Ma Jọ Edaka Vẹre—Enẹna Ma Rrọ Igodẹ!

Okenọ mẹ avọ Sakina ma jọ emetẹ eboba, ma jẹ rria kẹloma. Sakina ọ jọ ruaro jẹ jọ krigbẹ, rekọ mẹ jọ kakao jẹ jọ dọdọ. Ma jẹ hae whọ ẹsibuobu, rekọ ẹdẹjọ ma tẹ họre gaga. No ẹdẹ ọyena vrẹ, ma gbẹ jẹ t’ẹme kẹ ohwohwo hayo yere ohwohwo ho. Uwhremu na, ma tẹ kwa kpohọ ọvuọ obo riẹ, ma gbẹ riẹ oria nọ ohwohwo ọ jọ họ.

Evaọ 1994, me te mu uwuhrẹ Ebaibol họ kugbe Isẹri Jihova, yọ ẹmẹrera uruemu mẹ u te nwene. Ikpe ene nọ i lele i rie nọ me kpohọ ẹdẹ okokohọ obọdẹ mai evaọ Bujumbura, Burundi, akpọ o te gb’omẹ unu nọ mẹ nyaku Sakina. Eva e were omẹ nnọ ọ jọ etẹe, rekọ ma yere ohwohwo sasasa ha. Uwhremu na evaọ ẹdẹ ọyena, u gb’omẹ unu gaga nọ mẹ rue riẹ evaọ usu ahwo nọ a be te họ-ame na! Ọye omariẹ o nwene gaga no re. Ọ gbẹ rọ ohwo ẹwhọ nọ mẹ jẹ hai lele whọ kẹse kẹse na ha. Ẹvẹ u gbunu te nọ mẹ rue riẹ nọ ọ be kẹ imuẹro ẹgbede ọrọ omaromudhe riẹ kẹ Ọghẹnẹ ẹkwoma ame-ọhọ!

Okenọ ọ nya no ame na ze no, mẹ tẹ dhẹ kpatakpata nyae gbae jẹ lẹlẹ ta kẹe nọ: “Whọ kareghẹhọ epanọ ma họre te?” Ọ tẹ ta nọ: “E, mẹ kareghẹhọ, rekọ oke oyena o vrẹ no. Me zihe ruọ ohwo ọkpokpọ no enẹna.”

Eva e were omai inọ ma ruẹ uzẹme Ebaibol na nọ u ku omai gbe je nwene uruemu mai nọ o wọhọ orọ adaka kpohọ orọ igodẹ nọ Othuru-Igodẹ Ologbo na, Jihova Ọghẹnẹ, o wo. Ẹhẹ, uzẹme Ebaibol na u re ghine nwene izuazọ.