Yọrọ Oghọghọ Ra Evaọ Egagọ Jihova
“Wha hẹ ghọghọ eva Ọnowo na kẹse kẹse, whaọ mẹ jẹ ta nọ, Ghọghọ.”—AHWO FILIPAI 4:4.
1, 2. Ẹvẹ oniọvo jọ avọ uviuwou riẹ a sae rọ yọrọ oghọghọ rai ghelọ ekufiẹ eware kpobi nọ a wo?
JAMES, Oleleikristi nọ ọ kpako te ikpe 70 no nọ ọ be rria evaọ Sierra Leone, o ruiruo gaga no evaọ uzuazọ riẹ kpobi. Dai roro oghọghọ riẹ evaọ okenọ o koko igho họ te epanọ ọ rọ dẹ uwou ibrikpẹ ene nọ o rọ kpatiẹ! Rekọ, u kri hi nọ James avọ uviuwou riẹ a kwa kpohọ iẹe no, ẹmo omoma ọ tẹ romavia evaọ orẹwho oyena, a tẹ mahe uwou rai muotọ. Uwou rai u vru, rekọ oghọghọ rai u vru hu. Eme jabọ?
2 James avọ uviuwou riẹ a tẹro rai vi, orọnikọ oware nọ a kufiẹ hẹ, rekọ oware nọ u kiọkọ. James o ru rie vẹ nọ: “Makọ evaọ etoke imuozọ na, ma je ru iwuhrẹ, se Ebaibol na, lẹ kugbe, jẹ ghale umutho eware nọ ma wo kugbe amọfa. Ma sae yọrọ oghọghọ mai fikinọ ma tẹro mai vi usu igbunu nọ ma wo kugbe Jihova.” Ẹkwoma eroro kpahe eghale rai, enọ ewo usu okpekpe kugbe Jihova o mae jọ udevie rai rro na, Ileleikristi ẹrọwọ enana a gbẹ jẹ sae “hae ghọghọ.” (2 Ahwo Kọrint 13:11, NW ) Dede na, o lọhọ họ re a thihakọ uyero uye rai. Rekọ a sobọhọ họ re a ghọghọ evaọ Jihova.
3. Ẹvẹ Ileleikristi ọsosuọ jọ a rọ yọrọ oghọghọ rai?
3 Ileleikristi ọsosuọ na a je zere edawọ nọ e wọhọ enọ James avọ uviuwou riẹ a ruẹ na. Ghele na, Pọl ukọ na o kere eme enana se Ileleikristi Hibru: “[A] raha eware rai yọ wha be ghọghọ ghele.” Kẹsena Pọl o te dhesẹ ehri oghọghọ rai: “Wha wo ẹruore efe owoma nọ ọ rẹ jọ ribri.” (Ahwo Hibru 10:34, ẹjẹlẹ ibieme na ọmai.) Ẹhẹ, Ileleikristi ikpe-udhusoi ọsosuọ eyena a wo ẹruore ọgaga. A rọ udufihọ rri kpohọ obaro kẹ ewo oware nọ a rẹ sae raha ha—“etu uvie uzuazọ” nọ ọ rẹ hiẹ hẹ evaọ Uvie obọ odhiwu Ọghẹnẹ. (Eviavia 2:10) Nẹnẹ, ẹruore Oleleikristi mai—makọ ọrọ odhiwu hayo ọrọ otọakpọ—ọ rẹ sai fiobọhọ k’omai yọrọ oghọghọ mai makọ evaọ okenọ ma tẹ rẹriẹ ovao ku okpẹtu.
“Ghọghọ eva Ẹruore” Na
4, 5. (a) Fikieme ohrẹ Pọl re a “ghọghọ eva ẹruore” na u ro kiehọ kẹ ahwo Rom na? (b) Eme ọ rẹ sae lẹliẹ iroro Oleleikristi reghe no ẹruore riẹ?
4 Pọl ukọ na ọ tuduhọ ibe enọ e rọwo evaọ Rom awọ inọ a “ghọghọ eva ẹruore” ọrọ uzuazọ ebẹdẹ bẹdẹ. (Ahwo Rom 12:12) Oyena yọ ohrẹ ẹruoke rọkẹ ahwo Rom na. Kawo vi ikpe ikpe nọ Pọl o kere se ae no, a te kie ruọ ukpokpoma ogaga, yọ a lahiẹ ejọ rai te uwhu fiki uzi nọ Ovie-Ologbo Nero o jie. Ababọ avro ẹrọwọ rai inọ Ọghẹnẹ ọ te kẹ ae etu-uvie uzuazọ nọ ọ yeyaa riẹ na o sẹro rai evaọ uye-oruẹ rai. Kọ ẹvẹ kpahe omai nẹnẹ?
5 Wọhọ Ileleikristi, ma re rẹro nọ a ti kpokpo omai re. (2 Timoti 3:12) Ofariẹ, ma vuhumu nọ ‘oke gbe eware idudhe’ i re kpomahọ omai kpobi. (Ọtausiwoma Na 9:11) Asidẹnte ọ sae rehọ uzuazọ ohwo jọ nọ ma you. Ẹyao ọgaga jọ ọ sai kpe ọse hayo oni hayo ogbẹnyusu ọkpekpe jọ. Ma gbẹ tẹrovi ẹruore Uvie mai hi, ma rẹ sae jọ ọza-enwoma abọ-ẹzi evaọ okenọ edawọ itieye na e tẹ romavia. Fikiere, u re woma re ma nọ oma mai nnọ, ‘Kọ mẹ be “ghọghọ eva ẹruore” na? Ẹvẹ mẹ be rehọ oke ro roro kpahe iẹe te? Kọ Aparadase nọ ọ be tha na o muẹro k’omẹ? Kọ mẹ be ruẹ oma mẹ evaọ etẹe? Kọ me wo ọwhọ kpahe ẹtha ekuhọ uyerakpọ nana wọhọ epanọ me wo evaọ okenọ mẹ kaki wuhrẹ uzẹme na?’ Onọ urere onana o gwọlọ eroro kpahe gaga. Fikieme? Keme nọ ma te wo omokpokpọ, be rria uzuazọ ọruẹriọ, jẹ be rria abọ otọakpọ na nọ ẹmo, ohọo, hayo okpẹtu ọraha e rẹ jọ kpokpo tere he, ma rẹ sai ku iroro ọ ẹgwọlọ ọgaga rọkẹ ẹtha akpọ ọkpokpọ Ọghẹnẹ na fie—eva obọnana.
6. (a) Okenọ Pọl avọ Saelas a jẹ ruẹ uye obẹbẹ, oware vẹ a tọ iroro rai vi? (b) Ẹvẹ oriruo Pọl avọ Saelas o sae rọ tuduhọ omai awọ nẹnẹ?
6 Pọl ọ tẹ jẹ hrẹ ahwo Rom na re a “thihakọ eva uye obẹbẹ.” (Ahwo Rom 12:12) Pọl ọ jọ ọrara kẹ uye oruẹ hẹ. Ẹdẹ jọ, ọ jọ evaọ aruọruẹ ruẹ ọzae jọ nọ o zizie i rie re ọ “nyaze obọ Masẹdonia” re o fiobọhọ kẹ ahwo nọ a rọ etẹe wuhrẹ kpahe Jihova. (Iruẹru 16:9) Fikiere, Pọl, jegbe Luk, Saelas, gbe Timoti, a tẹ ruọ edhere kpohọ obọ Europe. Eme ọ be hẹrẹ imishọnare ọwhọ eyena? Uye! Nọ a ta usiuwoma evaọ Filipai no, okpẹwho Masidonia, a tẹ fa Pọl avọ Saelas eviaviẹ je gbolo ae fihọ uwou-odi. U re vevẹ, orọnikọ ababọ-isiuru ọvo emotọ Filipai jọ a wo kẹ ovuẹ Uvie na ha—a wọso gaga. Kọ oware onana nọ o via na o lẹliẹ imishọnare ọwhọ na ku oghọghọ rai fiẹ? Ijo. Nọ a fa ae eviaviẹ je gbolo ai fihọ uwou-odi no, “nọ u te ole udevie-aso, Pọl avọ Sailas a tẹ jẹ lẹ jẹ so ile kẹ Ọghẹnẹ.” (Iruẹru 16:25, 26, ẹjẹlẹ ibieme na ọmai.) Uzẹme, edada eviaviẹ na e kẹ Pọl avọ Saelas oghọghọ họ, rekọ orọnikọ oyena họ oware nọ imishọnare ivẹ na a tẹro rai vi hi. A tẹro rai vi Jihova gbe idhere nọ ọ be rọ ghale ae. Ẹkwoma ‘akothiho eva uye obẹbẹ,’ Pọl avọ Saelas a jọ emamọ iriruo rọkẹ inievo rai nọ e jọ Filipai gbe eria efa.
7. Fikieme elẹ mai i je kugbe uyere?
7 Pọl o kere nọ: “Wha hẹ lẹ kẹse kẹse.” (Ahwo Rom 12:12) Kọ whọ rẹ lẹ evaọ okenọ whọ tẹ rọ etoke awa? Eme whọ rẹ lẹ kpahe? Ẹsejọhọ whọ rẹ fodẹ uzedhe ẹbẹbẹ ra jẹ yare Jihova kẹ obufihọ. Rekọ whọ rẹ sai ku eme uyere kugbei rọkẹ eghale nọ whọ be reawere rai. Okenọ ebẹbẹ e tẹ romavia, eroro kpahe ewoma Jihova evaọ eware ezi nọ o ru k’omai no u re fiobọhọ k’omai “ghọghọ eva ẹruore” na. Devidi, ọnọ uzuazọ riẹ o vọ avọ ukpokpoma, o kere nọ: “Iruo ibuobu ra nọ who ru, O Ọnowo ỌGHẸNẸ mẹ, iruo igbenu who ru kẹ omai; a sai dhesẹ ovo kẹ owhẹ hẹ! Re mẹ sae tae dhesẹ ai, rekọ i bu vi ekele.” (Olezi 40:5) Wọhọ Devidi, ma te bi roro kpahe eghale nọ ma wo n’obọ Jihova ze ẹsikpobi, ma re ghine wo oghọghọ.
Wo Emamọ Ẹzi
8. Eme o re fiobọhọ kẹ Oleleikristi jọ avọ evawere evaọ okenọ ọ tẹ r’otọ ukpokpoma?
8 Jesu ọ tuduhọ ilele riẹ re a wo eriwo ọliọliọ evaọ okenọ a tẹ nyaku edawọ sa-sa. Ọ ta nọ: “Eva e were owhai nọ ahwo a [tẹ] la owhai eka, a vẹ kẹ owhai uye, avẹ ta erue oghẹrẹ eware iyoma kpobi họ uzou rai fiki mẹ.” (Matiu 5:11) Didi ẹjiroro ma wo nọ ma rẹ rọ wereva evaọ otọ iyero itieye na? Ẹgba nọ ma re ro mudhe kẹ ọwọsuọ yọ imuẹro inọ ẹzi Jihova ọ rọ omai oma. Pita ukọ na ọ ta kẹ ibe Ileleikristi evaọ ẹdẹ riẹ inọ: “Otẹrọnọ a be rọ owhẹ se ọliọ fiki odẹ Kristi, who wo oghale, keme yọ ẹzi oruaro avọ orọ Ọghẹnẹ erọ owhẹ oma.” (1 Pita 4:13, 14) Ẹkwoma ẹzi riẹ, Jihova o ti je fiobọhọ k’omai thihakọ ma vẹ rọ ere yọrọ oghọghọ mai.
9. Eme o fiobọhọ kẹ inievo jọ ruẹ ẹjiroro oghọghọ evaọ okenọ a rọ jọ uwou-odi fiki ẹrọwọ rai?
9 Ma tẹ make rọ uyero nọ o mae ga kpobi, ma rẹ sae ruẹ ẹjiroro nọ ma rẹ rọ ghọghọ. Oleleikristi jọ nọ a re se Adolf ọ ruẹ nọ ere o rọ. Ọ be rria orẹwho nọ a jọ whaha iruo Isẹri Jihova evaọ ikpe buobu. A mu Adolf gbe egbẹnyusu riẹ je bruoziẹ kpe ai re a jọ uwou-odi oke krẹkri fikinọ a se nọ a rẹ vro erọwọ rai nọ i no Ebaibol ze. Uzuazọ uwou-odi o jọ gaga, rekọ wọhọ Pọl avọ Saelas, Adolf gbe egbẹnyusu riẹ a ruẹ ẹjiroro nọ a rẹ rọ kẹ Ọghẹnẹ uyere. A ta nọ, eware nọ a rọ ẹro ruẹ evaọ uwou-odi na i fiobọhọ kẹ ae bọ ẹrọwọ rai ga jẹ bọ ekwakwa eghaghae Oleleikristi wọhọ ọghoruo, ororokẹ, gbe uyoyou inievo. Wọhọ oriruo, okenọ a te vi uko se ọjọ evaọ ahwo nọ a fihọ uwou-odi na, ọ rẹ ghale eware na kugbe ibe enọ e rọwo, enọ i rri ọruẹrẹfihotọ nana wọhọ oware nọ u n’obọ Jihova ze, Ọkokẹ nọ ọ mai kpehru kpobi ọrọ ‘okẹ uwoma gbe okẹ nọ o gba kiete kpobi na.’ Uruemu ẹwo utioye na o wha oghọghọ se ọkokẹ na gbe enọ a be kẹ na. Fikiere uzedhe oware uye nọ a gwọlọ rọ raha ẹrọwọ rai na u dhugbe ru ae ga viere evaọ abọ-ẹzi!—Jemis 1:17; Iruẹru 20:35.
10, 11. Ẹvẹ oniọvo-ọmọtẹ jọ o ro yeri kugbe enọ egaga nọ a jẹ nọe gbe uye-oruẹ okrẹkri riẹ evaọ uwou-odi?
10 A mu Ella, ọnọ ọ jẹ rria orẹwho nọ a jọ whaha iruo Uvie na evaọ oke krẹkri, fikinọ ọ jẹ ghale ẹruore Oleleikristi riẹ kugbe amọfa. Eva emerae eree, a jẹ nọ ei enọ egaga. Uwhremu na nọ a gu ẹdhọ riẹ, a te brukpei nọ ọ jọ uwou-odi ikpe ikpe evaọ oria nọ uvumọ ohwo nọ ọ be gọ Jihova ọ rọ họ. Ella ọ jọ ikpe 24 ọvo evaọ oke oyena.
11 Uzẹme, Ella o rẹro nọ ọ te raha etoke uzoge riẹ buobu evaọ ubrukpẹ uwou-odi hi. Rekọ nọ orọnọ ọ sai nwene uyero riẹ hẹ na, ọ tẹ jiroro re o nwene eriwo riẹ. Fikiere, o te muọ uwou-odi na họ erri wọhọ ẹkwotọ isẹri-ise omobọ riẹ. Ọ ta nọ: “Iruo usiuwoma ota buobu nọ a re ru e riẹ, oyena o tẹ lẹliẹ ikpe na dhẹ vẹrẹ vẹre.” Nọ ikpe isoi e vrẹ no, a tẹ wariẹ nọ Ella enọ. Nọ a vuhumu nọ uwou-odi na o te raha ẹrọwọ riẹ hẹ, ahwo nọ a be nọe enọ na a tẹ ta kẹ iẹe nọ: “Ma sai siobọno owhẹ hẹ; who ri nwene he.” Ella ọ tẹ kuyo whawha nọ: “Rekọ me nwene no! Uruemu mẹ u woma vi okenọ a rọ kaki mu omẹ fihọ uwou-odi no, yọ ẹrọwọ mẹ ọ ga vi oke ọsosuọ no!” O te fibae nọ: “Otẹrọnọ wha gwọlọ siobọno omẹ hẹ, mẹ te jọ etẹnẹ bẹsenọ Jihova ọ rẹ ruẹ nọ u fo re o siwi omẹ.” Ekarọ ikpe isoi gbe ubro e sai mi Ella oghọghọ riẹ hẹ! O wuhrẹ epanọ o re ro wo edẹro evaọ uyero kpobi nọ o kie ro. Kọ whọ sai wuhrẹ oware jọ no oriruo riẹ ze?—Ahwo Hibru 13:5.
12. Eme ọ rẹ sae wha udhedhẹ iroro se Oleleikristi nọ ọ rọ uyero obẹbẹ?
12 Who ku ei họ họ inọ Ella o wo okẹ aghẹruẹ jọ nọ o lẹliẹ e riẹ sae rẹriẹ ovao ku use-abọ utioye na. Nọ ọ jẹ ta kpahe etoke nọ a jẹ rọ nọe enọ evaọ emerae jọ taure a te ti brukpei na, Ella ọ rọwo nọ: “Unu mẹ u je nuhu kpakpakpa, yọ mẹ wọhọ arata nọ ozọ u bi mu.” Ghele na, Ella o wo ẹrọwọ ọgaga fihọ Jihova. O wuhrẹ no re o fievahọ iẹe. (Itẹ 3:5-7) Fikiere, Ọghẹnẹ o te mu ei ẹro vi epaọ ọsosuọ. O ru rie vẹ nọ: “Oke kpobi nọ mẹ tẹ ruọ uwou nọ a jẹ jọ nọ omẹ enọ na, o rẹ wọhọ nọ udhedhẹ o ruọ omẹ oma . . . Epanọ uyero na o ga te, ere udhedhẹ na u re kodo te.” Jihova họ ehri udhedhẹ oyena. Pọl ukọ na o ru rie vẹ nọ: “Wha ruawa oware ovo ho; rekọ eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ. Re udhedhẹ Ọghẹnẹ nọ uvi eriariẹ kpobi, ote yọrọ eva gbe iroro rai eva Kristi Jesu.”—Ahwo Filipai 4:6, 7.
13. Eme ọ k’omai imuẹro inọ otẹrọnọ ma nyaku ẹbẹbẹ, ma ti wo ogaga nọ ma re ro thihakọ?
13 Ella, ọnọ a siobọno anwẹdẹ na, ọ yọrọ oghọghọ riẹ dede nọ ọ jọ otọ ẹbẹbẹ. O ru onana, orọnikọ evaọ ẹgba obọ riẹ hẹ, rekọ evaọ ẹgba nọ Jihova ọ kẹ riẹ. Ere o via kẹ Pọl uko na re, ọnọ o kere nọ: “Fikiere mẹ rẹ dhigbẹ yoma okuako mẹ viere, re ogaga Kristi o jọ omẹ oma. . . . Keme nọ omẹ rẹ kuako, kpakiyọ ẹsiẹe mẹ gae.”—2 Ahwo Kọrint 12:9, 10.
14. Dhesẹ epanọ Oleleikristi ọ sai ro wo eriwo ọliọliọ ọrọ uyero edawọ gbe oware nọ o rẹ sai noi ze.
14 Itunyẹ nọ whọ rẹriẹ ovao ku nẹnẹ e sai wo ohẹriẹ no enọ ma ta kpahe no na. Ghele na, oghẹrẹ nọ e rọ kpobi, o rọ bẹbẹ re a yeri kugbe otunyẹ. Wọhọ oriruo, ọga iruo ra ọ sae rọ ẹro ọgaga ro riwi iruo ra—vi epanọ o bi rri iruo ibe-iruiruo nọ e rọ egagọ efa. Ẹsejọhọ o lọhọ họ re whọ gwọlọ iruo efa. Ẹvẹ whọ sae rọ yọrọ oghọghọ ra? Kareghẹhọ Adolf gbe egbẹnyusu riẹ, enọ eware nọ a ruẹ evaọ uwou-odi i wuhrẹ re a bọ ekwakwa nọ e r’oja. Whọ tẹ daoma gaga re who ru eva were ọga iruo ra—makọ ọnọ ‘udu riẹ o rọ gaga’—whọ te bọ ekwakwa Oleleikristi wọhọ akothiho gbe uye-oruẹ-krẹkri. (1 Pita 2:18) Ofariẹ, whọ sai zihe ruọ oruiruo nọ ọ ghare viere, onọ o rẹ sai fiba uvẹ ra re whọ ruẹ iruo nọ i woma viere ẹdẹjọ. Obọnana joma t’ẹme kpahe idhere efa nọ ma sae rọ yọrọ oghọghọ mai evaọ egagọ Jihova.
Erulọhọ U re Su Kpohọ Oghọghọ
15-17. Eme imava-orọo jọ a wuhrẹ nọ o rẹ sai ru idhọvẹ lọhọ, o tẹ make rọnọ o rẹ sai si ehri riẹ no riẹriẹriẹ hẹ?
15 Ẹsejọhọ umutho ẹsalọ ọvo who wo kpahe oghẹrẹ iruo nọ who re ru hayo kpahe oria nọ who re jo ruiruo, rekọ abọ efa uzuazọ ra jọ e sae jariẹ nọ whọ rẹ sae kpọ. Roro kpahe oware nana nọ o via na.
16 Imava-orọo Ileleikristi jọ a zizie ọkpako jọ ziọ uwou rai kẹ emuọriọ. Evaọ owọwọ oyena, oniọvo na avọ aye riẹ a tẹ ta kẹe nnọ kẹle na itunyẹ uzuazọ e be kẹ ae idhọvẹ. Dede nọ aimava a bi ru iruo nọ e rẹ rehọ oke-kpobi, a sae gwọlọ iruo efa ha. A riẹ epanọ a sai ti thihakọ lehie te he.
17 Okenọ a yare ohrẹ, ọkpako na ọ tẹ kuyo nọ, “Wha ru uzuazọ rai lọhọ.” Evaọ oghẹrẹ vẹ? Ọzae na avọ aye riẹ a be raha euwa esa ro kpohọ iruo je zihe ze kẹdẹ kẹdẹ. Ọkpako na, ọnọ ọ riẹ imava-orọo na ziezi, ọ tẹ jiroro nọ a roro kpahe ẹkwa kẹle oria iruo rai, re a sai bru oke nọ a re ro kpohọ iruo je zihe ze kẹdẹ kẹdẹ kpotọ. A rẹ sae rehọ oke nọ u ti kiọkọ na rọ rẹrote eware efa nọ i wuzou—hayo a rẹ sae rehọ iẹe ro serihọ. Otẹrọnọ otunyẹ uzuazọ ọ be hai mi owhẹ abọ jọ oghọghọ, fikieme whọ gbẹ kiẹ uyero ra riwi hi sọ whọ sai wo ufuoma ẹkwoma eruo inwene jọ?
18. Fikieme u je wuzou re a roro ziezi re a tẹ te jiroro?
18 Edhere ọfa nọ a sai ro ru otunyẹ lọhọ họ eroro ziezi taure whọ tẹ te jiroro. Wọhọ oriruo, Oleleikristi jọ ọ jiroro nọ ọ rẹ bọ uwou. Dede nọ ọ re bọ uwou ẹdọvo ho, ọ tẹ salọ omaa nọ u bu ona gaga. O te ti vuhumu nọ ọ hae sae whaha ebẹbẹ jọ o hae jọnọ o ‘roro kpahe owojẹ riẹ’ taure ọ tẹ te salọ omaa uwou riẹ. (Itẹ 14:15) Oleleikristi ọfa jọ ọ rọwo nọ o re dikihẹ esalobọ kẹ ibe ọnọ ọ rọwo. Wọhọ epanọ a rọwokugbe, otẹrọnọ ọnọ o momo igho na ọ gbẹ sae hwa igho na ha, ọnọ o dikihẹ esalobọ na ọ rẹ hwa igho na. Evaọ ọsosuọ, ẹbẹbẹ ọ jariẹ hẹ, rekọ evaọ omoke jọ ọnọ o momo igho na ọ gbẹ jẹ nyate ọtamuo na ha. Eva e tẹ dha omomigho na ọ tẹ ta nọ ọnọ o dikihẹ esalobọ na ọ hwa igho na kpobi. Oyena u te fi otunyẹ ologbo họ oma ọnọ o dikihẹ esalobọ na. Kọ ọ gbẹ hae whaha oyena o hae jọnọ o roro kpahe eware nọ o gwọlọ kpobi ziezi taure ọ tẹ te rọwo nọ o re dikihẹ esalobọ na?—Itẹ 17:18.
19. Idhere jọ vẹ ma sai ro ru idhọvẹ lọhọ evaọ izuazọ mai?
19 Okenọ oma o tẹ rọ omai no, joma roro vievie he inọ ma rẹ sai ru otunyẹ mai lọhọ jẹ wariẹ wo oghọghọ mai ẹkwoma ebru kpotọ oke uwuhrẹ Ebaibol omobọ mai, usiuwoma ota, gbe iwuhrẹ enya. Whaọ, enana yọ idhere nọ e r’oja nọ ma re ro wo ẹzi ọfuafo Jihova, oware nọ o rẹ wha oghọghọ ze. (Ahwo Galesha 5:22) Iruẹru Ileleikristi e rẹ sasa-oma ẹsikpobi orọnikọ e rẹ rọ-oma ha. (Matiu 11:28-30) O wọhọ nọ iruẹru okọ hayo erọ arozaha eye i bi kuobọgbe omalọhọ mai, orọnikọ iruẹru abọ-ẹzi hi. Ẹkaki kiẹzẹ nọ ma re wuhrẹ o rẹ sai fiobọhọ k’omai jọ sasasa. Umutho eriosehọ ọfa ọ sae kẹ erere gaga. N. H. Knorr, ọnọ ọ ruiruo wọhọ omọvo Ugboma Esuo Isẹri Jihova rite oke uwhu riẹ, ọ jẹ hae ta kẹ imishọnare nọ: “Okenọ who te wo ewhrehe, oware ọsosuọ nọ who re ru họ eriosehọ. U ti gbe owhẹ unu epanọ ebẹbẹ buobu e rẹ lọhọ te nọ whọ tẹ wezẹ ziezi evaọ aso!”
20. (a) Dhesẹ kpẹkpẹre idhere jọ nọ ma sae rọ yọrọ oghọghọ mai. (b) Didi ẹjiroro whọ rẹ sai roro kpahe nọ a rẹ rọ ghọghọ? (Rri ẹkpẹti nọ o rọ ẹwẹ-obe avọ 17 na.)
20 Ileleikristi a wo uvẹ-ọghọ nọ a be rọ gọ “Ọghẹnẹ evawere na.” (1 Timoti 1:11, NW ) Wọhọ epanọ ma ruẹ no na, ma rẹ sae yọrọ oghọghọ mai makọ ma tẹ rẹriẹ aro ku ebẹbẹ egaga. Joma fi ẹruore Uvie mai họ obaro mai, ru enwene evaọ eriwo mai evaọ okenọ u te fo, je ru uzuazọ mai lọhọ. Kẹsena, makọ oghẹrẹ uyero nọ ma kie ro kpobi, ma rẹ j’owọ kpahe eme Pọl uko na inọ: “Wha hẹ ghọghọ eva Ọnowo na kẹse kẹse, whaọ mẹ jẹ ta nọ, Ghọghọ”!—Ahwo Filipai 4:4.
Roro Kpahe Enọ Enana Ziezi:
• Fikieme Ileleikristi a jẹ tẹrovi ẹruore Uvie na ziezi?
• Eme ọ rẹ sai fiobọhọ k’omai yọrọ oghọghọ mai evaọ uyero ẹbẹbẹ?
• Fikieme ma jẹ daoma ru izuazọ mai lọhọ?
• Evaọ abọ vẹ ejọ e jọ ru izuazọ rai lọhọ no?
[Ẹkpẹti/Iwoho nọ e rrọ ẹwẹ-obe avọ 29]
Ẹjiroro Efa nọ Ma rẹ Rọ Ghọghọ
Wọhọ Ileleikristi, ma wo ẹjiroro buobu nọ ma rẹ rọ ghọghọ. Roro kpahe enana:
1. Ma riẹ Jihova.
2. Ma wuhrẹ uzẹme Ẹme Ọghẹnẹ no.
3. A rẹ sae rehọ izieraha mai rọ vrẹ omai ẹkwoma ẹrọwọ nọ ma fihọ idhe Jesu.
4. Uvie Ọghẹnẹ u bi su—akpọ ọkpokpọ na ọ te tha kẹle!
5. Jihova ọ rehọ omai ziọ aparadase abọ-ẹzi no.
6. Ma be reawere usu oruọruọ Ileleikristi.
7. Ma wo uvẹ-ọghọ abọ-owo evaọ iruo usiuwoma ota na.
8. Ma rọ uzuazọ, yọ ma wo umuo ogaga jọ.
Bro ẹjiroro efa rọkẹ oghọghọ whọ rẹ sae fodẹ?
[Uwoho nọ o rrọ ẹwẹ-obe avọ 25]
Pọl avọ Saelas a jẹ ghọghọ makọ evaọ uwou-odi
[Iwoho nọ e rrọ ẹwẹ-obe avọ 27]
Kọ ẹro ra ọ tọvi irẹro oghọghọ akpọ ọkpokpọ Ọghẹnẹ na?