Iwhowho Uvie A n’Iyẹrẹ

Jihova Ọ rẹ Kẹ Ahwo Riẹ Oria Eriosehọ

ORIA edhedhẹ eriosehọ evaọ edhere igbehru o rẹ kẹ ohwo nọ o bi kperẹ nọ oma o lọhọ no omawere. Evaọ Nepal, a re se eria eriosehọ itieye na chautara. A rẹ sae ruẹ chautara kẹle ure ahe ologbo, edhedhẹ nọ a rẹ keria jo serihọ. Re ohwo ọ bọ chautara yọ oware ẹwo, yọ ibuobu nọ e rẹ bọ ae na a rẹ ko edẹ rai dhere.

Iyẹrẹ nọ i no obọ Nepal ze i dhesẹ epanọ Jihova Ọghẹnẹ o ro zihe ruọ ehri oghọghọ gbe omosasọ abọ-ẹzi no kẹ “ikperẹ” buobu nọ oma o lọhọ no evaọ uyerakpọ nana.—Olezi 23:2.

• Lil Kumari ọ be rria okpẹwho owowoma ọ Pokhara, nọ o rẹriẹ aro ku Igbehru Himalaya nọ ekpalekpa-ame i re kie fihọ na. Rekọ fiki awaọruọ ugho kẹ uviuwou na, Lil Kumari o te roro nọ ẹruore ọ riẹ hẹ. Okenọ omọvo Isẹri Jihova jọ o weze bru ei ze, ẹruore ọsasa Ebaibol na o te duobọte ie, ọ tẹ nwane yare uwuhrẹ Ebaibol.

Dede nọ uwuhrẹ na o were Lil Kumari, o lọhọ họ re ọ nyaharo fiki ọwọsuọ ọgaga uviuwou. Rekọ oma o lọhọ e riẹ hẹ. O je kpohọ iwuhrẹ Ileleikristi ẹsikpobi je fi eware nọ o bi wuhrẹ na h’iruo, maero evaọ ofẹ omarokpotọ aye. Fikiere, ọzae riẹ gbe oni riẹ a tẹ te ruẹ nọ uwuhrẹ Ebaibol Lil Kumari o be kẹ uviuwou na kpobi erere.

Ọzae riẹ gbe imoni efa jọ buobu a bi wuhrẹ Ẹme Ọghẹnẹ enẹna. Evaọ okokohọ jọ kẹle, onọ a ru evaọ Pokhara, Lil Kumari ọ reawere ọruẹrẹfihotọ na kugbe imoni 15 riẹ. Ọ ta nọ: “Uwou mẹ u zihe ruọ oria eriosehọ no keme uviuwou mai u kugbe no enẹna evaọ egagọ uzẹme, yọ mẹ ruẹ omofọwẹ no.”

• Dede nọ uzi u mukpahe omohẹriẹ utu evaọ Nepal, o gbẹ rọ ahwo na azẹ. Fikiere, ahwo buobu a wo isiuru kpahe oware nọ Ebaibol na ọ ta kpahe ẹrẹrẹe gbe ababọ-ọriẹwẹ. Nọ a wuhrẹ nnọ “Ọghẹnẹ ọ rẹ jẹ ahwo [jọ] ọvo rehọ họ” u nwene uzuazọ Surya Maya gbe uviuwou riẹ gaga.—Iruẹru 10:34.

Surya Maya ọ jọ ọkora fiki ẹdhoguo-okienyẹ ọrọ omohẹriẹ ẹko avọ iruemu-anwae nọ e dhẹ ruọ ahwo na oma no. Fikinọ ọ rọ aye nọ o wo ẹrọwọ odidi, Surya Maya ọ yare ẹdhọ riẹ ikpe buobu re o fiobọhọ kẹe. Rekọ ọ kuyo kẹ elẹ riẹ hẹ. Ẹdẹ jọ nọ o je bo lahwe kẹ obufihọ, ọmọ-oruọmọ ikpe ezeza riẹ, Babita, ọ tẹ nya bru ei ze ọ tẹ nọ inọ: “Fikieme who je bi bo kẹ obufihọ mi ẹdhọ nọ ọ sae ru uvumọ oware he?”

Whaọ oni Babita o bi wuhrẹ Ebaibol kugbe omọvo Isẹri Jihova jọ. Babita avọ ọwhọ o te zizie oniode riẹ kpohọ ewuhrẹ Ileleikristi. Nọ Surya Maya ọ nya, u gbe rie unu nọ ọ ruẹ ahwo uyerakpọ sa-sa nọ a be reawere usu kugbe ohwohwo ababọ omohẹriẹ. Ọ tẹ nwane yare uwuhrẹ Ebaibol. Dede nọ onana o lẹliẹ erivẹ riẹ mu ei imuẹwho, udu u no rie awọ họ; yọ dede nọ ọ rẹ sai se je kere he, onana o whaha e riẹ ẹnyaharo abọ-ẹzi hi.

Ikpe ihrẹ e vrẹ no, yọ imahrẹ evaọ uviuwou riẹ, te ọzae riẹ gbe emọ esa riẹ, a zihe ruọ Isẹri Jihova no. Enẹna Surya Maya ọ rọ ọkobaro, ọgbodibo oke-kpobi, be rọ oghọghọ fiobọhọ kẹ ahwo re a wọ ewha egbẹgbẹdẹ rai n’uzou evaọ oria eriosehọ nọ Jihova ọvo ọ rẹ sae kẹ.