Didi Obaro O Rọ Kẹ Otọakpọ Mai?

“Uvumọ ikpe-udhusoi o rọ ẹrẹrẹ kugbe ọrọ avọ 20 na ha evaọ ozighi, unu emo nọ a fi no, unu ahwo nọ e dhẹ kpohọ ivuẹ adhẹzọ, ima ahwo nọ a kpe no evaọ emo, gbe unuigho nọ a raha no kẹ ‘ethathọ,’ ” ere obe na World Military and Social Expenditures 1996 o ta. Kọ uyero onana u ti nwene ẹdẹjọ?

Pita ukọ na ọ kareghẹhọ Ileleikristi kpahe eyaa nọ Ọghẹnẹ ọ yaa evaọ ikpe-udhusoi buobu nọ i kpemu no: “Rekọ wọhọ epaọ eya [Ọghẹnẹ], ma rẹ hẹrẹ ihru ekpokpọ avọ akpọ ọkpokpọ enọ ẹrẹreokie ọ be ria.” (2 Pita 3:13) Eme eyena e kake jọ abọ jọ eruẹaruẹ Aizaya. (Aizaya 65:17; 66:22) Izrẹl anwae a ruẹ orugba ọsosuọ eyaa na nọ a zihe orẹwho na ziọ ẹkwotọ eyaa rai nọ a kri igbo Babilọn te ikpe 70 no. Ẹkwoma ẹwariẹ eyaa “ihru ekpokpọ avọ akpọ ọkpokpọ” na, Pita o dhesẹ nnọ eruẹaruẹ na i ti gbe rugba rro viere—evaọ akpọ-soso!

Eromu iyero ikiẹrẹe evaọ otọakpọ na soso họ oreva Ọghẹnẹ, yọ u ti rugba ẹkwoma Uvie obọ odhiwu riẹ nọ Kristi ọ rọ Ovie riẹ. “Orẹwho o gbẹ te wọ ẹmo bru orẹwho ho, hayo wuhrẹ kpahọ ẹmo-ofio ofa ha.” (Aizaya 2:4) Udhedhẹ gbe omofọwẹ ovọvọ oyena evaọ otọakpọ họ oware nọ Jesu o wuhrẹ ilele riẹ nọ a rẹro riẹ jẹ lẹ kẹ evaọ olẹ nọ a re se Ọsẹ Mai nọ Ọ rọ Obọ Odhiwu, hayo Olẹ Olori na, inọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.”—Matiu 6:9, 10.

Kọ o te were owhẹ re whọ rria akpọ nọ o kiẹrẹe wọhọ epanọ odhiwu ọ rọ na? Oyena họ ẹruore nọ Ebaibol na ọ kẹ ohwo kpobi nọ ọ rehọ eva kpobi gwọlọ riẹ Ọghẹnẹ jẹ rria lele idhere ikiẹrẹe riẹ.