Iwhowho Uvie A n’Iyẹrẹ

Latvia Ọ j’Owọ Kpahe Emamọ Usi Na

EBAIBOL na o dhesẹ vevẹ inọ o rọ oreva Ọghẹnẹ re “ahwo kpobi a wo usiwo, re a ze te riẹ uzẹme na.” (1 Timoti 2:4) Ahwo nọ a gb’ogbọ eyo emamọ usi na vẹre evaọ ikpe buobu a bi yoi enẹna! Evaọ Latvia, wọhọ epanọ o rọ abọ efa akpọ na, ahwo unuikpe kpobi gbe enọ i no oghoghẹrẹ eria ze a be j’owọ kpahe ovuẹ na, wọhọ epanọ iriruo nana i dhesẹ.

• Evaọ Rēzekne, ẹwho nọ ọ rọ ofẹ ovatha-ọre Latvia, oni jọ avọ ọmọtẹ riẹ a nọ aye jọ nọ a jọ iyẹrẹ nyaku kpahe edhere. Nọ ọ kẹ ae ovuẹ nọ a gwọlọ no, aye na, ọnọ ọ rọ omọvo Isẹri Jihova, o te zizie ai re a ziọ iwuhrẹ Isẹri na.

Nọ oni na avọ ọmọtẹ riẹ a wo ẹgwọlọ kpahe egagọ na, a tẹ jiroro nọ a re kpohọ ewuhrẹ na. Evaọ edhere, a tẹ gbae mu nọ otẹrọnọ a jọ obei nyaku oware nọ u kiehọ họ, a ti kuomarẹriẹ ovavo. Rekọ, ewuhrẹ na o siuru te epanọ iroro ezihe e rọ thọrọ ae ẹro. A tẹ jẹ uwuhrẹ Ebaibol rehọ, yọ anwọ oke oyena ze a bi kpohọ iwuhrẹ ẹsikpobi. Evaọ emerae esa ọvo, a tẹ ta isiuru rai re a kuomagbe iruo usiuwoma ota na via, bi rẹro ame-ọhọ.

• Evaọ okpẹwho jọ evaọ ofẹ ukiediwo-ọre Latvia, Osẹri jọ ọ tẹ nyaku Anna, aye ikpe 85, ọnọ o dhesẹ emamọ isiuru jẹ rọwo uwuhrẹ Ebaibol. Ọmọtẹ riẹ gbe amọfa uviuwou na a tẹ wọso ẹe gaga. Rekọ Anna ọ kuvẹ hẹ re ọkparesuọ na hayo owho riẹ gbe ẹyao e whaha iẹe ẹnyaharo evaọ uwuhrẹ Ebaibol riẹ.

Ẹdẹjọ Anna ọ tẹ ta kẹ ọmọtẹ riẹ nọ ọ be te họ-ame. Ọmọtẹ Anna ọ dẹmiunu ọ tẹ ta nọ: “Whọ tẹ họ-ame, me ti si owhẹ no uwou na no kpohọ oria nọ a rẹ jọ rẹro te enọ e be mọ.” Rekọ eguegue nana ọ whaha Anna ha. Fikinọ oma riẹ o ga ha, a họ riẹ ame evaọ uwou obọ riẹ.

Didi owọ ọmọtẹ Anna ọ jẹ kpahe onana? O wo enwene udu, o te there emamọ emu kẹ oni riẹ nọ ọ họ-ame no. Ọ tẹ nọ oni riẹ nọ, “Ẹvẹ oma o rọ owhẹ enẹna nọ whọ họ-ame no na?” Uyo vẹ Anna ọ kẹ? “Wọhọ ọmọ nọ a yẹ obọ!”

• Evaọ December 1998, Isẹri ivẹ jọ e nyaku olori isoja ọrọ Soviet Union vẹre nọ ọ siọ iruo ba no. Nọ ọ rọwo Ọnọma na, ọ tẹ jẹ uwuhrẹ Ebaibol rehọ, aye riẹ o te kuomagbei uwhremu na. A ru ẹnyaharo ọvẹvẹrẹ, u kri hi a te zihe ruọ iwhowho-uvie nọ e te họ-ame he. Evaọ uvewhru nọ u lele i rie, olori isoja vẹre na ọ tẹ họ-ame. Uyoyou ulogbo imava-orọo nana kẹ eware abọ-ẹzi o rọ uduotahawọ kẹ enọ e rọ ukoko na kpobi. Fibae, a fi udu rai kpobi họ iruo ẹruẹrẹ uwou jọ nọ a ru zihero emamọ Ọgwa Uvie.