Uyoyou kẹ Enọ E rọ “Ẹgba Orọwọ Na”

UVI Ileleikristi a wo ọgbakugbe nọ o wọhọ orọ uviuwou evaọ udevie rai. Evaọ uzẹme, no anwọ ikpe-udhusoi ọsosuọ C.E. ze, a bi se omoma rai “brọda” gbe “sista.” (Mak 3:31-35; Filimọn 1, 2, NW ) Enana e rọ eme-unu gheghe he; yọ edhesẹ epanọ egegagọ Ọghẹnẹ a ghine rri ohwohwo. (Wawo 1 Jọn 4:7, 8.) Jesu ọ ta nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.”—Jọn 13:35.

Uyoyou utioye na u dhesẹ oma via evaọ July 1997 okenọ ikpisoi gbe ẹvo i lele okpakpọ ukrẹkri jọ evaọ Chile. Idudhe na, ibuobu i te wo ẹgwọlọ emuore, emuẹgọ, gbe eware efa. Evaọ etoke okpẹtu, Isẹri Jihova a rẹ daoma lele uthubro Pọl ro se ahwo Galesha na: “Fikiere re, nọ uvẹ o gbẹrọ na, joma ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.”—Ahwo Galesha 6:10.

Fikiere, Isẹri Jihova a te koko oma họ vẹrẹ vẹrẹ re a dhogbo. A tẹ kwa emuore, emuẹgọ, gbe eware efa koko, salọ ae, variẹ ae, je vi ai kpohọ oria okpẹtu na. Emaha na dede a zọhọ eware aroza rai ze! Akpọ o gbe oniọvo-ọmọtẹ jọ unu nọ ọ ruẹ Ọgwa Uvie na nọ o vọ avọ eware nọ a rọ dhogbo ze. Ọ ta nọ: “Me kpenu fihọ ọvo, mẹ riẹ sọ ehwẹ mẹ rẹ hwẹ hayo oviẹ mẹ rẹ viẹ hẹ. Nwanọ eware nọ ma gwọlọ ena.”

Kpregede na, otọ o tẹ jọ oria ovo nọ ẹvo o ku na nuhu. Iwou buobu e raha. Re a nyate ẹgwọlọ na, a tẹ rọ egbẹgwae ogbodhẹ efa ro mu. Egbẹgwae Ebabọ Ubrotọ, enọ e rẹ rẹro te ebabọ eria omakokohọ Isẹri Jihova, a tẹ dhẹ ze ti fiobọhọ. Eme o no rie ze? Iwou ekrẹkrẹrẹ—enọ inievo na a ru ona họ jẹ bọ—a tẹ zọhọ ai kẹ enọ iwou rai e raha no. Dede nọ iwou enana e jọ ikpiwou hu, i woma gaga vi enọ egọmeti o momo kẹ ahwo enọ a ralọ otọ gbe oma rai hi na yọ i wo inwido ho na.

Inievo jọ i no ugbothabọ ze ti fiobọhọ. Ohwo-agbara Ogbẹgwae Ebabọ Ubrotọ na jọ ọ nyaze ti no oria na riwi evaọ edẹ ivẹ—dede nọ akaba-ọmo ọ rọ. Oniọvo jọ nọ otu aro o ruiruo gaga, jẹ wọ ire bru ekapenta nọ o je bru rai fihọ epanọ a gwọlọ. Oniọvo ọfa jọ nọ o diezọ ọ vẹ wọ ae kpohọ oria nọ a jọ gwọlọ ae.

Obọ nọ inievo na a fihọ na u duobọte iriughe buobu oma. Evaọ ẹwho jọ a dhẹ omoto iporisi jọ kẹle uwou oniọvo-ọmọtẹ jọ nọ a jẹ ruẹrẹ. Oma o jẹ kpakpa iporisi na. Ọjọ ọ tẹ nọ oniọvo jọ nọ: “Amono họ iruiruo nana nọ eva e be were t’enẹ na, kọ br’igho a be hwosa ae?” Oniọvo na ọ tẹ ta nọ ahwo na ahwo unevaze. Iporisi na jọ ọ tẹ ta nọ k’amara k’amara ọ rẹ jẹ azọhọ fihọ ichọche riẹ, rekọ epastọ riẹ ọ re tubẹ n’onọ riẹ dede he anwẹ nọ otọ na u ro nuhu na! Okiokiọ riẹ iporisi jọ o te fonu oniọvo na. O muẹrohọ iruiruo na re. Ọ ta nọ ẹzi ọjaja iruiruo na o were riẹ te epanọ ọ jẹ te rọ ruọ iruo na dede!

Evaọ uzẹme, omodawọ obufihọ na evaọ Chile o jọ oriruo oghọghọ kẹ otu iruiruo unevaze na gbe obọdẹ isẹri-ise kẹ iriughe.