“Jihova O Ru k’Omẹ Ziezi No!”

EVAỌ emamọ owọwọ jọ evaọ March 1985, ezae gbe eyae nọ e rrọ Ẹko-Iruo Ebe-Ikere evaọ oria-uzou ọ Isẹri Jihova evaọ New York, U.S.A., a muẹrohọ oware oka jọ. Evaọ oke oyena yọ Karl F. Klein ọ raha ikpe 60 no evaọ iruo-odibọgba oke kpobi na. Avọ evawere, Brọda Klein ọ tẹ ta nọ: “Jihova o ru k’omẹ ziezi no!” Ọ ta nọ Olezi 37:4 yọ ikere Ebaibol nọ e were e riẹ gaga. Uwhremu riẹ, o te ru oma were ahwo na kpobi ẹkwoma ekporo okwakwa ile riẹ.

Evaọ ikpe 15 nọ i lele i rie, Broda Klein ọ gbẹ ruabọhọ iruo wọhọ omọvo ẹko-iruo ebe-ikere na jẹ wọhọ omọvo Ugboma Esuo Isẹri Jihova. Kẹsena, evaọ January 3, 2001, nọ ọ kpako te ikpe 95 no, Karl Klein o te ku iruo otọakpọ riẹ họ avọ ẹrọwọ.

A yẹ Karl evaọ Germany. Uviuwou riẹ o tẹ kwa kpohọ United States, Karl ọ rro whẹro evaọ iwhre jọ nọ e kẹle Chicago, Illinois. Nọ ọ gbẹ jọ ọmoha Karl avọ oniọvo ọmaha riẹ Ted a te wo isiuru kpahe Ebaibol na gaga. Karl ọ họ-ame evaọ 1918, yọ eware isiuru nọ o yo evaọ okokohọ Emọ-Uwuhrẹ Ebaibol na evaọ 1922 e bọ uyoyou etoke uzuazọ kpobi rọkẹ iruo odibọgba na fihọ iẹe oma. Ọ gwọlọ re uvumọ oka u voi hi evaọ iruo usiuwoma ota na, tube ru ere evaọ eka urere uzuazọ riẹ dede.

Karl o zihe ro omọvo iruiruo evaọ oria-uzou na evaọ 1925, ọ kaki ruiruo evaọ ofẹ nọ a re jo kporo ebe. O wo uvi isiuru gaga kẹ ile, yọ evaọ unuikpe jọ o kporo okwakwa ikporakporo jọ evaọ utu eso-ile nọ e jọ uwou iredio Ileleikristi na. Oyena o vrẹ no, ọ tẹ jọ Ẹko-Iruo ọ Iruẹru Ukoko na ruiruo, maero ọ reawere usu kugbe ọsẹro ẹko-iruo na, T. J. Sullivan. Evaọ oke oyena, Ted ọ rọo no, avọ aye riẹ, Doris, a tẹ ro iruo imishọnare evaọ Puerto Rico.

Evaọ ikpe 50, Karl Klein ọ jọ Ẹko-Iruo Ebe-Ikere na ruiruo, oria nọ o jo fiobọhọ gaga keme o wo uyoyou kpahe eruo ekiakiẹ yọ o wo eriariẹ ididi kpahe Ebaibol na. Evaọ 1963, Karl ọ tẹ rọo Margareta, imishọnare nọ ọ rrọ ohwo Germany nọ o je ruiruo evaọ Bolivia. Avọ obufihọ uyoyou aye rie, maero evaọ okenọ ọ jẹ ruẹ uye ẹbẹbẹ ẹyao, evaọ oke krẹkri o gbe je ruiruo nọ ọ make vrẹ ikpe nọ ibuobu e rẹ rọ se iruo ba no. Uruemu oruọzewọ Karl, kugbe ajọwha ikporakporo riẹ, i ru nọ a rẹ rọ kareghẹhọ eme nọ ọ ta evaọ ikoko gbe ikokohọ. U kri hi taure o te whu, ọ rẹrote ese ikere okpẹdẹ rọkẹ uviuwou ulogbo ọ Ebẹtẹle New York na, avọ omawere gbe erere rọkẹ ahwo kpobi.

Ibuobu nọ i re se Uwou-Eroro Na ẹsikpobi a te kareghẹhọ ikuigbe uzuazọ Brọda Klein, ikuigbe isiuru erọ eware nọ e via kẹe nọ a kporo fihọ ukere ọ October 1, 1984 (ọrọ Oyibo). Whọ te reawere ese hayo ọwariẹ-se ikuigbe yena, je woi họ iroro nọ ọnọ o kere i rie na ọ raha ikpe ikpegbisoi efa wọhọ Oleleikristi ẹrọwọ gbe ọrọ omarọkẹ.

Wọhọ omọvo enọ a wholo erọ Olori na, Brọda Klein o wo ẹgwọlọ nọ o no udu kpobi ze re o lele Kristi su evaọ obọ odhiwu. Ma wo ẹjiroro kpobi nọ ma rẹ rọ rọwo nnọ Jihova o ru isiuru yena gba no.—Luk 22:28-30.

[Uwoho nọ o rrọ ẹwẹ-obe avọ 31]

Karl evaọ 1943 avọ T. J. Sullivan gbe Ted avọ Doris

[Uwoho nọ o rrọ ẹwẹ-obe avọ 31]

Karl avọ Margareta, October 2000