Iwhowho Uvie A n’Iyẹrẹ

India—“Okugbe Evaọ Udevie Oghoghẹrẹ”

“OKUGBE Evaọ Udevie Oghoghẹrẹ” yọ ẹme nọ ọ viodẹ nọ a re ro dhesẹ ọguakugbe orẹwho evaọ India. Ewo okugbe evaọ orẹwho urerede onana nọ o vọ avọ oghoghẹrẹ uruemu-ẹwho, ẹvẹrẹ, egagọ, uyẹ, ẹgọ, gbe emuore na o lọhọ họ. Ghele na, a rẹ ruẹ oghẹrẹ okugbe otiọye na evaọ ọfisi ẹruorote iruo ọrọ Isẹri Jihova evaọ India, dede nọ ahwo unevaze nọ a be rria jẹ jọ etẹe ruiruo na a no ibrotọ gbe ekwotọ buobu ze jẹ be jẹ evẹrẹ sa-sa.

• Joma t’ẹme kpahe Rajrani—upelẹ aye nọ o no Punjab ze, evaọ ubienẹ ẹkpẹlobọ-ukiediwo-ọre India. Okenọ Rajrani ọ jọ isukulu, Isẹri Jihova i te muọ Ebaibol họ ewuhrẹ kugbe ọmọ eklase riẹ jọ. Ọmọtẹ nana ọ tẹ gwọlọ bọ isiuru Rajrani fihọ Ebaibol na. Fikinọ ọmọ eklase riẹ na ọ riẹ Oyibo tere he yọ a wo Uwou-Eroro Na evaọ ẹvẹrẹ Punjabi evaọ oke oyena ha, ọ tẹ yare obufihọ Rajrani re ọ fa emagazini na kẹe. Oware nọ Rajrani ọ jọ Uwou-Eroro Na se ku u kpomahọ iẹe diwi te epanọ ọ rọ nyaharo te oria nọ ọ jọ rehọ uzuazọ riẹ mudhe kẹ Jihova Ọghẹnẹ ghelọ ọwọsuọ ọsẹ gbe oni riẹ. Enẹna o bi ruiruo evaọ Ebẹtẹle India, yọ o bi ru uzedhe iruo evona nọ i rovie ibiaro riẹ kẹ uzẹme na. Ọ be fa ebe Ileleikristi fihọ ẹvẹrẹ Punjabi!

• Je roro kpahe Bijoe, ọnọ o no abọfa India ze—ubrotọ Kerala nọ o rọ obọze-ukiediwo-ọre. A le Bijoe no isukulu fikiọ edikihẹ seomaba-edhehọ riẹ evaọ ehaa orẹwho. Nọ a guẹdhọ okrẹkri evaọ okọto no onọ u kuhọ avọ obokparọ kẹ egagọ efuafo, Bijoe o te zihe kpohọ isukulu.a O te je kpohọ ekọleji. Dede na, ọfariẹ-ogbe nọ ọ rọ isukulu na o je kpokpo iroro-oziẹbro riẹ, fikiere o te no isukulu evaọ etẹmo ọsosuọ. Enẹna, nọ o te ikpe ikpe no evaọ Ebẹtẹle na, ọ rọwo nnọ ẹjọ omọvo uviuwou Ebẹtẹle ọ oghoghẹrẹ ahwo rekiyọ avọ okugbe na o kẹ riẹ erere vi ewuhrẹ isukulu ikpehru nọ ọ hai le.

• Norma avọ Lily a kpako vrẹ ikpe 70 no yọ a rọ eyae-uku te ikpe buobu no. Omomọvo rai ọ raha vrẹ ikpe 40 no evaọ iruo odibọgba oke-kpobi na. Lily ọ jọ uwou-ogha na ruiruo te ikpe 20 no wọhọ ọfefafa ọ ẹvẹrẹ Tamil. Norma ọ ziọ Ebẹtẹle ikpe 13 nọ e vrẹ nọ ọzae riẹ o whu no. U te no emamọ oriruo ọrọ iruiruo osegboja gbe oruọzewọ nọ a rrọ no, a be wha okugbe fihọ uviuwou Ebẹtẹle na kpobi. O rẹ were ae re a ghọ erara, yọ o rẹ were ae re a kuomagbe emoha nọ e rọ uviuwou na, ghale oghọghọ ikpe buobu ọ ẹrria-uzuazọ Oleleikristi kugbe ae. Yọ emoha na i bi ru ẹkabọ rai ẹkwoma ezizie nọ a re zizie ai kpohọ iwou rai kẹ omakugbe je fiobọhọ kẹ ae evaọ oria nọ o jẹ gwọlọ ere. Ghinọ emamọ iriruo!

Nọ a fi ohẹriẹ nọ o rẹ wha ozighi gbe ẹwhọ ze evaọ eria buobu na kparobọ no na, ahwo unevaze nana a be rọ evawere ruiruo kugbe re a gbodibo kẹ amọfa wọhọ ahwo uviuwou Ebẹtẹle okugbe evaọ India.—Olezi 133:1.

[Oruvẹ-obotọ]

[Ọnọ o wo uwoho nọ o rrọ ẹwẹ-obe avọ 18]

Uwoho obemu: Mountain High Maps® Udu-Ekere © 1997 Digital Wisdom, Inc.