Kọ Ẹmeunu Ra ọ Rẹ Nwoma Manikọ O Re Siwi?

EVAỌ oke ebẹbẹ nana, u gbunu tere he inọ ahwo buobu a ‘rọ ọkora’ jẹ rọ enọ “a nwẹ eva ẹzi.” (Olezi 34:18) Fikiere, evaọ eme ọ Pọl ukọ na, ẹgwọlọ ọ riẹ ẹsikpobi re a “ta udu họ enọ udu u re bro awọ” je “fiobọhọ kẹ enọ e ko.” (1 Ahwo Tẹsalonika 5:14) Rekọ ẹvẹ o rẹ jọ otẹrọnọ ohwo jọ o ru omai eva dha hayo ru omai thọ gaga? O tẹ via ere, ma rẹ sai roro nọ u kiehọ re ma do ku ohwo na. Ghele na, u fo re a yọrọ oma. Ohrẹ, o tẹ maki fo, o rẹ sae wha enwoma ze nọ a tẹ rehọ evedha kẹe. Itẹ 12:18 o ta nọ: “Eme izuehọ ahwo jọ i re duwẹ wọhọ ọgbọdọ.”

Fikiere, ma tẹ be nya e kẹ ọkpọvio hayo ku ẹwhọ họ, u re woma re ma kareghẹhọ abọ avivẹ ọrọ Itẹ 12:18 na: “Rekọ ẹrọo ohwo owareghẹ ọ rẹ wha usiwo tha.” Nọ omobọ ra ẹsikpobi nọ, ‘Mẹ tẹ gwọlọ ọkpọvio, ẹvẹ mẹ rẹ gwọlọ nọ a rọ kpọ omẹ vi?’ Uduotahawọ o rẹ mae were ibuobu vi ẹfuọ. Fikiere jọ ujiro o hai n’owhẹ unu ze ziezi. Onana o rẹ kẹ ọnọ o ruthọ na ẹgba nọ o re ro ru woma viere, yọ obufihọ nọ a kẹ riẹ kpobi o rẹ sae were iẹe.

Ẹvẹ o r’oja te re ma fi ẹwo ba eme mai! Eme ọ usiwo i re ru ọnọ ọ be gaviezọ na w’iroro wọhọ ọso-ilezi na, ọnọ o kere nọ: “Okiẹrẹe ọ tẹ tehe omẹ, o rẹ jọ uyoyou-ẹwo k’omẹ; ọ tẹ whọku omẹ, o rẹ jọ ewhri evaọ uzou mẹ, onọ uzou mẹ o rẹ se he.”—Olezi 141:5, NW.