Yọrọ Oma Kẹ Ugho Nọ A Rẹ Rọ Dẹ Ọkwa!
A JẸ kẹ Saimọn ohwo Sameria na adhẹẹ gaga evaọ ẹwho riẹ. Ọ rria ikpe-udhusoi ọsosuọ C.E., yọ iruo emajiki riẹ i gbe ahwo unu te epanọ a jẹ rọ ta kpahe iẹe nọ: “Ohwo ọ nana họ ogaga Ọghẹnẹ nọ a re se oride na.”—Iruẹru 8:9-11.
Rekọ, nọ Saimọn o zihe ruọ Oleleikristi nọ ọ họ-ame no, o te muẹrohọ ogaga nọ o ga vi onọ o wo vẹre. O rọ ogaga nọ a rọ kẹ ikọ Jesu, nọ a rẹ sae rọ rehọ ekẹ igbunu ẹzi ọfuafo na kẹ amọfa. U gbe Saimọn unu te epanọ ọ rọ kẹ ikọ na ugho jẹ yare nọ: “Wha kẹ omẹ ogaga onana re, re kohwo kohwo nọ mẹ rọ obọ mẹ kpahe, ọ ruẹse wo Ẹzi Ẹri na.”—Iruẹru 8:13-19.
Pita ukọ na ọ tẹ whọku Saimọn, ta nọ: “Whẹ avọ idọlọ-efuafo ra, wha gbe vru, fiki epanọ who roro nọ a rẹ rọ fiki igho wo okẹ Ọghẹnẹ! Whọ jọ ẹme ọnana wo obọ hayo ẹkẹ ọvo ho, keme eva ra i kiete evaọ aro Ọghẹnẹ hẹ.”—Iruẹru 8:20, 21.
Oria Ebaibol onana ubiẹme na “simony” (ugho nọ a rẹ rọ dẹ ọkwa) u no ze, onọ a fa wọhọ “uzioraha ọ ẹdẹ hayo ẹzẹ ọkwa hayo ẹwọkpehru evaọ ichọche.” New Catholic Encyclopedia o rọwo nnọ maero no ikpe-udhusoi avọ 9 rite 11 ze “ugho nọ a rẹ rọ dẹ ọkwa o rọ dafia evaọ iwou ichọche, isu-ichọche, esuo-ichọche, makọ ọkwa ipopu.” Ukere avọ izii ọrọ The Encyclopædia Britannica (1878) u muẹrohọ nnọ: “Ẹkiẹriwo ikuigbe ẹgwa idhere Ipopu na o rẹ lẹliẹ emọ-uwuhrẹ rọwo nnọ a rẹ rehọ ohwo mu ọkwa ha ababọ ugho, yọ ugho nọ a rẹ rọ dẹ ọkwa evaọ ẹgwae idhere isu-ichọche na họ onọ o mai yoma, onọ o mae vuoma, jẹ mae rọ vevẹ.”
Ileleikristi uzẹme nẹnẹ a rẹ yọrọ oma kẹ ugho nọ a rẹ rọ dẹ ọkwa. Wọhọ oriruo, ahwo jọ a rẹ sae ku edẹ họ hayo wọ igho kẹ enọ e rẹ sae kẹ ae ọkwa. Evaọ abọdekọ riẹ, ahwo nọ a rẹ sae kẹ ọkwa na a re rri enọ obọ rai u te ziezi aro—gbe enọ oma o rẹ kpakpa—re a wọ igho kẹ ae. Imava na a be rọ ugho dẹ ọkwa, yọ Ikereakere na i mukpahe uruemu oyena. Pita ọ hrẹ Saimọn nọ: “Fikiere kuevarẹriẹ no umuomu ra onana no, re whọ lẹ Ọnowo na, otiẹsejọ, a rẹ te rehọ iroro eva ra na [“ẹgwae oyoma ra na,” New Jerusalem Bible] vrẹ owhẹ. Keme na mẹ ruẹ no nọ whọ rọ eva evie ẹyayare umuomu gbe evaọ uwou-odi izieraha.”—Iruẹru 8:22, 23.
Avọ evawere, Saimọn ọ ruẹ ẹthọthọ isiuru iyoma riẹ. Ọ lẹ ikọ na nọ: “Wha lẹ Ọnowo na kẹ omẹ, re eware nọ wha ta na ọvuọvo ọ siọ omẹ ba eruo.” (Iruẹru 8:24) Efihiruo obọdẹ uwuhrẹ nọ o rọ ikuigbe nana, Uvi Ileleikristi a rẹ daoma whaha uruemu ugho nọ a rẹ rọ dẹ ọkwa.