Areghẹ Ọghẹnẹ—Ẹvẹ A re ro Dhesẹ Lẹe?

“ARI areghẹ oyegbere na vo, a gbẹ jẹ kezọ eme riẹ hẹ.” Solomọn Ovie owareghẹ na ọ rehọ eme nana kuọ ikuigbe ọzae oyegbere owareghẹ jọ nọ o siwi okpẹwho soso no ọraha na họ. Rekọ u yoma kẹhẹ, “ohwo ọvo ọ kareghẹhọ oyogbere ọyena ha.”—Ọtausiwoma Na 9:14-16.

Ahwo-akpọ a re rri iyogbere vo, a tẹ maki ru ikpeware dede. Onana o via kẹ Jesu. Aizaya ọ ruẹaro kpahe iẹe: “Ahwo a riri riei vo jẹ se iẹe, ohwo uweli nọ ọ vọ avọ edada.” (Aizaya 53:3) Ahwo jọ a rri Jesu vo fikinọ o wo ọkwa hayo efe isu ilogbo edẹ riẹ hẹ. Ghele na, o wo areghẹ nọ o kpehru gaga vi ọrọ ahwo-akpọ sebaẹgba kpobi. Ahwo otẹwho Jesu a rọwo ho inọ “ọmọ ọwena” ọnana o wo areghẹ je bi ru iruo igbunu. Rekọ oyena yọ oruthọ ologbo, keme ikuigbe na i dhesẹ nọ “fiki epanọ a wo orọwọ họ, [Jesu] o gbe ru iruo ogaga eva e tẹe he.” Ẹvẹ u kie kpe ahwo na te!—Matiu 13:54-58.

J’oma ru oruthọ ọvona ha. Jesu ọ ta nọ: ‘Areghẹ ọ rẹ rọ iruo riẹ dhesẹ ekiete riẹ via.’ Ahwo nọ a bi ru iruo Ọghẹnẹ jẹ be rehọ ereghẹ obọ odhiwu kẹ amọfa a re vuhu ai, orọnikọ fiki ọkwa nọ a rrọ họ, rekọ ẹkwoma “ibi iwoma” nọ a bi dhesẹ—ẹrọwọ gbe uruemu rai nọ i no Ebaibol ze.—Matiu 7:18-20; 11:19.