Okenọ Efibo U re Dhesẹ nọ Ohwo Ọ Rọwo

OBE na Betrayal—German Churches and the Holocaust o ta vevẹ kpahe abọ nọ egagọ i wo evaọ etoke esuo Nazi. Obe na o ta nọ: “Ileleikristi e jẹ thọ esuo na uke, yọ ibuobu i fibo kẹ olahiẹ ahwo Ju. Evaọ onana efibo o dhesẹ ọrọwokugbe rai.”

Eme ọ jọ esuo Nazi si enọ i se oma rai Ileleikristi urru? Obe na u dhesẹ nọ “uzi gbe ẹkpatiẹ [Hitler] kpahe uyerakpọ Germany” o viẹ ibuobu họ. Obe na o ta nọ: “O mukpahe iwoho ẹbẹba, igberẹ-ibro, eva-ekparọ, ezae-duezae, gbe ‘eme izuehọ’ oge na, yọ ọ jẹ rehọ ekwakwa ona, isiliva, gbe igoru ru ọghọ kẹ eyae nọ i yẹ emọ ene, ezeza, gbe eree, ọ tẹ rọ ere tuduhọ eyae na awọ re a tẹrovi uwou-orọo rai. Ekruga uruemu anwae ẹwho onana, avọ ẹzi ohọre kẹ orẹwho-ohwo nọ Hitler o fihọ otọ fiki ẹguae ehrẹkpotọ orẹwho nọ Ọvọ Versailles na ọ wha ze, o tẹ lẹliẹ esuo Nazi si ibuobu urru, makọ Ileleikristi buobu evaọ Germany.”

Ẹko ahwo jọ a hẹrioma gaga. Obe na Betrayal o muẹrohọ nnọ: “Isẹri Jihova a se nọ a re ru ozighi hayo họre.” Onana o tẹ whae ze nọ a rọ họre ẹko ọsese nana, a te gbolo ahwo riẹ buobu fihọ iwou-odi olahiẹ. Ghele na, amọfa nọ a se omarai ilele Kristi a kpunu hu. Obe na o ta haro nọ: “Ahwo Kathọlik gbe Protẹstant a jẹ họre Isẹri Jihova ukpenọ a riohrọ rai, yọ a jọ abọ izi evega Hitler ukpenọ a rẹ jọ abọ ilale udhedhẹ orọ Isẹri na.” Efibo rai o fiba uye nọ o bẹ Isẹri na evaọ otọ esuo Nazi.

Nọ obọ nọ ichọche na i wo evaọ egọmeti Nazi o gbẹ be wha avro ọgaga ze na, obe na Betrayal u se Isẹri Jihova “ẹko egagọ nọ ọ se nọ ọ rẹ jọ abọ esuo na.”