Iwhowho Uvie A N’iyẹrẹ
“Eware Kpobi E rẹ Lọlọhọ Eva Obọ Ọghẹnẹ”
EME ọ obehru na, nọ e rọ Matiu 19:26, i rugba evaọ oma uvovo aye jọ evaọ Venezuela. Nọ o wuhrẹ je fievahọ Jihova vọvọ no, ọ tẹ sai fi ẹbẹbẹ ologbo jọ kparobọ. O gbiku nọ:
“Oniode mẹ ọ jọ wowou gaga avọ uyoyou. U yoma kẹhẹ, o whu evaọ okenọ mẹ jọ ikpe 16 ọvo. Uwhu riẹ o d’omẹ gaga. Me te reghe no, re me no ighẹ mai dede o tẹ jọ bẹbẹ kẹ omẹ. Mẹ jẹ hae kare ẹthẹ dhoma enwenọ ẹsikpobi.
“Me kpohọ isukulu hu, hayo kọ me wo iruo. Mẹ jẹ keria ubrukpẹ mẹ ọvo. Fikinọ mẹ jọ goli ababọ egbẹnyusu, mẹ tẹ jọ ọkora gaga. Mẹ tẹ wọhọ ohwo nọ o fioka ha jẹ gwọlọ whu dede re o jọ ere kuhọ. Mẹ jẹ hae nọ oma mẹ nọ, ‘Fikieme mẹ jẹ rọ uzuazọ?’
“Oni mẹ ọ jẹ hae rehọ emagazini Uwou-Eroro Na gbe Awake! mi Osẹri ọmoha jọ nọ a re se Gisela. Ẹdẹjọ oni mẹ o te gbẹroku Gisela nọ ọ jẹ nya uwou mai vrẹ ọ tẹ nọe sọ ọ sai fiobọhọ kẹ omẹ. Gisela ọ tẹ rọwo nọ ọ te daoma, rekọ mẹ se nọ mẹ rẹ rue riẹ. Onana o lẹliẹ oma lọhọ Gisela ha. O kere ileta se omẹ be ta nọ ọ gwọlọ jọ ogbẹnyusu mẹ gbe nnọ ohwo jọ nọ o wuzou vi ei ọ gwọlọ jọ ogbẹnyusu mẹ re. Wọhọ epanọ ọ ta, ohwo yena họ Jihova Ọghẹnẹ.
“Onana u te duobọ te omẹ, mẹ tẹ za ileta riẹ na. Emerae esa ma kere se ohwohwo. Nọ Gisela ọ tẹzẹ omẹ te oria jọ no mẹ tẹ te rọwo nnọ ọ sae nyaze te ruẹ omẹ. Evaọ ẹkeria ọsosuọ mai, Gisela o te wuhrẹ Ebaibol kugbe omẹ, ẹkwoma obe na Whọ Sae Ria Bẹdẹ Bẹdẹ eva Aparadase ọ Otọakpọ. Nọ uwuhrẹ na u kuhọ no, o te zizie omẹ re me kpohọ ewuhrẹ evaọ Ọgwa Uvie rai. Udu o tẹ nawo omẹ. Me ri no uwou na ruọ otafe evaọ ikpe ene he, yọ re mẹ nya ruọ iyẹrẹ na o jọ idudu.
“Gisela o wo odiri kugbe omẹ gaga. Ọ tuduhọ omẹ awọ nọ ozọ o riẹ hẹ gbe nnọ o ti su omẹ kpohọ ewuhrẹ na. Mẹ tẹ rọwo. Okenọ ma te Ọgwa Uvie na, me te muhọ enuhu, ọgbẹroyẹ o te fi omẹ oma. Mẹ sai yere uvumọ ohwo ho. Ghele na, mẹ tẹ rọwo nnọ me ti gbe kpohọ iwuhrẹ na, yọ koka koka Gisela ọ rẹ nyaze te rehọ omẹ.
“Re u fiobọhọ kẹ omẹ fi ozodhẹ mẹ kparobọ, Gisela ọ rẹ rehọ omẹ kpohọ iwuhrẹ na evaọ ẹruoke. Ma ve dikihẹ unuẹthẹ na je yere ahwo nọ e be nyaze na. Evaọ edhere ọyena, kọ omọvo hayo imava ọvo mẹ jẹ hae rẹriẹ ovao ku evaọ ẹsiẹvo, ukpenọ mẹ rẹ rẹriẹ ovao ku ahwo na kpobi ẹsiẹvo. Nọ me roro nọ mẹ gbẹ sai thihakọ riẹ ofa ha, Gisela ọ tẹ wariẹ eme Matiu 19:26 na kẹ omẹ: ‘Onana o rẹ bẹbẹ kẹ ahwo, rekọ eware kpobi e rẹ lọlọhọ eva obọ Ọghẹnẹ.’
“Dede nọ o lọhọ họ, uwhremu na mẹ tẹ te sai kpohọ oria nọ ahwo a jo bu viere eva okokohọ okogho. Ẹvẹ owojẹ oyena o rro te k’omẹ! Evaọ September 1995, mẹ tẹ gbaudu ta kẹ ekpako na nọ mẹ gwọlọ mu usiuwoma ota họ. Emerae ezeza nọ i lele i rie, evaọ April 1996, mẹ tẹ rehọ ame-ọhọ dhesẹ omarọkẹ Jihova mẹ via.
“Okenọ ohwo jọ ọ nọ omẹ kpahe epanọ mẹ sae rọ wharo ru onana, me te yo nọ: ‘Isiuru mẹ re me ru Jihova eva were e rro vi ozodhẹ mẹ.’ Dede nọ otiẹsejọ me re wo ọkora ghele, mẹ be ghọghọ inọ mẹ rọ ọkobaro oke-kpobi. Me te rri kpemu, mẹ rọwo kugbe Gisela. Enẹna me wo Ogbẹnyusu nọ o wo isiuru kpahe omẹ gbe ‘ọnọ [ọ be] kẹ omẹ eri.’ ”—Ahwo Filipai 4:13.
[Pictures on page 29]
“Isiuru mẹ re me ru Jihova eva were e rro vi ozodhẹ mẹ”