Iwhowho Uvie A N’iyẹrẹ

A Gwọlọ Ọghẹnẹ Uzẹme na Ruẹ

EVAỌ ikpe-udhusoi avọ ikpe B.C.E., egagọ erue e d’otọfia evaọ uvie erua ivẹ Juda. Rekọ, evaọ udevie ubu edhọgọ enana, ọzae jọ ọ jariẹ nọ o wo emamọ udu kẹ Ọghẹnẹ. Odẹ riẹ họ Jehoshafat. Jehu ọruẹaro na ọ ta kpahe iẹe nọ: ‘Ọ ruẹ eware iwoma jọ evaọ eva ra fiki epanọ . . . whọ ruẹrẹ udu ra họ re whọ gwọlọ Ọghẹnẹ.’ (2 Iruẹru-Ivie 19:3) Epọvo na nẹnẹ, evaọ “oke ẹbẹbẹ” nana, ima ahwo buobu a ‘ruẹrẹ idu rai’ no re a gwọlọ Ọghẹnẹ uzẹme na, Jihova. (2 Timoti 3:1-5) Oware nana nọ o jọ Togo, West Africa, via na u dhesẹ onana via.

Casimir o kpohọ isukulu Kathọlik ọ tẹ jẹ re Emu-Owọwọ ọsosuọ riẹ nọ ọ jọ ikpe izii. Rekọ okenọ ọ kpako te ikpe 14 no, Casimir ọ tẹ siọ ichọche ba ẹnya. Onana o jẹ lẹliẹ ozọ mu ei ẹsikpobi keme o roro nọ ẹseba Emase o te lẹliẹe kpohọ ehẹle ebrerae, hayo o tẹ kawo kọ pọgatri.

Evaọ obọ isukulu, Casimir o te kuomagbe ẹko izoge jọ nọ i re kokohọ ẹsiẹvo ẹkpoka kẹ uwuhrẹ Ebaibol na. O te je muọ Ebaibol na họ ese kẹ omobọ riẹ. Ẹdẹjọ Casimir o te se obe Eviavia kpahe arao ojihẹ idudu nọ o no abade ze. (Eviavia 13:1, 2) Okenọ ọ nọ osu ẹko uwuhrẹ Ebaibol na kpahe iẹe, ọ tẹ ta kẹe nọ arao na ọrọ aruakpọ nọ o ti ghine no abade ze. Ẹme ọnana o kpokpo udu Casimir keme ọ be rria kẹle Unueri Atlantic. U mu rie ẹro nọ ọ te jọ usu ahwo ọsosuọ nọ arao ojihẹ na ọ te re.

Casimir o te muọ ugho họ ekoko re ọ ruẹse dhẹ siọ arao ojihẹ na ba kpohọ ofẹ udhude ẹkpẹlobọ-ọre. Ọ tẹ ta kẹ ọmọ eklase riẹ jọ kpahe ẹjiroro riẹ. Fikinọ ọ rọ omọvo Isẹri Jihova, ọmọ eklase riẹ na ọ tẹ kẹe imuẹro nnọ arao otiọye na o ti ghine no abade ze he. U kri hi, o te zizie Casimir kpohọ iwuhrẹ eva Ọgwa Uvie. Ọ reawere iwuhrẹ na o te muhọ ẹnya ẹsikpobi. Ọ tẹ jẹ rọwo obe uwuhrẹ Ebaibol.

Nọ Casimir ọ be nyaharo evaọ uwuhrẹ riẹ na, ọkparesuọ uviuwou u te muhọ. Ahwo uwou riẹ a rẹ gọ esemọ jẹ re arao avọ azẹ nọ a ro dheidhe kiọkọ. Nọ Casimir ọ se nọ ọ rẹ re arao na, a te do ku ei jẹ ta kẹe nọ o no uwou. Casimir ọ j’ẹme he, a te vu ei wa. Rekọ, evaọ emerae esa, oghẹrẹ arao ọyena ọvo a jẹ jọ uwou na theri. Ohọo u te mu Casimir họ ekpe, rekọ o te thihakọ onana gbe ebẹbẹ efa.

Casimir ọ tẹ ruabọhọ ẹnyaharo abọ-ẹzi te oke omarọkẹ gbe ame-ọhọ. Uwhremu na, a tẹ rehọ iẹe mu odibo oruiruo o te je kpohọ eklase avene ọrọ Isukulu Ewuhrẹ Odibọgba na evaọ Togo. Enẹna o bi wo omawere iruo nọ ọ roma kẹ evaọ uwou-ogha na.

Ẹhẹ, ẹvẹ eme Devidi ovie na e rọ uzẹme te evaọ erria buobu: ‘Otẹrọnọ whọ gwọlọ [Jihova], whọ rẹ te rue riẹ.’—1 Iruẹru-Ivie 28:9.

[Picture on page 31]

Casimir (obọze) o bi wo omawere iruo nọ ọ roma kẹ evaọ uwou-ogha na