“Wuhrẹ Ọmọ”

SRE A jọ emamọ ọwhẹrẹ o gwọlọ vi ibi nọ a rẹ vaha vọ otọ na ọvo re a zihe ze emerae jọ kẹ ivuẹvu. O rẹ gwọlọ iruo gaga evaọ ekporo otọ na, ẹkọ ibi na, gbe ame okukuo ibi na re e rro ziezi.

A rẹ sae rehọ iruo ọwhẹrẹ ọnana dhesẹ uzẹme ọ Itẹ 22:6, onọ o ta nọ: “Wuhrẹ ọmọ edhere nọ ọ rẹ nya, nọ ọ jẹ kpako no ọ gbẹ thọriẹ ẹro ho.” Evaọ uzẹme, ewuhrẹ ọsẹ gbe oni u wo abọ ologbo evaọ emamọ ẹyọrọ ọmọ.

Rekọ, evaọ akpọ ogbekuo inẹnẹ na, esẹ gbe ini buobu a be kezọ ohrẹ onana ha. Nọ a te lele areghẹ akpọ na inọ emọ i ti wuhrẹ epanọ a re ro ku ebẹbẹ họ kẹ omobọ rai, emọ na ọvo a ve mu akoto obọ rai họ ẹkpakre. Uzuazọ utioye na u re kpe emọ na fihọ kẹ okpomahọ enwoma ọrọ ahwo ugbarugba.—Itẹ 13:20.

O rẹ mai woma re esẹ gbe ini a rehọ ehri-izi Ileleikristi wuhrẹ emọ rai ẹkwoma uwuhrẹ Ọghẹnẹ no emaha ze! Okevẹ a re ro muhọ? ‘No emaha ze,’ ere Pọl ukọ na ọ ta. Ere o via kẹ ọmoha na, Timoti. Oni riẹ, Yunisi, gbe oniode riẹ Lois a wuhrẹ Timoti “ikere ẹri na,” fikiere o te “wuhrẹ” jẹ “rọwo.” Eme o no rie ze? Uwuhrẹ utioye na u wo abọ ologbo nọ o ro ru ei “wha ẹro te usiwo.”—2 Timoti 1:5; 3:14, 15.

Epọvo na nẹnẹ, esẹ gbe ini nọ i sobọhọ evaọ “oware uwoma uruo” ho a te ruẹ erere buobu otẹrọnọ “oma o rọ [rai] hi.” (Ahwo Galesha 6:9) Enẹ Solomọn ovie owareghẹ na ọ ta: “Ọsẹ ọnọ okiẹrẹe ọ rẹ ghọghọ gaga.”—Itẹ 23:24.