Uyoyou nọ O Ga vi Orọ Oni

Ini buobu i bi gbolo emọ nọ a yẹ obọ fihọ eria nọ a jọ ro itreni, elatrini, hayo iyẹrẹ nọ i re zurie. Eva ẹsejọ, ahwo nọ e rẹ kwa ezuzu a rẹ jọ eva igbogbo ruẹ emọfofa nọ e viẹ oma lọhọ no be hẹrẹ ini rai. Wọhọ epanọ O Estado de S. Paulo o ta, “emọ nọ a bi gbolo fihọ iyẹrẹ i bi vihọ.” Uzẹme, oni ọboba na ọ te ruobọ evaọ obaro. Ghele na o gbolo ọmọ riẹ fiẹ, dede nọ ọ riẹ nọ ọmọ na ọ sai ti whu.

O rẹ sai gb’owhẹ unu nọ, ‘Eme jabọ oni o je gbolo ọmọ riẹ fiẹ, otẹrọnọ ọ rẹ zọ ọ zọ, otẹrọnọ o re whu o whu?’ Ebaibol ọ rehọ ẹme ozee otiọye na ro dhesẹ ẹhẹriẹ ologbo ọrọ ọdawẹ nọ Ọnọma omai o wo kẹ eriẹ: “Kọ [ọmọ-unuevie] ọ sae thọ aye ẹro, nọ ọ gbẹ reohrọ ọmọ nọ o no edhede riẹ ze he? Ọ sae thọ enana ẹro dede, rekọ wha sae thọ omẹ ẹro ho.”—Aizaya 49:15.

Evaọ uzẹme, rro vi oni ohwo-akpọ jọ, Ọghẹnẹ o wo uyoyou udidi k’omai o te je bi se ẹgwọlọ mai gboja. Makọ whẹ ọmaha hayo ọkpako, makọ ebẹbẹ kpobi nọ whọ be rẹriẹ ovao ku, a vu owhẹ wa ha. Ọnọma owhẹ ọ gwọlọ fiobọhọ k’owhẹ je wo isiuru kpahe omokpokpọ ra. Evaọ eme ọso-ilezi na, “ọsẹ gbe oni mẹ a [tẹ] se omẹ, Ọnowahwo o re ti kru omẹ rehọ.”—Olezi 27:10.

Evaọ akpọ na soso, a bi kporo emagazini Uwou-Eroro Na gbe Awake! re e kẹ eriariẹ ‘Ọghẹnẹ uzẹme ọvo na,’ Jihova, gbe Ọmọ riẹ, Jesu Kristi, enọ e rẹ sae rọ uzuazọ ebẹdẹ bẹdẹ kẹ enọ i vuhu i rie mu.—Jọn 17:3.