“Siwi Oma Ra Gbe Ahwo [Nọ] A Be Kezọ Ẹme Ra”
“Sẹro oma ra gbe uwuhrẹ ra. . . . Fiki ere oruo who re ro siwi oma ra gbe ahwo [nọ] a be kezọ ẹme ra.”—1 TIMOTI 4:16.
1, 2. Eme ọ be wọ Ileleikristi uzẹme re a nyaharo evaọ iruo uzuazọ-usiwo rai?
EVAỌ iwhre imivu jọ evaọ obọ ẹkpẹlobọ-ọre Thailand, imava-orọo jọ nọ a rọ Isẹri Jihova a dawo ona ẹvẹrẹ ọkpokpọ nọ a wuhrẹ rọ t’ẹme kẹ ahwo uyẹ jọ nọ a be rria ugbehru jọ. Re a sae ghale emamọ usi Uvie Ọghẹnẹ na kẹ ahwo iwhre na, imava-orọo na a te wuhrẹ ẹvẹrẹ ọrọ Lahu.
2 Ọzae uwou-orọo na ọ ta nọ: “O re bẹbẹ re a dhesẹ oghọghọ gbe evevọwẹ nọ ma wo, bi ruiruo evaọ udevie ahwo isiuru enana. Ma ghinẹ ruẹ nọ ma w’abọ evaọ orugba ọ Eviavia 14:6, 7, bi whowho usiuwoma ‘rọkẹ erẹwho gbe uyẹ gbe ẹvẹrẹ kpobi.’ Ẹkwotọ ekakao jọ e riẹ nọ emamọ usi na o re nyate he, ababọ avro ọnana yọ ọvo rai jọ. Ma wo iwuhrẹ Ebaibol buobu nọ ma be sai wuhrẹ re he.” U re vevẹ, imava-orọo nana a rẹro nọ a re siwi orọnikọ oma rai ọvo ho rekọ kugbe ahwo nọ a be kezọ ẹme rai. Wọhọ Ileleikristi, kọ mai kpobi ma gbe bi rẹro re ma ru epavo na?
“Sẹro Oma Ra”
3. Re ma sai siwi amọfa, eme ma rẹ kaki ru hrọ?
3 Pọl ukọ na ọ hrẹ Timoti nọ, “Sẹro oma ra gbe uwuhrẹ ra,” yọ onana u w’iruo kẹ Ileleikristi kpobi. (1 Timoti 4:16) Evaọ uzẹme, re ma fiobọhọ kẹ amọfa wo usiwo, ma rẹ kake sẹro oma mai hrọ. Ẹvẹ ma sai ro ru onana? Oware jọ họ, ma rẹ jaja aro vi kẹ etoke nọ ma be rria na. Jesu ọ kẹ oka abọ-buobu re ilele riẹ a riẹ okenọ ‘ekuhọ eyero eware na’ ọ te jọ. Ghele na, Jesu ọ tẹ jẹ ta nọ ma te riẹ gbagba ha okenọ ekuhọ na ọ te rọ nyaze. (Matiu 24:3, 36) Kọ ẹvẹ ma re ru kpahe uzẹme oyena?
4. (a) Oghẹrẹ uruemu vẹ ma re wo kpahọ oke nọ u kiọkọ kẹ eyero ọnana? (b) Oghẹrẹ uruemu vẹ ma rẹ whaha?
4 Omomọvo mai ọ sae nọ inọ, ‘Kọ me bi fi oke kpobi nọ u kiọkọ kẹ eyero onana họ iruo re me siwi oma mẹ gbe ahwo nọ e kezọ kẹ ẹme mẹ? Hayo kọ me bi roro nọ, “Nọ ma nwane riẹ okenọ ekuhọ na ọ te nyaze he na, mẹ te jọ oyena jọ ọdawẹ mẹ hẹ”?’ Uruemu uwhremu nana o rẹ wha enwoma ze. O nwane wọsuọ uduotahawọ Jesu na: “Wha hẹrẹ oma re; keme okenọ wha roro ho Ọmọ ohwo ọ rẹ tha.” (Matiu 24:44) Evaọ uzẹme oke nana yọ oke nọ ma re ro ku ọwhọ mai fiẹ evaọ iruo Jihova hayo fievahọ akpọ na kẹ ufuoma hayo evevọwẹ hẹ.—Luk 21:34- 36.
5. Oghẹrẹ iriruo vẹ isisẹri Jihova taure oke-Ileleikristi u te ti te a fih’otọ?
5 Edhere ọfa jọ nọ ma sai ro dhesẹ nọ ma be sẹro oma mai họ ẹkwoma akothiwo avọ ẹrọwọ wọhọ Ileleikristi. Idibo Ọghẹnẹ evaọ oke anwae a je thihakọ, makọ a rẹro esiwo obọnana hayo ọrọ obaro. Nọ ọ fodẹ iriruo isẹri nọ e jọ taure oke-Ileleikristi u te ti te wọhọ Ebẹle, Enọk, Noa, Abraham, gbe Sera no, , Pọl o te muẹrohọ nọ: “O nọ a ya eya riẹ [na] u te rai obọ họ, rekọ a jọ eva ugbo kpararo ruẹe a je dedie ei, a tẹ jẹ riẹ nọ ae oma rai na erara, gbe enya-ugbo eva akpọ na.” A roma kẹ uvumọ isiuru hu re a wo uzuazọ olọlọhọ, hayo kọ a kie kẹ otunyẹ ọfariẹ nọ e wariẹ e rai họ họ, rekọ a rọ ọwhọ rri kpohọ obaro kẹ ‘orugba eyaa na.’—Ahwo Hibru 11:13; 12:1.
6. Ẹvẹ eriwo Ileleikristi ikpe-udhusoi ọsosuọ na kpahe usiwo u ro kpomahọ edhere ẹrria rai?
6 Ileleikristi ikpe-udhusoi ọsosuọ a ruẹ oma rai re wọhọ “erara” evaọ akpọ nana. (1 Pita 2:11) Nọ a tube siwi ai no ọraha Jerusalẹm evaọ 70 C.E. no, Ileleikristi uzẹme a siọ usiuwoma ota ba ha hayo a kie zihe ruọ edhere uzuazọ akpọ na ha. A riẹ nọ usiwo ulogbo o be hẹrẹ enọ i kru ẹrọwọ rai. Evaọ uzẹme, lehie te 98 C.E., Jọn ukọ na o kere nọ: “Akpọ na avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.”—1 Jọn 2:17, 28.
7. Ẹvẹ Isẹri Jihova a ro dhesẹ akothiwo no evaọ oke onana?
7 Evaọ oke onana Isẹri Jihova a thihakọ no re evaọ iruo Ileleikristi na, dede nọ a rẹ ruẹ ukpokpoma ọgaga. Kọ akothiwo rai ofofe? Vievie, keme Jesu ọ kẹ omai imuẹro nọ: “Ọnọ o kiakọ te urere ọye a re ti siwẹ,” makọ oyena u dhesẹ urere eyero anwae na hayo orọ uzuazọ ohwo enẹna. Evaọ ẹkparomatha na, Jihova ọ te kareghẹhọ jẹ hwa-osa kẹ idibo ẹrọwọ riẹ kpobi enọ i whu no.—Matiu 24:13; Ahwo Hibru 6:10.
8. Ẹvẹ ma sai ro dhesẹ nọ ma wo ovuhumuo kẹ akothiwo Ileleikristi oke n’ukpemu na?
8 Ofariẹ, ma be wereva nọ Ileleikristi ẹrọwọ oke n’ukpemu na a wo orọnikọ ọdawẹ usiwo rai ọvo ho. Evaọ uzẹme mai enọ i wuhrẹ kpahe Uvie Ọghẹnẹ ẹkwoma omodawọ rai na ma vọ avọ uyere inọ a thihakọ evaọ erugba uwou nọ Jesu o vi: “Fikiere wha wuhrẹ ahwo erẹwho kpobi, . . . wha wuhrẹ ai, re a ru eware kpobi nọ mẹ vuẹ owhai.” (Matiu 28:19, 20) Nọ uvẹ na u gbe rovie kẹ omai na, ma sai dhesẹ uyere mai ẹkwoma ẹta usiuwoma na kẹ ahwo nọ i re ti yo emamọ usi na ha. Ghele na, usiuwoma ota yọ owojẹ ọsosuọ kẹ eruo ilele.
‘Sẹro Uwuhrẹ Ra’
9. Ẹvẹ uruemu irẹro o sai ro fiobọhọ kẹ omai mu iwuhrẹ Ebaibol họ?
9 Iruo mai i kugbe orọnikọ usiuwoma ota ọvo ho rekọ te ewuhrẹ re. Jesu o vi omai re ma wuhrẹ ahwo re a koko eware kpobi nọ o juzi rai na. Uzẹme, evaọ ekwotọ jọ, umutho ahwo ọvo a gwọlọ wuhrẹ kpahe Jihova. Rekọ ewo eriwo ọthọthọ kpahe ẹkwotọ na ọ sae whaha omodawọ mai re ma mu iwuhrẹ Ebaibol họ. Yvette, ọkobaro jọ evaọ ẹkwotọ nọ ahwo jọ a se ẹkwotọ ọyaya, o muẹrohọ erara nọ i weze kpohọ oria na, enọ i wo eriwo ọthọthọ otiọye na ha, o te mu obe iwuhrẹ Ebaibol họ. Nọ ọ kpọ iroro riẹ vi no, Yvette o te je duku ahwo nọ e gwọlọ uwuhrẹ Ebaibol.
10. Eme họ ugogo ẹkẹ-iruo mai wọhọ iwuhrẹ Ebaibol?
10 Ileleikristi jọ a sai sioma-h’emu re a wuhrẹ Ebaibol na kugbe enọ i wo isiuru fikinọ a roro nọ a sai wuhrẹ amọfa Ebaibol na ha. Uzẹme, ẹhẹriẹ ọ rọ umuo ẹgba omomọvo mai. Rekọ o gwọlọ ona uwuhrẹ ulogbo re ma tẹ te kparobọ wọhọ iwuhrẹ Ẹme Ọghẹnẹ hẹ. Ovuẹ ọfuafo Ebaibol na u wo ogaga, yọ Jesu ọ ta nọ enọ e wọhọ igodẹ a re vuhu urru Othuru-igodẹ uzẹme na okenọ a te yoi. Fikiere, iruo mai họ re ma vuẹ ovuẹ Othuru-Igodẹ Owoma na, Jesu, vevẹ wọhọ epanọ ma sae vuẹe.—Jọn 10:4, 14.
11. Ẹvẹ whọ sai ro fiobọhọ kẹ ọmọ-uwuhrẹ Ebaibol evaọ edhere nọ ọ mai wo iruo?
11 Ẹvẹ whọ sae rọ vuẹ ovuẹ Jesu na evaọ edhere nọ ọ mai wo iruo? Evaọ emuhọ, wuhrẹ oware nọ Ebaibol na ọ ta kpahe uzoẹme nọ a bi roro kpahe na. Whọ rẹ riẹ uzoẹme jọ k’oma ra taure whọ tẹ te rehọ iẹe wuhrẹ amọfa. Ere re, daoma jọ kpatiẹ jẹ jọ whẹtiẹwhẹtiẹ evaọ etoke uwuhrẹ na. Emọ-uwuhrẹ, kugbe emaha, a re wuhrẹ ziezi okenọ iroro rai i te dhẹmu yọ owuhrẹ na o te je dhesẹ adhẹẹ gbe ẹwo rọ kẹ ae.—Itẹ 16:21.
12. Ẹvẹ whọ sai ro wo imuẹro sọ ọmọ-uwuhrẹ na o wo otoriẹ oware nọ who bi wuhrẹ iẹe na?
12 Wọhọ owuhrẹ, orọnikọ whọ rẹ gwọlọ kẹ ọmọ-uwuhrẹ na oware imuẹro gheghe re ọ wariẹ ae ababọ otoriẹ hẹ. Fiobọhọ kẹe re o wo otoriẹ oware nọ o bi wuhrẹ na. Obe-oriẹ ọmọ-uwuhrẹ na, eware nọ ọ ruẹ no evaọ uzuazọ, gbe epanọ ọ riẹ Ebaibol na te i re kpomahọ otoriẹ riẹ kpahe ẹme nọ whọ be ta na. Fikiere, whọ rẹ sae nọ oma ra nọ, ‘Kọ o wo otoriẹ ikereakere nọ a fodẹ evaọ obe uwuhrẹ na?’ Whọ rẹ sae riẹ iroro riẹ ẹkwoma enọ nọ e gwọlọ vrẹ uyo E hayo ijo rekọ nọ e gwọlọ oruvẹ. (Luk 9:18-20) Evaọ abọdekọ riẹ, emọ-uwuhrẹ jọ a re sioma-h’emu re a nọ owuhrẹ onọ. Fikiere, a sae nya vrẹ ọvo ababọ otoriẹ oware nọ a bi wuhrẹ ae na. Tuduhọ ọmọ-uwuhrẹ na awọ re ọ nọ enọ jẹ ta kẹ owhẹ okenọ o wo otoriẹ ugogo-ẹme jọ ziezi hi.—Mak 4:10; 9:32, 33.
13. Ẹvẹ whọ sai ro fiobọhọ kẹ ọmọ-uwuhrẹ na re o zihe ro owuhrẹ?
13 Obọdẹ ẹjiroro jọ nọ a re ro wuhrẹ Ebaibol họ re a fiobọhọ kẹ ọmọ-uwuhrẹ na zihe ro owuhrẹ. (Ahwo Galesha 6:6) Fikiere, wọhọ ọkiẹkpemu uwuhrẹ ra, whọ sae nọe re o ru ugogo-ẹme jọ vẹ k’owhẹ avọ eme ivevẹ, wọhọ ẹsenọ ọ be tae kẹ ohwo jọ nọ o bi yoi evaọ oke ọsosuọ. Uwhremu na, okenọ o te te kẹ ekpohọ usiuwoma no, whọ sai zizie ei re o kuomagbe owhẹ evaọ usiuwoma ota na. O sae jọ lọlọhọ kẹe nọ o te bi lele owhẹ ruiruo, yọ eware nọ ọ te ruẹ i ti fiobọhọ kẹe evaọ evaifihọ rri bọwo okenọ ọ rẹ ruẹrẹ oma họ re ọ nya kpohọ odibọgba na k’omobọ riẹ.
Fiobọhọ kẹ Ọmọ-Uwuhrẹ na Zihe Ro Ogbẹnyusu Jihova
14. Eme họ ute ọsosuọ ra wọhọ owuhrẹ, kọ eme ọ rẹ zọhọ kugbe obokparọ re who woi?
14 Ute ọsosuọ owuhrẹ Oleleikristi kpobi họ re o fiobọhọ kẹ ọmọ-uwuhrẹ na wo usu kugbe Jihova. Whọ sai ru onana orọnikọ ẹkwoma eme ra ọvo ho rekọ ẹkwoma oriruo ra. Ewuhrẹ avọ oriruo o re kpomahọ idu emọ-uwuhrẹ na gaga. Uruemu o sai ghine do vi egede, maero okenọ a tẹ be kọ okwakwa ẹfuọ je bi fi ọwhọ họ ọmọ-uwuhrẹ na oma. Ọ te ruẹ nọ eme gbe owojẹ ra i no usu kugbe Jihova ze, oma o te wọe viere re ọ bọ usu utioye na k’oma riẹ.
15. (a) Fikieme o jẹ r’oja nọ ọmọ-uwuhrẹ na o re wo iroro egbagba kẹ ẹgọ Jihova? (b) Ẹvẹ whọ sai ro fiobọhọ kẹ ọmọ-uwuhrẹ na re o gbe ru ẹnyaharo abọ-ẹzi?
15 Whọ gwọlọ re ọmọ-uwuhrẹ na ọ gọ Jihova orọnikọ fikinọ ọ gwọlọ zọ vrẹ Amagẹdọn ọvo ho rekọ fikinọ o you rie. Ẹkwoma obufihọ kẹe re ọ bọ iroro oruọzewọ itieye, yọ whọ be bọ avọ ekwakwa nọ e rẹ to ho nọ e te zọ vrẹ ẹdawọ ẹrọwọ riẹ. (1 Ahwo Kọrint 3:10-15) Iroro ethọthọ, wọhọ isiuru nọ e vrẹta re ọ raro kele owhẹ hayo ohwo-akpọ ọfa jọ, e te kẹe ẹgba nọ ọ rẹ rọ whaha ọwhẹruọ akpọ na hayo aruọwha re o ru oware nọ u kiete he. Kareghẹhọ, whọ te jọ owuhrẹ riẹ bẹdẹ bẹdẹ hẹ. Nọ uvẹ na u rovie k’owhẹ na, whọ sae tuduhọ iẹe awọ re o sikẹle Jihova viere ẹkwoma isase Ẹme Ọghẹnẹ kẹdẹ kẹdẹ gbe eroro kpahiẹe. Evaọ edhere ọnana ọ te ruabọhọ ẹrehọ “oghẹrẹ eme oma ojaja” no Ebaibol na ze gbe ebe nọ a kporo no Ebaibol ze na oke krẹkri nọ uwuhrẹ ra kugbei u te kuhọ no.—2 Timoti 1:13.
16. Ẹvẹ whọ sai ro wuhrẹ ọmọ-uwuhrẹ na re ọ lẹ olẹ nọ u no udu ze?
16 Whọ sae je fiobọhọ kẹ ọmọ-uwuhrẹ na sikẹle Jihova ẹkwoma olẹ nọ o no udu ze nọ who re wuhrẹ iẹe. Ẹvẹ whọ sai ro ru onana? Otiẹsejọ whọ sai si iroro riẹ kpohọ olẹ oriruo Jesu na, gbe elẹ efuafo efa buobu nọ a kere fihọ Ebaibol na, wọhọ enọ e rọ ilezi na. (Ilezi 17, 86, 143; Matiu 6:9, 10) Fibae, okenọ ọmọ-uwuhrẹ ra o te yo olẹ nọ who re ro mu uwuhrẹ họ je kuhọ, ọ vẹ te ruẹ oghẹrẹ nọ oma o r’owhẹ kẹ Jihova. Fikiere, jọ elẹ ra i dhesẹ oruọzewọ gbe evevẹ, je dhesẹ owowa abọ-ẹzi gbe ọwhọ-eva.
Iruo Iru re Who Siwi Emọ Ra
17. Ẹvẹ esẹ gbe ini a sai ro fiobọhọ kẹ emọ rai re a daji edhere usiwo na?
17 Ababọ avro, ahwo uviuwou mai a rrọ usu ahwo nọ ma gwọlọ siwi na. Unu buobu ọ emọ esẹ gbe ini Ileleikristi a wo eva efuafo je “dikihẹ ga eva orọwọ” na. Ghele na, efa jọ a ri ru uzẹme na kodo tere he evaọ idu rai. (1 Pita 5:9; Ahwo Ẹfẹsọs 3:17; Ahwo Kọlọsi 2:7) Emoha enana buobu a rẹ nya no edhere Ileleikristi na no okenọ a te bikẹle hayo nọ a te te ekpako no. Otẹrọnọ whẹ yọ ọyewọ, eme whọ rẹ sai ru re who ru rọ sae whaha oware utioye na? Orọ ọsosuọ, whọ rẹ sai ru re whọ bọ eyero uviuwou nọ o rọ kpatiẹ. Emamọ uzuazọ uviuwou u re fi otọhotọ họ kẹ emamọ eriwo udu-esuo, ovuhumuo kẹ emamọ uruemu, gbe usu evawere kugbe amọfa. (Ahwo Hibru 12:9) Fikiere, omakugbe uviuwou nọ o rọ kpekpekpe o sae jọ otọhotọ nọ usu ọmọ kugbe Jihova o sae jọ rro. (Olezi 22:10) Iviuwou nọ i dikihẹ gaga a re ru eware kugbe wọhọ ugboma ovo—o tẹ make rọnọ onana o rẹ rehọ oke nọ esẹ gbe ini a hai ro ruiruo k’omarai. Evaọ edhere ọnana whọ rẹ sai ro wuhrẹ emọ ra ẹkwoma oriruo re a jiroro nọ i kiete evaọ uzuazọ. Esẹ gbe ini, oware nọ emọ ra a mae gwọlọ mi owhe họ, orọnikọ ekwakwa efe he, rekọ owhẹ—oke, omadawọ, gbe uyoyou ra. Kọ whọ be kẹ emọ ra eware enana?
18. Oghẹrẹ ọ enọ vẹ u fo nọ esẹ gbe ini a re fiobọhọ kẹ emọ rai k’uyo rai hrọ?
18 Esẹ gbe ini Ileleikristi a roro vievie he inọ emọ rai a ti zihe ruọ Ileleikristi kpregede re. Daniẹl, ọkpako ukoko gbe ọsẹ emọ isoi, o muẹrohọ nọ: “Esẹ gbe ini a rẹ rehọ oke hrọ ro fiobọhọ si avro nọ emọ rai a wo no obọ isukulu gbe eria efa ze. A rẹ rehọ odiri fiobọhọ kẹ emọ rai duku iyo kẹ enọ wọhọ enana: ‘Kọ ma be ghinẹ rria oke urere na? Kọ ghinẹ egagọ uzẹme ọvuọvo e riẹ? Fikieme ibe isukulu jọ nọ ọ rọ omẹ ẹro ziezi ọ gbẹ rọ rrọ usu uwoma ha? Kọ owezẹ ezaveyae o thọ ẹsikpobi taure a tẹ rọo?’ ” Esẹ gbe ini, wha sae rẹro so Jihova inọ ọ te ghale omodawọ rai, keme na ọye omariẹ o wo isiuru kpahe omokpokpọ emọ ra re.
19. Fikieme o jẹ mai woma re esẹ gbe ini a wuhrẹ kugbe emọ rai?
19 Esẹ gbe ini jọ a sai roro nọ a te he evaọ ewuhrẹ kugbe emọ obọ rai. Ghele na, u fo re who roro ere he, keme ohwo ọvo ọ sai wuhrẹ emọ ra vi owhẹ hẹ. (Ahwo Ẹfẹsọs 6:4) Ewuhrẹ kugbe emọ obọ ra o te kuvẹ k’owhẹ re whọ riẹ oware nọ o rọ idu gbe iroro rai. Kọ ẹmeọta rai o no udu ze manikọ erọ ugbunu ọvo? Kọ a ghinẹ rọwo oware nọ a bi wuhrẹ na? Kọ Jihova o ghine mu ai ẹro? Whọ sai duku iyo kẹ enọ enana gbe efa nọ i wuzou otẹrọnọ whẹ ọvo o bi wuhrẹ kugbe emọ ra.—2 Timoti 1:5.
20. Ẹvẹ esẹ gbe ini a sai ro ru uwuhrẹ uviuwou na họ onọ a rẹ reawere riẹ jẹ wha erere ze?
20 Ẹvẹ whọ sae rọ ruabọhọ omaa uwuhrẹ uviuwou ra okenọ who te mu ei họ no? Josẹf, ọkpako ukoko gbe ọsẹ ọmọzae avọ ọmọtẹ jọ, ọ ta nọ: “Wọhọ iwuhrẹ Ebaibol kpobi, u fo re uwuhrẹ uviuwou na o jọ avọ evawere, oware nọ kohwo kohwo o re rri haro kẹ. Re ma wo oyena evaọ uviuwou mai, ma rẹ dadamu ẹruoke jọ ọvo ho. Uwuhrẹ mai u re kri te auwa ọvo, rekọ o tẹ make rọnọ ẹsejọ iminiti ikpe ọvo ma wo, ma re wuhrẹ ghele. Oware jọ nọ o rẹ jọ uwuhrẹ mai na were emọ na oma gaga evaọ ẹkpoka na họ ma rẹ rehọ ikuigbe jọ no Obe Ikuigbe Ebaibol Mẹ ze ro ru edrama.a Epanọ o rẹ da ruọ oma te gbe otoriẹ nọ i re noi ze i wuzou vi uzedhe ẹme nọ ma wuhrẹ.”
21. Okevẹ esẹ gbe ini a re ro wuhrẹ emọ rai?
21 Uzẹme, etoke uwuhrẹ ọvo who je wuhrẹ emọ ra ha. (Iziewariẹ 6:5-7) Ọzae Osẹri na evaọ obọ Thailand ọnọ ma fodẹ eva umuhọ na ọ ta nọ: “Mẹ kareghẹhọ ziezi epanọ Ọsẹ mẹ ọ jẹ hae rọ wọ omẹ lele oma evaọ iruo usiuwoma ota na, avọ ẹdhighere mai, kpohọ ugbo thabọ ekwotọ ukoko mai. U re vevẹ, oriruo owoma ọsẹ gbe oni mai gbe ewuhrẹ nọ a je wuhrẹ omai evaọ otọ uyero kpobi họ onọ u fiobọhọ k’omai jiroro re ma ruọ iruo odibọgba oke-kpobi na. Yọ iwuhrẹ na i gbe wo iruo. Me gbe bi ru iruo evaọ ekwotọ ugbo thabọ na!”
22. Eme o re ti no ‘oma ra gbe uwuhrẹ ra nọ whọ sẹro’ riẹ ze?
22 Ẹdẹjọ kẹle na, evaọ ẹruoke, Jesu ọ te rọ ẹdhoguo Ọghẹnẹ brukpe eyero ọnana. Oware ulogbo oyena u ve zihe ruọ ikuigbe akpọ soso, rekọ idibo ẹrọwọ Jihova a te gbẹ gọe avọ irẹro usiwo ebẹdẹ bẹdẹ. Kọ whọ gwọlọ jọ usu rai, whẹ avọ emọ ra gbe emọ-uwuhrẹ Ebaibol ra? Fikiere kareghẹhọ: “Sẹro oma ra gbe uwuhrẹ ra; yọrọ oyena ga, keme fiki ere oruo who re ro siwi oma ra gbe ahwo [nọ] a be kezọ ẹme ra.”—1 Timoti 4:16.
[Oruvẹ-obotọ]
a Onọ Watchtower Bible and Tract Society of New York, Inc., a kporo.
Kọ Whọ Sae k’Iyo Nana Vevẹ?
• Eme ọ rẹ jọ uruemu mai, nọ ma riẹ uzedhe oke ẹdhoguo Ọghẹnẹ hẹ na?
• Idhere vẹ ma sae rọ ‘sẹro uwuhrẹ mai’?
• Ẹvẹ whọ sai ro fiobọhọ kẹ ọmọ-uwuhrẹ re ọ jọ ogbẹnyusu Jihova?
• Fikieme o jẹ r’oja re esẹ gbe ini a rehọ oke ro wuhrẹ emọ rai?
[Uwoho nọ o rrọ ẹwẹ-obe avọ 25]
Ewuhrẹ ọ rẹ nyaharo ẹkwoma ẹkeria ọghọ rekọ onọ o rọ whẹtiẹwhẹtiẹ
[Uwoho nọ o rrọ ẹwẹ-obe avọ 28]
Eru edrama ikuigbe Ebaibol, wọhọ onọ Solomọn o bi jo gu igberẹ ivẹ na ẹdhọ na, i re ru re a reawere iwuhrẹ uviuwou