Rehọ Uyoyou Bọ Oma Ga

“Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” —MATIU 22:37.

1. (a) Eware jọ vẹ Oleleikristi o re wuhrẹ? (b) Ovẹ họ okwakwa Oleleikristi nọ o mai wuzou, kọ fikieme?

OLELEIKRISTI o re wuhrẹ eware buobu re ọ sae ruẹse jọ uvi ọgbodibo. Obe Itẹ u fielo họ epanọ eriariẹ, otoriẹ, gbe areghẹ i wuzou te. (Itẹ 2:1-10) Pọl ukọ na ọ t’ẹme kpahe ẹgwọlọ kẹ ẹrọwọ gbe ẹruore ọgaga. (Ahwo Rom 1:16, 17; Ahwo Kọlọsi 1:5; Ahwo Hibru 10:39) Ithihakọ gbe oma-oriẹsuo e r’oja re. (Iruẹru 24:25; Ahwo Hibru 10:36) Ghele na, okwakwa jọ o riẹ nọ, o gbẹ riẹ hẹ, u re si erru no ekwakwa edekọ na je tube ru ai kare aghare. Okwakwa oyena họ uyoyou.—1 Ahwo Kọrint 13:1-3, 13.

2. Ẹvẹ Jesu o ro dhesẹ epanọ uyoyou u wuzou te, kọ didi enọ onana o kpare?

² Jesu o dhesẹ epanọ uyoyou u wuzou te nọ ọ ta nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Nọ uyoyou o rọ oka ovuhumuo Ileleikristi uzẹme na, u fo re ma nọ enọ wọhọ, Eme họ uyoyou? Fikieme u je wuzou tere nọ Jesu ọ ta nọ oye a rẹ mai ro vuhu ilele riẹ? Ẹvẹ ma sai ro wo uyoyou? Ono ma re you? Joma t’ẹme kpahe enọ enana.

Eme Họ Uyoyou?

3. Ẹvẹ a rẹ sai dhesẹ uyoyou, kọ fikieme u je kpomahọ iroro gbe ubiudu na?

³ Otofa uyoyou jọ họ ‘edhesẹ oma owhẹwhẹtiẹ, hayo isiuru ididi kẹ omọfa, omọfa nọ o re si ohwo urru hayo were ohwo.’ O rọ okwakwa nọ o rẹ wọ ahwo re a ruiruo kẹ ewoma amọfa, onọ ẹsejọ o rẹ gwọlọ omodawọ ulogbo. Uyoyou, wọhọ epanọ a dhesẹ i rie evaọ Ebaibol na, u re kpomahọ iroro gbe ubiudu na. U w’obọ kugbe iroro na keme ohwo nọ o you ọ rẹ riẹ oware nọ o bi ru, vuhumu nnọ tei te amọfa nọ o you, aikpobi a wo ewhrehe gbe ekwakwa nọ i siuru. U re kpomahọ iroro na viere keme ahwo jọ a riẹ nọ Oleleikristi o re you—ẹsejọhọ ahwo nọ ọ hai you vẹre he—keme ọ riẹ no ese Ebaibol na ze nọ Ọghẹnẹ ọ gwọlọ nọ o ru ere. (Matiu 5:44; 1 Ahwo Kọrint 16:14) Ghele na, ubiudu na họ ugogo oria nọ uyoyou u re no ze. Uvi uyoyou nọ a jọ Ebaibol na dhesẹ orọnikọ okwakwa iroro ọvo ho. O gwọlọ oruọzewọ udidi gbe omaduhọ iroro kpobi.—1 Pita 1:22.

4. Edhere vẹ uyoyou o rọ rrọ ọgbakugbe ọgaga?

⁴ O re bẹbẹ re ahwo nọ a wo oriobọ evaọ ubiudu a ghinẹ jọ usu uyoyou keme ohwo nọ o you ọ rẹ ruẹrẹ oma kpahe re ọ rọ isiuru omọfa karo kẹ eriẹ. (Ahwo Filipai 2:2-4) Eme ọ Jesu na, “ẹkẹ oghale o mae rọ vi emio” e rẹ mae jọ uzẹme evaọ okenọ a tẹ k’okẹ na evaọ uyoyou. (Iruẹru 20:35) Uyoyou yọ ọgbakugbe ọgaga. (Ahwo Kọlọsi 3:14) Ẹsibuobu o rẹ kẹre te usu, rekọ ọgbakugbe uyoyou o rro vi orọ usu. A re dhesẹ usu obẹlẹ nọ o rẹ jọ udevie ọzae avọ aye riẹ ẹsejọ wọhọ uyoyou; rekọ, uyoyou nọ Ebaibol na ọ tuduhọ omai awọ nọ ma wo na o rẹ tọ vi orọ isiuru iwo. Nọ ọzae avọ aye a te ghine you ohwohwo, a rẹ jọ kugbe ghele o tẹ make rọnọ usu ugboma o gbẹ lọhọ họ fiki awhaha owho hayo fikinọ ẹyao o kie omọvo rai jọ.

Uyoyou—Okwakwa nọ U w’Uzou

5. Fikieme uyoyou o jẹ rọ okwakwa nọ u wuzou kẹ Ileleikristi?

⁵ Fikieme uyoyou o jẹ rọ okwakwa nọ u w’uzou kẹ Ileleikristi? Orọ ọsosuọ, fikinọ Jesu o j’uzi kẹ ilele riẹ re a you ohwohwo. Ọ ta nọ: “Whai họ ezọ mẹ wha te ru eware nọ mẹ ta kẹ owhai. Eware nana mẹ rọ juzi kẹ owhai, re whai ohwo oyou ohwo.” (Jọn 15:14, 17) Orọ avivẹ, fikinọ Jihova họ odhesẹvia uyoyou, yọ wọhọ egegagọ riẹ ma rẹ raro kele iei. (Ahwo Ẹfẹsọs 5:1; 1 Jọn 4:16) Ebaibol na ọ ta nọ ewo eriariẹ Jihova gbe Jesu u dhesẹ uzuazọ ebẹdẹ bẹdẹ. Ẹvẹ ma sae rọ ta nọ ma riẹ Ọghẹnẹ ma gbẹ daoma re ma jọ wọhọ epanọ ọ rọ họ? Jọn ukọ na o roro i rie enẹ: “Ohwo nọ o wo uyoyou hu, ọ riẹ Ọghẹnẹ hẹ; keme Ọghẹnẹ họ uyoyou.”—1 Jọn 4:8.

6. Ẹvẹ uyoyou o rẹ kpọ abọ sa-sa ọrọ izuazọ mai vi?

⁶ Uyoyou u wuzou re fiki ẹjiroro avesa: U re fiobọhọ k’omai kpọ abọ sa-sa ọrọ uzuazọ mai vi jẹ lẹliẹ eware nọ ma bi ru kiehọ. Wọhọ oriruo, o r’oja re a rehọ eriariẹ Ẹme Ọghẹnẹ ẹsikpobi. Rọkẹ Oleleikristi, eriariẹ itieye na e wọhọ emuore. I re fiobọhọ kẹe rro te ẹkpako je ru eware lele oreva Ọghẹnẹ. (Olezi 119:105; Matiu 4:4; 2 Timoti 3:15, 16) Ghele na, Pọl ọ vẹvẹ unu nọ: “ ‘Eriariẹ’ e [rẹ] lẹliẹ ohwo bru oma-oro, rekọ uyoyou u re ru ohwo gbakiete.” (1 Ahwo Kọrint 8:1) Ijo, uvumọ oware o jọ eriariẹ egbagba thọ họ. Obọ mai ẹbẹbẹ na ọ rrọ—ma wo iroro uzioraha. (Emuhọ 8:21) Otẹrọnọ iroro owowa nọ uyoyou o rẹ wha ze e gbẹ riẹ hẹ, eriariẹ e rẹ sae lẹliẹ ohwo fu uke, roro omariẹ woma vi amọfa. Oyena o rẹ via ha otẹrọnọ uyoyou o be wọ ohwo na. “Uyoyou u wo . . . eha-ise he.” (1 Ahwo Kọrint 13:4) Oleleikristi nọ uyoyou o be wọ ọ rẹ yoma ha o tẹ make rọnọ o wo eriariẹ ididi jọ. Uyoyou o rẹ lẹliẹe roma kpotọ jẹ whaha iẹe ẹgwọlọ re o ru odẹ k’oma riẹ.—Olezi 138:6; Jemis 4:6.

7, 8. Ẹvẹ uyoyou u re ro fiobọhọ k’omai tẹrovi eware nọ e mae r’oja?

⁷ Pọl o kere se Ahwo Filipai nọ: “Mẹ lẹ kẹ owhai re, uyoyou rai u hedhe ẹruẹruọ, eva ẹriẹ gbe areghẹ kpobi. Re wha ruẹse dhesẹ oware nọ uwoma via.” (Ahwo Filipai 1:9, 10) Uyoyou Oleleikristi u re fiobọhọ k’omai nya lele uduotahawọ nana re ma muẹrohọ eware nọ e mae r’oja. Wọhọ oriruo, roro kpahe eme Pọl se Timoti: “Otẹrọnọ ohwo jọ ọ guọlọ ọkwa [ọsẹro], yọ okpiruo ọ guọlọ na.” (1 Timoti 3:1) Evaọ etoke ukpe iruo 2000 na, unu ikoko nọ e rọ akpọ na soso u wo ẹvi ọ 1,502, u te ru nọ ma ro wo unu okpokpọ orọ 91,487. Fikiere, ma wo ẹgwọlọ ologbo ọrọ ekpako efa, yọ enọ i te kẹ uvẹ-ọghọ na a re jiri ai.

⁸ Ghele na, otẹrọnọ enọ i bi te kẹ uvẹ-ọghọ ẹruọsa a fi ẹjiroro uvẹ-ọghọ utioye na họ iroro, a rẹ yọrọ emamọ iroro owowa. Re a wo udu-esuo hayo re a riẹ ohwo ọvo họ eware nọ e r’oja ha. Ekpako nọ i re ru Jihova eva were họ enọ uyoyou kẹe gbe rọkẹ inievo rai o be wọ. Orọnikọ odẹ hayo esuo a be gwọlọ họ. Pita ukọ na, nọ ọ hrẹ ekpako ukoko re a yọrọ emamọ uruemu no, o fiẹgbahọ ẹgwọlọ ‘omarokpotọ.’ Ọ hrẹ enọ e rọ ukoko na kpobi nọ: “Wha hrẹ oma rai kpotọ họ obọ otọ ogaga Ọghẹnẹ.” (1 Pita 5:1-6) U re woma re ohwo nọ ọ gwọlọ te kpobi o roro kpahe oriruo ekpako buobu nọ e rọ akpọ na nọ i bi ruiruo gaga, avọ omarokpotọ, jẹ rọ oghale kẹ ikoko rai.—Ahwo Hibru 13:7.

Iroro Ezi I re Fiobọhọ k’Omai Thihakọ

9. Fikieme Ileleikristi a je fi eghale eyaa Jihova h’iroro?

⁹ A rẹ sae jọ edhere ọfa ruẹ epanọ u wuzou te re uyoyou o wọ ohwo. Rọkẹ enọ i bi le omarọkẹ Ọghẹnẹ fiki uyoyou, Ebaibol na ọ yeyaa eghale buobu enẹna gbe eghale igbunu nọ a sai kele he evaọ obaro. (1 Timoti 4:8) Oleleikristi nọ ọ rọwo eyaa enana gaga gbe ọnọ ọ rọwo nnọ Jihova “ọ rẹ te hwosa kẹ e nọ e guọlọ e riẹ” o re wo obufihọ nọ o re ro dikihẹ gaga evaọ ẹrọwọ na. (Ahwo Hibru 11:6) Ibuobu mai i bi siuru orugba eyaa Ọghẹnẹ jẹ be wariẹ eme Jọn ukọ na: “Ami. Nyaze, Ọnowo Jesu!” (Eviavia 22:20) Ẹhẹ, eroro kpahe eghale nọ e rọ obaro k’omai otẹrọnọ ma wo ẹrọwọ o rẹ k’omai ẹgba thihakọ, wọhọ epanọ “oghọghọ nọ a kẹ riẹ” u fiobọhọ kẹ Jesu thihakọ na.—Ahwo Hibru 12:1, 2.

10, 11. Ẹvẹ uyoyou nọ o rẹ w’omai u re ro fiobọhọ k’omai thihakọ?

¹⁰ Rekọ eme ọ rẹ via otẹrọnọ isiuru mai re ma rria akpọ ọkpokpọ na ọvo họ uvi ẹjiroro nọ ma be rọ gọ Jihova? Koyehọ ma te kare odiri hayo kare edẹro otẹrọnọ eware e ga hayo eware e gbẹ via epanọ ma rẹro rai hi. Ma rẹ sae jọ ọza ologbo ọrọ ereghe vrẹ. (Ahwo Hibru 2:1; 3:12) Pọl ọ ta kpahe ogbẹnyusu riẹ vẹre Demas, ọnọ ọ dhẹ se iẹ ba. Fikieme? Fiki “uyoyou nọ o wo kpahe eware akpọ nana.” (2 Timoti 4:10) Enọ e be rehọ iroro oriobọ gọ kpobi a rọ ọza-enwoma ọvona. Akpọriọ ẹsiẹsiẹ nọ akpọ na ọ rẹ kẹ ọ rẹ sai si ai urru, o vẹ jọ bẹbẹ kẹ ae re a ru omodawọ enẹna evaọ ẹruore kẹ eghale nọ e rọ obaro.

¹¹ Dede nọ u kiehọ je fo re a wo isiuru kpahe ewo eghale obaro gbe irẹro ufuoma no edawọ na, uyoyou o rẹ bọ ovuhumuo mai kẹ oware nọ u fo nọ o rẹ mai wuzou evaọ uzuazọ mai. Oreva Jihova họ oware nọ u wuzou, orọnikọ omai hi. (Luk 22:41, 42) Ẹhẹ, uyoyou o rẹ b’omai ga. U re ru omai thihakọ hẹrẹ Ọghẹnẹ mai, wo edẹro kpahe eghale nọ ọ kẹ kpobi je fievahọ nnọ evaọ ẹruoke riẹ, ma ti wo eware nọ ọ yaa kpobi—gbe efa. (Olezi 145:16; 2 Ahwo Kọrint 12:8, 9) Bọo oke oyena, uyoyou u re fiobọhọ k’omai hae gọ ababọ oriobọ keme “uyoyou o rẹ guọlọ orọ obọ riẹ hẹ.”—1 Ahwo Kọrint 13:4, 5.

Ono Ileleikristi A re You?

12. Wọhọ epanọ Jesu ọ ta, ono ma re you?

¹² Jesu ọ kẹ uzi nọ a re lele kpahe ohwo nọ ma re you evaọ okenọ ọ wariẹ eme ivẹ jọ no Uzi Mosis ze. Ọ ta nọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra” jegbe nọ, “You omọfa epanọ who you oma ra.”—Matiu 22:37-39.

13. Ẹvẹ ma sai ro wuhrẹ re ma you Jihova, dede nọ ma sae rue riẹ hẹ?

¹³ No eme Jesu na ze, o rọ vevẹ nnọ ohwo nọ ma rẹ kaki you họ Jihova. Dede na, a yẹ omai avọ uyoyou ovọvọ rọkẹ Jihova ha. Oyena yọ oware nọ ma re wuhrẹ. Okenọ ma kaki yo kpahe iẹe, eware nọ ma yo i si omai kẹle iẹe. Ẹmẹrera na, ma te ti wuhrẹ kpahe epanọ ọ rọ ruẹrẹ otọakpọ na họ kẹ ahwo-akpọ. (Emuhọ 2:5-23) Ma wuhrẹ kpahe oghẹrẹ nọ o yeri kugbe ahwo-akpọ no, nọ o ro gbabọkẹ omai hi evaọ okenọ uzioraha o kake ruọ uviuwou ahwo-akpọ, rekọ ọ j’owọ re ọ ta omai. (Emuhọ 3:1-5, 15) Ọ rehọ edhere ẹwo yeri kugbe enọ i wo ẹrọwọ, uwhremu na ọ tẹ rehọ Ọmọ ọvo riẹ kẹ rọkẹ erọvrẹ izieraha mai. (Jọn 3:16, 36) Ẹvi eriariẹ nana u ru ovuhumuo mai kẹ Jihova rro. (Aizaya 25:1) Devidi Ovie na ọ ta nọ o you Jihova fiki uyoyou ẹruọsa Riẹ. (Olezi 116:1-9) Nẹnẹ, Jihova ọ be sẹro mai, be thọ omai, be bọ omai ga, jẹ be tuduhọ omai awọ. Epanọ ma wuhrẹ kpahe iẹe te, ere uyoyou mai u re di te.—Olezi 31:23; Zefanaya 3:17; Ahwo Rom 8:28.

Ẹvẹ Ma Sai ro Dhesẹ Uyoyou Mai?

14. Edhere vẹ ma rẹ sai ro dhesẹ nnọ uyoyou mai kẹ Ọghẹnẹ yọ omamọ riẹ?

¹⁴ Uzẹme, ahwo buobu evaọ akpọ na soso a rẹ ta nọ a you Ọghẹnẹ, rekọ uruemu rai o wọso ẹmeunu rai. Ẹvẹ ma sae rọ riẹ nọ ma ghine you Jihova? Ma rẹ sae t’ẹme kẹe evaọ olẹ jẹ ta iroro mai kẹe. Yọ ma rẹ sai dhesẹ uruemu nọ u re dhesẹ uyoyou mai. Jọn ukọ na ọ ta nọ: “Ohwo kpobi nọ o koko ẹme [Ọghẹnẹ], eva riẹ uvi uyoyou Ọghẹnẹ o jẹ gbunu. Fiki onana u je mu omai ẹro nọ ma rọ eva riẹ.” (1 Jọn 2:5; 5:3) Oware jọ nọ Ẹme Ọghẹnẹ ọ ta k’omai họ ma re kokohọ je yeri uzuazọ ofuafo. Ma rẹ whaha eviẹhọ, ta uzẹme, jẹ jọ fuafo evaọ iroro. (2 Ahwo Kọrint 7:1; Ahwo Ẹfẹsọs 4:15; 1 Timoti 1:5; Ahwo Hibru 10:23-25) Ma re dhesẹ uyoyou ẹkwoma obufihọ iwo nọ ma rẹ rọ kẹ enọ i wo ẹgwọlọ. (1 Jọn 3:17, 18) Yọ ma rẹ siọ amọfa ba ẹtakẹ kpahe Jihova ha. Oyena u kugbe obọ-uwo evaọ usiuwoma ota akpọ-soso Uvie na. (Matiu 24:14; Ahwo Rom 10:10) Ẹmeoyo kẹ Ẹme Ọghẹnẹ evaọ eware itieye na yọ imuẹro inọ uyoyou mai kẹ Jihova yọ omamọ riẹ.

15, 16. Ẹvẹ uyoyou kẹ Jihova u kpomahọ izuazọ buobu evaọ ukpe n’ukpo?

¹⁵ Uyoyou kẹ Jihova u re fiobọhọ k’ahwo jẹ emamọ iroro. Ukpe n’ukpo, uyoyou utioye na o wọ ahwo 288,907 rehọ izuazọ rai mudhe kẹe jẹ rehọ ame-ọhọ dhesẹ ẹjiroro rai na via. (Matiu 28:19, 20) Omarọkẹ rai u wo otofa. U kpoka họ enwene evaọ izuazọ rai. Wọhọ oriruo, Gazmend ọ jọ omọvo jọ nọ ọ karo evaọ arozaha basketball evaọ Albania. Evaọ ikpe jọ buobu, tei te aye riẹ a wuhrẹ Ebaibol yọ ghelọ ezadhe a te ti te wọhọ iwhowho Uvie. Ukpe n’ukpo, Gazmend ọ tẹ họ-ame, omọvo jọ evaọ usu ahwo 366 nọ e jọ Albania họ-ame evaọ ukpe iruo 2000 na. Obe-usi jọ u kporo uzoẹme jọ kpahe iẹe jẹ ta nọ: “Uzuazọ riẹ u wo ẹjiroro, yọ fiki onana, tei te uviuwou riẹ a be reawere edẹ uzuazọ rai nọ e mai wo evawere. Rọ kẹe, u gbe wuzou hu unuigho nọ ọ rẹ sae jọ uzuazọ wo rekọ, ukpoye, epanọ ọ rẹ sae kẹ te ro fiobọhọ kẹ amọfa.”

¹⁶ Epọvo na, a kẹ oniọvo-ọmọtẹ jọ nọ ọ họ-ame obọ nọ ọ be jọ ekọmpene epẹtiro ruiruo evaọ Guam okpiruo isiuru jọ. Nọ o kpehru gaga no evaọ ikpe buobu, uwhremu na a tẹ kẹe uvẹ nọ ọ rẹ rọ jọ ethabọ prẹsidẹnte aye ọsosuọ evaọ ikuigbe ekọmpene na. Rekọ, ọ rehọ uzuazọ riẹ mudhe kẹ Jihova no enẹna. Whaọ nọ o lele ọzae riẹ t’ẹme na no, oniọvo-ọmọtẹ ọkpokpọ na ọ tẹ se iruo na, ukpoye ọ tẹ rehọ iruo ubroke re ọ sae nyaharo te epanọ ọ rẹ rọ jọ ọgbodibo oke-kpobi, ọkobaro. Uyoyou kẹ Jihova o wọ riẹ re ọ gwọlọ gọe wọhọ ọkobaro ukpenọ o re le isiuru ugho evaọ akpọ nana. Evaọ uzẹme, evaọ akpọ na soso uyoyou utioye na o wọ ahwo 805,205 w’obọ evaọ abọ sa-sa ọrọ odibọgba ọkobaro na evaọ etoke ukpe iruo 2000 na. Ẹvẹ odhesẹvia uyoyou gbe ẹrọwọ nọ ekobaro eyena a dhesẹ o rro te!

Ọwhọ kẹ Eyou Jesu

17. Didi emamọ oriruo uyoyou ma jọ oma Jesu ruẹ?

¹⁷ Jesu yọ oriruo ogbunu ọrọ ohwo nọ uyoyou o wọ. Taure a te ti yẹi wọhọ ohwo, o you Ọsẹ riẹ je you ahwo-akpọ. Wọhọ ehri areghẹ, ọ ta nọ: “Mẹ rọ abotọ [Jihova], wọhọ osu iruo, mẹ jọ eva-ewerọ kẹ e kẹdẹ kẹdẹ jẹ hae ghọghọ eva aro riẹ kẹse kẹse, jẹ hae ghọghọ kẹ ẹria akpọ na jẹ were eva kẹ emọ ahwo.” (Itẹ 8:30, 31) Uyoyou Jesu o wọ riẹ siobọno ẹrria obọ odhiwu riẹ re a yẹe wọhọ ọmọfofa gheghe. Ọ rehọ odiri gbe ẹwo yeri kugbe otu omarokpotọ gbe iwhrori ọ tẹ jẹ ruẹ uye evaọ obọ ewegrẹ Jihova. Uwhremu na, o te whu kẹ ahwo-akpọ kpobi evaọ ure oja. (Jọn 3:35; 14:30, 31; 15:12, 13; Ahwo Filipai 2:5-11) Ẹvẹ onana o rọ emamọ oriruo ọrọ emamọ ọwhọ te!

18. (a) Ẹvẹ ma re ro wo uyoyou kẹ Jesu? (b) Edhere vẹ ma re ro dhesẹ nọ ma you Jesu?

¹⁸ Okenọ enọ i wo emamọ udu e tẹ se ikuigbe uzuazọ Jesu evaọ Usiuwoma na je roro kpahe unu eghale nọ uzuazọ ẹrọwọ riẹ o kẹ rai no, onana u re ru uyoyou udidi rro evaọ eva rai rọkẹe. Mai nẹnẹ ma wọhọ enọ Pita ọ jẹ t’ẹme kẹ nọ ọ ta nọ: “Nọ wha te rueriẹ e he, wha you rie.” (1 Pita 1:8) Ma re dhesẹ uyoyou mai okenọ ma te fi ẹrọwọ họ iẹe jẹ raro kele uzuazọ riẹ ọrọ omolahiẹ kẹ amọfa. (1 Ahwo Kọrint 11:1; 1 Ahwo Tẹsalonika 1:6; 1 Pita 2:21-25) Evaọ April 19, 2000, a kareghẹhọ ahwo 14,872,086 oware nọ ma je you Jesu evaọ okenọ a kpohọ Ekareghẹhọ ẹgbukpe uwhu riẹ. Ẹvẹ unu oyena o rro te! Yọ ẹvẹ o rọ ọbọga te re ma riẹ nọ ahwo buobu a wo isiuru kpahe esiwo ẹkwoma idheidhe Jesu! Evaọ uzẹme, uyoyou Jihova gbe Jesu k’omai gbe uyoyou mai kẹ ae o rẹ bọ omai ga.

19. Didi enọ kpahe uyoyou ma te t’ẹme kpahe evaọ uzoẹme n’otha na?

¹⁹ Jesu ọ ta nọ ma rẹ rọ udu, ẹwẹ, iroro, gbe ẹgba mai kpobi you Jihova. Rekọ ọ tẹ jẹ ta nọ ma re you erivẹ mai wọhọ oma mai. (Mak 12:29-31) Amono oyena u kugbe? Kọ ẹvẹ uyoyou ọrivẹ u re ro fiobọhọ k’omai kpomamu ziezi je wo emamọ iroro? Ma te t’ẹme kpahe enọ enana evaọ uzoẹme n’otha na.

Kọ Whọ Kareghẹhọ?

• Fikieme uyoyou o jẹ rọ okwakwa nọ u wuzou?

• Ẹvẹ ma sai ro wuhrẹ re ma you Jihova?

• Ẹvẹ uruemu mai u re ro dhesẹ nọ ma you Jihova?

• Ẹvẹ ma re ro dhesẹ uyoyou mai kẹ Jesu?

[Iwoho nọ e rrọ ẹwẹ-obe avọ 20, 21]

Uyoyou u re fiobọhọ k’omai rọ odiri hẹrẹ ufuoma

[Uwoho nọ o rrọ ẹwẹ-obe avọ 22]

Idhe ilogbo Jesu e rẹ wọ omai you rie