Iwhowho Uvie A n’Iyẹrẹ

Ufuoma no Okpomahọ Idhivẹri

URUEMU imizi o kpọ izuazọ ima ahwo buobu kri no. Rekọ o lọhọ re a wo ufuoma! Oyehọ oware nọ o via kẹ ahwo buobu evaọ okpẹwho anwae Ẹfẹsọs. Wọhọ epanọ Ebaibol na ọ ta, “enọ e rehọ ebe nọ a je ro ru iruo-ewhariọ zikuku a jẹ kakaọ ho; a tẹ jọ iraro ahwo kpobi mahe ae . . . Fikiere ẹme Ọnowo na ọ tẹ ro whawha avọ obọ okparọ.”—Iruẹru 19:19, 20.

Ẹvi ọ rọ ukoko Ileleikristi inẹnẹ re. Wọhọ epanọ o jọ evaọ Ẹfẹsọs, usu ahwo nọ e be ziọ ukoko na họ ahwo nọ a je ru iruemu idhivẹri vẹre. Oware onana nọ o jọ obọ Zimbabwe via na u dhesẹ onana.

A riẹ Gogo (Oni-Ologbo) Mthupha gaga kẹ ogaga imizi riẹ. Ahwo a re no ugbobọ Zambia, Botswana, gbe South Africa ze re ọ rehọ imu ibiebi riẹ siwi ai. Gogo Mthupha o te je wuhrẹ amọfa epanọ a rẹ rọ jọ n’anga, hayo ọbo-ẹva. Yọ ẹsejọ ọ rẹ s’ahwo esagba!

Ohiohiẹ Ẹdoka jọ Isẹri Jihova nọ e jẹ ta usiuwoma n’uwou ruọ uwou a te weze bru Gogo Mthupha ze. Ẹme nọ a gbẹ ta kpahe eyaa Ebaibol ọrọ akpọ ọkpokpọ ẹrẹreokie, kpahe akpọ nọ o wo ufuoma no ikpomahọ emuemu kpobi, o were riẹ oma gaga. O te mi obe na Whọ Sae Ria Bẹdẹ Bẹdẹ eva Aparadase ọ Otọakpọ ọ tẹ jẹ rọwo nnọ a wuhrẹ Ebaibol kugbei.a Nọ o wuhrẹ isiasa ọvo no, o te muọ iwuhrẹ họ ẹnya.

No ewuhrẹ Ebaibol riẹ ze, Gogo Mthupha o te wuhrẹ nnọ ogaga obọdẹ riẹ u no obọ emama izi imuomu ze enọ e wọso esuo Jihova. (2 Pita 2:4; Jud 6) O te je wuhrẹ nnọ o rọ ọtamuo idhivẹri na re a ru ohwo nọ obọ rai u te kpobi wọso Jihova jẹ wọso egagọ efuafo. Nọ okọ riẹ o rọ onọ ọ rẹ jọ lẹ se imizi imuomu na, kọ eme o re ti ru?

Gogo Mthupha o te dhesẹ isiuru na nnọ ọ rẹ raha ekwakwa ebo gbe erọ imizi riẹ kpobi no. Onana u kugbe obọdẹ etu riẹ gbe “izei eruẹ nọ ọ rẹ rọ t’ẹme kugbe idhivẹri” enọ o re fihọ iruo evaọ usiwo n’anga riẹ. Gogo Mthupha ọ gwọlọ raha eware itieye kpobi no re ọ sae gọ Ọghẹnẹ uzẹme ọvo nọ ọ rọ uzuazọ na, Jihova.

Rekọ imoni riẹ jọ a tẹ se keme ọ be ruẹ ugho ro fiobọhọ kẹ ai. A tẹ lẹe re o kpeze ekwakwa ẹbo na se ai, kugbe ogaga eda riẹ re a rehọ iẹe w’erere haro. Gogo Mthupha ọ tẹ se.

Avọ obufihọ ukoko Isẹri Jihova, ọ tẹ kwa ekpa ilogbo esa erọ ekwakwa ẹbo koko ọ tẹ mahe ai kpobi no. Nọ errae na e da ruọ ekwakwa egagọ idhivẹri riẹ oma no, Gogo Mthupha o te bo nnọ: “Rri! Izei eruẹ na, ọ be sai siwi oma riẹ hẹ.”

U kri hi, Gogo Mthupha ọ tẹ rọ oghọghọ rọ ame-ọhọ dhesẹ omaromudhe riẹ kẹ Jihova. Kọ eme họ okọ riẹ enẹna? Ọ be zẹ ẹbe. Ẹhẹ, ẹkwoma ogaga Ẹme Ọghẹnẹ, ohwo ọ rẹ sai wo ufuoma no egagọ idhivẹri. Enẹ Gogo Mthupha ọ ta: “Oma u ri vẹ omẹ enẹ ẹdọvo ho.”

[Oruvẹ-obotọ]