Kọ U Fo re Whọ Kiẹ Egagọ Efa Riwi?

“ME KPOHỌ iwuhrẹ Ileleikristi te enwenọ ukpe soso no, yọ o rẹ were omẹ re mẹ ta kẹ amọfa kpahe Uvie Ọghẹnẹ,” ere Miguel ọ ta, ọnọ ọ rọ omọvo Isẹri Jihova enẹna evaọ South America. “Me te ti mu ezọ họ ẹgaviẹ kẹ eme egagọ evaọ iredio je bi rri ughe eta-usiuwoma egagọ evaọ etẹlivisiọne. Me roro nọ ighe itieye na i ti fiobọhọ k’omẹ riẹ viere kpahe ahwo egagọ efa. Me muẹrohọ nnọ iwuhrẹ rai e rọwo kugbe Ebaibol na ha, rekọ oma o jẹ kpakpa omẹ.”

Evaọ ẹkwotọ ọvona, Jorge o wo ọwhọ evaọ ewuhrẹ amọfa kpahe egagọ uzẹme. Ghele na, eva okejọ, ọye omariẹ o te mu ezọ họ ẹgaviẹ kẹ eme egagọ evaọ iredio gbe idhesẹvia etẹlivisiọne. Ọ jẹ hae ta nọ: “U re fo re whọ riẹ oware nọ amọfa a bi roro.” Nọ a tẹ nọe kpahe enwoma nọ e rẹ sai no oma ukpefihọ kẹ iwuhrẹ erue itieye na ze, o ve yo nọ: “Uvumọ oware o rẹ sae raha ẹrọwọ ohwo nọ ọ riẹ uzẹme Ebaibol na ha.” Eware nana nọ e via na e kpare onọ jọ nọ u wuzou ze, Kọ o rọ oware areghẹ re a kezọ kẹ oware nọ amọfa a rọwo?

Evuhumu Egagọ-Ileleikristi Uzẹme

Nọ ikọ na i whu no, oghẹrẹ ẹko Egagọ-Ileleikristi iwhayo nọ e romavia e tẹ rọ ẹmẹrera gbe egagọ uzẹme ku. Nọ ọ kparo ruẹ onana, Jesu o te dhesẹ edhere jọ nọ a rẹ rọ hẹriẹ Egagọ-Ileleikristi erue no Egagọ-Ileleikristi uzẹme. Orọ ọsosuọ, ọ vẹvẹ unu nọ: “Wha sẹro oma rai obọ eruẹaro erue, e nọ e rẹ gọ ẹgọ iwu igodẹ bru owhai tha rekọ eva rai erao ijihẹ.” Kẹsena o te fibae nọ: “Ibi rai wha re ro vu hu ai.” (Matiu 7:15-23) Ilele uzẹme Jesu a re koko eware nọ o wuhrẹ, yọ o rẹ lọlọhọ re a vuhu ai mu ẹkwoma ibi iwoma rai. Wọhọ epanọ Jesu omariẹ o ru, a re weze bru ahwo re a dhesẹ Uvie Ọghẹnẹ kẹ ae no Ikereakere na ze. Evaọ elele oriruo Jesu, a hẹrioma no isuẹsu akpọ na gbe ẹwhọ uyerakpọ riẹ. A jẹ Ebaibol na rehọ wọhọ Ẹme Ọghẹnẹ a tẹ jẹ be kẹe adhẹẹ wọhọ uzẹme na. A re whowho odẹ Ọghẹnẹ. Yọ nọ a be daoma re a dhesẹ uyoyou nọ Ọghẹnẹ o wuhrẹ na, a re w’obọ evaọ emo ho. Ukpoye, a re yeri kugbe ohwohwo wọhọ inievo.—Luk 4:43; 10:1-9; Jọn 13:34, 35; 17:16, 17, 26.

Wọhọ epanọ Ikereakere na e ta, o rẹ lọlọhọ re a “vuhu enọ ikiẹrẹe gbe iruimuomu, gbe ọnọ ọ be gọ Ọghẹnẹ gbe ọnọ ọ be gọ e he.” (Malakae 3:18) Egegagọ uzẹme nẹnẹ a rọ ovo evaọ iroro gbe iruo, wọhọ epanọ Ileleikristi ikpe-udhusoi ọsosuọ na a jọ. (Ahwo Ẹfẹsọs 4:4-6) Nọ who te vuhu utu uvi Ileleikristi itieye na no, fikieme oma o jẹ kpakpa owhẹ kpahe erọwọ amọfa?

Yọroma kẹ Otu Iwuhrẹ Erue

Ebaibol na ọ rọwo inọ makọ okenọ ohwo o te wuhrẹ uzẹme Ebaibol na riẹ no, enwoma ogbekuo abọ-ẹzi ọrọ iwuhrẹ erue e riẹ. Pọl ukọ na ọ vẹvẹ unu nọ: “Wha yọrọ oma re ohwo ọvo ọ siọ eriariẹ ifofe gbe ẹghẹ rai ba ẹ rọ viẹ owhai họ, enọ erọ uwuhrẹ ahwo akpọ avọ izi akpọ na, e nọ e rọ e rọ Kristi hi.” (Ahwo Kọlọsi 2:8) Ẹvẹ ikere nana i dhesẹ ẹme na vẹ te! Wọhọ arao nọ ọ be gwọlọ owhẹ wọ vrẹ nyai kpe, otu iwuhrẹ erue a sae jọ enwoma ilogbo.

Uzẹme, Pọl o muẹrohọ oware nọ amọfa a rọwo. O muọ ovuẹ riẹ jọ họ inọ: “Whai ahwo Athẹns, evaọ eware kpobi me je vuhu mu no nọ whai ahwo ogbẹrọwọ. Keme na epanọ mẹ be hẹ rọ nyavrẹ na, me te fiẹrohọ epanọ wha be hẹ rọ fiki riẹ gọ egagọ rai, mẹ tẹ ruẹ umukpẹ aruẹri avọ ekere nọ a kere họ iẹe nọ, ‘ERỌ ỌGHẸNẸ NỌ A RIẸ HẸ.’ ” (Iruẹru 17:22, 23) Rekọ orọnikọ Pọl ọ jẹ rọ eriariẹ-ifofe egbẹme Griki kuoma ẹsikpobi hi.

Re a riẹ kpahe emuhọ gbe erọwọ egagọ eruẹ o hẹrioma gaga no erọwọ na nọ a rẹ rọ kuoma.a Jihova ọ rehọ ‘ọrigbo nọ o wo ẹrọwọ avọ areghẹ na’ mu no re a kẹ iwuhrẹ nọ e rọwo kugbe Ẹme riẹ. (Matiu 4:4; 24:45) Pọl omariẹ o kere nọ: “Wha rẹ sae jọ emẹjẹ Ọnowo na avọ emẹjẹ izi igbegbe re emu hu. Kọ ma rẹ rọ ihri-eriọ ru Ọnowo na evadha?”—1 Ahwo Kọrint 10:20-22.

O sae jọ nọ otu iwuhrẹ erue jọ a jọ Ileleikristi uzẹme vẹre, rekọ a te ti kurẹriẹ no uzẹme kpohọ ẹthọthọ. (Jud 4, 11) Onana u re gb’omai unu hu. Nọ ọ t’ẹme kpahe ‘ọrigbo nọ o wo ẹrọwọ avọ areghẹ na’ nọ o dikihẹ kẹ ugboma Ileleikristi nọ a wholo na no, Jesu ọ tẹ ta kpahe “odibo omuomu,” utu nọ u gu inoma nọ, “Olori mẹ o re ti lehie,” o te muọ ibe erigbo riẹ họ ekpe. (Matiu 24:48, 49) Ẹsibuobu, ahwo nana gbe ilele rai a wo uvumọ iwuhrẹ ivevẹ obọ rai hi; isiuru rai họ re a raha ẹrọwọ amọfa. Jọn ukọ na o kere kpahe ae nọ: “Re ohwo jọ [o] te bru owhai ze, ọ gbẹ wha uwuhrẹ nana ze he, wha rehọ iẹ fihọ uwou hu hayo uyere o kẹ gbe he.”—2 Jọn 10; 2 Ahwo Kọrint 11:3, 4, 13-15.

Ahwo oruọzewọ nọ a be gwọlọ uzẹme na a rẹ romatotọ kiẹ eme nọ a bi yo mi egagọ sa-sa ze ziezi. Evaọ ẹruoke, Ọghẹnẹ ọ vẹ te ghale ahwo udu-oruọzewọ itieye nọ e be gwọlọ uzẹme na. Ebaibol na ọ ta kpahe areghẹ Ọghẹnẹ nọ: “Otẹrọnọ whọ gwọle riẹ wọhọ isiliva, jẹ gwọlọ iẹe wọhọ efe nọ a sino, kẹsena whọ vẹ te . . . ruẹ eriariẹ Ọghẹnẹ na.” (Itẹ 2:4, 5) Nọ a te duku eriariẹ Ọghẹnẹ nana no ẹkwoma Ebaibol na gbe ukoko Ileleikristi na jẹ ruẹ epanọ Jihova ọ be ghale enọ eriariẹ nana e be kpọ no, Ileleikristi uzẹme a rẹ gbẹ ruabọhọ ezọgaviẹ kẹ iwuhrẹ egagọ erue he.—2 Timoti 3:14.

[Oruvẹ-obotọ]