Ruẹrẹ Oma Kpahe Kẹ Odu-ikpe Nọ Ọ R’oja!

ESUO Odu-Ikpe Kristi o te wha eghale buobu se uviuwou ohwo-akpọ. Evaọ otọ ọkpọvio oyoyou Jesu, a te kpare ohwo-akpọ no uyero oja riẹ na kpohọ ẹgbagba oruaro. Roro kpahe oware nọ oyena u ti dhesẹ kẹ owhẹ. Omokpokpọ! Dai roro ei, whọ rẹ kparoma k’ohiohiẹ k’ohiohiẹ avọ oma nọ o ga owhẹ vi odẹ n’ukpo. Ima buobu ezae, eyae, gbe emọ a bi rri kpohọ ẹrria evaọ etoke evawere ọyena. A bi rẹro riẹ, a be lẹ kẹe. Ewuhrẹ Ebaibol rai ọ kẹ rae imuẹro no inọ eghale nana e sae jọ erai nọ a rẹ reawere rai.

Rekọ taure o te ti muọ Esuo Odu-Ikpe riẹ họ, Jesu Kristi o ti si enọ i mukpahe esuo riẹ kpobi no otọakpọ na. O ti ru onana evaọ ẹmo nọ a jọ Ebaibol na se Amagẹdọn. (Eviavia 16:16) Uvi Ileleikristi evaọ otọakpọ a te họre evaọ ẹmo ọyena ha. Oyena yọ ẹmo Ọghẹnẹ. Yọ o te jọ udogbe jọ ọvo ho. Ebaibol na ọ ta nọ o te nyate ọnyaba otọakpọ na. A ti kpe ewegrẹ esuo Kristi no. Ọvuọvo rai ọ te dhẹ vabọ họ!—Jerimaya 25:33.

Kẹsena Jesu ọ vẹ te rẹriẹ ovao ku Setan Ẹdhọ na gbe idhivẹri riẹ. Dai roro iei, wọhọ epanọ ọnọ o kere obe Eviavia ọ rue riẹ: “Kẹsena mẹ [tẹ] ruẹ ukọ-odhiwu [Jesu Kristi] nọ o bi mu no obọ odhiwu tha, yọ usiavẹ ẹri-igbolẹvẹe gbe ogbregba ulogbo jọ [o] riẹ e obọ. O te mu odudu na, oriọvọ anwae na nọ a rese Setan hayo Ukumuomu, a tẹ gba e ifi udheukpe usoi akuakpe.” (Eviavia 20:1, 2) Kẹsena, a ve ti kpe Setan avọ idhivẹri riẹ no bẹdẹ bẹdẹ.—Matiu 25:41.

“Otu obuobu jọ, nọ ohwo ọvo ọ sai kele he,” a te zọ vrẹ Amagẹdọn. (Eviavia 7:9) Kristi ọ te kpọ enana ziezi re a wo erere vọvọ no “eyeri ame uzuazọ” ze, wọhọ epanọ othuru-igodẹ ọ rẹ kpọ igodẹ riẹ bru ame usiwo uzuazọ na. (Eviavia 7:17) Nọ Setan gbe idhivẹri riẹ a gbẹ sae whaha ẹnyaharo abọ-ẹzi rai hi na, a ti fiobọhọ kẹ enana nọ e zọ vrẹ Amagẹdọn na kparobọ vrẹ iroro emuemu rai bẹsenọ a re te ẹgbagba!

Evaọ otọ esuo oyoyou Kristi, iyero uzuazọ i ve ti woma viere. Jihova Ọghẹnẹ, ẹkwoma Jesu Kristi, o ti si eware nọ e be wha edada gbe uweri no. O “ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.” (Eviavia 21:4) Aizaya ọruẹaro na ọ tẹ gba ẹme na ekru ta nọ: “Kẹsena aro enọ itu i veti rovie, ezọ enọ i di i veti rovie; kẹsena ọmo o veti duola wọhọ uyo, ẹrọo ọnọ o dienu ọ rẹte so ole oghọghọ.” (Aizaya 35:5, 6) Yọ iwhuowhu na, “te ekakao te ilogbo,” a ve ti zihe ziọ uzuazọ avọ ẹruore inọ a gbe ti whu ofa ha!—Eviavia 20:12.

Makọ enẹna, a bi koko “otu obuobu” nọ ọ te zọ vrẹ Amagẹdọn na họ. A be ruẹrẹ oma kpahe kẹ Esuo Odu-Ikpe Kristi na. Dede nọ a riẹ okenọ esuo na o ti muhọ họ, a wo evaifihọ nnọ evaọ ẹruoke Ọghẹnẹ, o te nyaze. Whọ rẹ sae jọ usu rai, rekọ whọ rẹ ruẹrẹ oma kpahe re—orọnikọ ẹkwoma eware ra nọ whọ rẹ zẹ no re whọ kua kpohọ oria jọ họ, rekọ ẹkwoma eriariẹ egbagba Jihova Ọghẹnẹ gbe ẹjiroro riẹ nọ who re wo ẹkwoma uwuhrẹ Ebaibol. O te were Isẹri Jihova re a dhesẹ kẹ owhẹ epanọ uwuhrẹ Ebaibol o sae rọ kẹ owhẹ gbe uviuwou ra erere ababọ ugho hayo owha-iruo jọ nọ o rẹ rehọ mi owhẹ. O te were enọ i bi kporo emagazini nana eva re a kẹ owhẹ evuẹ efa.

[Box on page 7]

Ikpe Odu na—Erọ Igheghe Manikọ Erọ Oka?

Nọ a kere abọ buobu obe Ebaibol orọ Eviavia na evaọ eka na, onọ jọ o roma via. Kọ ẹvẹ kpahe Esuo Odu-Ikpe Kristi nọ a jọ Eviavia fodẹ na? Kọ o rọ etoke gheghe manikọ ọrọ oka?

Imuẹro buobu e riẹ inọ etoke ikpe odu gheghe a be fodẹ. Roro onana: Pọl ukọ na o se Esuo Odu-Ikpe Kristi na, etoke nọ a ti ro gu ahwo-akpọ ẹdhọ na ẹdẹ. (Iruẹru 17:31; Eviavia 20:4) Pita ukọ na o kere nnọ ẹdẹ ọvo (euwa 24) rọ kẹ Jihova yọ ikpe odu. (2 Pita 3:8) Onana u dhesẹ nnọ “ẹdẹ” ẹdhoguo nana yọ uzedhe ikpe odu. Fibae, eva Eviavia 20:3, 5-7, evaọ ikere ọsosuọ na, ma se isiane inọ, “odu ikpe na,” orọnikọ “odu ikpe” he. Onana u dhesẹ uzedhe unuoke nọ a fihọ.