Uzou Avọ 133
Jesu O ru Eware nọ Ọghẹnẹ Ọ Gwọlọ Mi Ei Kpobi Gba
OKENỌ Ovie-Ọgbaẹmo na Jesu Kristi o te si Setan gbe akpọ oyoma riẹ no, ẹvẹ onana o te wha oghọghọ ze te! Kẹsiẹe Esuo Odu Ikpe udhedhẹ Jesu u ve ti muhọ!
Evaọ otọ ekpakpọ Jesu gbe ibe ivie riẹ, ahwo nọ a zọ no Amagẹdọn ze a re ti ru otọakpọ na fo no erara ẹmo okiẹrẹe na. Ẹsejọhọ, ahwo nọ a zọ evaọ otọakpọ na a ve je ti yẹ emọ evaọ ubroke jọ, a ve ti je w’abọ evaọ iruo awere ọrọ ẹruẹrẹ otọakpọ na fihọ ọgbọ owoma.
Jesu ọ vẹ te kpare ima ahwo buobu ze re a te reawere Aparadase owoma ọnana. O ti ru onana evaọ orugba eyaa obọ riẹ: “Oke o be tha nọ enọ e rọ uki ekareghẹhọ kpobi . . . a te rọ nya via.”—NW.
Usu ahwo nọ Jesu ọ te kpare ze họ orumuomu okiẹdẹ na nọ o whu fihọ abotọ riẹ evaọ ure oja na. Kareghẹhọ nnọ Jesu ọ yeyaa kẹe nọ: “Uzẹme mẹ ta kẹ owhẹ nẹnẹ na, Who re ti lele omẹ jọ evaọ Aparadase.” (NW ) Ijo, orọnikọ a te rehọ ọzae ọyena kpohọ obọ odhiwu re o su wọhọ ovie kugbe Jesu hu, hayo kọ Jesu ọ te wariẹ zihe ruọ ohwo re o lele iei rria Aparadase otọakpọ họ. Ukpoye, Jesu ọ te jọ kugbe orumuomu okiẹdẹ na evaọ iroro na inọ Ọ te kpare iẹe ziọ uzuazọ evaọ Aparadase, ọ vẹ jẹ ruẹ nọ ẹgwọlọ riẹ kpobi, te erọ iwo gbe abọ-ẹzi, i te rie obọ, wọhọ epanọ ifoto nọ o rọ ẹwẹ-obe obaro na u dhesẹ na.
Dai roro iei! Evaọ otọ ẹruọsa oyoyou Jesu, uviuwou ahwo kpobi—enọ e zọ no Amagẹdọn, emọ rai, gbe ima idu nọ a te kpare no uwhu ze nọ i yoẹme kẹe—a vẹ te rro kpohọ ẹgbagba ohwo-akpọ. Jihova, ẹkwoma Ọmọ ovie riẹ, Jesu Kristi, ọ vẹ te rria evaọ ẹzi kugbe ahwo-akpọ. Urru nọ Jọn o yo no odhiwu ze o ta nọ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.” Ohwo ọvo evaọ otọakpọ ọ gbẹ te ruẹ uye je whu hu.
Evaọ ekuhọ Esuo Odu Ikpe Jesu na, eyero na ọ vẹ te nwane jọ epanọ Ọghẹnẹ ọ kake jiroro riẹ nọ ọ ta kẹ ọzae avọ aye ọsosuọ na, Adamu avọ Ivi, re a yẹ re a vọ otọakpọ na. Ẹhẹ, otọakpọ na o vẹ te vọ avọ uyẹ okiẹrẹe ahwo-akpọ egbagba. Onana o te jọ erei keme a ti fi erere idhe ẹtanigbo Jesu họ iruo kẹ ahwo kpobi. Uwhu fiki uzioraha Adamu o gbẹ te jọ họ!
Kọ enẹ Jesu o ti ro ru eware nọ Jihova ọ gwọlọ mi ei kpobi gba. Fikiere, evaọ ekuhọ odu ikpe na, ọ vẹ te rehọ Uvie na gbe uviuwou ahwo-akpọ nọ e gba no họ obọ Ọsẹ riẹ. Ọghẹnẹ o ve ti siobọno Setan avọ idhivẹri riẹ no ọgọdọ-odidi nọ o kare iruo na ze. Rọ kẹ ẹjiroro vẹ?
Whaọ, evaọ ekuhọ odu ikpe na, ahwo buobu nọ a be rria Aparadase na a te jọ enọ a kpare ze nọ a te dawo ẹrọwọ rai ẹdọvo ho. Taure a te ti whu, a riẹ kpahe eyaa Ọghẹnẹ hẹ, fikiere a wo uvẹ nọ a ro fi ẹrọwọ họ ai hi. Kẹsena, nọ a tẹ kpare ai ze je wuhrẹ ai izẹme Ebaibol na no, o rẹ lọlọhọ kẹ ai evaọ Aparadase re a gọ Ọghẹnẹ ababọ ọkparesuọ. Rekọ a tẹ kẹ Setan uvẹ re ọ daoma whaha ae Ọghẹnẹ ọgọ, kọ a sai ti kru ẹgbakiete rai evaọ otọ ẹdawọ? Re a ku avro nana họ, a ve ti siobọno Setan.
Eviavia nọ a rọ kẹ Jọn u dhesẹ nọ okenọ Esuo Odu Ikpe Jesu o te kuhọ no, Setan ọ te rẹriẹ ahwo nọ a riẹ unu rai hi no egagọ Ọghẹnẹ. Rekọ okenọ ẹdawọ urere na o te kuhọ no, Setan, idhivẹri riẹ, gbe ahwo nọ ọ sai suthọ kpobi a vẹ te raha ai no bẹdẹ bẹdẹ. Evaọ abọdekọ riẹ, ahwo nọ a zọ nọ a dawo vọvọ no a vẹ te rria re a reawere eghale Ọsẹ obọ odhiwu rai bẹdẹ bẹdẹ.
U re vevẹ, Jesu o w’abọ ologbo no yọ o gbe ti w’abọ ologbo evaọ erugba ẹjiroro ọruaro Ọghẹnẹ. Dai roro eghale nọ ma te reawere rai kpobi fiki eware nọ o rugba wọhọ Ovie odhiwu ologbo Ọghẹnẹ. Ghele na, eware nọ o ru kpobi okenọ ọ jọ ohwo e rẹ thọrọ omai ẹro ho.
Jesu ọ rehọ unevaze ziọ otọakpọ re o wuhrẹ omai kpahe Ọsẹ riẹ. Rro vi onana ọ kẹ oriruo ekwakwa eghaghae Ọghẹnẹ. U re duobọ te idu mai nọ ma te roro kpahe aruọwha ologbo gbe ẹgba-ọzae riẹ, areghẹ riẹ nọ o wo ibe he, obọdẹ ẹgba riẹ wọhọ owuhrẹ, esuo aruọwha riẹ, gbe ẹwo gbe ọdawẹ riẹ. Nọ ma te roro kpahe oghẹrẹ nọ uye o bẹ riẹ te re ọ ruẹse rehọ ẹtanigbo na ze, onọ u rovie edhere uzuazọ k’omai, ababọ avro ma re yere iei!
Evaọ uzẹme, didi ohwo ma ruẹ no evaọ ewuhrẹ uzuazọ Jesu! Oruaro riẹ u re vevẹ je gbunu. Oma o rẹ wọ omai re ma whowho eme ọba Rom na Pọntiọs Pailet: “Rri! Ọzae na!” Ẹhẹ, ghinọ, “Ọzae na,” ọzae nọ ọ mae rro nọ ọ rria no!
Ẹkwoma ọruẹrẹfihotọ idhe ẹtanigbo na nọ ma rẹ jẹrehọ, a jẹ sai si igbo uzioraha gbe uwhu nọ ma reuku riẹ mi Adamu n’omai oma, Jesu ọ vẹ sae jọ “Ọsẹ Ebẹdẹ bẹdẹ” mai. Ahwo nọ a ti wo uzuazọ ebẹdẹ bẹdẹ kpobi a rẹ rehọ eriariẹ, orọnikọ ọrọ Ọghẹnẹ ọvo ho, rekọ te ọrọ Ọmọ riẹ, Jesu Kristi. Ajọ ese gbe ewuhrẹ ra ọrọ obe onana u fiobọhọ k’owhẹ wo eriariẹ itieye nọ e rẹ kẹ uzuazọ na! 1 Jọn 2:17; 1:7; Jọn 5:28, 29; 3:16; 17:3; 19:5; Luk 23:43; Emuhọ 1:28; 1 Ahwo Kọrint 15:24-28; Eviavia 20:1-3, 6-10; 21:3, 4; Aizaya 9:6.
▪ Eme ọ te jọ oghale evawere ahwo nọ a te zọ no Amagẹdọn gbe emọ rai?
▪ Amono a te reawere Aparadase kugbe enọ e te zọ no Amagẹdọn gbe emọ rai, kọ ẹvẹ Jesu ọ te rọ jọ kugbe ai?
▪ Ẹvẹ eyero na ọ te jọ evaọ ekuhọ odu ikpe na, kọ eme Jesu o ti ru evaọ okioye?
▪ Fikieme a ti ro si Setan no ọgọdọ-odidi na ze, kọ eme ọ te via kẹe gbe ahwo nọ a lele i rie uwhremu na?
▪ Ẹvẹ Jesu ọ sae rọ jọ “Ọsẹ Ebẹdẹ bẹdẹ” mai?