Kọ Okugbe Egagọ Ọ Kẹlino? — UWOU-EBE ITANẸTE ọrọ Uwou-Eroro

Kọ Okugbe Egagọ Ọ Kẹlino?

“Ma be rọ ẹro ruẹ ẹdẹ ologbo evaọ ikuigbe ichọche mai,” ere Christian Krause, prẹsidẹnte ọrọ Lutheran World Federation, ọ ta. Epọvo na re, Pope John Paul II ọ ta kpahe “owojẹ ẹnyaharo ologbo evaọ edhere ọkpakpakre ọrọ ewo okugbe evaọ udevie Ileleikristi.”

Oware nọ o wha ewhowhovia isiuru enana ze họ obọ nọ a whẹhọ Ẹme Ọrọwokugbe evaọ October 31, 1999, evaọ Augsburg, Germany, onọ o k’imuẹro Owhowhovia Okugbe Kpahe Ewuhrẹ Ẹrẹreokie. A roma totọ salọ oke gbe oria na ziezi. A ta nọ evaọ October 31, 1517, Martin Luther ọ tehe iwuhrẹ 95 riẹ fihọ ẹthẹ ichọche ologbo na evaọ Wittenberg, ọ tẹ rọ enẹ muọ Etoke-Enwene Protẹstant na họ. Yọ Augsburg họ oria nọ ilele Luther a jọ dhesẹ ẹrọwọ rai, Uzi Augsburg na, via evaọ 1530, onọ Ichọche Kathọlik ọ se, nọ o wha ẹwhọ nọ a rẹ sai kuhọ họ ziọ udevie ichọche Protẹstant gbe ọrọ Kathọlik na.

Kọ Owhowhovia Okugbe na o te jọ emamọ owojẹ nọ u ti ku ichọche na kugbe, wọhọ epanọ a be ta na? Ahwo jọ a wo avro. Iwuhrẹ-egagọ Protẹstant nọ i bu vi 250 a whobọhọ obe ofa jọ nọ o wọsuọ oyena, nọ o be vẹvẹ unu mukpahe Ichọche Kathọlik nọ u ti mi ai otọ no. Eva e dha ahwo Protẹstant re okenọ Ichọche Kathọlik a whowho uvẹ-onuje obọdẹ rọkẹ ukpe 2000, uruemu nọ o wha ẹwhọ na ze evaọ ikpe 500 nọ e vrẹ. Yọ nọ Uzi Augsburg na avọ avro Kathọlik, orọ Ogbẹgwae Trent, e gbẹ r’otọ na, okugbe ọ kẹle otọ họ.

Ẹhẹriẹ gbe ẹwhọ nọ e rọ Kristẹndọm e rro gaga vi oware nọ obọ nọ a whẹhọ owhowhovia okugbe jọ ọ rẹ sae ruẹrẹhọ. Ofariẹ, okugbe ẹrọwọ ọ roma hwa erọwọ nọ i no Ẹme Ọghẹnẹ ze, Ebaibol na. (Ahwo Ẹfẹsọs 4:3-6) Ukpenọ u re no omafihotọ ze, okugbe uzẹme o re no ewuhrẹ gbe eruo oware nọ Ọghẹnẹ ọ gwọlọ mi omai ze. Maeka ọruẹaro na o whowho nọ: “Ahwo na kpobi a be nya evaọ ọvuọ odẹ ẹdhọ riẹ, rekọ evaọ odẹ [Jihova, NW ] Ọghẹnẹ mai ma rẹ rọ nya bẹdẹ bẹdẹ.”—Maeka 4:5.

[Ọnọ o wo uwoho nọ o rrọ ẹwẹ-obe avọ 32]