Mai Yọ Itienọ I Wo Ẹrọwọ

Ẹghale Ẹruore Ileleikristi na Evaọ Senegal

IYEI yọ emu nọ a re n’otọ ze. Evaọ ikpe udhusoi-akuakpe buobu, ahwo a jọ ebade, ewae, gbe ithẹ akpọ na kpe iyei no. Ikọ Jesu Kristi jọ a jọ ikuori evaọ Abade Galili. Rekọ Jesu o dhesẹ oghẹrẹ iruo okuori efa kẹ ae. Onana họ iruo okuori abọ-ẹzi nọ o te wha erere ro se orọnikọ ikuori na ọvo ho rekọ ro se iyei na re.

Evaọ abọ nana, Jesu ọ ta kẹ Pita okuori na nọ: “Nọ umuo na vrẹ who ti mu ahwo.” (Luk 5:10) A be wha oghẹrẹ iruo okuori nana haro nẹnẹ evaọ ekwotọ nọ i bu vi 230, kugbe Senegal. (Matiu 24:14) “Ikuori ahwo” ọgbọna e be jọ etenẹ rọ aruọwha ghale ẹruore Oleleikristi rai kugbe amọfa.—Matiu 4:19.

Senegal ọ rrọ ubienẹ ukiediwo-ọre Africa. U no udhude uwẹkpẹ nọ uwhru riẹ o rrọ Sahara evaọ ẹkpẹlobọ-ọre na rite owhawho udhedhẹ orọ ofẹ Casamance na evaọ obọze-ọre. Senegal yọ ẹkwotọ nọ ofou ọyaya udhude na gbe ofou odhedhẹ Atlantic na i re fou vrẹ. Ahwo nọ a be rria etẹ a bu vi ima izii. A riẹ ahwo Senegal kẹ ẹghọ erara. Ibuobu e rrọ Ileleikristi hi. Ibuobu rai yọ ithuru-igodẹ, efa rai a re su imalu, ekamẹle, gbe ewe. Ewhẹrẹ e riẹ re, enọ e rẹ kọ epapa, uvovo, gbe isikapa. Ẹhẹ, ikuori e riẹ re, enọ i re kpe ekọ vọ no Abade Atlantic na gbe ithẹ ilogbo efa nọ e dhẹ orẹwho na vrẹ ze. Iruo okuori na e be wha ugho se Senegal gaga. Evaọ uzẹme, okpemu orẹwho na họ ceebu jën, emuore ọwewere ọrọ isikapa, iyei, gbe ẹbe.

“Ikuori Ahwo”

Ahwo ọwhọ nọ a bu te 863 a bi whowho Uvie Ọghẹnẹ evaọ Senegal. Iruo okuori abọ-ẹzi e jọ etenẹ muhọ evaọ emuhọ ikpe 1950. A rovie uwou ogha Watch Tower Society fihọ Dakar, oria esuo na, evaọ 1965. “Ikuori” imishọnare a muọ orẹwho na họ ẹnyaze no erẹwho ugbothabọ ze. “Iruo okuori” i te muhọ, ẹghale ẹruore Ileleikristi na evaọ Senegal o te muhọ ẹnyaharo ẹmẹrera. Uwhremu na, a tẹ te bọ uwou ogha ọkpokpọ eva Almadies, evaọ ughe Dakar, a tẹ rehọ iẹe mudhe kẹ Jihova evaọ June 1999. Ẹvẹ oyena o jọ oke oghọghọ te!

Use-Abọ Ẹjẹrehọ Uzẹme Na

A be nyaku ahwo nọ a no oghoghẹrẹ eria ze ẹsikpobi, yọ ejọ e j’owọ kẹ ovuẹ ẹruore nọ ọ rrọ Ẹme Ọghẹnẹ na no. Dede nọ ibuobu e riẹ kpahe Ebaibol na ha, a ghọghọ nọ a ro wuhrẹ nnọ eyaa nọ Jihova Ọghẹnẹ ọ yaa kẹ eruẹaro ẹrọwọ anwae na i ti rugba kẹle.

Ẹsibuobu o rẹ gwọlọ aruọwha re ohwo o mudhe kẹ ehri-izi Ileleikristi, maero otẹrọnọ enana i duobọte iruẹru gbe uruemu uviuwou. Wọhọ oriruo, a rẹ jọ Senegal wo eyae buobu. Roro kpahe oriruo ọzae nọ o wo eyae ivẹ evaọ okenọ o mu Ebaibol họ ewuhrẹ. Kọ o ti wo aruọwha nọ ọ rẹ rọ jẹ uzẹme Ileleikristi na rehọ re o nwene lele ẹgwọlọ Ikereakere na re ọ jọ ọzae aye ọvo? (1 Timoti 3:2) Kọ ọ te talamu aye uzoge riẹ, aye nọ ọ kake rọo? Oyena họ oware nọ o ru, yọ obọnana ọ rrọ ọkpako nọ o wo ọwhọ evaọ ukoko ulogbo jọ kẹle Dakar. Aye ọsosuọ riẹ na ọ jẹ uzẹme na rehọ no re avọ emọ 12 riẹ, 10 erọ aye ọsosuọ na, 2 erọ aye avivẹ riẹ vẹre na.

Ọzadhe ọfa ọrọ ẹjẹrehọ ẹruore Ileleikristi na o sae jọ ababọ-obeoriẹ. Kọ onana u dhesẹ nọ ohwo nọ ọ riẹ obe he ọ rẹ sai kurẹriẹ hẹ? Vievie. Roro kpahe oriruo Marie, oni emọ eree nọ o re ruiruo gaga. Ọ ruẹ epanọ u wuzou te re ọ rehọ Ebaibol na t’ẹme kugbe emọ riẹ kẹdẹ kẹdẹ taure a te ti kpohọ isukulu o ve te kpohọ iruo. Rekọ ẹvẹ ọ sai ro ru ere, nọ ọ riẹ ese he na? K’irioke k’irioke kpobi, ọ rẹ rehọ omobe na Ẹkiẹriwo Ikereakere na Kẹdẹ Kẹdẹ o ve dikihẹ iyẹrẹ uwẹkpẹ na evaọ aro uwou riẹ. Nọ ahwo a be nya aro uwou na vrẹ na, ọ vẹ nọ ae sọ a rẹ sai se. Ọ tẹ ruẹ ohwo nọ ọ rẹ sai se, ọ vẹ kẹe omobe na ọ vẹ ta avọ osegboja no: “Mẹ rẹ sai se he, iviena who gbe se oria nana kẹ omẹ nẹnẹ?” Ọ vẹ kezọ kẹ isase na ziezi. O ve yere ohwo na ọ vẹ ruọ uwou riẹ vẹrẹ vẹrẹ re ọ rehọ eme na t’ẹme kugbe emọ riẹ taure a te ti kpohọ isukulu!

Oghẹrẹ Ahwo Kpobi A be k’Uyo

Evaọ Senegal, a rẹ sae ruẹ ahwo nọ a keria iyẹrẹ be zẹ iyei, ẹbe-ọrọrọ, hayo ibi-ire eva eki hayo enọ e kerria otọ ure ulogbo ọ baobab be da ataya, iti eyayare jọ. Avọ ọtamuo re a ta usiuwoma na kẹ ahwo kpobi nọ a nyaku, inievo ivẹ i lele ọzae jọ nọ ọ ko nọ ọ be jọ iyẹrẹ yare igho t’ẹme. Nọ a yere iei no, a tẹ ta nọ: “Ahwo buobu a rẹ k’owhẹ ugho rekọ a re lele owhẹ t’ẹme he. Ma nyaze ti lele owhẹ t’ẹme kpahe oware jọ nọ u wuzou gaga nọ u kpomahọ obaro ra.” U te gbe ọyareware na unu. Inievo na e tẹ ta haro nọ: “Ma gwọlọ nọ owhẹ onọ jọ. Fikieme uye-oruẹ u je bu akpọ na enẹ?” Ọyareware na ọ tẹ kuyo nọ: “Yọ oreva Ọghẹnẹ.”

Inievo na i te lele iei jiroro no Ikereakere na ze je dhesẹ Eviavia 21:4 vevẹ kẹe. Ovuẹ ẹruore nana gbe uzẹme na inọ ohwo jọ ọ wẹriẹ re o lele iei t’ẹme Ebaibol na u duobọte ọyareware na gaga. Irui i te su noi aro ze. Ukpenọ ọ yare igho, ọ tẹ lẹ inievo na re a rehọ igho nọ a fihọ omodhe riẹ na! O si ikẹ na te epanọ ahwo a ro su kuku. Udugaga inievo na a rọ tae kurẹriẹ re o kru igho na. Ọ tẹ te rọwo rekọ o si ikẹ nọ a wariẹ weze bru ei.

Yunivasiti ologbo nọ ọ rrọ Dakar o bi je fiba emu iyei evaọ iruo okuori abọ-ẹzi na. Ọmọzae jọ nọ ọ jọ isukulu na je wuhrẹ kpahe imu, Jean-Louis, o muọ Ebaibol na họ ewuhrẹ. Ọ tẹ jẹ uzẹme na rehọ vẹrẹ vẹrẹ, rehọ uzuazọ riẹ mudhe kẹ Jihova, ọ tẹ họ-ame. Ẹgwọlọ riẹ họ re ọ gọ Ọghẹnẹ wọhọ ọkobaro oke-kpobi, rekọ ewuhrẹ imu riẹ ọ were riẹ re. Fiki ọtamuo jọ nọ o wo kugbe orẹwho riẹ, o gba riẹ họ re ọ nya ewuhrẹ na te urere. Ghele na, o te muọ iruo ọkobaro obufihọ họ. Nọ a kẹe obe no wọhọ edọkita nọ o te ziezi, a te zizie iei re o ruiruo evaọ uviuwou Ebẹtẹle ulogbo jọ evaọ Africa wọhọ edọkita uviuwou na. Ọmoha ọfa jọ nọ a ta usiuwoma kẹ evaọ Yunivasiti Dakar na o bi ruiruo obọnana evaọ uviuwou Ebẹtẹle evaọ orẹwho riẹ.

Iruo okuori abọ-ẹzi evaọ Senegal e be ghinẹ nyaharo. A bi rri ebe Ebaibol Isẹri Jihova nyaseba ha, yọ obọnana a be fae fihọ ẹvẹrẹ orẹwho na, nọ a re se Wolof. Eyo emamọ usi na evaọ ẹvẹrẹ obọ rai o tuduhọ ahwo udu-oruọzewọ buobu awọ no re a j’owọ avọ uyere. Avọ oghale Jihova, a ti gbe mu iyei ẹwoho efa, nọ “ikuori ahwo” erọ ọwhọ evaọ Senegal a gbẹ be ghale ẹruore Oleleikristi na avọ ẹrọwọ gbe aruọwha na.

[Udhesẹ-oria nọ o rrọ ẹwẹ-obe avọ 31]

SENEGAL

[Ọnọ o wo uwoho]

Mountain High Maps® Copyright © 1997 Digital Wisdom, Inc.

[Uwoho nọ o rrọ ẹwẹ-obe avọ 31]

Ẹghale ẹruore Ileleikristi na evaọ Senegal