Orọo Ababọ-Owezẹ?

EVAỌ omodawọ re a sai dhesẹ uzẹme nọ o rọ udevie uwuhrẹ ọ Meri nọ ọ riẹ ọzae ẹdọvo ho avọ orọo riẹ kugbe Josẹf, ahwo buobu nọ a rẹ drọ jẹ kare ahwo a te dhesẹ Josẹf wọhọ ọkpọkuọzae. A roro nọ Josẹf ọ mae jọ ohwo nọ ọ yọrọ Meri vi ọzae-uwou orọo. Rekọ, kẹle na, Pope John Paul II ọ tẹ fodẹ oware nọ o hẹriẹ oma no oyena. Ọ ta nọ Josẹf “ọ jọ ọkpọkuọzae evaọ oke oyena ha.” Ukpoye, “ẹgbagba obeva riẹ, okẹ nọ a kẹ riẹ, o wọ riẹ re o you Meri ababọ isiuru owezẹ.”

Otẹrọnọ o rọ Meri iroro inọ ọ rẹ riẹ ọzae vievie he, eme ọ rọ kuvẹ re a sae h’otọ? Pope ọ kuyo inọ: “O wọhọ nọ, okenọ aimava a ta ẹme orọo, Josẹf avọ Meri a rọwo kugbe inọ a rẹ rria kugbe ababọ owezẹ.”

Rekọ, ẹme nọ Ebaibol na ọ ta u wo ohẹriẹ. Ikere Matiu e ta nọ Josẹf “ọ wezẹ kugbei hi bẹsenọ o ro yẹ ọmọ no.” (Matiu 1:25, Catholic New American Bible, ẹjẹlẹ ibieme na ọmai.) Nọ a yẹ Jesu no, usu Josẹf avọ Meri o gbẹ jọ orọ ababọ owezẹ hẹ. Imuẹro onana jọ họ, uwhremu na evaọ ikere Usiuwoma na, a dhesẹ nnọ Jesu o wo inievo emezae gbe emetẹ.—Matiu 13:55, 56.

Fikiere, nọ Ebaibol na o dhesẹ nnọ Meri ọ riẹ ọzae he okenọ o yẹ Jesu, oware ovuovo o riẹ hẹ nọ a rẹ rọ ta nọ ọ rria edẹ uzuazọ riẹ kpobi ababọ owezẹ kugbe Josẹf.