Otofa Ebaibol Ẹkwoma Okpomahọ Ono?
EDHESẸ ọvo jọ ọrọ ẹme na “otofa” họ “re a wo otoriẹ oware ro no orọwọ, iroro, hayo uyero ohwo ze.” (Webster’s Ninth New Collegiate Dictionary) Fikiere, otofa nọ ohwo ọ rẹ kẹ oware kpobi o roma hwa otọhotọ uyerakpọ ohwo na.
Rekọ ẹvẹ kpahe otofa Ebaibol? Kọ ma wo udu nọ ma rẹ rọ f’otọ evuẹ Ebaibol na nya lele “orọwọ, iroro, hayo uyero” mai? N’otọ ze, egba eriariẹ Ebaibol gbe efefafa buobu a ta nnọ orọnikọ ere a ru hu rekọ Ọghẹnẹ ọ kpọ rae.
Oriruo jọ họ eme nọ a kere fihọ ẹme-otofa ọ Jọn 1:1 evaọ A New Version of the Four Gospels, nọ John Lingard o kporo evaọ 1836 evaọ odẹ-ovao na “Ohwo Kathọlik.” O ta nọ: “Ahwo sa-sa a rẹ ta nọ ikereakere ẹri na e rọwo kugbe iroro sa-sa rai: o rọ ere keme, evaọ uzẹme, orọnikọ Ikereakere na e kẹ rai ovuhumuo na ha, rekọ ae ọvo a fi otofa obọ rai ba Ikereakere na.”
Dede nọ uzẹme ọ ta na, eme họ ẹjiroro okere-obe na? Ọ rọ eme riẹ na rọ tha otofa nọ ọ kẹ owọ oyena uke, onọ ọ fa nọ: “Evaọ emuhọ ‘ẹme na’ ọ jariẹ; yọ ‘ẹme na’ ọ jọ kugbe Ọghẹnẹ; yọ ‘ẹme na’ họ Ọghẹnẹ,” efafa nọ e nwane rọwo kugbe uwuhrẹ Esanerọvo.
Eme ọ wọ okere-obe na fa Jọn 1:1 rọ tha uwuhrẹ Esanerọvo na uke? Kọ “Ikereakere na e kẹ [riẹ] ovuhumuo” nọ o ro ru ere? Vievie, keme a rẹ jọ uvumọ oria evaọ Ebaibol na ruẹ uwuhrẹ Esanerọvo ho. Muẹrohọ oware nọ The New Encyclopædia Britannica o ta kpahe ẹme ọnana: “Makọ ubiẹme na Esanerọvo hayo uwuhrẹ ovẹvẹ riẹ o roma via evaọ Ọvọ Ọkpokpọ na ha.” Fibae, E. Washburn Hopkins, profẹsọ Yunivasiti ọ Yale, o muẹrohọ nnọ: “Jesu avọ Pọl a riẹ kpahe uwuhrẹ esanerọvo na ha; . . . a ta uvumọ ẹme kpahe iẹe he.”
Kọ didi ẹme ma rẹ ta kpahe enọ e rọwo kugbe otofa Esanerọvo rọkẹ Jọn 1:1 hayo owọ Ebaibol ofa jọ? Ma tẹ rọ eme ọ Mr. Lingard gu ai ẹdhọ koyehọ, “orọnikọ Ikereakere na e kẹ rai ovuhumuo na ha, rekọ ae ọvo a fi otofa obọ rai ba Ikereakere na.”
Avọ evawere, ma wo Ẹme obọ Ọghẹnẹ nọ o rẹ kp’omai evaọ onana. Pita ukọ na ọ ta nọ: “Orọsosuọ vievie wha rẹ riẹ-otọ onana, nnọ eruẹaruẹ Ikerakere ẹri na, ovuovo o rọ oware nọ ohwo ọvo o re mu otọ riẹ fa ha. Keme aroọruẹ ọvo nọ o no obọ ohwo ze ọ te jọ họ, rekọ ahwo nọ Ẹzi Ẹri o mu ae a ta ẹme nọ o no obọ Ọghẹnẹ ze.”—2 Pita 1:20, 21.