Edhere Uyoyou O Re Kie he

“Wha guọlọ ekẹ ilogbo na. Enẹna me re ti dhesẹ emamọ edhere na kẹ owhai.”—1 AHWO KỌRINT 12:31.

1-3. (a) Ẹvẹ ewuhrẹ edhesẹ uyoyou o rọ wọhọ ewuhrẹ ẹvẹrẹ ọkpokpọ? (b) Didi ekwakwa i re ru edhesẹ uyoyou jọ use-abọ?

KỌ WHỌ daoma gwọlọ wuhrẹ ẹvẹrẹ ọkpokpọ no ẹdẹjọ? O lọhọ họ! Dede na, ọmọ ọboba o re wuhrẹ ẹvẹrẹ ọkpokpọ nọ ọ tẹ rọ oria nọ a be jọ jẹe. Ẹvori riẹ ọ rẹ rehọ edo gbe otofa eme na lọlọhọ, fikiere u re kri hi ọ vẹ be jẹ ẹvẹrẹ na gbiae. O rọ ere kẹ ekpako ho. Ma re se ebe ẹvẹrẹ na unuẹse buobu, re ma tẹ te riẹ epanọ a rẹ ta eme rai jọ. Nọ ohwo o te wuhrẹ ẹvẹrẹ na t’oria jọ no, o ve muhọ eroro lele ẹvẹrẹ ọkpokpọ na ọ vẹ jẹ tae lọlọhọ ziezi.

² Re a wuhrẹ edhesẹ uyoyou o wọhọ ewuhrẹ ẹvẹrẹ ọkpokpọ. Uzẹme, a kuọ abọjọ okwakwa Ọghẹnẹ onana kugbe yẹ ahwo-akpọ. (Emuhọ 1:27; wawo 1 Jọn 4:8.) Ghele na, ewuhrẹ edhesẹ uyoyou o gwọlọ omodawọ gaga—maero nẹnẹ nọ uyoyou u tulo ho na. (2 Timoti 3:1-5) Onana o rẹ via ẹsejọ evaọ uviuwou na. Ẹhẹ, a be yọrọ ahwo buobu evaọ okegbe nọ a rẹ jọ kpahe ẹme ọgaga ọvo, nọ eme uyoyou e rọ họ. (Ahwo Ẹfẹsọs 4:29-31; 6:4) Kọ ẹvẹ ma rẹ sai ro wuhrẹ edhesẹ uyoyou—o tẹ make rọnọ a dhesẹ i rie k’omai hi?

³ Ebaibol na ọ rẹ sai fiobọhọ. Eva 1 Ahwo Kọrint 13:4-8, Pọl ọ kẹ orọnikọ otofa eruehru orọ uyoyou hu rekọ edhesẹvia ovevẹ ọrọ uruemu nọ uyoyou ulogbo onana u re dhesẹ. Eroro kpahe awọ Ebaibol enana u ti fiobọhọ k’omai wo otoriẹ okwakwa Ọghẹnẹ onana jẹ ruẹrẹ omai kpahe viere re ma dhesẹ iẹe. Joma roro kpahe abọjọ uyoyou wọhọ epanọ Pọl o dhesẹ i rie. Ma te ghale ai fihọ abasa: uruemu mai; kẹsena, ma vẹ ta kpahe usu mai kugbe amọfa; ọrọ urere kọ ithihakọ.

Uyoyou U re Fiobọhọ k’Omai Fi Omoya Kparobọ

4. Didi oruvẹ Ebaibol na ọ kẹ kpahe ihrieriọ?

⁴ Nọ ọ kake t’ẹme kpahe uyoyou no, Pọl o te kere se ahwo Kọrint nọ: “Uyoyou u wo ihrieriọ họ.” (1 Ahwo Kọrint 13:4) Ihrieriọ o rẹ sai dhesẹ oma via evaọ ẹgo nọ amọfa a te bi kparo vi ohwo. Oghẹrẹ ihrieriọ nana o rẹ wha ọraha ze—ọrọ ugboma, uruemu, gbe abọ-ẹzi.—Itẹ 14:30; Ahwo Rom 13:13; Jemis 3:14-16.

5. Ẹvẹ uyoyou u re ro fiobọhọ k’omai fi ihrieriọ kparobọ okenọ ma te roro nọ a k’omai ọkwa jọ evaọ ukoko na ha?

⁵ Fiki onana, nọ omobọ ra nọ, ‘Kọ me re muofu nọ a gbẹ k’omẹ ọkwa jọ evaọ ukoko na ha?’ Uyo na o tẹ rọ E, who weri hi. Jemis, ọnọ o kere Ebaibol na, ọ kareghẹhọ omai nọ ‘ẹzi ihri-eriọ’ o rọ eva ahwo-akpọ kpobi nọ e gba ha. (Jemis 4:5) Uyoyou kẹ oniọvo ra o rẹ sai fiobọhọ k’owhẹ kpọ uruemu ra vi. U re ru owhẹ ghọghọ kugbe enọ e be ghọghọ, who gbe rri rie nọ a bi rri owhẹ vo ho otẹrọnọ a kẹ omọfa oghale hayo ujiro.—Wawo 1 Samuẹle 18:7-9.

6. Didi ẹbẹbẹ ọgaga ọ roma via evaọ ukoko ahwo Kọrint ikpe-udhusoi ọsosuọ na?

⁶ Pọl o fibae nọ uyoyou u re “seha ha, u re fu uke he.” (1 Ahwo Kọrint 13:4, NW ) Otẹrọnọ ma wo ona hayo ẹgba jọ, u fo re ma rọ fiki riẹ kpare igabọ kpehru hu. Ẹsejọhọ, onana o jọ ẹbẹbẹ kẹ ahwo omorro jọ nọ e bẹbẹ ruọ ukoko Kọrint anwae na. O sae jọ nọ a rẹ r’unu ruẹme họ gaga hayo a rẹ mai ru eware kpọvi. Ẹsejọhọ ovao ahwo nọ a jẹ kpọ rri omobọ rai u fiba ozighi nọ o jọ ukoko na. (1 Ahwo Kọrint 3:3, 4; 2 Ahwo Kọrint 12:20) Uyero na o tẹ te ga te epanọ Pọl ọ rọ whọku ahwo Kọrint na fiki epanọ a bi “thihakọ igheghẹ,” enọ Pọl ọ rehọ unu dhesẹ gaga wọhọ “ikọ iride.”—2 Ahwo Kọrint 11:5, 19, 20.

7, 8. Rehọ Ebaibol na dhesẹ epanọ ma rẹ sae rọ rehọ ona nọ ma wo wha okugbe ze.

⁷ Uyero ovo na o sae roma via nẹnẹ. Wọhọ oriruo, ahwo jọ a rẹ sae rehọ eware nọ a le t’obọ no seha evaọ odibọgba na hayo ọkwa nọ a jọ ukoko Ọghẹnẹ wo. Ma tẹ maki wo ona hayo ẹgba jọ nọ amọfa evaọ ukoko na a kare, kọ oyena o rẹ lẹliẹ omai fu uke? Whaọ, u re fo re ma rehọ ona nọ ma wo wha okugbe haro—orọnikọ omobọ mai hi.—Matiu 23:12; 1 Pita 5:6.

⁸ Pọl o kere nọ dede nọ ukoko na u wo ekwakwa buobu, “Ọghẹnẹ o ku oma na gbe.” (1 Ahwo Kọrint 12:19-26) Ubiẹme Grik nọ a fa ‘kugbe’ u dhesẹ ọguakugbe, wọhọ epaọ ekọlọ nọ a rẹ guakugbe. Fikiere uvumọ ohwo evaọ ukoko na ọ rẹ rehọ ona riẹ y’oma ha re ọ jẹ gwọlọ ta họ amọfa obọ. Ukoko Ọghẹnẹ o ghọ omoya gbe omorro.—Itẹ 16:19; 1 Ahwo Kọrint 14:12; 1 Pita 5:2, 3.

9. Didi iriruo unuovẹvẹ Ebaibol na ọ kẹ kpahe ahwo nọ e jẹ gwọlọ isiuru omobọ rai?

⁹ “Uyoyou o rẹ guọlọ orọ obọ riẹ hẹ.” (1 Ahwo Kọrint 13:5) Ohwo oyoyou o re fi amọfa iwhayo re o le oware nọ ọ gwọlọ t’obọ họ. Iriruo unuovẹvẹ kpahe ẹme ọnana e rọ Ebaibol na. Re a dhesẹ iẹe: Ma se kpahe Dilala, Jezibẹl, gbe Atalia—eyae nọ i fi amọfa iwhayo re a le edhere oriobọ rai t’obọ. (Ibruoziẹ 16:16; 1 Ivie 21:25; 2 Iruẹru-Ivie 22:10-12) Absalom, ọmọ Devidi ovie na ọ riẹ re. Ọ rẹ nyabru enọ e ziọ Jerusalẹm kẹ ẹdhoguo jẹ rehọ ẹghẹ dhesẹ nọ okọto ovie na u wo isiuru kpahe ebẹbẹ rai tere he. Ọ vẹ ta kẹ ai vevẹ nọ ohwo nọ okọto na o gwọlọ họ ọnọ ọ rọ jajaja wọhọ ọye omariẹ! (2 Samuẹle 15:2-4) Uzẹme, Absalom o wo isiuru, orọnikọ rọ kẹ enọ e be ruẹ uye he, rekọ kpahe omobọ riẹ. Nọ o je ru wọhọ ovie nọ ọ rehọ omobọ riẹ mu, o te ku ahwo buobu rẹriẹ. Rekọ ukuhọ riẹ Absalom o te whu. Eva oke uwhu riẹ, a tubẹ rehọ iẹe wọhọ ọnọ a rẹ kẹ emamọ ukio ho.—2 Samuẹle 18:6-17.

10. Ẹvẹ ma sai ro dhesẹ nọ ma bi roro kpahe isiuru amọfa?

¹⁰ Onana o rọ unuovẹvẹ kẹ Ileleikristi nẹnẹ. Makọ ọzae hayo aye, ma sai wo okẹ nọ a rẹ rọ tẹzẹ amọfa. O sae jọ lọlọhọ k’omai re ma kparobọ, ẹkwoma ẹme nọ ma rẹ ta họ amọfa obọ hayo rri enọ i wo eriwo ọfa vo. Rekọ ma te ghine wo uyoyou, ma re roro kpahe isiuru amọfa. (Ahwo Filipai 2:2-4) Ma rẹ wha amọfa re he hayo wha ekpere uruemu jọ haro ho fiki eriariẹ mai hayo fiki ọkwa mai evaọ ukoko Ọghẹnẹ wọhọ epaọ ẹsenọ eriwo mai ọvo họ enọ e mai woma. Ukpoye, ma rẹ kareghẹhọ itẹ Ebaibol na: “Omovia o rẹ wha ọraha tha, uzou-uveghe o rẹ wha ekie tha.”—Itẹ 16:18.

Uyoyou O rẹ Wha Usu Udhedhẹ Ze

11. (a) Idhere vẹ ma sai ro dhesẹ uyoyou nọ o rọ wowou jẹ rọ kpatiẹ? (b) Ẹvẹ ma sai ro dhesẹ nọ ma be ghọghọ evaọ emuemu hu?

¹¹ Pọl o te je kere nọ uyoyou u re wo “ọriẹruo” gbe nnọ “u re ru eware etọtọ họ.” (1 Ahwo Kọrint 13:4, 5) Ẹhẹ, uyoyou o rẹ k’omai uvẹ ru eware evaọ edhere evega, otọtọ, hayo orivo ho. Ukpoye, ma re roro kpahe iroro amọfa. Wọhọ oriruo, ohwo uyoyou ọ rẹ whaha eware nọ i re kpokpo iroro amọfa. (Wawo 1 Ahwo Kọrint 8:13.) Uyoyou “o rẹ ghọghọ eva oware othọthọ họ, rekọ o rẹ ghọghọ eva oware nọ u kiete.” (1 Ahwo Kọrint 13:6) Ma te you uzi Jihova, ma rẹ rọ ọfariẹ-ogbe wholo hayo rri ughe eware nọ Ọghẹnẹ ọ ghọ họ. (Olezi 119:97) Uyoyou u re fiobọhọ k’omai ruẹ oghọghọ evaọ eware nọ e rẹ bọ ga viukpọ enọ e rẹ raha.—Ahwo Rom 15:2; 1 Ahwo Kọrint 10:23, 24; 14:26.

12, 13. (a) Eme ma re ru otẹrọnọ ohwo jọ o ru omai thọ? (b) Kẹ iriruo Ebaibol ro dhesẹ nọ makọ ofu nọ a riẹ mu ọ rẹ sai ru omai ru oware ugheghẹ.

¹² Pọl o kere nọ uyoyou u re mu “ofu hu” (“o re vi igabọ t’ezọ họ,” Phillips). (1 Ahwo Kọrint 13:5) Uzẹme, o rọ oma mai wọhọ ahwo-akpọ nọ e gba ha re ma muofu hayo dina dheva evaọ okenọ omọfa o te ru omai thọ. Rekọ, o rẹ thọ re ma kru ẹgo h’eva oke krẹkri hayo wo ẹwhọ h’eva. (Olezi 4:4; Ahwo Ẹfẹsọs 4:26) A gbẹ kpọe he, makọ emamọ ofu nọ ma mu o rẹ lẹliẹ omai ru oware ugheghẹ, yọ Jihova ọ sae r’omai guẹdhọ.—Emuhọ 34:1-31; 49:5-7; Ikelakele 12:3; 20:10-12; Olezi 106:32, 33.

¹³ Ahwo jọ a kẹ sebaẹgba amọfa uvẹ no re u kpomahọ ekpohọ iwuhrẹ Ileleikristi rai hayo obọ nọ a re wo evaọ odibọgba na. Vẹre, ibuobu ahwo nana a họre gaga no kẹ ẹrọwọ na, ẹsejọhọ a thihakọ ọkparesuọ uviuwou no, ẹkoko ibe iruiruo rai, gbe eware efa. A thihakọ ezadhe eyena keme a rri rai wọhọ edawọ ẹgbakiete, yọ ere e ghinẹ rọ. Rekọ eme ọ rẹ via okenọ ibe Oleleikristi ọ tẹ ta hayo ru oware othọthọ? Kọ onana o gbẹ rọ odawọ ẹgbakiete? Ere o rọ, keme ma te kru ẹwhọ h’eva, ma rẹ sae “kẹ ukumuomu oria.”—Ahwo Ẹfẹsọs 4:27.

14, 15. (a) Eme u dhesẹ re a “kele iruthọ”? (b) Ẹvẹ ma sae rọ raro kele Jihova evaọ erọvrẹ?

¹⁴ Avọ emamọ ẹjiroro, Pọl o fibae nọ uyoyou “u re kele iruthọ họ.” (1 Ahwo Kọrint 13:5, NW ) Ọ jọ etenẹ fodẹ ẹme ikelakele, ẹsejọhọ re o dhesẹ uruemu nọ a re ro kere iruthọ fihọ obe re e siọ ẹro ba ẹthọrọ. Kọ o rọ oware uyoyou re a kere ẹme hayo uruemu enwoma na fihọ iroro, epaọ ẹsenọ a te ta kpahe iẹe evaọ obaro? Ẹvẹ eva e rẹ were omai te inọ Jihova ọ be rọ evega kiẹ omai riwi hi! (Olezi 130:3) Ẹhẹ, ma te kurẹriẹ, o re voro iruthọ mai no.—Iruẹru 3:19.

¹⁵ Ma rẹ sae raro kele Jihova evaọ ẹme ọnana. U fo re ma kpakpa oma hrọ họ o tẹ wọhọ nọ omọfa o ru omai thọ. Otẹrọnọ ma rẹ kaki muofu, ma te nwa oma mai oma vi onọ ohwo ọdekọ na ọ nwa. (Ọtausiuwoma Na 7:9, 22) Ukpoye, u re fo re ma kareghẹhọ nọ uyoyou o rẹ “rọwo eware kpobi.” (1 Ahwo Kọrint 13:7) Dede na, mai ọvuọvo ọ gwọlọ jọ oruru hu, rekọ ma re mu viẹro kpahe ẹjiroro inievo mai gbe he. Oria nọ o jọ lọhọ kpobi, ma hai dina vro kẹ ohwohwo.—Ahwo Kọlọsi 3:13.

Uyoyou U re Fiobọhọ k’Omai Thihakọ

16. Iyero vẹ uyoyou o sae jọ fiobọhọ k’omai thihakọ?

¹⁶ Fikiere Pọl ọ tẹ ta k’omai nọ “uyoyou u re wo odiri krẹkri.” (1 Ahwo Kọrint 13:4) O rẹ lẹliẹ omai thihakọ ọbẹwẹ, ẹsejọ evaọ oke krẹkri. Wọhọ oriruo, Ileleikristi buobu a rria iviuwou nọ a jẹ rọ egagọ sa-sa te ikpe buobu no. Efa a rọo ho, orọnikọ ere a gwọlọ họ, rekọ fikinọ a sae be ruẹ ọrivẹ-orọo nọ o fo “evaọ Ọnowo na” ha. (1 Ahwo Kọrint 7:39; 2 Ahwo Kọrint 6:14) Amọfa a riẹ nọ a bi lele ẹyao nọ o bi siotọ muabọ. (Ahwo Galesha 4:13, 14; Ahwo Filipai 2:25-30) Uzẹme, evaọ uyero sebaẹgba ọnana, uvumọ ohwo nọ ọ kare uyero nọ o dina gwọlọ ithihakọ ọ riẹ hẹ.—Matiu 10:22; Jemis 1:12.

17. Eme o ti fiobọhọ k’omai thihakọ eware kpobi?

¹⁷ Pọl ọ k’omai imuẹro nọ uyoyou “u re thiakọ eware kpobi, . . . rẹro eware kpobi, avọ odiri eva eware kpobi.” (1 Ahwo Kọrint 13:7) Uyoyou kẹ Jihova u re fiobọhọ k’omai thihakọ uyero kpobi fiki ẹrẹreokie. (Matiu 16:24; 1 Ahwo Kọrint 10:13) Orọnikọ ma be gwọlọ uwhu hu. Ukpoye, ute mai họ re ma ruẹse rria uzuazọ udhedhẹ. (Ahwo Rom 12:18; 1 Ahwo Tẹsalonika 4:11, 12) Ghele na, okenọ edawọ ẹrọwọ e tẹ roma via, ma rẹ wereva thihakọ enana wọhọ abọ osohwa ọkwa-olele Ileleikristi mai. (Luk 14:28-33) Nọ ma bi thihakọ na, ma rẹ daoma sasa ovao, rẹro ewoma evaọ udevie iyero idabolo.

18. Fikieme ma jẹ gwọlọ ithihakọ nọ eware e tẹ make be riẹ nya?

¹⁸ Orọnikọ evaọ ukpokpoma ọvo a jo thihakọ họ. Ẹsejọ, re a thihakọ u dhesẹ ẹdadamu, re a tilẹmu eruo oware jọ makinọ idabolo e riẹ hayo e riẹ hẹ. Ithihakọ u kugbe ẹyọrọ emamọ omaa abọ-ẹzi. Wọhọ oriruo, kọ who bi w’abọ ziezi evaọ odibọgba na, wọhọ epanọ uyero ra o k’owhẹ uvẹ te? Kọ who bi se je roro kpahe Ẹme Ọghẹnẹ je lele Ọsẹ obọ odhiwu ra t’ẹme evaọ olẹ? Kọ who bi kpohọ iwuhrẹ ukoko na ẹsikpobi, je bi wo erere no uduotahawọ ohwohwo ze kugbe enọ wha gbẹ rọwo? Otẹrọ ere, makọ eware i kiehọ k’owhẹ obọnana hayo whọ rọ ẹbẹbẹ, yọ who bi thihakọ. Jọ o b’owhẹ hẹ, “keme u re ti krẹ hẹ re ma te kọrọ ibi rai, otẹrọnọ oma o rọ omai hi.”—Ahwo Galesha 6:9.

Uyoyou—“Emamọ Edhere”

19. Ẹvẹ uyoyou o rọ rrọ “emamọ edhere”?

¹⁹ Pọl ọ fodẹ epanọ edhesẹ uyoyou u wuzou te nọ o se okwakwa Ọghẹnẹ onana “emamọ edhere.” (1 Ahwo Kọrint 12:31) “Emamọ” evaọ edhere vẹ? Whaọ, Pọl ọ nwane t’ẹme kpahe ekẹ ẹzi na no, enọ e jọ buobu evaọ udevie Ileleikristi ikpe-udhusoi ọsosuọ na. Ahwo jọ a jẹ sae ruẹaro, a kẹ amọfa ẹgba nọ a re ro siwi eyao, a kẹ ibuobu ẹgba nọ a rẹ rọ jẹ evẹrẹ. Ekẹ enana i ghine gbunu! Ghele na, Pọl ọ ta kẹ ahwo Kọrint nọ: “Mẹtẹ make be jẹ erọo-unu ahwo gbe ọrọ ikọ-odhiwu, re me wo uyoyou hu, mẹ rẹ wọhọ ẹroo nọ o re do, hayo edo ẹgogo odhogu. Mẹ tẹ maki wo okẹ aruọruẹ, mẹ jẹ riẹ otọ eware ididi kpobi, avọ eriariẹ kpobi, re mẹtẹ maki wo [ẹrọwọ] kpobi, makọ igbehru me ve wolo ai, re me gbe wo uyoyou hu yọ omẹ rọ odẹ-oware ovo ho.” (1 Ahwo Kọrint 13:1, 2) Ẹhẹ, makọ iruo nọ e hae kẹ erere vẹre i ve zihe ruọ iruo “iwhuowhu” otẹrọnọ iroro nọ ma bi ro ru ai o gbẹ rọ uyoyou kẹ Ọghẹnẹ gbe ọrivẹ hẹ.—Ahwo Hibru 6:1.

20. Fikieme o jẹ gwọlọ omodawọ ẹsikpobi re ma wo uyoyou?

²⁰ Jesu ọ k’omai ẹjiroro ọfa nọ ma je wo okwakwa Ọghẹnẹ orọ uyoyou. Ọ ta nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Ubiẹme na “re” u ru rie fihọ ẹme omobọ Oleleikristi kpobi sọ o ti wuhrẹ edhesẹ uyoyou. Whaọ, ẹrria evaọ orẹwho ofa ọvo o rẹ gbomai họ wuhrẹ ẹvẹrẹ riẹ hẹ. Yọ orọnikọ ekpohọ iwuhrẹ eva Ọgwa Uvie hayo usu nọ ma rẹ nya kugbe ibe Ileleikristi o rẹ nwani wuhrẹ omai idudhe re ma dhesẹ uyoyou hu. Ewuhrẹ “ẹvẹrẹ” ọnana o gwọlọ omodawọ ẹsikpobi.

21, 22. (a) Eme ma re ru otẹrọnọ ma nyate abọjọ uyoyou nọ Pọl ọ ta kpahe na ha? (b) Edhere vẹ a sae rọ tae nnọ “uyoyou u re re he”?

²¹ Ẹsejọ, whọ rẹ sae nyate ute uyoyou nọ Pọl ọ t’ẹme te na ha. Rekọ o b’owhẹ hẹ. Rehọ odiri wuhrẹ uyoyou. Gbẹ hai kpohọ Ebaibol na ẹsikpobi je fi izi riẹ h’iruo evaọ oyerikugbe amọfa ra. Jọ oriruo nọ Jihova omariẹ ọ k’omai o thọrọ owhẹ ẹro ho. Pọl ọ tudu họ ahwo Ẹfẹsọs awọ nọ: “Wha rọ eva elọlọhọ lele ohwo ohwo yeri, ohwo ọ rọ vrẹ ohwo, wọhọ epanọ Ọghẹnẹ ọ rọ fiki Kristi vrẹ owhai na.”—Ahwo Ẹfẹsọs 4:32.

²² Wọhọ epanọ ẹta ẹvẹrẹ ọfa ọ rẹ jọ lọlọhọ nọ a te ru ei avọ omodawọ na, uwhremu na whọ rẹ te ruẹ nọ edhere uyoyou o lọhọ viere. Pọl ọ k’omai imuẹro nọ “uyoyou u re re he.” (1 Ahwo Kọrint 13:8) Wo ohẹriẹ no ekẹ igbunu ọrọ ẹzi na, uyoyou u ti serihọ họ. Fikiere gbe wuhrẹ epanọ a re dhesẹ okwakwa Ọghẹnẹ onana. Wọhọ epanọ Pọl o fi rie họ, o rọ “emamọ edhere.”

Kọ Whọ Sae k’Iyo Nana Vevẹ?

◻ Ẹvẹ uyoyou o sai ro fiobọhọ k’omai fi omoya kparobọ?

◻ Idhere vẹ uyoyou o sai ro fiobọhọ k’omai wha udhedhẹ haro evaọ ukoko na?

◻ Ẹvẹ uyoyou o sai ro fiobọhọ k’omai thihakọ?

◻ Ẹvẹ uyoyou o rọ rrọ “emamọ edhere”?

[Picture on page 9]

Uyoyou u ti fiobọhọ k’omai kpairoro vrẹ iruthọ inievo mai

[Pictures on page 13]

Otofa ithihakọ họ ẹyọrọ omaa ukoko mai