyẹrẹ nọ ahwo ichọche na nọ akpọ o gbunu no a te yo orikogho Liverpool nọ ọ ta kpahe “obọ nọ ọ te rọ tehe ẹthẹ Ọghẹnẹ avọ enọ inọ, fikieme? fikieme?” Osu-ichọche ọnana o wo eme omosasọ ọvuọvo no obọ Ọghẹnẹ nọ ọ rọ uzuazọ ze gbe he.

Kọ eme u fo nọ ma rẹ rọwo enẹna? O rọ oware iroro re a rọwo Ọghẹnẹ nọ ọ ghinẹ rọ uzuazọ. Oye họ usiavẹ nọ a rẹ rọ kiyo enọ egaga nọ e rọ obehru na. Ma zizie owhẹ inọ whọ kiẹ imuẹro nọ e rọ uzoẹme obaro na riwi.

[Picture on page 3]

Ekade na o nọ inọ “Fikieme?”

[Credit Line]

NEWSTEAM No. 278468/Sipa Press