Oware nọ U Woma Vi Udẹ

NỌ Ọ fodẹ “eware okafe” nọ eyae e rẹ rọ whẹ erru họ oma no, Pita ukọ na ọ tẹ hrẹ nọ: “Ukpoye, erru ra o rẹ jọ orọ eva ra, erru ebẹdẹ bẹdẹ ọrọ ẹzi owowolẹ avọ udhedhẹ, onọ o mae ghare evaọ aro Ọghẹnẹ.”—1 Pita 3:3, 4, Today’s English Version.

O rọ isiuru inọ, okenọ ukọ na o je kere kpahe ẹgọ okafe otiọye na, ọ rehọ ubiẹme Griki na koʹsmos ruiruo, onọ a si ubiẹme Oyibo na cosmetics no ze, onọ otofa riẹ o rọ “ẹwhẹhọ erru maero kọ orọ ovioma na.” Kọ Pita ọ be jọ etenẹ ta nọ eyae Ileleikristi a si isiaro hayo eware emu-osẹ itieye na ha? Uvumọ oware o jọ Ẹme Ọghẹnẹ dhesẹ ere he. Ukpoye, onana o kẹ uvẹ kẹ ẹsalọ onọ u je ohwo, fikiere onọ o rẹ were ọjọ o rẹ were ọdekọ họ.

Rekọ, nọ a te ru ei vrẹta, hayo a te ru ei te epanọ u bi ro kpokpo amọfa buobu, didi ovuẹ a be kẹ ahwo na? Kọ ogbẹrọ ovuẹ ọ osẹ-othọthọ, orivo, omovia, oheri, hayo oriobọ? Evaọ uzẹme, o rẹ sae lẹliẹ aye jọ kuẹku, lẹliẹ ahwo rọ ubiẹro othọthọ rri rie i.—Wawo Izikiẹl 23:36-42.

Evaọ evuhumuo onana, aye nọ ọ rọ ‘ọgba egagọ’ ọ rẹ daoma, nọ u te je ei nọ o bi si isiaro, re ovao riẹ u dhesẹ orọ emamọ iroro, ẹwolẹ, ẹwo, omarokpotọ. Ekwakwa nana e rẹ ghariẹ erru gbe ewoma riẹ. Evaọ uzẹme, te ọ gwọlọ si isiaro hayo ọ gwọlọ si hi, o re dhesẹ ọghọ gbe erru obeva. Onana u re dhesẹ ereghẹ riẹ via nnọ, wọhọ epanọ eme ọ Pita nọ e rọ obehru na i dhesẹ na, oware jọ o riẹ nọ u woma vi udẹ.—1 Timoti 2:9, 10.